Sunday School: Doktrina sa Ebanghelyo
Leksyon 25: ‘Dili ang Akong Pagbuot Maoy Matuman, Kon Dili ang Imo’

Leksyon 25

“Dili ang Akong Pagbuot Maoy Matuman, Kon Dili ang Imo”

Mateo 26:36–46; Marcos 14:32–42; Lucas 22:39–46

Katuyoan

Aron paglig-on sa mga pagpamatuod sa mga sakop sa klase nga sila makadawat sa kapasayloan, kalinaw, ug kinabuhing dayon tungod sa Pag-ula ni Jesukristo.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan, diin naghatag og kasayuran sa kasinatian sa Manluluwas didto sa Tanaman sa Getsemani: Mateo 26:36–46, Marcos 14:32–42, ug Lucas 22:39–46.

  2. Dugang nga basahonon: 2 Nephi 2:5–8; Alma 7:11–14; 34:8–16; 42:1–31; Doktrina ug mga Pakigsaad 19:15–24, Ang Giya ngadto sa mga Kasulatan, “Pag-ula,” ug “Getsemani.”

  3. Kon anaa ang hulagway nga Si Jesus Nag-ampo sa Getsemani (62175 853; Pakete sa mga Hulagway sa Ebanghelyo 227), gamita kini sa panahon sa leksyon.

  4. Pagdapit og pipila ka mga sakop sa klase sa pagtambong sa klase nga andam sa mubo nga pagpahayag sa ilang mga gibati mahitungod sa Pag-ula ni Jesukristo pinaagi sa pagbasa sa paborito nga tudling sa kasulatan mahitungod sa Pag-ula o pagbasa og kusog sa pipila ka mga linya gikan sa paborito nga himno sa sakramento.

  5. Sugyot alang sa pagtudlo: Ang Ginoo miingon, “Ayaw pagtinguha sa pagpahayag sa akong pulong, apan pagtinguha og una sa pag-angkon sa akong pulong” (D&P 11:21). Aron makatudlo sa epektibo nga paagi gikan sa mga kasulatan, ikaw kinahanglan nga magtuon ug mamalandong niini matag adlaw. Sa kanunay mag-amuma sa imong pagpamatuod sa gahum ug katinuod niini. (Tan-awa sa Teaching, No Greater Call, [36123], mga pahina 14–17.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Daghang mga tuig sa wala pa si Elder Orson F. Whitney ma-ordenahi nga Apostol, siya nakadawat og panan-awon sa Manluluwas didto sa Tanaman sa Getsemani. Basaha ang mosunod nga kinutlo, diin si Elder Whitney mihulagway sa iyang panan-awon:

“Ako mora pud og didto sa Tanaman sa Getsemani, usa ka saksi sa pag-antus sa Manluluwas. Ako nakakita kaniya ingon ka yano sa akong pagkakita kang bisan kinsa. Nagbarug sa luyo sa usa ka kahoy diha sa atubangan, ako nakakita ni Jesus, uban ni Pedro, Santiago ug Juan, samtang sila miagi sa gamay … nga ganghaan diha sa akong tuo. Mibiya sa tulo ka mga Apostoles didto, human sila sultihi sa pagluhod ug sa pag-ampo, ang Anak sa Dios miadto sa pikas bahin sa Tanaman sa Getsemani, diin Siya usab miluhod ug nag-ampo. Kini mao ang sama nga pag-ampo nga nasinati sa tanan nga magbabasa sa Biblia: ‘Amahan ko, kon mahimo man, isaylo lang kanako kining kopa; gani dili sumala sa akong pagbuot, kon dili sa imo.’

Samtang Siya nag-ampo ang mga luha midagayday sa iyang nawong, nga nagatubang kanako. Gisakitan kaayo ko sa akong nakita nga gani ako usab mihilak, tungod sa tinud-anay nga kalooy. Ang akong tibuok kasingkasing nalooy kaniya; ako naghigugma kaniya sa akong tibuok kalag, ug nangandoy nga mauban kaniya ingon nga ako walay laing gipangandoy.

“Pagkataud-taud Siya mibarug ug milakaw ngadto diin ang mga Apostoles nagluhod … nakatulog pag-ayo! Siya hinay nga miuyog kanila, mipukaw kanila, ug uban sa tingog sa malumo nga pagbadlong, wala maapektohi bisan gamay nga pagpakita og kasuko o ka walay pailub, mihangyo kanila sa yano kon sila ba dili makatukaw uban kaniya sulod sa usa ka oras. Didto Siya, uban sa hilabihan ka bug-at nga sala sa kalibutan diha sa iyang mga abaga, uban sa pag-agulo sa matag tawo, babaye ug bata nga miigo sa iyang mabination nga kalag––ug sila dili gayud makatukaw uban kaniya sulod sa usa ka mubo nga oras!

“Mibalik ngadto sa iyang dapit, Siya mihalad sa sama nga pag-ampo ingon sa una; unya mibalik ug nakit-an na sab sila nga nangatulog. Siya mipukaw pagusab kanila, miawhag pag-usab kanila, ug sa makausa pa mibalik ug nag-ampo. Kini nahitabo sa tulo ka higayon” (Through Memory’s Halls [1930], 82).

Ipakita ang hulagway ni Jesus nga nag-ampo sa Getsemani. Hangyoa ang mga sakop sa klase sa paghunahuna bahin sa ilang gugma alang sa Manluluwas ug unsa kaha ang ilang bation kon sila nakakita nga siya nag-ampo diha sa Tanaman sa Getsemani sa gabii sa dili pa ang iyang Paglansang sa Krus. Pagdapit og pipila ka mga sakop sa klase sa pagpaambit sa ilang mga hunahuna.

Paghisgut ug Paggamit sa Kasulatan

Kini nga leksyon ug ang leksyon 26 maghisgut mahitungod sa Pag-ula––ang kinabubut-on nga paghimo ni Jesukristo sa pagdala diha sa iyang kaugalingon sa kamatayon ug sa mga sala ug mga kahuyang sa tanan nga katawhan. Kini nga leksyon nagpunting sa kasinatian sa Manluluwas diha sa Tanaman sa Getsemani, samtang ang leksyon 26 maghisgut sa iyang Paglansang sa Krus. Kini mahinungdanon nga hinumduman nga ang Pag-ula naglakip sa pag-antus sa Manluluwas sa tanaman ug diha sa krus.

Si Presidente Ezra Taft Benson mitudlo: “Sa Getsemani ug didto sa Kalbaryo, Siya mihimo sa walay kinutuban ug walay katapusan nga pag-ula. Kadto mao ang labing dako nga buhat sa gugma nga natala sa kasaysayan. Sa ingon Siya nahimong atong Manluluwas—nagtubos kanatong tanan gikan sa pisikal nga kamatayon, ug nagtubos kanato gikan sa espirituhanong kamatayon niadtong kinsa motuman sa mga balaod ug mga ordinansa sa ebanghelyo” (The Teachings of Ezra Taft Benson [1988], 14).

1. Ang Manluluwas midala diha sa iyang kaugalingon sa atong mga sala ug mga kaluyahon.

Tukia ang Mateo 26:36–46; Marcos 14:32–42; ug Lucas 22:39–46. Dapita ang mga sakop sa klase sa pagbasa og kusog sa pinili nga mga bersikulo.

  • Unsa ang gihangyo ni Jesus sa iyang mga Apostoles nga buhaton didto sa Tanaman sa Getsemani? (Tan-awa sa Lucas 22:39–40.) Ngano nga mihangyo man si Jesus sa mga Apostoles sa pag-ampo? (Tan-awa sa Lucas 22:40.) Sa unsa nga paagi nga ang pag-ampo makalig-on kanato batok sa mga pagtintal?

  • Unsa ang gihangyo ni Jesus nilang Pedro, Santiago, ug Juan nga buhaton didto sa Tanaman sa Getsemani? (Tan-awa sa Mateo 26:38, 41. Ipasabut nga kining paggamit sa pulong bantay nagpasabut nga magtukaw.) Sa unsa nga paagi nga ang sugo sa pagbantay, o sa pagtukaw, atong magamit samtang kita naninguha sa pagsunod sa ebanghelyo? (Tan-awa sa 2 Nephi 4:28; Alma 7:22; 32:26–27.)

  • Ngano nga si Jesus andam man sa pag-uyon sa hilabihang pag-antus nga siya nahibalo man nga iyang masinati didto sa Tanaman sa Getsemani? (Tan-awa sa Mateo 26:39, 42, 44.) Unsa ang atong makat-unan gikan sa pag-ampo sa Manluluwas didto sa Getsemani? Sa unsa nga paagi nga kamo napanalanginan sa diha nga kamo mituman sa kabubut-on sa Langitnong Amahan?

  • Human nga si Jesus miingon nga siya mobuhat sa pagbuot sa Langitnong Amahan, “adunay anghel nga mipakita ngadto kaniya gikan sa langit, nagligon kaniya” (Lucas 22:43). Unsa ang gitudlo niini kanato mahitungod sa atong Langitnong Amahan? (Ang mga tubag mahimong maglakip nga siya magligon kanato samtang kita mapainubsanon nga mobuhat sa iyang pagbuot.)

  • Unsa ang nasinati sa Manluluwas didto sa Getsemani? (Tan-awa sa D&P 19:16–19; Lucas 22:44; Mosiah 3:7; Alma 7:11–13.)

    Si Elder James E. Talmage mitudlo: “Ang pag-antus ni Kristo didto sa tanaman dili matugkad pinaagi sa hunahuna nga may kinutuban, sa kakusog ug sa hinungdan niini…. Siya nanglimbasog ug miagulo ubos sa kabug-at ingon nga walay lain nga nilalang nga nagpuyo dinhi sa yuta nga daw gani makahanduraw nga kini mahimo. Dili ang pisikal nga kasakit, ni ang mental nga kasubo lamang, maoy hinungdan sa iyang pag-antus sa ingon nga kasakitan diin nakapahimo sa pag-ula og dugo gikan sa matag lungag sa panit; apan usa ka espirituhanon nga pag-antus sa kalag ingon nga ang Dios lamang ang may gahum sa pagsinati…. Nianang takna sa kasakitan si Kristo nakasarang ug nakabuntog sa tanan nga kakuyaw nga ikapahamtang ni Satanas, ‘ang prinsipe niini nga kalibutan,’ … Sa uban nga paagi, nahinabo ug sa hilabihan ka tinuod nga dili masabut sa tawo, ang Manluluwas midala diha sa iyang kaugalingon sa kabug-at sa mga sala sa kalibutan gikan ni Adan ngadto na sa katapusan sa kalibutan” (Jesus the Christ, 3rd ed. [1916], 613).

    Si Elder Neal A. Maxwell miingon: “Isip kabahin sa Iyang walay kinutuban nga pag-ula, si Jesus nahibalo ‘sumala sa unod’ sa tanan nga atong maagian (Alma 7:11–12). Siya mipas-an sa atong mga sala, sa mga kaguol, sa mga kasubo, ug … sa mga kasakit sa matag tawo, babaye, ug bata (tan-awa sa 2 Nephi 9:21)” (sa Conference Report, Abr. 1987; o Ensign, Mayo 1987, 72).

2. Kita nagkinahanglan sa Pag-ula ni Jesukristo.

  • Ngano nga kita nagkinahanglan man sa Pag-ula ni Jesukristo? (Tan-awa sa Alma 34:9.)

    1. Tungod sa Pagkapukan ni Adan ug ni Eva, kita makaangkon sa pisikal nga kamatayon, nga mao ang panagbulag sa lawas ug sa espiritu (Moises 6:48).

    2. Kon kita makasala, kita magdala sa espirituhanon nga kamatayon diha sa atong mga kaugalingon tungod kay kita mibulag sa atong mga kaugalingon gikan sa Dios. Ang atong mga sala nakahimo kanato nga dili limpyo ug dili makapahimo kanato nga mopuyo uban sa Dios (1 Nephi 10:21).

    3. Tungod kay kita dili makabuntog sa pisikal ug espirituhanon nga kamatayon pinaagi sa atong mga kaugalingon, ang Langitnong Amahan mipadala sa iyang Bugtong nga Anak aron paghalad sa Pag-ula (Juan 3:16; 2 Nephi 2:5–9).

  • Unsa nga mga panalangin ang maanaa kanato tungod sa matubsanon nga sakripisyo sa Manluluwas? Unsa may buhaton aron makadawat niini nga mga panalangin?

    1. Tungod kay ang Manluluwas nagpakamatay ug nabanhaw, kitang tanan mabanhaw, makabuntog sa pisikal nga kamatayon (Mosiah 16:7–8).

    2. Tungod kay siya midala sa iyang kaugalingon sa atong mga sala, kita makahinulsol sa atong mga sala ug mapasaylo, maghimo kanato nga limpyo ug takus nga mopuyo uban sa Dios (Alma 7:13–14; Mga Artikulo sa Hugot nga Pagtuo 1:3).

    3. Tungod kay siya midala sa iyang kaugalingon sa atong mga kaluyahon, siya makasabut sa atong mga kalisdanan ug mahibalo kon unsaon sa pagtabang kanato (Alma 7:11–12). Kita makadawat og kalinaw diha kaniya samtang kita mapainubsanon nga mosunod kaniya (D&P 19:23).

    Si Elder Marion G. Romney mipasabut nga pinaagi sa Pag-ula ang tanan nga tawo maluwas gikan sa pisikal nga kamatayon ug ang mahinulsulon ug masulondon maluwas usab gikan sa sala:

    “Gikinahanglan ang pag-ula ni Jesukristo aron mahiusa ang mga lawas ug mga espiritu sa mga tawo diha sa pagkabanhaw. Ug busa ang tanan sa kalibutan, mga tumutuo o ang dili mga tumutuo, utangan ngadto sa Manunubos tungod sa ilang piho nga pagkabanhaw, tungod kay ang pagkabanhaw mahimong malukpanon ingon man ang pagkapukan, nga midala sa kamatayon sa matag tawo.

    “Adunay lain nga bahin sa pag-ula diin nakahimo kanako sa paghigugma sa Manluluwas og labaw pa, ug mipuno sa akong kalag sa pagpasalamat nga dili malitok. Kini mao nga agi og dugang sa pagtubos alang sa mga kalapasan ni Adan, tungod niana nagdala sa pagkabanhaw, ang Manluluwas pinaagi sa iyang pag-antus mibayad sa utang sa akong mga sala. Siya mibayad sa utang alang sa inyong mga sala ug alang sa mga sala sa matag buhi nga tawo nga nagpuyo dinhi sa yuta o ni bisan kinsa nga magpuyo sa pagkamortal dinhi sa yuta. Apan kini iyang gibuhat nga adunay kondisyon. Ang mga kaayohan niini nga pag-antus alang sa atong indibidwal nga mga kalapasan dili moabut kanato nga walay kondisyon dili parehas sa pagkabanhaw nga moabut nga dili igsapayan bisan unsa man ang atong buhaton. Kon kita moambit sa mga panalangin sa pag-ula kon ang atong indibidwal nga mga kalapasan ang hisgutan, kita kinahanglan gayud nga motuman sa balaod.

    “ … Kon kita nakahimo og sala, kita mahibulag sa Dios ug dili angayan nga mosulod ngadto sa iyang atubangan. Walay mahugaw nga butang nga makasulod ngadto sa iyang atubangan. Kita dili makahimo pinaagi lamang sa atong mga kaugalingon, bisan unsa pa ang atong buhaton, sa pagkuha sa atong mga kaugalingon sa lama nga anaa nato ingon nga sangputanan sa atong kaugalingon nga mga kalapasan. Kana nga lama kinahanglan nga pagahugasan pinaagi sa dugo sa Manunubos, ug siya mihimo og paagi nga kanang lama mahimong mawala. Kana nga paagi mao ang ebanghelyo ni Jesukristo. Ang ebanghelyo nagsugo nga kita motuo sa Manunubos, modawat sa iyang pagula, maghinulsol sa atong mga sala, magpabunyag pinaagi sa pag-unlod alang sa kapasayloan sa atong mga sala, modawat sa gasa sa Espiritu Santo pinaagi sa pagpandong sa mga kamot, ug sa pagpadayon nga matinud-anon sa pagtuman, o mobuhat kutob sa atong mahimo, sa mga baruganan sa ebanghelyo sa tanan nga mga adlaw sa atong mga kinabuhi” (sa Conference Report, Okt. 1953, 35–36).

Dapita ang gisangunan nang daan nga mga sakop sa klase sa pagpaambit sa mga pasundayag nga ilang giandam (tan-awa sa seksyon sa “Pagpangandam”).

Panapos

Pagpamatuod kang Jesukristo ug pagpadayag sa imong pagpasalamat alang sa iyang Pag-ula. Kon angay, hangyoa ang mga sakop sa klase sa pagbuhat sa ingon.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. Pagpasalida sa video

Ang ikalima nga bahin sa “New Testament Customs,” usa ka pinili gikan sa New Testament Video Presentations (53914), nagpasabut nga ang Getsemani mao ang “pigsanan sa oliba.” Kon ikaw mopasalida niining bahina, hisguti kon sa unsa nga paagi nga ang Getsemani mao ang angay nga ngalan alang sa tanaman diin ang Manluluwas mipas-an sa atong mga sala.

2. “Ang Tigpataliwala”

Si Elder Boyd K. Packer migamit og usa ka sambingay aron pagtudlo kon sa unsa nga paagi nga ang Pag-ula ni Jesukristo nakapalingkawas kanato gikan sa sala samtang kita maghinulsol ug maghupot sa mga sugo. Ikaw mahimo nga mopaambit niini nga sambingay aron pagtabang sa mga sakop sa klase nga makasabut sa panginahanglan sa Pag-ula. Ang sambingay makit-an diha sa mosunod nga mga tinubdan:

  1. Mga Baruganan sa Ebanghelyo [1997], mga pahina 70–73.

  2. “The Mediator,” usa ka bahin sa Book of Mormon Video Presentations (53911).

  3. Conference Report, Abr. 1977, mga pahina 79–80; o Ensign, Mayo 1977, mga pahina 54–55.