Sunday School: Doktrina sa Ebanghelyo
Leksyon 44: ‘Ang Dios Gugma’

Leksyon 44

“Ang Dios Gugma”

1, 2, ug 3 Juan

Katuyoan

Aron pagtabang sa mga sakop sa klase nga makasabut sa unsa nga paagi nga ang Amahan ug Anak mipakita sa ilang gugma alang kanato ug sa unsa nga paagi nga kita makapakita sa atong gugma alang kanila.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. 1 Juan 2:28–29; 3:1–2; 4:7–19; 5:1, 11–15. Si Juan nagtudlo nga ang Langitnong Amahan mipakita sa iyang gugma alang kanato pinaagi sa paghatag og paagi alang kanato nga mahimong sama kaniya ug makapanunod sa kinabuhing dayon.

    2. 1 Juan 1:7–9; 2:1–2; 3:5–8, 16; 5:11–13. Si Juan nagtudlo nga si Jesus mipakita sa iyang gugma alang kanato pinaagi sa matubsanon nga sakripisyo, nga makapahimo kanato nga mahisama sa atong Amahan sa Langit.

    3. 1 Juan 2:3–17; 3:9–24; 4:4–21; 5:1–10; 2 Juan; 3 Juan. Si Juan nagtudlo nga kita makapakita sa atong gugma sa Langitnong Amahan ug ni Jesukristo pinaagi sa atong pagkamasulundon ug sa atong gugma alang sa usag usa.

  2. Dugang nga basahonon: Moroni 7:48; Doktrina ug mga Pakigsaad 45:3–5.

  3. Kon ikaw mogamit sa pang-atensyon nga kalihokan, pagdala og litrato sa pamilya o usa sa mosunod nga mga hulagway: Usa ka Pamilya nga Nagkahiusa sa Pagtrabaho (62313); Paglingaw-lingaw sa Pamilya (62384); o Panaghiusa sa Pamilya (Pakete sa mga Hulagway sa Ebanghelyo 616).

  4. Sugyot alang sa pagtudlo: “Samtang imong gahinan og insaktong panahon ang mahunahunaon ug mainampoon nga pagpangandam, ikaw mapanalanginan og mas maayo nga panabut. Mas dali ikawng mobati sa giya sa Espiritu…. Hinumdumi nga sa imong pagpaningkamot sa pagtudlo sa ebanghelyo ni Jesukristo, dili igo nga basta lang maandam ang mga leksyon. Kinahanglan usab nga imong andamon ang imong kaugalingon (Teaching, No Greater Call [36123], 97).”

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipakita ang hulagway sa usa ka pamilya.

Pang-atensyon nga Kalihokan

  • Unsa ang uban nga mga paagi nga ang mga ginikanan makapakita og gugma alang sa ilang mga anak? Unsaon sa mga anak pagpakita og gugma alang sa ilang ginikanan, mga igsoon nga mga lalaki ug mga babaye?

Sa unsa nga paagi nga kitang tanan mga sakop sa usa ka pamilya?

Pahinumdumi ang mga sakop sa klase nga agi og dugang sa pagkasakop ngadto sa kalibutanon nga pamilya, ang matag usa kanato espiritu nga anak sa atong Langitnong Amahan, kinsa naghigugma kanato ug nagtinguha sa pagpanalangin kanato. Diha sa iyang mga sulat, si Juan misubli sa pagpasabut pag-ayo kon giunsa sa Amahan ug sa Anak pagpakita sa ilang gugma alang kanato ug unsaon nga kita makapakita sa atong gugma alang kanila.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga paagi nga kini magamit sa atong inadlaw-adlaw nga kinabuhi. Awhaga ang mga sakop sa klase sa pagpaambit sa mga kasinatian nga may kalabutan ngadto sa mga baruganan sa kasulatan.

1. Mga pagpadayag sa gugma sa Langitnong Amahan alang kanato.

Hisguti ang mga bersikulo nga gilista sa ubos. Ikaw mahimo nga molakbit pagtingub sa panaghisgutan diha sa pisara sa mga pagpadayag sa gugma sa Dios.

  • Kon ikaw mogamit sa usa ka pulong sa paghulagway sa Langitnong Amahan, unsa man kini? Unsa nga pulong ang gigamit ni Juan sa paghulagway sa Langitnong Amahan diha sa 1 Juan 4:8, 16? Ngano nga kini mao man ang angay nga pulong?

  • Basaha ang 1 Juan 3:1–2. Unsa nga mga pagpadayag sa gugma sa Ginoo ang gisulti ni Juan niini nga mga bersikulo? (Ang Dios motawag kanato nga iyang mga anak ug mohimo kanato nga sama ni Kristo—gidayeg, gihimaya, ug isigkamanununod uban kaniya; tan-awa usab sa Mga Taga-Roma 8:14–17.) Unsa ang atong buhaton aron mahimong pagatawgon nga mga anak sa Dios? (Tan-awa sa 1 Juan 2:28–29; 4:7; 5:1; Mga Taga-Galacia 3:26–27; Mosiah 5:5–9; Moroni 7:48. Ipasabut nga samtang kitang tanan mga espiritu nga mga anak sa Dios, ang paggamit sa mga pulong “mga anak sa Dios” diha sa 1 Juan 3:1–2 nagpasabut niadtong midala sa ilang mga kaugalingon sa ngalan ni Kristo pinaagi sa bunyag ug pagpasidungog sa iyang ngalan pinaagi sa hugot nga pagtuo ug pagkamatarung.)

  • Basaha ang 1 Juan 4:9–10. Unsa nga pagpadayag sa gugma sa Dios ang gisulti ni Juan niini nga bersikulo? (Tan-awa usab sa Juan 3:16; 1 Juan 5:11; 2 Nephi 9:10. Ipasabut nga ang pulong pagpakig-uli diha sa 1 Juan 4:10 nagpasabut sa maulaong pagsakripisyo ni Jesukristo.) Sa unsang paagi nga ang iyang pagpadala sa iyang Anak aron pagtubos sa atong mga sala nagpakita sa gugma sa Langitnong Amahan alang kanato?

  • Basaha ang 1 Juan 4:13. Unsa nga pagpakita sa gugma sa Dios ang gisulti ni Juan niini nga bersikulo. Sa unsa nga paagi nga ang Espiritu mahinungdanon nga gasa sa inyong kinabuhi?

  • Si Juan mitudlo nga ang Langitnong Amahan motubag sa atong mga pag- ampo kon kita mangayo sumala sa Iyang kabubut-on (1 Juan 5:14–15). Sa unsa nga paagi nga ang pag-ampo nakatabang kaninyo sa pagbati sa gugma sa Langitnong Amahan? Ngano nga ang pag-ampo mahinungdanon alang kanato aron mahimong sama sa atong Amahan sa Langit?

  • Si Juan mitudlo nga “kita naghigugma [sa Ginoo], tungod kay siya unang mihigugma kanato” (1 Juan 4:19). Unsa ang uban nga mga paagi nga gipakita sa Dios ang iyang gugma kaninyo? Unsa ang inyong gibati sa dihang kamo mihunahuna sa mga paagi nga gipakita sa Dios ang iyang gugma alang kaninyo?

    Si Presidente Thomas S. Monson miingon: “Ang plano sa atong Langitnong Amahan naglangkub sa mahinungdanong pagpadayag sa tinuod nga gugma. Ang tanan nga atong gimahal––gani ang atong mga pamilya, atong mga higala, atong kalipay, atong kahibalo, atong mga pagpamatuod—mahimong mawala kon dili pa tungod sa atong Amahan ug sa Iyang Anak, si Ginoong Jesukristo…. Ang kalibutan nakasaksi og mas dako nga gasa, ni kini nakaila og mas mahangturon nga gugma” (sa Conference Report, Abr. 1993, 77; o Ensign, Mayo 1993, 62–63).

2. Mga pagpadayag sa gugma sa Manluluwas alang kanato

Hisguti ang mga bersikulo nga gilista sa ubos.

  • Basaha ang 1 Juan 3:16. Unsa nga pagpadayag sa gugma sa Manluluwas ang gisulti ni Juan niini nga bersikulo? Unsa nga mga panalangin ang atong madawat tungod sa matubsanong sakripisyo sa Manluluwas? (Tan-awa sa 1 Juan 1:7–9; 5:11–13; 2 Nephi 9:11–13; Alma 11:40–44. Mahimong ilista nimo ang mga tubag sa mga sakop sa klase diha sa pisara samtang ikaw maghisgut niini nga mga bersikulo.)

  • Basaha ang 1 Juan 2:1–2. Unsa nga pagpadayag sa gugma sa Manluluwas ang gisulti ni Juan niini nga bersikulo? Unsa man ang usa ka Manlalaban? (Ang usa kinsa mopakilooy alang sa kaayohan sa uban.) Unsa ang gibuhat ni Jesus alang kanato isip atong manlalaban? (Tan-awa sa D&P 45:3–5.)

  • Si Juan mitudlo nga ang Anak sa Dios miabut aron sa pagguba sa mga buluhaton sa yawa (1 Juan 3:8). Sa unsa nga paagi nga ang kinabuhi ug mga pagtulun-an sa Manluluwas makaguba sa mga buluhaton sa yawa?

3. Pagpakita sa atong gugma alang sa Langitnong Amahan, ni Jesukristo, ug sa uban

Hisguti ang mga bersikulo nga gilista sa ubos. Mahimong imong i-summarize ang panaghisgutan diha sa pisara pinaagi sa paglista sa mga paagi nga kita makapakita og gugma alang sa Langitnong Amahan ug ni Jesukristo.

  • Basaha ang 1 Juan 2:3–6. Unsa ang atong makat-unan gikan niini nga mga bersikulo mahitungod kon unsaon sa pagpakita sa atong gugma alang sa Dios? (Tan-awa usab sa Juan 14:15; 1 Juan 3:24; 5:3; 2 Juan 1:6.) Sa unsang paagi nga ang pagkamasulundon nagpakita sa atong gugma alang sa Dios?

  • Basaha ang 2 Juan 1:4 ug 3 Juan 1:4. Sa unsa nga paagi nga ang atong pagkamatinud-anon makahatag og kalipay ngadto sa atong Langitnong Amahan?

  • Basaha ang 1 Juan 2:15–17. Unsa ang atong makat-unan gikan niini nga mga bersikulo mahitungod kon unsaon nato sa pagpakita sa atong gugma sa Dios? Sa unsa nga paagi nga usahay kita mopakita og gugma alang sa kalibutan kay sa gugma alang sa Dios? Sa unsa nga paagi nga kita maapektohan kon kita mopakita sa gugma alang sa kalibutan? Unsaon man nato pagbuntog sa gugma alang sa kalibutanon nga mga butang?

  • Basaha ang 1 Juan 4:7–8, 11. Unsa ang atong makat-unan gikan niini nga mga bersikulo mahitungod kon unsaon nato sa pagpakita sa atong gugma alang sa Dios? (Tan-awa sa 1 Juan 3:11, 23; 4:21.) Giunsa paghulagway ni Juan ang mga tawo nga miangkon nga ilang gihigugma ang Dios apan wala “maghigugmaay sa usag usa”? (Tan-awa sa 1 Juan 2:9, 11; 3:14–15, 17; 4:20.) Ngano nga ang atong gugma alang sa uban usa ka sukdanan sa atong gugma sa Dios? Unsaon man nato sa pagbati ug pagpakita og mas dako nga gugma alang sa usag usa? Sa unsa nga paagi nga kamo napanalanginan pinaagi sa gugma sa laing tawo alang kaninyo?

Kon ikaw mogamit sa pang-atensyon nga kalihokan, ipakita pag-usab ang hulagway sa pamilya ug ipangutana ang mosunod:

  • Unsa ang mga panalangin sa pagpuyo diha sa usa ka pamilya nga ang mga sakop naghigugmaay sa usag usa ug naghigugma sa Dios? Unsaon man nato pagtabang ang uban aron makatagamtam nianang sama nga mga panalangin ingon nga kabahin sa pamilya sa Dios?

Panapos

Ipamatuod ang dakong gugma sa Langitnong Amahan ug ni Jesukristo kanato. Awhaga ang mga sakop sa klase sa paghinumdom sa mga pagtulun-an ni Juan samtang sila naninguha sa pagpakita sa ilang gugma alang sa Langitnong Amahan ug ni Jesukristo ug alang sa uban nga mga tawo.

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit sa usa o pipila niini nga mga ideya isip kabahin sa leksyon.

1. “Maglakaw diha sa kahayag” (1 Juan 1:7)

Basaha ang 1 Juan 1:6–7.

  • Unsa ang gipasabut sa “paglakaw diha sa kangitngit”? Unsa ang gipasabut sa “paglakaw diha sa kahayag”? (Ingon nga bahin sa imong panaghisgutan niini nga mga pangutana, ikaw mahimo nga mopakanta sa mga sakop sa klase sa “Tudloi Ko Paglakaw sa Kahayag.”) (Tan-awa sa Mga Himno ug mga Awit sa mga Bata, p. 66.)

2. Si Juan mipasidaan batok sa espiritu sa anti-Kristo

  • Diha sa iyang mga sulat, si Juan misubli sa pagpasidaan sa mga Santos sa paglikay sa mga anti-Kristo. Unsa ang gisulti ni Juan nga buhaton sa mga anti-Kristo? (Tan-awa sa 1 Juan 2:22–23; 4:1–3; 2 Juan 1:7.) Ngano sa inyong hunahuna nga ang kaaway mosulay sa pagwagtang sa atong mga pagpamatuod sa Manluluwas? Unsa ang atong buhaton aron mapalig-on ang atong mga pagpamatuod?

    Si Elder M. Russell Ballard mitudlo: “Ang indibidwal, kinaugalingon nga pagpamatuod sa ebanghelyo sa kamatuoran, ilabi na sa balaan nga kinabuhi ug misyon ni Ginoong Jesukristo, mahinungdanon alang sa atong kinabuhing dayon…. Ang kinabuhing dayon gipasikad sa atong kaugalingon, tagsa-tagsa nga kahibalo sa atong Amahan sa Langit ug sa Iyang Balaan nga Anak. Ang yano nga pagkahibalo mahitungod kanila dili igo. Kita kinahanglan nga adunay kinaugalingon, espirituhanon nga mga kasinatian aron mapalig-on ang atong pagpamatuod. Kini moabut pinaagi sa pagtinguha niini sa sama nga tumong, sama sa hunahuna sa gigutom nga tawo nga nagtinguha og pagkaon” (sa Conference Report, Abr. 1996, 111; o Ensign, Mayo 1996, 80).

3. “Wala pa gayuy tawo nga nakakita sa Dios bisan kanus-a (1 Juan 4:12)

Kon ang mga sakop sa klase matingala kon ang 1 Juan 4:12 nagpasabut nga ang tawo dili makakita sa Dios, ipakita nila ang pareha nga bersikulo diha sa Hubad ni Joseph Smith, diin mabasa, “Wala pa gayuy tawo nga nakakita sa Dios bisan kanus-a, gawas kanila kinsa mituo” (1 Juan 4:12. Itudlo nga daghan ang mga propeta nga nakakita sa Dios. Tan-awa sa Exodo 33:9–11; Juan 6:46; Mga Buhat 7:55–56; Doktrina ug mga Pakigsaad 67:10–12; Moises 1:1–2; Abraham 3:11; Joseph Smith––Kasaysayan 1:16–17.

4. Pangbatan-on nga panaghisgutan

Pasundi ang pang-atensyon nga kalihokan ginamit ang dugang detalyado nga paghisgut-hisgot kon unsaon sa mga batan-on pagpakita og mas dakong gugma alang sa ilang mga ginikanan. Awhaga ang mga sakop sa klase sa pagpadayon sa ilang mga hunahuna, ug hangyoa sila sa pagpangandam sa pagpaambit sa ilang kasinatian sa umaabut nga semana.

5. Mga himno mahitungod sa gugma

Pagpili og usa ka himno mahitungod sa gugma. Pakigsabut sa usa ka gamay nga grupo sa mga sakop sa klase sa pag-awit sa himno, o ipaawit ang himno sa tibuok klase, basaha ang mga pulong niini, o patukara ang girekord na niini.