Fakahā 1–11

• Neongo ʻoku fakaʻaongaʻi ʻe Sione ha ngaahi fakatātā mo ha ngaahi fakataipe ʻi he Fakahā 1 ke fakamatalaʻi ʻaki e toetuʻu ʻa e Fakamoʻuí mo ʻEne ngaahi ngāué, ʻoku hoko hono ako e vahe ko ʻení ko ha founga lelei ke fakatupulaki ai ʻa e tui ʻokú Ne moʻui pea ʻokú Ne tataki Hono Siasí. ʻE lava ke hiki ʻe he kau mēmipa ʻo e kalasí ha ngaahi kupuʻi lea ʻi he palakipoé mei he Fakahā 1 ʻoku kau ai ha fakatātā pe ko ha fakataipe pea vahevahe pe ko e hā ʻoku nau takitaha akoʻi mai fekauʻaki mo Sīsū Kalaisí. Hangē ko ʻení, ko e hā ʻoku tau ako mei he ngaahi fakataipe ko ʻení fekauʻaki mo e founga ʻoku tataki ai ʻe Kalaisi Hono Siasí ʻi he kuongá ni? ʻOku fekauʻaki fēfē nai e fakamatala ʻa Sione ki he Fakamoʻuí mo e fakamatala ʻi he Tokāteline mo e Ngaahi Fuakava 110:1–4?

• ʻOku tau hangē kitautolu ko e Kāingalotu naʻe tohi ki ai ʻa Sione ʻe ʻi ai pē ha founga: te tau fehangahangai ai mo e filí. Fakaafeʻi e kau mēmipa ʻo e kalasí ke nau fekumi ʻi he Fakahā 2–3 ki he ngaahi faingataʻa naʻe fehangahangai mo e Kāingalotu ʻi he kuonga ʻo Sioné, pea tokoni ke mahino kiate kinautolu naʻe ʻafioʻi ʻe Sīsū Kalaisi e ngaahi faingataʻa mo e mālohinga ʻo e kolo takitaha. Mahalo ʻe lava ke nau vahevahe ha ngaahi aʻusia ne nau ongoʻi ai naʻe ʻafioʻi ʻe he Fakamoʻuí e ngaahi tūkunga makehe ne nau ʻi ai. Ko e hā ha faleʻi naʻe fai ʻe he ʻEikí ki he Kāingalotú ʻe toe lava ʻo tokoni mai ke tau ikunaʻi hotau ngaahi faingataʻá?

• Naʻe fakahoko foki ʻe he ʻEikí ʻi he vahe ko ʻení ha ngaahi talaʻofa fakalaumālie kiate kinautolu ʻe ikuná. Te ke ala fakaafeʻi e kau mēmipa ʻo e kalasí ke nau tauhoa ʻo ngāue ai ke kumi ʻi he Fakahā 2–3; 7:13–17 ʻa e ngaahi talaʻofa ʻa e ʻEikí. ʻE lava foki kenau toe tā ha ngaahi fakatātā ke ne fakafofongaʻi ha niʻihi ʻo e ngaahi talaʻofa ko ʻení, pea vahevahe mo e kalasí e ngaahi meʻa ʻoku nau maʻú. ʻOku ueʻi fēfē nai kinautolu ʻe he ngaahi talaʻofa ko ʻení ke hokohoko atu ʻenau feinga ke ikunaʻi honau ngaahi faingataʻá mo e vaivaiʻangá?

• ʻE tokoni nai ha lēsoni fakatātā ki hoʻo kalasí ke mahino kiate kinautolu ʻa e fakataipe ʻi he Fakahā 5 fekauʻaki mo hono fakaava ʻe he Fakamoʻuí ʻa e tohi naʻe fakamaʻú? ʻE lava ke ke haʻu mo ha kiʻi fakaneifua ʻi ha kiʻi puha tāpuni malu ke vahevahe mo e kalasí. Kimuʻa pea kamata e kalasí, ʻoange fakapulipuli ki ha tokotaha ʻa e kī ki he loká. Fakamatalaʻi ange ki he kalasí ʻa e meʻa ʻi he loto puhá, pea fakaʻatā ha niʻihi ʻo e kau mēmipa ʻo e kalasí ke nau feinga ke fakaava e puhá kimuʻa pea toki fakaava ʻe he tokotaha ʻokú ne maʻu ʻa e kií. ʻE lava leva ke fakafehoanaki ʻe he kalasí ʻa e lēsoni fakatātā ko ʻení ki he Fakahā 5. ʻE ala ʻaonga e ngaahi fehuʻi pehení: ʻOku tatau fēfē e fakamoʻui ʻo e fānau ʻa e Tamai Hēvaní mo e puha loká pe tohi naʻe fakamaʻú? Ko e hā nai e ʻuhinga ne hoko ai ʻa Sīsū Kalaisi ko e tokotaha pē te Ne lava ʻo fakaava ʻa e ngaahi fakamaʻú? (vakai ki he lea ʻi he “Ngaahi Maʻuʻanga Tokoni Kehé”). Ko e hā ʻa e ngaahi tāpuaki naʻe fakafalala ki he malava ʻe he Fakamoʻuí ʻo fakaava e ngaahi fakamaʻú? (vakai, Fakahā 7:14–17).

• Hangē ko e kakai fiefia ʻi he Fakahā 5, ʻoku tau lava foki he ʻahó ni ʻo hiki hake hotau leʻó ʻi he fakafetaʻi ki he Fakamoʻuí ko e Tokotaha ʻoku taau ke foaki mai ʻa e fakamoʻuí. ʻE lava ke hiva fakataha ʻe he kau mēmipa ʻo e kalasí ha ngaahi himi fakafetaʻi fekauʻaki mo e Fakamoʻuí. Hangē ko ʻení, ʻe lava ke mou hiva ʻa e “Kolōlia ki he ʻOtua” (Ngaahi Himi, fika  42; pea kumi ʻa e ngaahi moʻoni ʻoku akoʻi mai ʻe he himi ko ʻení fekauʻaki mo Sīsū Kalaisí. Ko e hā ha ngaahi aʻusia kuo tokoni mai ke tau maʻu ai ha ngaahi fakamoʻoni ki he ngaahi moʻoni ko ʻení? Ko e hā ha ngaahi meʻa faitatau ʻoku tau fakatokangaʻi ʻi he pōpoaki ʻo ʻetau ngaahi himi fakafetaʻí pea mo e ngaahi fakahā ʻi he Fakahā 5:9–14? ʻE founga fēfē haʻatau fakaʻaongaʻi lelei ange e ngaahi himí ʻi ʻapi pea ʻi he lotú ke Lotu mo fakafetaʻi ki he ʻEikí?

• ʻOku fakamatalaʻi ʻe he Fakahā 7 ʻa e ngaahi meʻa naʻe hoko ʻi he “vete hono ono ʻo e meʻa fakamaʻú,” ʻa ia ʻoku fakafofongaʻi ʻe ha ngaahi meʻa ʻe niʻihi ai hotau kuongá. ʻOkú ne tali foki mo e fehuʻi ʻi he fakaʻosinga ʻo e vahe 6: “He kuo hokosia ʻa e ʻaho lahi ʻo hono houhaú; pea ko hai ʻe faʻa tuʻu ai?” (veesi 17). ʻE lava ke kumi ʻe he kau akó ha ngaahi tali ki he fehuʻi ko ʻení ʻi he vahe 7. Ko ha ngaahi fehuʻi ʻeni ʻe niʻihi ʻe lava ke nau aleaʻi: Ko e hā naʻe fakatatali ai ʻe he ʻEikí hono fakaʻauha ʻo e māmaní ʻi ha vahaʻa taimí? ‘Oku founga fēfē hono hanga ʻe he ngaahi ouaú mo e ngaahi fuakavá ʻo “fakamaʻu ʻa [kitautolu] ki he ʻaho ʻa ia ʻe lilingi hifo ai ʻa e houhau ʻo e ʻOtuá”? (TF 1:9). Ko hā hotau fatongiá ʻi hono teuteuʻi ʻa e māmaní ki he Hāʻele ʻAnga Uá? ʻE lava ke ʻomi ʻe he Tokāteline mo e Ngaahi Fuakava 1:4–23; 77:8–11 ha ngaahi fakakaukau kehe.

• Mahalo ʻe pehē ʻe ha niʻihi ʻo e kau mēmipa ʻo e kalasí ʻoku faingataʻa ʻa e tohi ʻa Fakahaá ke mahino kiate kinautolu. ʻE lelei kapau te nau fakakaukau ki he ngaahi tohi ʻa Sioné ʻi he taumuʻa ʻo e palani ʻa e Tamai Hēvaní ke hākeakiʻi ʻEne fānaú. ʻI hono lau ʻe he kau mēmipa ʻo e kalasí ʻi ʻapi ʻa e Fakahā 1–11, ʻe lava ke nau maʻu ai ha ngaahi moʻoni ʻoku tokoni ke mahino kiate kinautolu e palani ʻa e Tamai Hēvaní ki Heʻene fānaú (vakai, fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakaafeʻi ke nau fakamatala ki he meʻa naʻa nau ‘iló. ʻE ʻaonga foki kiate kinautolu ke nau toe vakaiʻi ʻa e konga ʻi he “Ngaahi Maʻuʻanga Tokoni Kehé” ʻoku ui ko e “Ngaahi Folofola fekauʻaki mo e palani ʻo e fakamoʻuí.” Poupouʻi e kau mēmipa ʻo e kalasí ke hokohoko atu ʻenau fekumi ki he ngaahi folofola ʻokú ne akoʻi mai ha ngaahi moʻoni fekauʻaki mo e palani ʻo e fakamoʻuí ʻi heʻenau lau e toenga ʻo e tohi ʻa Fakahaá, pea tuku ange ha faingamālie ʻi he ngaahi lēsoni he kahaʻú ke nau vahevahe ʻa e meʻa ʻoku nau maʻú.

Naʻe akoʻi ʻe ʻEletā Jeffrey  R. Holland ʻi haʻane fakamatalaʻi e ngaahi meʻa naʻe hoko ʻi he maama fakalaumālié:

“Naʻe fili loto fiemālie ʻa Kalaisi ke Ne fakaʻapaʻapaʻi ʻa e tauʻatāina ke fili ʻa e faʻahinga kotoa ʻo e tangatá pea ke Ne fai ʻa e fakalelei maʻa ʻenau ngaahi angahalá. ʻI Heʻene fakahoko ʻení, te Ne fakafoki ki he Tamaí ʻa e lāngilangi kotoa pē ʻo e huhuʻi ʻofa ko iá.

“Naʻe lava ke hoko ʻa e Fakalelei taʻefakangatangata ko ʻeni ʻa Kalaisí koeʻuhí (1) Ko e tangata pē ia ʻe taha naʻe moʻui ʻi he māmaní taʻe ʻi ai Haʻane angahala, ko ia naʻe ʻikai moʻulaloa Ia ki he mate fakalaumālie ko e ola ʻo e faiangahalá, (2) Ko Ia e ʻAlo pē Taha ʻo e Tamaí naʻe Fakatupú pea ko ia ai naʻá Ne maʻu e ngaahi ʻulungaanga ʻo e ʻOtuá peá Ne maʻu ai ʻa e mālohi ke ikunaʻi ʻa e mate fakaesinó, pea (3) Ko Ia pē tokotaha naʻá Ne loto fakatōkilalo feʻunga mo loto fiemālie ʻi he fakataha alēlea ʻi he maama fakalaumālié, ke tomuʻa fakanofo Ia ki he ngāue ko iá” (“Ko e Fakalelei ʻa Sīsū Kalaisí,” Ensign pe Liahona, Maʻasi 2008, 35).