Kalatia

• E faigofie atu le suesueina o soo se tusi o tusitusiga paia pe a tatou iloa le pogai sa tusia ai. Ona o le mafuaaga lenei, atonu e lelei ai le amata o lau talanoaga e uiga i le Kalatia i se fesili e pei o le “O le a sou manatu, o le a le faamoemoega o Paulo na tusia ai lenei tusi?” po o le “O le a le faafitauli sa taumafai Paulo e fofo?” Valaaulia ia tagata o le vasega e vaavaai mo ni faamatalaga taufaaataata i le Kalatia 1:6–7; 3:1–5; 4:8–21. E faapefea ona faatatau le savali a Paulo ia i tatou i nei aso?

• Sa manatu nisi o le Au Paia i Kalatia e tatau ona faaauau pea ona latou ola i le tulafono a Mose. Ia Paulo, o lenei mea sa pei o le ola ma se “amo o le pologa” e faatusa atu i le saolotoga lea ua ofoina mai i le tulafono a Keriso (Kalatia 5:1). E ui e le masani ona tatou feagai ma lenei faafitauli i aso nei, ae tatou te feagai uma lava ma se filifiliga talitutusa i le va o le pologa faaleagaga ma le saolotoga e ala mai ia Iesu Keriso. Ina ia fesoasoani i tagata o lau vasega e suesue aoaoga a Paulo e uiga i le saoloto ma le pologa, e mafai ona e fai atu ia i latou e tau mai ni uiga faaalia ma ni amioga e ono taitai atu ai i le pologa faaleagaga (e pei o tu ma aga faaleaganuu, mausa le lelei, talitonuga sese, po o le taulai atu i faatinoga i fafo nai lo o le liua o le loto [totonu]). E tusa ai ma le Kalatia 5:1, 13–14, e faapefea ona tatou maua le saolotoga mai le pologa faaleagaga? O faapefea ona maua e tagata o le vasega le saolotoga lea ua folafola mai i le talalelei a Keriso? E mafai foi ona e valaaulia tagata o le vasega e faasoa mai pe faapefea ona latou tali atu i se tasi ua manatu o le ola i le talalelei e faatapulaa ai le saolotoga o le tagata lava ia.

• E tauivi le toatele o tagata ia iloa le faatosinaga a le Agaga. Kalatia 5 e mafai ona fesoasoani i tagata o lau vasega ia iloa le fua o le Agaga. Atonu e mafai ona e amata i le fai atu ia i latou e saili i le Kalatia 5:22–25 e maua ai upu sa faaaoga e Paulo e faamatala ai le fua o le Agaga. Aisea ua avea ai se fua o se faatusa lelei o le auala e faatosina ai i tatou e le Agaga? Atonu e mafai e tagata o le vasega ona faasoa mai pe na faapefea ona mautinoa le i ai o lenei fua i o latou olaga po o olaga o tagata latou te iloa. O isi punaoa e suesue i ai e aofia ai le Mataio 7:16–18; Ioane 14:26–27; Moronae 7:13–17; Mataupu Faavae ma Feagaiga 11:12–13; ma saunoaga mai ia Peresitene Gordon B. Hinckley o loo i “Punaoa Faaopoopo.”

  Ata

  apu i luga o le laau

• O nisi taimi e mafai ona tatou aoao ai e uiga i se mataupu faavae e ala i le aoao e uiga i lona faafeagai. Mo se faataitaiga, i le Kalatia 5:16–26, sa faatusatusa ai e Paulo “galuega a le tino” i “le fua o le Agaga.” Ina ia fesoasoani i tagata o le vasega ia mafaufau loloto po o le a le tulaga o le latou “savavali i la le Agaga,” atonu e te fautua atu i ai e faitau le Kalatia 5:16–26 ona fai lea o se iloiloga a le tagata lava ia e talitutusa i le Gaoioiga i Uiga Auaumama o loo i le itulau 126 o le Talai La’u Talalelei Mo se faataitaiga, mo aitema taitasi o loo lisiina i fuaiupu 19–23, e mafai ona latou tusia ai se fesili e pei o le “Pe ou te mataua i lau tupulaga?” po o le “Pe ou te lagonaina le alofa i aso uma?” E le tatau ona faasoaina tali a tagata o le vasega i a latou iloiloga patino, ae e mafai ona e valaaulia i latou e faasoa mai ni manatu po o ni mafaufauga e fesoasoani ai i le tasi ma le isi ia “savavali i la le Agaga.” Afai e leai se taimi e faauma ai le gaoioiga lenei i le vasega, e mafai ona e fautua atu e faauma i le fale.

• O le suesueina o le Kalatia 6:7–10 e mafai ona fesoasoani i tagata o le vasega e mafaufau loloto atili ai i taunuuga umi o a latou filifiliga. Ina ia fesoasoani ia i latou, e mafai ona e aumai ni fatu o ni ituaiga eseese, faatasi ma laau iti, fualaau aina mata, po o fualaau faisua, ia e ola mai nei fatu taitasi (pe e mafai ona e aumaia ni ata o nei mea). E mafai ona galulue faatasi tagata o le vasega e faafetaui ia fatu i le mea e fua mai ai. E mafai foi ona latou faitaua fuaiupu 7–10 ma talanoa faatatau i le uiga o le lulu “i la [le] tino” ma “i la le Agaga.” (E mafai foi ona fesoasoani le savali mai ia Elder Ulisses Soares i le “Punaoa Faaopoopo”). O a mea tatou te seleseleina pe a tatou lulu i la le tino? O a mea tatou te seleseleina pe a tatou lulu i la le Agaga? (tagai Kalatia 5:22–23). Mafaufau e valaaulia tagata o le vasega e mafaufau loloto i faamanuiaga latou te faamoemoe ia maua. O le a “lulu” e mafai ona latou faia i le taimi nei e saunia ai e maua na faamanuiaga? Atonu e mafai foi ona e valaaulia i latou e tusi i lalo o latou manatu, ma, afai latou te lagona le toalelei, ia faasoa mai na mea.

• Atonu e lagona e nisi o tagata o le vasega le “faapalapala i le amio lelei” (Kalatia 6:9)—ona atonu latou te le o mautinoa o fua mai a latou taumafaiga. Atonu o le a aoga ai le talanoaina o le Kalatia 6:7–10 . Ina ia faalauiloa atu nei fuaiupu, e mafai ona e valaaulia se tasi o le vasega e talanoa puupuu e uiga i se taimi sa ia manaomia ai le onosai a o taumafai e toto se mea. O le a se mea e mafai ona aoao mai e le aafiaga a lenei tagata, faapea foi ma le Kalatia 6:7–10, e uiga i a tatou taumafaiga ia “savavali i la le Agaga”? (Kalatia 5:25).

Na aoao mai Peresitene Gordon B. Hinckley: “E faapefea ona tatou iloa mea a le Agaga? E faapefea ona tatou iloa e mai i le Atua? E ala i ona fua. Afai e taitai atu ai i le tuputupu a’e ma le atina’e, afai e taitai atu ai i le faatuatua ma le molimau, afai e taitai atu ai i se auala e lelei atu o le faia o mea, afai e taitai atu i le faaleatua, o lona uiga e a le Atua lea. Afai e faavaivaia ai i tatou, afai e aumai ai i tatou i le pouliuli, afai e faafememea’i ai i tatou ma faapopoleina ai i tatou, afai e taitai atu i le leai o se faatuatua, o lona uiga e a le tiapolo lea.”

I se tasi o tulaga, sa saunoa mai ai Peresitene Hinckley: “E te iloa uunaiga a le Agaga e ala i fua o le Agaga—o le mea e faamalamalama ai, o le mea e atia’e ai, o le mea e lelei ma mautinoa ma faagaeetia ma taitai atu ai i tatou i mafaufauga lelei ma upu lelei ma galuega lelei e a le Agaga o le Atua lea. Ae o le mea e faavaivaia i tatou, lea e taitai atu ai i tatou i auala faasaina—o mea na e a le fili lea. Ou te manatu o le manino lava lena, o le faigofie lava lena” (Aoaoga a Peresitene o le Ekalesia: Gordon B. Hinckley [2016], 121).

Sa faamalamalama mai e Elder Ulisses Soares: “O le lulu i la le Agaga o lona uiga o o tatou manatu, upu, ma amioga ua tatau ona siitia atu ai i tatou i le tulaga paia a o tatou matua faalelagi. Ae peitai, ua faatusa e tusitusiga paia le la le tino o se tulaga faaletino po o tuinanau o le tagata faalenatura, lea e faatagaina ai tagata ina ia faatosina atu e ala i le lagona malosi, manaoga, naunauga, ma tuinanau o le tino nai lo le saili mo se uunaiga mai le Agaga Paia. Afai tatou te le faaeteete, e ono uunaia i tatou e na faatosinaga tuufaatasi ma uunaiga o le amioleaga i le lalolagi ina ia tatou taliaina uiga le mama ma lepopoi e ono avea ma vaega o o tatou tulaga faaletagata” (“Nofo i le Itu a le Alii!” Ensign po o le Liahona, Me 2012, 39).