2 Korinito 8–13

• Ua poloaiina e le Atua Lana Au Paia ia fesoasoani e tausi i latou o e le tagolima, ma o fasifuaitau i le 2 Korinito 8–9 e mafai ona musuia ai tagata o lau vasega i a latou taumafaiga. Ina ia fesoasoani ia latou maua nei fasifuaitau, e mafai ona e tusia i luga o le laupapa ni fesili e pei o le Aisea tatou te foai atu ai? ma le E faapefea ona tatou foai atu? E mafai ona sue e le afa o le vasega ia tali i le 2 Korinito 8:1–15, ae sue e le isi afa i le 2 Korinito 9:6–15. (Atonu e te faamatala atu, i le mataupu 8, fuaiupu 1–5, o loo tautala ai Paulo e uiga i le Au Paia i Maketonia o ni faataitaiga o le foai atu ma le matamau. E mafai faapefea e mataupu faavae sa aoao mai e Paulo ona fesoasoani ia i tatou ia lelei atili ai lo tatou tausia o e matitiva ma e le tagolima?

• Ina ia fesoasoani i tagata o le vasega ia malamalama lelei atu i le auala a le Alii e taulima ai manaoga faaletino a Lana Au Paia, e tele punaoa o loo lisiina i le “Punaoa Faaopoopo.” Atonu e mafai ona e tofia ni nai tagata o le vasega e toe faamanatu se tasi pe sili atu o nei punaoa ma faasoa mai se mea e faagaeetiaina ai i latou. Pe e mafai e tagata o le vasega ona maua ni manatu i le 2 Korinito 8:1–15; 9:6–15 o loo faaalia ai, sa tausia e le Au Paia i aso o Paulo ia tagata matitiva i auala lava ia o loo tatou faia ai i aso nei?

• Talu ai o i tatou, e pei foi o le Au Paia i Korinito, e aafia uma i aoaoga sese, e mafai ona aoga ia i tatou le toe faamanatuina o lapataiga a Paulo i Korinito e uiga i “aposetolo pepelo.” Atonu e maua e tagata o le vasega ni faataitaiga o aoaoga pepelo o loo faapea ona faatosinaina ai i tatou i aso nei i le savali a Elder Quentin L. Cook “Totoa i le Molimau ia Iesu” (Ensign po o le Liahona, Nov. 2016, 40–43). Atonu foi e mafai ona e muai tofia se tasi e faitau i lenei savali ma faasoa mai i le vasega mea o loo aoao mai ai e uiga i auala e mafai ona tatou aloese ai mai “maa tu’ia” e faapea ona taitaieseina i tatou mai le talalelei. O a nisi aoaoga ua taatele i le lalolagi i aso nei e mafai ona taitaiesea i tatou mai upumoni o le talalelei? Atonu e te fai atu i tagata o le vasega e toe faamanatu le 2 Korinito 11:21–33 ma faasoa mai ni mea ua latou aoaoina mai nei fuaiupu e uiga i “auauna [moni] a Keriso.”

• O nisi taimi e lagona ai e tagata o le Ekalesia le lofituina i manaoga o le olaga—e aofia ai mea latou te ono vaaia o manaoga o le avea ma se Au Paia o Aso e Gata Ai. O le fautuaga a Paulo e “tofotofo ia outou ia te outou, po ua outou i le faatuatua” e mafai ona fesoasoani ia te oe ma tagata o lau vasega ia taulai atu “i le [faigofie o loo] ia Keriso” (2 Korinito 13:5; 11:3). Atonu foi e mafai ona outou faitau faatasi i le 2 Korinito 11:3 ma faitau po o le a le uiga o le fasifuaitau “[faigofie o loo] ia Keriso”. E mafai foi ona e fai atu i tagata o le vasega e vaaifaalemafaufau e faapea, ua valaaulia i latou e tusi mo se nusipepa, se faamatalaga o le talalelei a Iesu Keriso, e faatapulaa i le 100 upu. Tuu atu ia i latou le taimi e tusi ai a latou faamatalaga, ma tuu atu ia i latou e fefaasoaai i le tasi ma le isi mea na latou tusia. Afai latou te manaomia se fesoasoani, e mafai ona latou tagai i le Ioane 3:16–17; 3 NIfae 27:13–21; ma le Faamaoni i le Faatuatua, 76. Valaaulia tagata o le vasega e mafaufau loloto pe o latou tumau faamaoni i mataupu faavae autu o le talalelei.

• Ina ia fesoasoani i tagata o le vasega e “iloilo [tofotofo]” pe faapefea ona latou faafaigofieina o latou olaga ina ia avea ai ma ni soo lelei atu, atonu e te faasoa atu ia i latou le saunoaga a Peresitene Dieter F. Uchtdorf o loo i “Punaoa Faaopoopo.” E mafai e tagata o le vasega ona talanoa i auala e mafai ona latou faaaogaina ai le valaaulia a Peresitene Uchtdorf e “Taulai atu i aoaoga faavae autu, mataupu faavae, ma faaaogaaga o le talalelei.” O a nisi manatu o loo i ai a tagata o le vasega e uiga i auala e mafai ona tatou iloiloina ai i tatou lava ia mautinoa tatou te tumau faamaoni i le faatuatuaga?

• O le a sau tala e fai atu i se uo sa tatalo mo le toomaga mai se gasegase faaletino peitai ua ia lagona e lei taliina mai lenei tatalo? Mafaufau e valaaulia tagata o le vasega e mafaufau loloto i lenei fesili ao latou faitau le leoa i le 2 Korinito 12:5–10. Ona latou faasoa mai lea o ni malamalamaaga loloto mai nei fuaiupu atonu e fesoasoani ai i lenei tulaga. E mafai foi ona latou faasoa mai ni aafiaga i se taimi, sa latou maua ai le malosi i vaivaiga, e ala i le alofa tunoa o Iesu Keriso. O a auala na faia ai e lena aafaiga se faatosinaga i o latou olaga?

• Mosaea 4:16–27; Alema 34:27–29; Mataupu Faavae ma Feagaiga 104:14–18.

• Tusitaulima 2: Taitaiina o le Ekalesia (2010), 6.1.

• “Sefuluai ma Taulaga,” Mo le Malosi o le Autalavou (2011), 38–39.

• Viiga: “Ona ua Maua Tele,” “Faaola e ia Ou Alofa,” “Ua Ou Faia Ea se Lelei?” (Viiga, nu. 124,150 136).

• Vitio i le LDS.org: “Welfare Facilities––Bishops’ Storehouse,” “The Labor of His Hands,” “Thanks Be to God,” and “Fast Offerings: Are We All Not Beggars.”

• Autu o le Talalelei, “Uelefea,” topics.lds.org.

Na aoao mai Peresitene Dieter F. Uchtdorf:

“Uso e ma tuafafine, o le ola i le talalelei e le manaomia ona faafaigata.

“E tuusao moni lava. E mafai ona faamatalaina faapenei:

• “O le faalogo i le afioga a le Atua ma le faamoemoega naunautai e taitai atu ai i tatou e talitonu i le Atua ma faatuatuaina Ana folafolaga.

• “O le faatele o lo tatou faatuatuaina o le Atua, o le faatele foi lea o le faatumulia o o tatou loto i le alofa mo Ia ma mo le tasi ma le isi.

• “Ona o lo tatou alofa mo le Atua, ua tatou mananao ai e mulimuli ia te Ia ma tatou faaogatusaina ai a tatou amioga ma Lana afioga.

• “Ona tatou te alolofa i le Atua, ua tatou mananao ai e auauna atu ia te Ia; tatou te mananao ia faamanuia olaga o isi ma fesoasoani atu i e matitiva ma lē tagolima.

• “O le faatele ona tatou savavali i lenei ala o le avea ma soo, o le faatele foi lena o lo tatou mananao ia aoao i le afioga a le Atua.

“Ma faapena ai lava, i laasaga taitasi e taitai atu i le isi laasaga ma faatumulia ai i tatou i le faatuatua, faamoemoe ma le alofa mama ua faateleina naua.

“E matagofie le faigofie, ma e maeu le aoga.

“Uso e ma tuafafine, afai o loo e manatu e le o matua aoga tele le talalelei ia te oe, ou te valaaulia oe ia taofi teisi lava, toe tagai i lou olaga mai se mea maualuga, ma faafaigofie lou auala i le avea ai ma soo. Taulai atu i aoaoga faavae autu, mataupu faavae, ma faaaogaaga o le talalelei. Ou te folafola atu o le a taiala ma faamanuia outou e le Atua i o outou ala e faamalieina ai le olaga, ma o le a mautinoa lava le aoga atili o le talalelei mo outou.” (“E Aoga!,” Ensign po o le Liahona, Nov. 2015, 22).