Kapitulo 13
Jesus ug ang Balay sa Iyang Langitnong Amahan
Si Jesus miadto sa templo sa Jerusalem. Daghang mga tawo ang anaa didto aron maghimo og sakripisyo pinaagi sa pagpatay og usa ka hayop ug sunugon kini ibabaw sa altar. Ang sakripisyo mitabang sa mga tawo nga maghunahuna mahitungod sa Manluluwas, kinsa mosakripisyo sa Iyang Kaugalingon pinaagi sa pag-antus ug pagpakamatay alang kanila.
Ang uban nga mga tawo walay hayop nga ikasakripisyo. Ang mga tawo namaligya og mga hayop ngadto kanila diha sa templo. Ang mga namaligya gusto nga makakwarta og daghan. Sila wala maghunahuna mahitungod sa Dios.
Si Jesus nakakita sa mga tawo nga namaligya og mga hayop diha sa templo. Siya miingon nga ang templo balay sa Langitnong Amahan, usa ka dapit nga balaan. Siya miingon nga ang mga tawo kinahanglan nga dili mopalit o mobaligya og mga butang didto.
Si Jesus mibuhat og latigo nga pisi, gipanglintuwad ang mga lamesa, gipanglabay ang mga salapi diha sa sawog, ug gipapahawa sa templo ang mga namaligya. Siya dili motugot kanila nga magbuhat og dautan nga mga butang diha sa balay sa Langitnong Amahan.