2 Kolinitō 1–7

• Mahalo ʻoku ʻi ai ha taha ʻi hoʻo kalasí ʻokú ne foua ha palopalema faingataʻa. ʻOku tokoni e ngaahi aʻusia naʻe fakamatalaʻi ʻe Paulá mo e faleʻi naʻá ne fakahoko ʻi he 2 Kolinitoó ki he kau mēmipa ʻo e kalasí ke nau fakakaukau ki he ngaahi tāpuaki ʻe lava ke maʻu mei honau ngaahi faingataʻaʻiá. Ke kamataʻi ha fealēleaʻakí, te ke lava ʻo kole ki ha mēmipa ʻo e kalasí ke nau mateuteu mai ke lea fekauʻaki mo ha founga naʻe tāpuekina ai ʻe ha faingataʻa ʻene moʻuí pe ko ha meʻa naʻá ne ako mei ha taha kehe naʻá ne kātekina ha faingataʻa. Peá ke toki ʻoange leva ki he kau mēmipa ʻo e kalasí ke nau toe vakaiʻi ʻa e 2 Kolinitō 1:3–7; 4:6–10, 17–18; mo e 7:4–7, ʻo kumi pe ko e hā e meʻa naʻe akoʻi ʻe Paula fekauʻaki mo e ngaahi taumuʻa mo e tāpuaki ʻo e ngaahi faingataʻá. (Ki ha sīpinga ʻo ʻene ngaahi akonakí, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Kole ki he kau mēmipa ʻo e kalasí ke nau vahevahe e meʻa ne nau maʻú. ʻE lava ke ke fokotuʻu ange ke nau lau leʻolahi ʻa e veesi ne nau maʻu ai ha akonaki pau pea vahevahe leva ha aʻusia pe ko ha fakamoʻoni ʻoku felāveʻi mo e akonaki ko iá.

• Fakakaukau ke ke tuku ange ha taimi ki he kau mēmipa ʻo e kalasí ke nau fakalaulauloto ki he founga ʻe lava ke tāpuekina ai ʻe he ngaahi faingataʻá ʻetau moʻuí, kau ai mo e akonaki ʻa Paula ʻi he 2 Kolinitō 1:3–7; 4:6–10, 17–18; mo e 7:4–7. ʻE lava ke nau tohi ʻi he taimi ko ʻení e founga ʻe lava ke felāveʻi ai e ngaahi akonaki ʻa Paulá mo e ngaahi faingataʻa ʻoku nau fehangahangai mo ia ʻi heʻenau moʻuí.

• Ke tānaki atu ki hoʻomou fealēleaʻakí, fakakaukau ke hivaʻi fakataha ʻe he kau mēmipa ʻo e kalasí ʻa ʻenau ngaahi himi manako ʻa ia ʻoku fakamoʻoni ki he fiemālie mo e ngaahi tāpuaki ʻoku foaki mai ʻe he Tamai Hēvaní mo e Fakamoʻuí ʻi he taimi ʻo e faingataʻá—hangē ko e “ʻE Kāinga Kuo Langa Ha Tuʻunga” (Ngaahi Himi, fika 37). Hili hoʻomou hiva fakatahá, ʻe lava ke ke fakaafeʻi e kau mēmipa ʻo e kalasí ke nau kumi ha kupuʻi lea ʻi he 2 Kolinitō 1 mo e 4 ʻoku nau ongoʻi ʻoku feʻunga mo e pōpoaki ʻo e himí.

• Kuo tau aʻusia kotoa ha taimi naʻe “fakatupu mamahi” mai ai ha taha kiate kitautolu pe ki he fāmilí (veesi 5). ʻE lava ke vakai e kau mēmipa ʻo e kalasí ki he 2 Kolinitō 2:5–11, ʻo kumi e faleʻi ʻa Paula fekauʻaki mo e founga ke tau fakafeangai ai ki ha taha naʻá ne fakamamahiʻi kitautolu. Fakakaukau ke fakaafeʻi e kau mēmipa ʻo e kalasí ke nau toe vakaiʻi e Luke 15:11–32; Sione 8:1–11; pea mo e lea ʻa ʻEletā Kevin  R. Duncan (vakai, “Ngaahi Maʻuʻanga Tokoni Kehé”) ke ʻilo lahi ange fekauʻaki mo e founga ʻoku totonu ke tau fakafeangai ai kiate kinautolu kuo nau faiangahalá. ʻOku tau uesia fēfē nai kitautolu mo e niʻihi kehé ʻi he taimi ʻoku ʻikai ke tau fie fakamolemoleʻi aí?

• ʻOku omi ha kakai tokolahi ki he lotú mo ha loto holi ke ongoʻi ofi ange ki he ʻOtuá, pea ʻe lava ke tokoni kiate kinautolu hano aleaʻi ʻo e 2 Kolinitō 5:14–21. Ke kamata e kalasí, ʻe lava ke kumi ʻe he kau mēmipa ʻo e kalasí ʻa e ʻuhinga ʻo e foʻi lea fakaleleí, mahalo te nau kamata kumi e foʻi leá ʻi he tikisinalé. Ko e hā ha ʻilo ʻoku ʻomi ʻe he meʻá ni fekauʻaki mo e fakalelei ki he ʻOtuá? Ko e hā ha ngaahi ʻilo kehe ʻoku tau maʻu mei he fakamatala ʻi he Fakahinohino ki he Ngaahi Folofolá fekauʻaki mo e “Fakalelei”? ʻOku tokoni fēfē e ngaahi ʻilo ko ʻení ke mahino kiate kitautolu ʻa e 2 Kolinitō 5:14–21? ʻE lava ke ke fakaafeʻi e kau mēmipa ʻo e kalasí ke nau vahevahe e ngaahi ongo ʻoku nau maʻu fekauʻaki mo e Fakamoʻuí, ʻa ē ʻoku hanga ʻe Heʻene Fakaleleí ʻo fakaʻatā ke tau toe fakataha mo e ʻOtuá.

• ʻOku ʻomi ʻe he 2 Kolinitō 7:8–11 ha fakamatala ʻaonga fekauʻaki mo e mamahi faka-ʻOtuá, mo hono fatongia ʻi he fakatomalá. Ko e hā ʻoku tau ako fekauʻaki mo e mamahi faka-ʻOtuá mei he 2 Kolinitō 7:8–11 mo e ngaahi lea ʻa Palesiteni Dieter  F. Uchtdorf ʻi he “Ngaahi Maʻuʻanga Tokoni Kehé”? Ko e hā ʻoku mahuʻinga ai ʻa e mamahi faka-ʻOtuá ki he fakatomalá?

• Mahalo te ke ongoʻi mālohi ke poupouʻi ha fealēleaʻaki ʻoku toe loloto ange fekauʻaki mo e fakatomalá. Kapau ko ia, ʻe lava ke ke fai ʻeni, Hiki ʻi he palakipoé Ko e fakatomalá ko e . Kole ki he kau mēmipa ʻo e kalasí ke nau kumi ha ngaahi founga ke fakakakato ai e kupuʻi lea ko ʻení, ʻo fakaʻaongaʻi e ngaahi meʻa ʻoku nau ako mei he 2 Kolinitō 7:8–11, pea pehē mo e ngaahi folofolá mo e ngaahi tokoni ʻoku maʻu ʻi he “Ngaahi Maʻuʻanga Tokoni Kehé.” Te nau fakaʻaongaʻi fēfē nai e ngaahi akonaki ko ʻení ke tokoni ki ha taha ke mahino kiate ia e founga ke fakatomala fakamātoato aí?

Naʻe akonaki ʻa ʻEletā Kevin  R. Duncan: “Ko e kī ki hono fakamolemoleʻi e niʻihi kehé ko e vakai kiate kinautolu ʻo hangē ko e ʻafio hifo ʻa e ʻOtuá kiate kinautolú. Ko e taimi ʻe niʻihi ʻe tāpuakiʻi kitautolu ʻe he ʻOtuá ʻaki ha meʻafoaki ke tau vakai ki he loto mo e laumālie ʻo ha taha kehe kuó ne fakaʻitaʻi kitautolu. ʻE lava ke iku e fakakaukau ko ʻení ki ha ʻofa lahi ki he taha ko iá” (“Ko e Faitoʻo Faifakamoʻui ʻo e Fakamolemolé,” Ensign pe Liahona, Mē 2016, 34).

Naʻe fakamatala ʻa Palesiteni Dieter  F. Uchtdorf ʻo pehē:

“ʻOku ueʻi fakalaumālie ʻe he mamahi faka-ʻOtuá ʻa e liliú mo e ʻamanaki leleí tuʻunga ʻi he Fakalelei ʻa Sīsū Kalaisí. ‘Oku fusi hifo kitautolu ʻe he mamahi fakamāmanípea toʻo atu e ‘amanaki leleí, pea fakalotoʻi kitautolu ke tau fakavaivai ki he ngaahi ‘ahiʻahi lahi.

“‘Oku fakatupu ‘e he mamahi ‘faka-‘Otuá ‘a e uluí mo ha liliu ‘o e lotó. ‘Okú ne ngaohi kitautolu ke tau fehiʻa ‘i he angahalá kae ‘ofa ‘i he meʻa ‘oku leleí. ʻOkú ne poupouʻi kitautolu ke tau tuʻu hake pea ʻaʻeva ʻi he maama ʻo e ʻofa ʻa Kalaisí. Ko e fakatomala moʻoní ko hano liliu ka ʻoku ʻikai ko hano fakamamahiʻi” (“Te Ke Lava ʻo Fai ia He Taimí Ni!” Ensign pe Liahona, Nōvema 2013, 56).

• ʻIsikeli 18:30–31

• Mōsaia 3:19; 5:2

• ʻAlamā 5:11–21; 42:29–30

• 3 Nīfai 9:13–14, 20–22

• Tokāteline mo e Ngaahi Fuakava 58:42–43

• Fakahinohino ki he Ngaahi Folofolá, “Fakatomala”

• “Repentance,” Gospel Topics, topics.lds.org

• Dale  G. Renlund, “Fakatomala: Ko ha Fili Fakafiefia,” Ensign pe Liahona, Nōvema 2016, 121–24

Naʻe akonaki ʻa ʻEletā Neil L. Andersen ʻo pehē:

“ʻOku tau tafoki mei he ʻOtuá he taimi ʻoku tau faiangahala aí. ʻI he taimi ʻoku tau fakatomala aí, ʻoku tau tafoki ai ki he ʻOtuá.

“ʻOku tātātaha ke hoko e fakaafe ke fakatomalá, ko ha leʻo ʻo e tautea, ka ko ha tautapa ia ʻi he angaʻofa ke tafoki pea ʻfoki’ ki he ʻOtuá [vakai, Hilamani 7:17]. Ko e taʻalo mai ia ʻa ha Tamai angaʻofa mo Hono ʻAlo Tofu Pē Tahá ke tau toe lelei ange ʻi he tuʻunga ʻoku tau ʻi aí, ke tau aʻu ki ha tuʻunga moʻui māʻolunga ange, ke tau liliu pea ongoʻi ʻa e fiefia he tauhi e ngaahi fekaú. ʻI heʻetau hoko ko e kau muimui ʻo Kalaisí, ʻoku tau fiefia ʻi he tāpuaki ʻo e fakatomalá pea mo e fiefia ʻo hono fakamolemoleʻí. ʻOku nau hoko ko e konga ʻetau moʻuí, pea ʻokú ne takiekina ʻa e anga ʻo ʻetau fakakaukaú mo e ongo ʻoku tau maʻú. …

“Ki ha tokolahi, ʻoku hangē ʻa e fakatomalá ko ha hala fononga kae ʻikai ko ha meʻa ʻoku hoko tuʻo taha pē. ʻOku ʻikai ke faingofua. ʻOku faingataʻa ʻa e liliú. ʻOku fie maʻu ki ai ʻa e feinga mālohi mo taʻetūkuá. Naʻe folofola ʻa Sīsū, ‘Kapau ʻe muimui ha taha ʻiate au, tuku ke ne liʻaki ʻe ia ia, pea toʻo hake ʻene ʻakau mafasiá ʻo muimui ʻiate au [Mātiu 16:24]. Ko e fakatomalá ko e tafoki mei he ngaahi meʻa, hangē ko e taʻe-faitotonú, hīkisiá, loto lilī mo e ngaahi fakakaukau ʻulí, pea hanga atu ki ha meʻa kehe hangē ko e manavaʻofá, taʻe-siokitá, faʻa-kātakí, mo e anga fakalaumālié. Ko e ʻtoe tafoki ia ki he ʻOtuá” (Fakatomala … Koeʻuhí Ke u Fakamoʻui ʻa Kimoutolu,” Ensign pe Liahona, Nōvema 2009, 40–41.