Siotai el mo Metecholb e Moterekokl

Kid a rokui el ngelekel a Chedam er a Babeluades. Kede mlei er tial beluulechad el morngii a techelled el mesuub, mukeroul, e mo uai Ngii me bol sebeched el muut el mora Rengedel (mesa Moses 1:39). Ng diak el sebeched le mo uai Ngii a lechub e deluut el mo er Ngii a lak a chedaol ngesou el dengai. A Demad er a Babeluades a uldureklii a Ngelekel, el Jesus Kristo, el mo tngakireng el kired e sobecheklid er a rngedel a kodall (mesa 3 Nephi 27:13–22).

Ng sebeched el nguu a klisichel a olsobel el Kristo lokiu a klaumera er kid er Ngii el mo ouchel a rengud, e metecholb, e nguu a sengk er a Chedaol Reng lokiu oterkekled, e outekangel el mo ra ulebongel. A otirekled er a telbiil er a techolbechelid a kot el dauch lomak er kid el mo er a Dios me luchul e a Chedaol Reng a omekbeches, melisiich, e melodech er kid el mo ungil. Tiaikid el teletael er a omengikiid a okedongall el cheroll er a reng. (Mesa 2 Nephi 31:7, 13–14, 20–21; Mosiah 5:1–7; 18; 27:24; 3 Nephi 27:20; Johanes 3:5.)

A cheroll er a reng a omuchel sel demetecholb er a ralm ma Chedaol Reng. A techolbechelid a klou el deureng e chedaol ruoll dolsingch el kirel. Sel demetecholb loba ngariou e delemdemk el reng, e kede omuchel er a beches el klengar loba klisichel a Dios. Uriul er a techolbechelid e kede moterekokl, e melemolem el melisiich er kid sel de klikiid e dolai er a sakrament. (Mesa 2 Nephi 31:13; Mosiah 18:7–16; Moroni 6:2; Doctrine and Covenants 20:37.)

Sel molchesuar Chedaol Reng, e msiotai er a rechad el mo metecholb e moterekokl. Tia sebechel duubech er a chelsel a ngii di el suobel.

Molisechakl a suobel er a techolbechelid e mngesuterir a rechad el mo medengelii osischeklel a Kristo (mesa suobel 3). Molisechakl el kirel a klou el ultutelel ma deureng er a telbiil er a techolbechelid, me a klausubes er a klengit, me a ngeiul a sengk er a Chedaol Reng.

Mkedmekelterir a rechad el kirel a siotai el mo metecholb el mo ungil medengei el kmo te mla mo medengei aikal osisechakl me a telbiil el bo loruul. A telbiil er a techolbechlid a ua ikakid:

• Mo semeriar el oungakl er a ngklel a Jesus Kristo.

• Moltirakl a llechul a Dios.

• Mesiou er a Dios ma rebebil.

• Outekangel el mo er a ulebongel. (Mesa suobel 4.)

Ke locha mo ouchais aikang:

“Sel de metecholb, e ‘kede sioning er medal a [Dios] el kmo [kede] mla soiseb er a telbiil lobengkel, e [mo] mesiou er ngii e oltirakl a llechul.’ Sel doltirakl er tiaikid el telbiil, e Ngii a yaksok el kmo Ngii a mo otengelii a Reng er Ngii el mei er [kid]’ (Mosiah 18:10).”

A siotai el kirel a techolbechelid a kirel kmal komakai e bleketakl. Ng sebechem el kmo:

“Ng sebechem el mo oltirakl er a okesiu er a Jesus Kristo el mo metecholb er a chad el ngii a mla mechedaol mo meruul er tial chedaol ruoll? Aki mo ngosukau el kudmeklau el kirel a techolbechelid. Ki oumerang el kmo ke mo keldmokl er a [kebesengil a bui]. Ng sebechem el kudmeklau el kirel a techolbechelid er tiaikid el sils?”

Ng di uaia ikel bebil er a siotai, e myaksok a meklou el klengeltengat el bol ngai a rechad sel kengei er a siotai el mo metecholb e oltirakl a telbiil lobengkel. Mouchais er a klaumera er kau er a ikal klengeltengat.

Mouchais el kmo a techolbechelid me a olterekokl a diak el ngii a ulebongel. Ng bai, melutk el kirel a rael er a telbiil el uchul a urunguled, deureng, me a klisichel a Dios el mora klengar er a chad (mesa Mosiah 27:25–26). Uriul er a rechad a lemetecholb e lemoterekokl, eng sebechir el mo klikiid lokiu a Chedaol Reng sel lolemolem el ngara rolel a telbiil.

A lungil, e msiotai er tirkal molisechakl er tir el mo mesa teletelel a techolbechelid me a taem er a miting er a sakrament el ngarngii a tara chad el mo moterekokl.