Galuega 22–28

• O le molimau a Paulo ia Feso ma le Tupu o Akeripa e mafai ona avea o se avanoa e talanoa ai le uiga o le tuuina atu o le molimau. Atonu e te amataina i le fai atu i tagata o le vasega e toe faamanatu le Galuega 22:1–21 ma le 26:1–29. O le a se mea ua tatou aoao mai i le faataitaiga a Paulo e uiga i le tuuina atu o le molimau? O a ni mataupu faavae faaopoopo e uiga i le tuuina atu o le molimau, ua tatou aoaoina mai le saunoaga a Elder M. Russell Ballard i le “Punaoa Faaopoopo”? O le usuina po o le tataina o le viiga “Molimau” (Viiga, nu. 74) atonu o le a fesoasoani e aumai ai le Agaga i le tou talanoaga.

• Atonu na maua e tagata o le vasega ni malamalamaaga patino a o latou suesue i le molimau a Paulo ia Feso ma le Tupu o Akeripa. Valaaulia i latou e faasoa mai. O a ni lapataiga e mafai ona tatou maua mo aso nei i le tali atu a le Tupu o Akeripa i le molimau a Paulo? (tagai Galuega 26:28). E mafai foi e tagata o le vasega ona mafaufau i isi molimau mai tusitusiga paia sa musuiaina ai i latou. (O nisi o faataitaiga e aofia ai le Iopu 19:25–27; 2 Nifae 33:10–15; Alema 5:45–48; ma le MFF 76:22–24.) Pe atonu e mafai ona latou faasoa mai ni aafiaga i se taimi sa uunaia ai i latou e le molimau a se tasi.

• Sa faatusaina e le Perofeta o Iosefa Samita ona aafiaga i le molimau atu e uiga i le Uluai Faaaliga i le aafiaga a Paulo i luma o le Tupu o Akeripa (tagai Iosefa Samita—Talafaasolopito 1:24–25). Atonu e mafai ona galulue tagata o le vasega i paga e fatufatuai ai se lisi o mea e tutusa i le va o nei auauna e toalua a le Atua. E faapefea ona fesoasoani lenei gaoioiga ina ia tatou malamalama i auala e faasoa atu ai a tatou molimau e tusa lava pe faigata le faia o lea mea?

• E ui lava sa lei sailia e Paulo le molimau faaleagaga sa ia mauaina i le auala i Tamaseko, ae sa ia faaaluina le taimi na totoe o lona olaga e galue ai i le faatumauina ma le puipuia o lana molimau (tagai Galuega 22:10, 14–16; 26:19). O le faataitaiga a Paulo e mafai ona fesoasoani i lau vasega ia malamalama o se molimau e manaomia ai le galue ma le ositaulaga. Ina ia amata se talanoaga e uiga i lenei mea, atonu e mafai e se tagata o le vasega ona faamatala mai ana taumafaiga ia avea ma se tagata musika, tusiata, po o se tagata taalo talenia. E faapefea ona tutusa le atinaeina o se tomai faapena ma le mauaina ma le faamalosia o se molimau? O a ni taumafaiga e tatau ona tatou faia ia maua ma faamalosia ai se molimau? (tagai foi Alema 5:46).

• Sa valaauina e le Alii ia Paulo e fai ma “se auauna” (Galuega 26:16), ae o le a le uiga o lenei upu? Ina ia fesoasoani i tagata o lau vasega e suesue pe faapefea ona latou auauna atu i isi, e mafai ona e tusia i luga le laupapa se fesili e pei O le a le uiga o le auauna atu? Valaaulia tagata o le vasega e vaavaai mo tali i punaoa nei: Mataio 20:25–28; Galuega 26:16–18; 3 Nifae 18:29–32; Guide to the Scriptures, “Minister,” scriptures.lds.org. A o latou faasoa mai mea na latou maua, fautuaina i latou e talanoaina auala e mafai e i tatou uma ona auauna atu ai i isi, e aofia ai i o tatou valaauga i le Ekalesia.

• Sa saunoa Brother David L. Beck e uiga i tiutetauave o i latou e umia le perisitua ia auauna atu i isi, ma o le tele o ona malamalamaaga manino e mafai ona faatatau ia i latou uma o loo galulue i le Ekalesia (tagai “O Lou Tiute Paia e Auauna Atu,” Ensign po o le Liahona, Me 2013, 55–57). Mo se faataitaiga, o le a se mea ua tatou aoao mai i le tala ia Chy Johnson e uiga i le auauna atu i isi? O le vitio “The Miracle of the Roof” (LDS.org) o se faataitaiga lelei foi o le auauna atu. O a nisi faataitaiga e mafai ona faasoa mai e tagata o le vasega? Tuu atu i tagata o le vasega se taimi e mafaufau ai i se tagata o le e mafai ona latou auauna atu i ai i lenei vaiaso ma pe o le a faapefea ona latou faia lea mea.

• Atonu na i ai ni aafiaga o tagata o lau vasega i se taimi sa latou mulimuli ai i le taitaiga a perofeta e tusa lava pe sa ese mai fautuaga a tagata atamamai o le lalolagi po o manatu o tagata e siomia i latou. Valaaulia ni nai tagata o le vasega e omai saunia i le vasega e faasoa mai ni aafiaga faapena. Ona valaaulia lea o tagata o le vasega e faasoa mai pe na faapefea ona tali atu tagata sa i luga o le vaa ina ua valoia e Paulo, o le vaa o le a “tele le leaga ma maumau” (Galuega 27:10). E faapefea ona talitutusa tali a nisi o tagata i fautuaga faaperofeta i o tatou aso?

• O a ni mea tatou te aoao mai i le Galuega 27 e uiga i le mulimuli i perofeta a le Alii? O le upusii mai ia Elder Ronald A. Rasband i le “Punaoa Faaopoopo” o loo i ai tali e mafaufau loloto i ai ma se lisi o mea matautia ua lapataia i tatou e perofeta o aso nei e faasaga i ai. Na faapefea ona faamanuiaina i tatou e ala i le mulimuli i fautuaga a perofeta soifua?

Sa saunoa Elder M. Russell Ballard e faatatau i le molimau a Paulo i luma o le Tupu o Akeripa ma ia aoao mai lona uiga mo i tatou o le tuuina atu o le molimau:

“Ua tatau ona saga taulai atu a tatou sauniga molimau i le Faaola, o aoaoga faavae o le talalelei, o faamanuiaga o le Toefuataiga, ma aoaoga a tusitusiga paia. Ua tatau ona sui a tatou tala faaleaiga, o faamatalaga o ni malaga, ma lauga i molimau mama atoatoa. O i latou ua tofia e lauga ma faiaoga i a tatou sauniga po o fonotaga, e tatau ona latou faia i le mana o aoaoga faavae ia e le gata o le a faalogoina ae ia lagonaina foi, siitia ai agaga o tagata ma faamalamalamaina ai. …

“… E ui lava ina lelei i taimi uma le faaali atu o le alofa ma le faafetai, ae o na uiga e le o i ai le ituaiga molimau e faamumuina se afi o le talitonu i olaga o isi. O le tuuina atu o se molimau, o le ‘molimau atu lea e ala i le mana o le Agaga Paia; ia tuuina atu se tautinoga paia o le upumoni e faavae i le malamalama po o le talitonuga patino’ [Guide to the Scriptures, “Testify,” scriptures.lds.org]. O le tautinoga manino o le upumoni, e maua ai se eseesega i olaga o tagata. O le mea lena e suia ai le loto. O le mea lena e mafai e le Agaga Paia ona faamaonia i loto o fanau a le Atua” (“Molimau Mama Atoatoa,” Ensign po o le Liahona, Nov. 2004, 41).

Na aoao mai Elder Ronald  A. Rasband:

“[O tatou taitai], e ala mai i musumusuga faalelagi, ua valaauina e aoao mai ma taitai i tatou ma … o loo valaau mai ia i tatou ia faaeteete i mea lamatia o loo tatou feagai ai i aso taitasi—mai le faasamasamanoa i le tausiga o le aso Sapati, e oo i lamatiaga i le aiga, i sauaga i le saolotoga o tapuaiga, ma e oo lava i le finauina o faaaliga o aso e gata ai. Uso e ma tuafafine, o tatou faalogo atu ea i ā latou fautuaga? …

“A tatou fetaomi atu i luma, ma filifili e mulimuli i fautuaga ma lapataiga a o tatou taitai, ua tatou filifili e mulimuli i le Alii a’o agai atu le lalolagi i le isi itu. Ua tatou filifili e pipiimau i le āi uamea, ia avea ma Au Paia o Aso e Gata Ai, ia iai i le feau a le Alii, ma ia faatumulia ‘i le olioli tele’ [1 Nifae 8:12].

“O le fesili faatupulaia o nei aso ua manino: o outou tutu faatasi ea ma taitai o le Ekalesia i se lalolagi pogisa ina ia mafai ona e faasusulu atua le Malamalama o Keriso?” (“Tutu Faatasi ma Taitai o le Ekalesia,” Ensign po o le Liahona, Me 2016, 47–48).