Abentekiti

Tamnei

aikaon ibukin tembora

Titiraki ibukin beeba ni kariaia nakon te tembora ibukiia kairake

Iai am onimaki inanom ao am koaua iroun te Atua, te Tama ae Akea Tokina; Natina, Iesu Kristo; ao te Tamnei ae Raoiroi?

Iai am koaua ibukin Ana Mwakuri ni Kamaiu Iesu Kristo ao n Ana beku ngkai am Tia Kamaiu ao te Tia Kabooira?

Iai am koaua ibukin Kaokan ana euangkerio Iesu Kristo?

Ko kamatoa te Beretitenti n ana Ekaretia Iesu Kristo ibukiia Aika Itiaki ni Boong aika Kaitira bwa te burabeti, te tia mamata, te tia karekei kaotioti ao bon tii ngaia te aomata i aon te aonaaba ae e kariaiakaki ni kamwakuri kiingin te nakoanibonga ni kabane? Ko kamatoaia kaain te Moan Beretitentii ao te Kooram n Abotoro n te Tengaun ma Uoman bwa burabeti, taan mamata, ao taan karekei kaotioti? Ko kamatoaia Mataniwi ni Kabuta ake tabeman ao mataniwi n te tabo n te Ekaretia?

E a tia te Uea n taekinna bwa bwaai nako ana bane ni “karaoaki n te itiaki” i Matana (Reirei ao Berita aika Tabu 42:41). Ko kekeiaki ibukin ataakin te itiaki n am iango ao n anuam? Ko kawakina tuan te itiaki?

Ko iriira ana reirei ana Ekaretia Iesu Kristo n anuam aika aki noraki ao aika noraki ma am utu ao tabeman?

Ko boutokai ao ni kaungai taian reirei, mwakuri, ke koaua aika a kaitara ma ake n ana Ekaretia Iesu Kristo ibukiia Aika Itiaki ni Boong aika Kaitira?

Ko kekeiaki ni kawakina te bong ae te Tabati n tabuia, ni mweengam ao n te taromauri, ni kaakaei am bootaki, ni katauraoiko nakon ao ni kororaoi n anaa te toa; ao ni maiuakina maium ni kabooraoia ma tuua ao tuan te euangkerio?

Ko kekeiaki bwa ko na kokoaua ni bwaai ni kabane aika ko karaoi?

Ko kakabwaka am kabwianibwai n ae e bwanin?

Ko mataata ao n ongotaeka nakon Tuan te Mauri?

Iai am bure aika a kakaiaki inanon maium ae ko riai ni kaitiaki ma mataniwi n te nakoanibonga bwa mwakoron am rairannano?

N am iango ko tau n rin n ana auti te Uea ao ni karaoi otenanti n te tembora?

Ngai te nati aine ae tatangiraki irouia Kaaro ake i Karawa ma rikiu mai karawa ao tokin kawaiu ae akea tokina.

Ngkai ana reirei Iesu Kristo, I kataia n riki n ai Arona. I ukoukori ao ni mwakuriia oin au kaotioti ao ni buokiia tabeman n Arana ae tabu.

N na tei bwa te tia kakoaua ibukin te Atua n taainako ao ni bwaai nako ao n taabo nako.

Ngkai I kataia bwa N na tau ibukin te karietataaki, I kawakina te bwaintituaraoi ibukin te rairannano ao n ukoukora te tamaroa ni katoa bong. Ma te onimaki, N na kakorakora mweengau ao au utu, ni karaoi ao ni kawakin berita aika tabu, ao ni karekei otenanti, ao kakabwaia man te tembora ae tabu.

Ngai te natin te mwaane iroun te Atua ae I tangiraki, ao iai Ana mwakuri ae n na karaoia.

Ma nanou, marurungiu, au iango, ao korakorau ni kabane, N na tangira te Atua, kawakin au berita, ao ni kabongana Ana nakoanibonga ni beku ibukiia tabeman, ni moanaki man mweengau.

Ngkai I kekeiaki ni beku, kamwakura te onimaki, rairannano, ao n rikirake ni katoa bong, N na kona n tau ni karekei kakabwaia n te tembora ao te kimwareirei n te euangkerio ae teimatoa.

N na katauraoi n riki bwa te mitinare ae mwakuri korakora, te bumwaane ae karinerine, ao te karo ae tangira man arou n riki bwa ana reirei ni koaua Iesu Kristo.

N na ibuobuoki ni katauraoa te aonaaba ibukin okin te Tia Kamaiu man kaoakiia aomata ni kabane nakon Kristo ao ni karekea te kakabwaia man Ana Mwakuri ni kamaiu.

Tamnei

aikaon ibukiia aomata aika wareka te mwabe

Tuua ake Tebwina

Ko na tai Atuana te Atua temanna irarikiu.

Ko na tai karaoa am bwai te boua ae karaki.

Ko na tai atonga aran te Uea ae Atuam ni bakanrereia.

Uringa te bong ae te Tabati, n tabuia.

Ko na karinea tamam ma tinam.

Ko na tai kamateia aomata.

Ko na tai wenenibure.

Ko na tai iraa.

Ko na tai kaota aron raom n te aro ni kewe.

Ko na tai mataai.

Taraa Te Otinako 20:3–17.