Sunday School: Doktrina sa Ebanghelyo
Leksyon 21: ‘Unsa ang Timailhan sa Imong Pag-anhi?’

Leksyon 21

“Unsa ang Timailhan sa Imong Pag-anhi?”

Joseph Smith––Mateo (Mateo 24)

Katuyoan

Aron pagtabang sa mga sakop sa klase nga makaila sa mga ilhanan nga mag-una sa Ikaduhang Pag-anhi sa Manluluwas ug sa pag-awhag sa mga sakop sa pagandam sa ilang mga kaugalingon alang niining dakong hitabo.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Joseph Smith—Mateo 1:1–20 (Mateo 24:1–5, 9–13, 15–22). Si Jesus nanagna sa umaabut nga kalaglagan sa Jerusalem.

    2. Joseph Smith—Mateo 1:21–55 (Mateo 24:6–8, 23–51). Si Jesus mihulagway sa mga timailhan nga mag-una sa iyang Ikaduhang Pag-anhi ug nagtudlo sa unsa nga paagi nga ang iyang mga pinili makaandam alang sa iyang pag-anhi.

  2. Dugang nga basahonon: Marcos 13; Lucas 21:5–38; Doktrina ug mga Pakigsaad 45:15–55.

  3. Kon anaa ang hulagway sa Ikaduhang Pag-anhi (62562 853; Pakete sa mga Hulagway sa Ebanghelyo 238), gamita kini atol sa leksyon.

  4. Sugyot alang sa pagtudlo: Ang usa ka tawag sa pagtudlo wala magkinahanglan nga ikaw nakahibalo sa tanan mahitungod sa ebanghelyo, busa ikaw kinahanglan nga dili maulaw kon dunay usa ka sakop sa klase nga mangutana nga dili nimo matubag. Kay sa maghimo-himog tubag, ingna nga wala ka mahibalo ug ingna siya nga maningkamot ka sa pagpangita og tubag.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon:

Patamboa ang mga sakop sa klase sa bintana ug patan-awa sa kalangitan. Kon walay bintana sa lawak-klasehanan, pangutan-a ang mga sakop sa klase kon unsa ang kahimtang sa panahon sa dihang sila miabut sa simbahan. Unya pahimoa sila og kanang dili mahitabo nga mga panagna mahitungod sa kahimtang sa panahon. Pananglitan, kon ang kalangitan hayag ug init sa gawas, panagna nga moulan sulod sa pipila ka mga takna. Kon tugnaw ug nag-ulan sa gawas ug morag ang ulan magpadayon pa og dugay-dugay, panagna nga sulod sa lima ka mga minuto moinit ug mouga ang gawas.

Pangutan-a ang mga sakop sa klase unsay ilang hunahuna mahitungod sa imong panagna. Human sila makakomentaryo, pangutana sa mosunod:

Pang-atensyon nga Kalihokan

  • Unsa ang inyong panagna mahitungod sa kahimtang sa panahon sa mosunod nga pipila ka mga takna? Unsay nakatabang kaninyo sa paghimo niana nga panagna?

  • Sa unsa nga paagi nga ang mga timailhan sa nagsingabut nga kahimtang sa panahon makaimpluwensya sa mga butang nga atong gihimo? (Ang mga tubag mahimong maglakip nga kita sa kasagaran mangandam pinasikad niini nga mga timailhan. Sama pananglit, kita maghimo og mga plano alang sa mga kalihokan sa gawas kon nagpakita nga ang kahimtang sa panahon maayo, o kita maghimo og talagsaon nga mga pagpangandam aron makasugakod sa makusog nga bagyo.)

Ipasabut nga ang pagpanagna sa kahimtang sa panahon maoy usa ka sitwasyon nga kita magsalig sa mga timailhan aron sa pagtabang kanato nga maandam para sa umaabut nga mga panghitabo. Kon atong bantayan ang mga timailhan, atong mapaubsan ang posibilidad nga dili makalitan nga dili andam. Sama usab niana, ang pagbantay sa mga timailhan sa Ikaduhang Pag-anhi ni Jesukristo makatabang kanato nga makapangandam para sa dakong hitabo. Kini nga leksyon maghisgut sa ubang mga timailhan nga gitagna ni Jesus nga mag-una sa dili pa ang iyang Ikaduhang Pag-anhi. (Mahimo nimong itudlo nga ang pagtagna nagtino nga adunay usa ka butang nga malagmit mahitabo, samtang ang panagna nagtino nga usa ka butang mahitabo gayud. Ang pagtagna mahitungod sa kahimtang sa panahon mahimong masayup, pero ang mga panagna diha sa kasulatan kabahin sa Ikaduhang Pag-anhi tanan matuman gayud.)

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, tabangi ang mga sakop sa klase nga makasabut nga ang Ginoo nagpadayag og mga kasayuran aron sa pagtabang kanato nga makaandam alang sa iyang Ikaduhang Pag-anhi. Bisan pa sa mga kalisdanan sa ulahing mga adlaw, kita mahinangpon nga nagpaabut uban sa hingpit nga kalipay niining dakong hitabo.

Ipasabut nga ang Mateo 24 naglakip sa mga panagna sa Manluluwas mahitungod sa pagkalaglag sa Jerusalem ug mahitungod sa iyang Ikaduhang Pag-anhi. Sa milabay nga mga panahon, ang mga bersikulo niining mao nga kapitulo giusab ug gihan-ay pag-usab, naghimo niini nga usahay lisud sabton kon hain nga hitabo ang gihulagway sa piho nga bersikulo. Maayo nalang gani, isip kabahin sa iyang dinasig nga paghubad sa Biblia, giklaro ni Joseph Smith ang duha ka mga panagna ug mipahiuli og dugang nga mga kasayuran. Ang iyang dinasig nga paghubad sa Mateo 24 makita diha sa Joseph Smith––Mateo sa Perlas nga Labing Bililhon.

Gamita ang kasayuran sa Joseph Smith—Mateo samtang inyong tukion ang mga doktrina ug mga baruganan niini nga leksyon. Ipakita ang hulagway sa Ikaduhang Pag-anhi sa tibuok panahon sa leksyon.

1. Si Jesus mitagna sa umaabut nga kalaglagan sa Jerusalem.

Tukia ang Joseph Smith—Mateo 1:1–20 (tan-awa usab sa Mateo 24:1–5, 9–13, 15—22). Dapita ang mga sakop sa klase sa pagbasa sa pinili nga mga bersikulo.

  • Pipila ka mga adlaw sa wala pa ang pagkalansang ni Jesus, ang uban sa iyang mga tinun-an mikuyog kaniya ngadto sa Bungtod sa mga Oliba. Unsa ang duha ka mga pangutana nga gipangutana sa mga tinun-an ni Jesus? (Tan-awa sa Joseph Smith—Mateo 1:4. Ipasabut nga ang Joseph Smith—Mateo 1:5–20 maoy tubag sa Manluluwas sa unang pangutana, nga naghisgut kabahin sa pagkalaglag sa Jerusalem. Ang Joseph Smith—Mateo 1:21–55 maoy tubag sa Manluluwas sa ikaduhang pangutana, nga naghisgut bahin sa Ikaduhang Paganhi.)

  • Unsa ang gipanagna sa Manluluwas kabahin sa templo didto sa Jerusalem ug sa siyudad mismo? (Tan-awa sa Joseph Smith—Mateo 1:2–3, 12.) Unsa man nga mga timailhan nga gipanagna sa Manluluwas nga mag-una sa kalaglagan sa Jerusalem? (Tan-awa sa Joseph Smith—Mateo 1:5–10.)

  • Unsa ang gisulti ni Jesus nga buhaton sa iyang mga sumusunod aron malikay sa kalaglagan? (Tan-awa sa Joseph Smith—Mateo 1:11–15.) Nganong importante man nga sila dili na mobalik ngadto sa ilang mga panimalay kon sila nakabiya na? (Tan-awa sa Lucas 9:62; D&P 133:14–15.)

Ipasabut nga bisan kon daghang mga Judeo ang wala motuo nga ang ilang bantugan nga dakbayan ug ang templo pagalaglagon, ang mga panagna sa Ginoo natuman pagka A.D. 70. Nagtuo nga ang Mesiyas moabut ug motabang kanila sa gubat, ang mga Judeo nakig-away batok sa mga Taga-Roma sa A.D. 66. Paglabay sa upat ka mga tuig ang Taga-Roma milaglag sa tibuok dakbayan. Kadtong naminaw sa Manluluwas ug milayas ngadto sa mga kabukiran naluwas. Kadtong wala maminaw sa tambag nahisalaag ug nalaglag.

2. Si Jesus mihulagway sa mga timailhan nga mag-una sa iyang Ikaduhang Pag-anhi.

Basaha ug tukia ang pinili nga mga bersikulo gikan sa Joseph Smith—Mateo 1:21–55 (tan-awa usab sa Mateo 24:6–8, 14, 23–51). Pahinumdumi ang mga sakop sa klase nga ang ikaduhang pangutana nga gipangutana sa mga tinun-an nagpunting sa Ikaduhang Pag-anhi sa Manluluwas ug sa nag-uban niini nga kalaglagan sa mga dautan (nga usahay gitawag nga mao ang “katapusan sa kalibutan”). Samtang inyong hisgutan ang mga timailhan ug ang mga kalisud nga mag-una sa Ikaduhang Pag-anhi, ilista kini sa pisara.

  • Unsa nga timailhan sa Ikaduhang Pag-anhi sa Manluluwas ang gihisgutan diha sa Joseph Smith—Mateo 1:22? Unsa nga ebidensya ang inyong nakita nga kining panagna natuman? Unsaon man nato paglikay sa pagpanglingla sa mini nga mga propeta? (Tan-awa sa Mateo 7:15–20; D&P 45:57; 46:7–8.)

  • Unsa ang mga timailhan sa Ikaduhang Pag-anhi ang gihisgutan diha sa Joseph Smith—Mateo 1:23 ug Joseph Smith—Mateo 1:28? Unsa nga ebidensya ang inyong nakita nga kini nga panagna natuman? Ang Ginoo mitudlo nga kita angay nga “dili makuyawan” sa mga gubat ug mga huhungihong sa mga gubat. Sa unsa nga paagi nga kita makabaton og kalinaw panahon sa magubot nga mga panahon? (Tan-awa sa 1 Juan 4:16–18; D&P 6:34–36; 45:34–35; 59:23.)

    Si Elder M. Russel Ballard mihatag sa mosunod nga tambag sa paglaum ug pagdasig:

    “Bisan tuod ang mga panagna nagsulti kanato nga kini nga mga butang moabut gayud, nagkadaghan ang mga tawo nga nagpahayag sa dakong kahadlok diha sa unsay makita sa nag-anam og kadaghan nga mga katalagman sa tibuok kalibutan…. Maangkonon kita nga adunay daghan nga mga rason nga labi gyung mabalaka tungod kay kita wala makakita og dihadiha nga mga tubag ngadto sa daw walay kasulbaran nga mga problema nga giatubang sa tawhanong pamilya. Apan bisan pa sa ingon niini nga mga problema, nga sa kaulahian mas mograbe pa, dili gayud kita motugot nga mawad-an kita og paglaum! …

    “ … Ang Ginoo mao ang nagdumala. Siya nahibalo sa katapusan gikan sa sinugdanan. Siya mihatag kanato og igo nga panudlo nga, kon sundon, mohatag kanato og kaayohan ibabaw sa bisan unsang kalisud. Ang iyang mga katuyoan pagatumanon, ug sa umaabut nga mga adlaw kita makasabut sa mahangturong mga rason alang sa tanan niini nga mga hitabo. Busa, karon kita kinahanglan nga magmainampingon nga dili kaayo magpalabi sa atong gibati, ni kinahanglan kita nga magpalabi sa kabalaka sa sobra nga mga pagpangandam; apan unsa ang atong buhaton mao ang paghupot sa mga sugo sa Dios ug dili gayud magpakawala sa paglaum!

    “Apan asa kita makakita og paglaum diha sa taliwala sa ingon nga kagubot ug katalagman? Labaw nga masayon, ang atong usa nga paglaum alang sa espirituhanong kaluwasan sa panahon niining mga kaguliyang mao ang pagpunting sa atong mga hunahuna ug sa atong mga kasingkasing ngadto ni Jesukristo…. Nagdala uban sa ‘kalasag sa hugot nga pagtuo’, kita makabuntog sa daghan sa atong inadlaw-adlaw nga mga hagit sa kinabuhi ug makabuntog sa atong labing dako nga mga kahuyang ug mga kahadlok, nakahibalo nga kon kita mobuhat kutob sa atong mahimo sa paghupot sa mga sugo sa Dios, bisan unsa pa ang mahitabo, kita anaa ra sa maayong kahimtang” (sa Conference Report, Okt. 1992, 41–43; o Ensign, Nob. 1992, 31–32).

  • Unsa nga mga timailhan sa Ikaduhang Pag-anhi ang gihulagway sa Joseph Smith—Mateo 1:27 ug 31? Sa unsa nga paagi nga kini nga mga panagna natuman na karon? (Ang misyonaryo nga buhat milambo, ug ang ebanghelyo gitudlo ug gidawat diha sa daghan nga mga dapit sa tibuok kalibutan.) Unsa ang mahimo sa matag usa kanato aron makatabang sa pagpatuman niining mga panagna?

  • Unsa nga timailhan sa Ikaduhang Pag-anhi ang gihulagway diha sa Joseph Smith—Mateo 1:29–30? Unsa nga ebidensya ang inyong nakita nga kini nga panagna natuman? Unsa may gitambag sa ulahing mga propeta nga atong buhaton aron maandam sa mga natural nga mga katalagman nga mag-una sa Ikaduhang Pag-anhi?

  • Unsa nga mga timailhan sa Ikaduhang Pag-anhi ang gihisgutan diha sa Joseph Smith––Mateo 1:32–33?

  • Ang Ginoo miingon sa iyang mga sumusunod sa Jerusalem sa “pagbarug diha sa balaan nga dapit” (Joseph Smith––Mateo 1:12), ug siya mihatag og sama nga tambag sa atong panahon karon (D&P 87:8; 101:22). Unsa pang uban nga balaan nga mga dapit nga kinahanglan nato nga maoy barugan? Sa unsa nga paagi kini nga mga dapit makapanalipod kanato sa panahon sa mga kalisud sa ulahing mga adlaw?

    Si Presidente Ezra Taft Benson miingon, “Ang balaan nga mga lalaki ug balaan nga mga babaye mobarug diha sa balaan nga mga dapit, ug kini nga balaan nga mga dapit naglakip sa atong mga templo, atong mga simbahan, atong mga panimalay, ug ang mga stake sa Zion, nga mao, ingon sa gipahayag sa Ginoo, ‘alang sa panalipod, ug ang dangpanan gikan sa mga makusog nga unos, ug gikan sa mga kasuko kon kini igabu-bu sa walay pagsagul ibabaw sa tibuok yuta’ (D&P 115:6)” (“Prepare Yourselves for the Great Day of the Lord,” Brigham Young University 1981 Fireside and Devotional Speeches [1981], 68).

  • Unsa nga giya ang gihatag ni Jesus aron makatabang kanato nga dili malingla niining ulahing mga adlaw sa dili pa ang Ikaduhang Pag-anhi? (Tan-awa sa Joseph Smith––Mateo 1:37.) Unsaon man nato pagmahal ang mga pulong sa Ginoo? Sa unsang paagi nga ang inyong pagmahal sa mga pulong sa Ginoo nakatabang kaninyo sa paglikay sa mga paglingla?

  • Unsa ang gitudlo ni Jesus sa mosunod nga mga tudling aron pagtabang kanato sa pag-andam alang sa iyang Ikaduhang Pag-anhi?

    1. Ang sambingay sa kahoy nga igira (Joseph Smith––Mateo 1:38–40).

    2. Ang pagtandi sa Ikaduhang Pag-anhi ngadto sa mga Adlaw ni Noe (mga bersikulo 41–43).

    3. Ang panagna sa duha ka tawo nga nagtrabaho diha sa uma ug sa duha ka tawo nga naggaling diha sa galingan (mga bersikulo 44–46).

    4. Ang sambingay sa maayong tawo ug sa kawatan (mga bersikulo 47–48).

    5. Ang sambingay sa agalon ug sa iyang mga ulipon (bersikulo 49–54).

  • Ngano nga importante man nga kita makanunayong magbantay ug magandam alang sa pag-anhi sa Ginoo? Sa unsa nga paagi nga kita makabantay ug makaandam sa pagsugat sa Ginoo?

  • Unsa ang mahitabo sa mga matarung kon ang Manluluwas moanhi pag-usab? (Tan-awa sa Joseph Smith––Mateo 1:37, 44–45, 50; 1 Mga Taga-Tesalonica 4:16–18, D&P 88:96–98.)

Panapos

Ipamatuod nga ang mga panagna diha sa kasulatan mahitungod sa Ikaduhang Pag-anhi ni Jesukristo matuman ang tanan. Ipasabut og maayo nga pinaagi sa pagtuon sa mga pagtulun-an sa Manluluwas ug sa pagsunod sa mga tambag sa mga buhing propeta, kita makaandam sa atong mga kaugalingon sa pagsugat ni Kristo. Kon kita andam, ang Ikaduhang Pag-anhi mahimong usa ka maanindot nga adlaw alang kanato.

Dugang nga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton kini nga ideya isip kabahin sa leksyon.

Mga timailhan sa Ikaduhang Pag-anhi gipadayag diha sa ulahing mga adlaw

Ipasabut nga si Propeta Joseph Smith nakadawat sa pagpadayag nga nagsubli ug nagtin-aw sa mga panagna nga gihatag sa karaang mga tinun-an ni Jesus. Kini nga pagpadayag makita diha sa Doktrina ug mga Pakigsaad 45. Ipatandi sa mga sakop sa klase ang Doktrina ug mga Pakigsaad 45:15–55 ngadto sa Joseph Smith––Mateo.

Mahimo nimong ipasabut nga sa Doktrina ug mga Pakigsaad, ang Ginoo nagsugo kang Joseph Smith nga sugdan na sa paghubad ang Bag-ong Tugon. Ang Joseph Smith––Mateo kabahin niining dinasig nga hubad.