Mataio 21–23; Mareko 11; Luka 19–20; Ioane 12

Atonu e lagona e tagata o le vasega le le amanaiaina po o le faagaloina i nisi taimi i o latou olaga. E mafai ona fesoasoani le tala ia Sakaio latou te malamalama ai e silafia i latou e le Tama Faalelagi ma Iesu Keriso ma e popole mo i latou. Ina ia fesoasoani i tagata o le vasega e faatatau lenei tala i o latou olaga, valaaulia i latou e manatu o i latou lava o Sakaio. O le a sou manatu i le mea sa ia aoaoina e uiga i le Faaola mai lona aafiaga? O le a se mea e mafai ona tatou aoao mai taumafaiga a Sakaio i le sailia o le Faaola?

E ono fesoasoani foi le fai i tagata o le vasega e mafaufau i isi taimi i mau na valaau ai e le Alii ia tagata i o latou igoa. (O nisi o faataitaiga o loo maua atu i le “Punaoa Faaopoopo”) E mafai foi ona e valaaulia tagata o le vasega e faasoa mai ni aafiaga ua faamautu atu ai ia i latou e silafia lelei e le Alii i latou taitoatasi.

E mafai e se gaoioiga faigofie ona folasia atu se talanoaga e uiga i le malaga faatupu atu o le Faaola i Ierusalema: E toatele tagata o le vasega e mafai ona tusia i le laupapa ni mea e fesootai ma se tupu, e pei o se palealii po o se nofoalii, a o mateina e isi mea o loo latou tusia. Ona tusi lea e isi tagata se tamai asini ma ni lala laau. O a faia a nei mea i se tupu? Ona mafai lea ona e faaali atu se ata o le malaga faatupu a le Faaola i Ierusalema mai le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma valaaulia le vasega e faitau le Mareko 11:1–11. Na faapefea ona faailoa e nei tagata ia Iesu o lo latou Tupu? E faapefea ona tatou tapuai ia Iesu Keriso o lo tatou Tupu i a tatou upu ma taga fai?

Ina ia fesoasoani i tagata o le vasega ia malamalama o Iesu Keriso o lo tatou Tupu, e mafai ona e fai atu ia i latou e toeiloilo le viiga “Le Tupu o tupu, Afio Mai,” Viiga, nu. 25, O a upu mai le viiga e faamanatu mai ai ia i tatou upumoni o i le Mataio 21:1–11; Mareko 11:1–11; Luka 19:29–44; ma le Ioane 12:12–16?

Na aoao mai Peresitene Dieter F. Uchtdorf e faapea o le faia o mea e ese mai i poloaiga sili e lua ma totonugalemu o o tatou olaga, ua pei o le fanaina atu o se ‘au i se puipui e leai se mea o i ai ona tusi lea o ni taulaiga e faataamilo i ‘au (tagai “Taulai Atu i le Ogatotonu,” Ensign po o le Liahona, Jan. 2017, 4–5). Pe fesoasoani le sailiilia o lenei talafaatusa i le vasega e malamalama ai ile Mataio 22:34--40? O se tasi ala e faia ai lenei mea o le fofola o se pepa paepae lautele i luga o le fola ona tuu lea i le vasega e feauaua’i e faapa’u se peni po o se penitala i luga. Ona mafai lea ona latou tusia ni taulaiga i mea na tau ai a latou peni po o penitala ma faaigoa taulaiga taitasi i se poloaiga. A uma ona faitau faatasi le Mataio 22:34--40 e mafai ona e tusia se taulaiga fou e li’o ai isi taulaigauma ma faaigoa i le “Alofa i le Atua ma Alofa i Lou Tuaoi.” E faapefea e le taulai atu i poloaiga sili e lua ona fesoasoani tatou te usitai ai i isi poloaiga a le Atua? E mafai faapefea ona tatou faamautinoa ua tatou taulai atu i lo tatou usitai i nei poloaiga e lua?

Mata e faamanuiaina tagata o le vasega mai le talanoaina o le faaupuga “taiala tauaso,” lea sa faaaoga e le Faaola e faamatala ai le tauaso faaleagaga o le au Faresaio ma le au tusiupu? (Mataio 23:16). E mafai ona e mafaufau i se auala e faapupula ai pe faape’i i se tagata ona mulimuli i se tagata e le mafai ona pupula. Pe mafai foi e le vasega ona lisi ile laupapa ia uiga o se taiala tauaso, e pei ona faamatala mai i le Mataio 23:13–33. Ina ia faaopoopo i le lisi, mafaufau e vaavaai i mau faaopoopo o loo aoao mai ai le tauaso faaleagaga, e pei ole 2 Korinito 4:3–4; 2 Nifae 9:28–32; ma le Iakopo 4:14. E mafai ona tatou iloa ma aloese mai taiala tauaso?

Atonu e te manao e fesoasoani i tagata ole vasega ia malamalama o le au tusiupu ma le au Faresaio na sili ona taulai atu i auro ma meaalofa i le malumalu nai lo le uigamoni o le malumalu (tagai Mataio 23:16--22). Ina ia faia lena mea, mafaufau e faasoa le faataoto i le penina ma le pusa sa saunoa i ai Peresitene Boyd K. Packer i le “Punaoa Faaopoopo.” O a ni mea e ono tata’i ese ai i tatou mai le olioli i faamanuiaga moni o le malumalu? po o le sauniga faamanatuga?

O nisi tagata o e talitonu ia Iesu Keriso atonu e le mananao e tutu atu mo Lana talalelei, aemaise lava i potopotoga e le amanaiaina pe tauemu i talitonuga faalelotu. O a lesona o i ai i le Ioane 12:42--43 mo i tatou i aso nei? E mafai ona e valaaulia le vasega e sailiili i mau nei ma faailoa mai tagata o e mananao e faamalie tagata ma tagata o e mananao e faamalie le Atua: Esoto 32:1–8; 1 Samuelu 15:18–25; Mataio 14:1–10; 1 Nifae 6:1–6; Mosaea 17:1–12; ma le Moronae 8:16. O le a se mea ua tatou aoao mai i nei faataitaiga? Mo nisi faamatalaga e uiga i lo tatou tiutetauave e faaali atu ai lo tatou faatuatua i nofoaga faitele, tagai Elder Robert D. Hales, “Faasaoina o le Faitalia, Puipuia o le Saolotoga o Tapuaiga,” Ensign po o le Liahona, Me 2015, 111–13.