Kapitulo 39
Jesus Miayo sa Tawo nga Buta
Usa ka adlaw niana si Jesus naglakaw uban sa Iyang mga disipulo. Nakakita sila og usa ka tawo kinsa natawo nga buta. Ang mga disipulo nangutana kon ang tawo nabuta ba tungod kay siya nakasala o tungod ba kay nakasala ang iyang mga ginikanan.
Ang Manluluwas miingon nga wala sa mga ginikanan o sa tawo ang nakasala. Ang tawo nabuta aron si Jesus moayo kaniya ug mapakita sa mga tawo ang gahum sa Dios.
Si Jesus nag-umol og lapok gikan sa abug. Iya kining gibutang sa mga mata sa buta nga tawo. Si Jesus misugo sa tawo sa paghugas sa iyang mga mata.
Human gayud ang tawo mihugas sa lapok gikan sa iyang mga mata, makakita na siya!
Sa dihang ang iyang mga silingan nakakita kaniya, sila wala makasiguro kinsa siya. Siya miingon kanila nga si Jesus ang miayo kaniya. Ang mga silingan midala kaniya ngadto sa mga Pariseo. Ang tawo misulti sa mga Pariseo nga si Jesus ang miayo kaniya.
Ang uban nga mga Pariseo nagtuo nga si Jesus usa gayud ka matarung nga tawo. Ang uban nagtuo nga Siya usa ka makasasala. Sa dihang ang tawo miingon nga si Jesus usa ka matarung nga tawo, ang uban nga mga Pariseo nangasuko ug gipapahawa ang tawo.
Nakit-an ni Jesus ang tawo. Iyang gipangutana ang tawo kon siya mituo ba sa Anak sa Dios. Ang tawo nangutana kon kinsa ang Anak sa Dios. Si Jesus miingon nga Siya mao ang Anak sa Dios, ug ang tawo misimba Kaniya.