Mataio 8–9; Mareko 2–5

Atonu e maua e tagata o lau vasega ni malamalamaaga mamana i a latou suesuega faaletagata lava ia o nei mataupu (tagai i le lisi o faamalologa i le otootoga o le vaiaso lenei i le Sau, Mulimuli Mai ia te Au---Mo Tagata Taitoatasi ma Aiga). Mafaufau e valaaulia tagata o le vasega e faasoa mai o latou malamalamaaga i se paga pe i le vasega atoa.

Ina ia fesoasoani ia malamalama tagata o le vasega i le sootaga o le faatuatua ma vavega, e mafai ona e faitaua Mataio 8–9 ma le Mareko 2; 5, ma vaavaai mo le faatuatua o le tagata o le sa faamaloloina po o le faatuatua o isi. (Afai e leai se taimi e talanoaina ai uma ia vavega, fai i tagata o le vasega pe o fea e sili ona ‘anoa ia i latou.) O nisi o nei mau e mafai ona faalautele ai la outou talanoaga. Mamona 9:15–21; Eteru 12:12–16; Moronae 7:27–37; ma le Mataupu Faavae ma Feagaiga 35:8. O le a se mea o aoao mai e faamalologa a le Faaola ma nei mau e uiga i le faatuatua ma vavega? Tagai foi i le Bible Dictionary, “Vavega.”

Atonu e i ai ni tagata i lau vasega e faatuatua ma o loo sailia se vavega, ae e lei tupu se vavega i le ala sa latou mananao ai. O le a le mea o aoao mai e tusitusiga paia ma o tatou taitai o le Ekalesia e uiga i lenei mea? I se tusiga na faaulutala “Taliaina o le Finagalo ma le Taimi o le Alii,” Elder David A. Bednar na faamatalaina lona fautuaina o se ulugalii i lenei tulaga, (Liahona, Aok. 2016, 31–35; tagai foi 2 Korinito 12:7–10; MFF 42:43–52). Pe ua vaai tagata o le vasega i faamanuiaga e oo mai i o latou olaga po o olaga o isi ina ua tutupu vavega sa mananao i ai?

Pe a faitau e uiga i vavega i le Mataio 8–9 ma le Mareko 2; 5, atonu e taumanatunatu nisi tagata pe o mafai na mea i aso nei. Sa faamatala e Moronae o tatou aso o se taimi “o le a faapea ai e le toe i ai ni vavega,” ae sa ia folafola mai foi o le Atua o le Atua lava o vavega, aua o le Atua o “se Tagata e le liliu lava” (Mamona 8:26; 9:18–21; tagai foi Moronae 7:27–29). E mafai faapefea ona e fesoasoani i tagata o lau vasega e faateleina lo latou faatuatua i le mana o le Atua e faamanuiaina ai o latou olaga? E mafai ona e fai i ai e faasoa mai ni faataitaiga o vavega sa latou molimauina. E mafai foi ona e fuafua e faasoa atu tala o vavega mai le talafaasolopito o le Ekalesia (tagai “Punaoa Faaopoopo”).

Atonu ua e silafia ni nai luitau o loo feagai ma tagata o lau vasega. Talu ai e tofu uma i tatou ma ni tofotofoga i ni taimi i o tatou olaga, o le toeiloiloina o le tala i le Mareko 4:35--41 e mafai ona fausia ai le faatuatua o le vasega e mafai e le Faaola ona aumaia ia i latou le filemu. Tuu atu ia tofu le tagata ma se fasipepa, ma fai i ai e tusi i le isi itu se tofotofoga sa latou feagai. I le isi itu, fai i ai e tusi ai se mea mai le Mareko 4:35--41 lea e musuia ai i laotu e liliu atu ile Faaola i le taimi o o latou tofotofoga. Fautuaina le vasega e faasoa mai mea sa latou tusia, pe afai latou te maua lagona lelei e fai ai.

O le viiga “Matai e, Ua Sou le Vasa,” Viiga, nu. 58, o loo faavae i le tala o i le Mataio 8:23–27 ma le Mareko 4:35–41. Atonu e maua e tagata o le vasega ni upu o le viiga e fesootai ma fasifuaitau i mau. E mafai foi ona faaali atu se ata o loo faaalia ai le vaaiga (tagai Tusi Ata o le Talalelei, nu. 40) ma talanoaina pe o le fea taimi lea e faaalia mai e le tusiata. O a nisi auala e mafai ona e fesoasoani ai i tagata o le vasega ia malamalama i le uiga ma le manao o lenei vavega?

O le tala o lenei vavega o loo aoao mai ai le taua o le galulue faatasi i le lotogatasi e fesoasoani i le Faaola i le laveaiina o i latou e manaomia faaleagaga ma le faaletino. O le savali a Elder Chi Hong (Sam) Wong “Laveai i le Lotogatasi” (Ensign po o le Liahona, Nov. 2014, 14–16) e mafai ona faaopoopo i le talanoaga o lenei upumoni. Mafaufau e valaaulia se tagata o le vasega e sau sauniuni e toe iloilo le tala mai mau ona faasoa atu lea o mea na aoao mai e Elder Wong. O le a se mea e mafai ona tatou aoao mai le Mareko 2:1--12 e uiga i le taua o le galulue faatasi e laveai i latou e manaomia? (tagai foi Mareko 3:24–25).