Sunday School: Doktrina sa Ebanghelyo
Leksyon 41: ‘Natapos Ko Na ang Akong Pagdalagan sa Lumba’

Leksyon 41

“Natapos Ko Na ang Akong Pagdalagan sa Lumba”

1 ug 2 Timoteo; Tito

Katuyoan

Aron pag-awhag sa mga sakop sa klase sa pagkat-on ug sa pagtudlo sa tinuod nga doktrina ug nga mahimong matarung nga mga ehemplo alang sa uban.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. 1 Timoteo 4; 2 Timoteo 1–4; Tito 1. Si Pablo mihulagway sa timailhan sa apostasiya. Siya mitudlo nga ang pagkat-on ug pagtudlo sa tinuod nga doktrina makatabang sa pagbantay batok sa apostasiya.

    2. 1 Timoteo 4:12. Si Pablo mitudlo nga kita kinahanglan nga mahimong “panig-ingnan sa mga matuohon.”

    3. 1 Timoteo 6; Tito 2–3. Si Pablo mitudlo nga kita kinahanglan “mosunod subay sa pagkamatarung” ug mosalikway sa pagka dili diosnon.

  2. Dugang nga basahonon: Ang Giya ngadto sa mga Kasulatan, “Mga Epistola ni Pablo: 1 ug 2 Timoteo, Tito,” 56.

  3. Kon ikaw mogamit sa pang-atensyon nga kalihokan, andama ang ginunting nga mga pulong sa mosunod nga mga pamahayag, o pag-andam sa pagsulat niini diha sa pisara:

    • Aron makatapos sa akong lumba, ako kinahanglan:

    • Magkat-on ug magtudlo sa tinuod nga doktrina

    • Mamahimo nga panig-ingnan sa mga matuohon.

    • Mosunod subay sa pagkamatarung, ug mosalikway sa pagka dili diosnon.

  4. Sugyot alang sa pagtudlo: Ilainlain ang mga kagamitan ug mga paagi nga imong gamiton sa pagtudlo. Sama pananglit, ikaw mahimong mogamit og mga hulagway o mga kagamitan sa audiovisuals, lahi nga paagi sa paghisguthisgot, o lahi nga paghan-ay sa mga lingkuranan. Ang nagkalainlaing paagi makatabang sa mga sakop sa klase nga interesado kanunay sa mga leksyon. Tan-awa sa Teaching, No Greater Call (36123), mga pahina 89–92 ug 159–84, alang sa mga materyal ug mga pamaagi nga tingali angay gamiton sa imong mga leksyon.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pang-atensyon nga Kalihokan

  • Unsa ang katapusang lumba sa dagan nga inyong naapilan o nakita? Unsa ang kalainan tali sa pagdaug ug sa paghuman sa lumba sa dagan? Pila ka buok ang mga mananaug sa kasagaran nga lumba? Unsa ang kinahanglan nga inyong buhaton aron modaug?

  • Sa unsa nga paagi nga ang dagan sa atong kinabuhi sama sa usa ka lumba? (Ang tanan nga katawhan makahimo sa pagdaug sa “lumba” sa kinabuhi.) Unsa ang kinahanglan nga atong buhaton aron makahuman sa lumba sa kinabuhi nga malampuson?

Hangyoa ang usa ka sakop sa klase sa pagbasa sa 2 Timoteo 4:7. (Ikaw mahimo usab nga motudlo nga ang usa ka “lumba” mahimo sab nga tawgong usa ka “dalan”.) Ipasabut nga si Apostol Pablo nagpuyo sa ingon nga paagi nga siya nakahimo sa pagpahayag niini dihang hapit na matapos ang iyang kinabuhi. Kini nga leksyon naghisgut sa pipila ka mga pagtulun-an ni Pablo nga makatabang kanato samtang kita magtinguha sa paghuman sa atong lumba nga malampuson.

Ipakita ang ginunting nga pulong nga Aron makahuman sa akong lumba, ako kinahanglan:

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga paagi kini magamit sa atong inadlaw-adlaw nga kinabuhi. Awhaga ang mga sakop sa klase sa pagpaambit sa mga kasinatian nga may kalabutan sa mga baruganan sa kasulatan.

Ipasabut nga si Timoteo ug si Tito mga sinaligan nga mga kauban ni Pablo kinsa nag-abag kaniya sa pagsangyaw sa ebanghelyo. Human sa unang pagkabilanggo ni Pablo sa Roma, siya mipadayon sa iyang misyonaryong mga panaw. Didto sa Efeso, siya mibiya ni Timoteo aron mangalagad sa Simbahan, ug didto sa Creta siya mibiya ni Tito nga adunay susama nga buluhaton. Samtang si Pablo mipadayon sa iyang pagpanaw, siya misulat og mga sulat alang sa pagpalig-on niini nga mga kaigsoonan ug aron sa pagtambag kanila sa ilang mga responsibilidad ingon nga mga pari ug mga magbalantay sa mga Santos. Busa kini nga mga sulat sa kasagaran gitawag og pastoral nga mga sulat.

1. Kat-uni ug itudlo ang tinuod nga doktrina.

Tukia ang 1 Timoteo 4; 2 Timoteo 1–4; ug Tito 1. Dapita ang mga sakop sa klase sa pagbasa og kusog sa pinili nga mga bersikulo.

  • Unsa ang mga timailhan sa apostasiya nga gihulagway ni Pablo sa iyang mga sulat ngadto ni Timoteo ug Tito? (Tan-awa sa 1 Timoteo 4:1–3; 2 Timoteo 3:1–7, 13; 4:3–4; Tito 1:10–11.) Sa unsa nga paagi nga kini nga mga timailhan sa apostasiya makita karon? (Tan-awa sa 2 Nephi 28:3–9; D&P 1:15–16. ) Sa unsa nga paagi nga kita makapanalipod sa atong mga kaugalingon batok niini nga mga dautan?

  • Ngano nga ang ubang mga tawo “kanunayng magtuon, apan bisan unsaon dili gayud makakab-ot og kahibalo sa kamatuoran”? (2 Timoteo 3:7). Sa unsa nga pamaagi nga kita makasiguro nga ang atong pagkat-on makahatag kanato og kahibalo sa kamatuoran?

  • Unsa ang gitudlo ni Pablo ngadto ni Timoteo mahitungod sa mga responsibilidad sa mga tawo kinsa nagtudlo sa ebanghelyo? (Tan-awa sa 1 Timoteo 4:6–7, 13–16; 2 Timoteo 2:16, 23–25; 3:14–17; 4:2, 5. Ikaw mahimo nga mosulat niini nga mga kapangakohan diha sa pisara.) Unsa nga mga kahigayunan nga ania kanato aron sa pagtudlo sa ebanghelyo? (Ang mga tubag mahimong maglakip sa pagtudlo sa mga sakop sa pamilya, pagtuman sa mga calling sa Simbahan, ug paghisgut sa ebanghelyo uban sa mga higala ug mga kaila. Itudlo nga ang matag usa kanato sa ubang paagi magtutudlo sa ebanghelyo.) Sa unsa nga paagi kita makatudlo sa ebanghelyo sa mas epektibo nga paagi?

  • Si Pablo mihatag og gibug-aton sa kamahinungdanon sa pagtudlo ug pagkaton sa tinuod nga doktrina (1 Timoteo 1:3; 4:6, 13; Tito 2:1). Sa unsa nga paagi nga ang pagkat-on sa tinuod nga doktrina makatabang kanato sa pagbantay kalabot sa apostasiya? Unsa ang uban nga mga kakuyaw sa dili tinuod nga mga pagtulun-an? Sa unsa nga paagi ang pagkat-on sa tinuod nga mga doktrina sa ebanghelyo nakapanalangin sa inyong kinabuhi?

    Sa paghisgut sa gahum sa tinuod nga doktrina, si Elder Boyd K. Packer miingon: “Ang tinuod nga doktrina, nga nasabtan, makapausab sa mga hiyas ug mga batasan. Ang pagtuon sa mga doktrina sa ebanghelyo mas dali kaayo nga makapalambo sa batasan itandi sa pagtuon lamang mahitungod sa maayong pamatasan…. Mao kana ang hinungdan nga among gipasabut pag-ayo ang mahitungod sa pagtuon sa mga doktrina sa ebanghelyo” (sa Conference Report, Okt. 1986, 20; o Ensign, Nob. 1986, 17).

  • Sa unsa nga paagi nga kita makasiguro nga unsa ang atong gitudlo mao ang tinuod nga doktrina? (Tan-awa sa Mosiah 18:19–20; D&P 52:9.)

    Si Elder Joseph B. Wirthlin mitambag: “Ang Dios mipadayag sa tanang butang nga gikinahanglan alang sa atong kaluwasan. Kita kinahanglan motudlo ug mohatag og importansya sa mga butang nga gipadayag na ug molikay sa pagsuhid sa giingon nga mga misteryo. Ang akong tambag ngadto sa mga magtutudlo sa Simbahan, kon sila magtudlo diha sa ward ug mga stake, mga tulunghaan sa Simbahan alang sa mas taas nga pagkat-on, mga institute sa relihiyon, mga seminary, bisan ingon nga mga ginikanan diha sa ilang mga panimalay, kinahanglan nga ibasi ang ilang mga pagtudlo diha sa mga kasulatan ug sa mga pulong sa mga propeta sa ulahing mga adlaw” (sa Conference Report, Okt. 1994, 101; o Ensign, Nob. 1994, 77).

  • Unsa ang gitambag ni Pablo nga atong buhaton kon kita makadawat sa matarung nga doktrina? (Tan-awa sa 2 Timoteo 1:13; Tito 1:9.) Unsa sa inyong hunahuna ang gipasabut sa “paghupot nga malig-on”? (Tan-awa sa 1 Nephi 15:23–24.)

Kon ikaw migamit sa pang-atensyon nga kalihokan, ipakita ang ginunting nga mga pulong nga Pagkat-on ug pagtudlo sa tinuod nga doktrina.

2. “Paghimo … nga usa ka panig-ingnan sa mga matuohon.”

Basaha ug hisguti ang 1 Timoteo 4:12.

Unsa sa inyong hunahuna ang gipasabot sa paghimo “nga usa ka panig-ingnan sa mga matuohon”? (1 Timoteo 4:12). Sa unsa nga paagi nga kamo naimpluwensya sa usa ka tawo kinsa mao ang “usa ka panig-ingnan sa mga matuohon”?

Ilista ang matag paagi nga giawhag ni Pablo ni Timoteo nga mahimong usa ka panig-ingnan. Hangyoa ang mga sakop sa klase sa paghulagway sa unsa nga paagi nga kita mahimong usa ka panig-ingnan sa matag usa niini nga mga paagi.

  • Pulong

  • Pakigsultihanay (mahimo usab nga nagpasabut sa linihokan o batasan)

  • Gugma nga putli

  • Espiritu

  • Hugot nga pagtuo

  • Kaputli

Kon ikaw migamit sa pang-atensyon nga kalihokan, ipakita ang ginunting nga mga pulong nga Mamahimo nga usa ka panig-ingnan sa mga matuohon.

3. “Mosunod subay sa pagkamatarung” ug mosalikway sa pagka dili diosnon.

Basaha ug hisguti ang pinili nga mga bersikulo gikan sa 1 Timoteo 6 ug Tito 2–3.

  • Unsa ang gitudlo ni Pablo mahitungod sa paghigugma sa salapi? (Tan-awa sa 1 Timoteo 6:7–10.) Sa unsa nga paagi nga ang gugma sa salapi mao ang “gamut sa tanan nga pagkadautan”? Sa unsa nga paagi nga kita makasiguro nga kita wala magpunting sa hilabihan diha sa salapi ug ubang materyal nga mga katigayunan? (Tan-awa sa 1 Timoteo 6:17–19; Jacob 2:18–19.)

    Si Elder Dallin H. Oaks mitudlo: “Wala gayuy dautan kalabut sa salapi. Ang Maayong Samarianhon migamit sa susamang salapi aron pag-alagad sa iyang isigkatawo nga gigamit ni Judas sa pagbudhi sa Magtutudlo. ‘Ang gugma sa salapi [mao] ang gamut sa tanan nga pagkadautan (1 Timoteo 6:10; italics gidugang.) Ang kritikal nga kalainan mao ang matang sa pagka-espirituhanon nga atong gigamit sa pagtan-aw, pagtimbang-timbang, ug pagdumala sa mga butang niini nga kalibutan” (sa Conference Report, Okt. 1985, 78; o Ensign, Nob. 1985, 63).

  • Sa iyang sulat ngadto nila ni Timoteo ug Tito, si Pablo mihatag og daghan nga mga panudlo mahitungod sa pagpuyo sa matarung nga paagi. Unsa nga tambag ang gihatag ni Pablo sa mosunod nga mga bersikulo: 1 Timoteo 6:11–12; 2 Timoteo 2:22; Tito 2:1–8, 12; 3:1–2, 8? (I-summarize ang mga tubag sa mga sakop sa klase diha sa pisara. Hisguti unsa ang gipasabut niini nga mga panudlo ug unsaon nato paggamit niini sa atong mga kinabuhi.)

Kon ikaw migamit sa pang-atensyon nga kalihokan, ipakita ang ginunting nga mga pulong nga Mosunod subay sa pagkamatarung ug mosalikway sa pagka dili diosnon.

Panapos

Ipasabut nga si Pablo nakahibalo nga siya hapit na patyon tungod sa iyang pagpamatuod ni Jesukristo. Apan siya usab nakahibalo nga tungod kay siya nagpuyo sa ebanghelyo, adunay gitagana alang [kaniya] nga korona sa pagkamatarung” (2 Timoteo 4:8). Paghatag og pagpamatuod sa kamahinungdanon sa pagbuhat sa matarung nga mga butang matag adlaw ug pagpabilin sa dalan aron kita makasulti uban ni Pablo, “Nakigbisug ako sa maayong pag-away, natapos ko na ang akong pagdalagan sa lumba, ako nagpabilin sa hugot nga pagtuo” (2 Timoteo 4:7).

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit sa usa o pipila niini nga mga ideya isip kabahin sa leksyon.

1. Dugang nga panaghisgutan sa 1 Timoteo

  • Unsa nga tambag ang gihatag ni Pablo mahitungod sa pag-ampo diha sa 1 Timoteo 2:1–3? Ngano nga kita mag-ampo alang sa tanan nga mga tawo? Sa unsa nga paagi nga kita makabuhat niini nga makahuluganon? Ngano nga kita kinahanglan nga mag-ampo ilabi na alang sa mga lider sa mga nasud?

  • Diha sa 1 Timoteo 3:1–7 si Pablo mihatag sa mga kwalipikasyon sa usa ka bishop. Ngano nga kini nga mga kinaiya mahinungdanon alang sa usa ka bishop?

  • Unsa ang gitudlo ni Pablo sa 1 Timoteo 5:8 mahitungod sa pag-atiman sa atong mga pamilya? Ngano sa inyong hunahuna nga si Pablo makusganon nga misulti batok niadtong kinsa wala motuman niini nga responsibilidad?

2. “Ang Dios wala mohatag kanato sa espiritu sa kahadlok” (2 Timoteo 1:7)

Hangyoa ang usa ka sakop sa klase sa pagbasa sa 2 Timoteo 1:7.

  • Unsa ang ubang mga butang nga gikahadlokan sa mga tawo dinhi sa kalibutan karon? Unsa nga kasigurohan ang gihatag ni Pablo ngadto ni Timoteo kalabut sa “espiritu sa kahadlok”? Sa unsa nga paagi nga inyong nasayran nga tinuod gayud kini nga kasiguroan sa inyong kaugalingong kinabuhi?

3. Pagkamaayo nga mga empleyado

Basaha ug hisguti ang Tito 2:9–10.

  • Sa unsa nga paagi nga ang tambag ni Pablo ngadto sa mga sulugoon niini nga mga bersikulo magamit ngadto sa mga empleyado? (Itudlo nga ang pulong pangawkaw nagkahulugan sa pagpangawat o paggamit sa dili maayo.) Sa unsa nga paagi nga ang mga empleyado usahay mangawat gikan sa ilang mga agalon? (Ang mga tubag mahimong maglakip sa pagpanghukhuk, pagkuha sa mga suplay alang sa personal nga gamit, o sa dili pagtrabaho sa tibuok adlaw.)

  • Unsa ang gisulti ni Pablo nga kita kinahanglan nga mobuhat kay sa mangawkaw? (Ipakita ang “maayong pagkamatinud-anon” o pagkamasaligan sa pagsalig. Unsa ang mga resulta nga inyong nakita sa pagpakita sa “maayong pagkamatinud- anon” sulod sa trabahoan?