“Bliongel 3: Suobel 3—Ebangkelio er a Jesus Kristo,” Molisechakl er a Ebangkelio er Ngak: Olechotel sel Domerk er a Ebangkelio er a Jesus Kristo (2023)
“Bliongel 3: Suobel 3,” Ebangkelio er a Jesus Kristo
Bliongel 3: Omesuub 3
Ebangkelio er a Jesus Kristo
siasing/Llecheklel
Sel Ongeru el Mei, mla er a Harry Anderson
Rechad a Locha mo Omdasu
Ng techa a Jesus Kristo? Ng mekera e sebechel ngosukak me a telungalek er ngak?
Ngera belkul sel ngarngii a klaumerang er kid er a Jesus Kristo? Ng mekera ea klaumera er kid er Ngii lomekngeltengat er a klengar er ngak?
Ngera belkul sel de bo douchel?
Ak mekera knguu a budech er a Dios me a klausubes ruriul er a mekngit lomelilt?
Ngera moktek er a techolbechelid?
Ngera a sengk er a Chedaol Reng?
Ngera belkul a outekangel el mo er a ulebongel?
A ebangkelio er a Jesus Kristo a seikid a ngoikid el mora Kristo. Ng kmal bleketakl me a kekerei el ngalek a sebechel mo medengelii. Tial osisechakl a kirel a ebangkelio me a suobel mlara Kristo, uldimukl a klaumera er a Jesus Kristo, ouchelreng, techolbechelid, sengk er a Chedaol Reng, me a outekangel el mora ulebongel. Ng dirrek el kirel a teletelel a ebangkelio a lomekngeltengat er a rokui el ngelekel a Dios.
A tekoi el ebangkelioa belkul a kmo “ungil chais.” A ebangkelio er a Jesus Kristo a ungil chais e lengii el meskid a suobel—diak a ngemedel klemerang—ng kired el mei er Ngii me bode sobel (mesa 1 Nephi 15:14). A ebangkelio a olisechakl er kid a teletelel a de kiei lungil, el ngarngii a belkul a klengar er kid. Sel ungil chais er a ebangkelio a meskid a rael el mo nguu a klausubes er a klengit, mo klikiid, me deluut el mo obengkel a Dios.
Uldasu el kirel a Olsisechakl
Tial bliongel a meskid a beldukl el okesiu el molngeseu er a omengedmeklem el mo olsisechakl. Tia dirrek el uldimukl a okesiu lousbech a ker me a ongit el kau a sebechem el ousbech.
Sel mongedmokl er kau el mo olsisechakl, bomungil meluluuch el kirel a derta el chad me a teletael el ngara chelsel me a ikel chedaol tekoi el lousbech. Molilt el kmo ngera er ngii a kot el mo ngosuterir me bo molisechakl. Bom kldmokl el mo meketakl a tekoi el rechad a locha diak el sal medengei. Bom tkur a taem el kau olsisechakl, bo molatk el kudmeklii a osisechakl el di kedeb.
Bom ngilt a chedaol llechukl el mo ousbech sel molisechakl. Sel “Doctrinal Foundation” el tara bliongel er a osisechakl a uldimukl a betok el chedaol llechukl el lungil mousbech.
Bo momes el kmo ngera el ker a ungil bo moker sel molsisechakl. Bo momes a ongit el kau a sebechem el mesterir el ngii a mo mengesuseu er a derta el chad el mo meruul.
Bo molsiich a ikel yaksok el klengeltengat er a Dios, e bo mochotii a klaumera er kau er a suobel el kau olsisechakl.
siasing/Llecheklel
re misionari lolisechakl er a telungalek
Ngera Sebechem el Olsisechakl el mo er a Rechad er a Chelsel a teruich me a eim el mora lluich me a eim el Bung
Mngiltii a imong malechub eng teblong er a ikal beldukl el llach el kau a mo olisechakl. Sel suobel el ngii a uchetemel aikal bek el llach a ulecholt ruriul er tial beldukl el tekoi.
Chedaol el Urerel a Jesus Kristo
A Dios a uldureklii a Betik ra Rengul el Ngelekel, el Jesus Kristo, el mera beluulechad el mo olsobel er kid er a kngtid me a kodall.
Ele a uchul sel mlodars el tngakireng er a Jesus, eng sebeched el mo mukbeches er a kngtid e mo klikiid sel bo douchel ra rengud.
Uriul er a le mekerus a Jesus, e Ngii a milekiis ra kodall. E le a uchul a Okisel a Jesus, e kid a lmuut el mo ngar ruriul er a demad. Tia belkul a kmo a bedengel me a delbengel a derta el chad a lmuut el mo dmak, me a derta er kid a mo kiei el mo cherechar el cherrungel, loba mla mo ngar el bedenged.
Klaumerang er a Jesus Kristo
A klaumerang sei ea kot el llechul a ebangkelio er a Jesus Kristo.
A klaumerang er a Jesus Kristo uldimukl a mesisiich el rengud el kmo Ngii a Ngelekel a Dios e oumera er Ngii el Osobel e Olsobel.
A klaumerang er a Kristo a osisechakl er a omeruul me a klisiich.
Kid a melisiich a klaumerang er kid lokiu a nglunguuch, omesuubel a chedaol llechukl, me a otireklel a llach.
Ouchel Reng er a Kngtid
Klaumerang er a Jesus Kristo a ngoikid el mo ouchel a rengud. A ouchel reng ra klengit a rael el ngii a ngoikid el bedul a Dios e mo cheroid er a klengit. Me sel bo douchel, e a omerrelled, soad, ma uldesued a mo mengodech el mo tabesul ngii me a soal a Dios.
Sel de mera louchel a rengud, ea Dios a ousubes er kid. A ousubes a sebechel e le Jesus Kristo a uldersii el kirel a kngtid.
Me sel douchel, e kede mo ngara budech e leng mo mededaes a rengud me a uldesued.
A ouchelreng er a klengar er kid a di ngarngii lomeruul. A Dios a lmuut el ngoikid sel bek el taem el bo douchel a rengud. Ng diak a tang mel chitid.
Techolbechelid: Kot el Telbiled lobengkel a Dios
A techolbechelid seikid a tetelel sel de kot el soiseb er a telbiil er a deleuill lobengkel a Dios.
A techolbechelid a eru techetechel: techolbechelid lokiu a ralm me a Reng. Sel de metecholb e moterkokl, eng mechoit a kngtid, meng meskid a beches el bakes er a klengar.
Kid a metecholb el mo moduleb, lokiu a okesiu er a Jesus.
A re mekekerei el ngalek a diak el bol metecholb dil merekmo bol eai a rekrir. A rengalek el mad ruchei ra bol eai a rekril a mo suobel lokiu a Tngakireng er a Jesus Kristo.
Ke de melai er a chedaol belsoil ra bek el sandei el mo melatk er a uldersel a Jesus e mo omekbeches a telbiled lobengkel a Dios.
Sengk e ra Chedaol Reng
A Chedaol Reng a ongedei el chedal a Kle Dios.
Nguriul ra de metecholb, e kede nguu a sengk ra Chedaol Reng lokiu chedaol ruoll er a olterkokl.
Sel de nguu a sengk er a Chedaol Reng, eng mo sebechel lobengked er a klengar er kid a lsekum kid a kedung.
A Chedaol Reng a omekbeches er kid, omekrael er kid, mengelaod er kid, e ngosukid el mo medengelii a klemerang.
Outekangel el mo er a Ulebongel
A outekangel a uldimukl er ngii a melemolem el ngara klaumerang er a Kristo er a bek el sils. Kede melemolem el oltirakl a telbiled lobengkel a Dios, ouchela rengud ra kngtid, melai odbechel Chedaol Reng, e melai er a chedaol belsoil.
Sel le blak a rengud el osiik rolel moltirakl er a Jesus Kristo, ea Dios a yaksok el kmo kede monguu a diak a ulebengelel klengar.
A Ebangkelio er a Jesus Kristo a Omekngeltengat er a Rokui el Ngelekel a Dios.
A kiei loltirakl er a ebangkelio a meskid a klou el deurreng, omekrael a doruul, e melisiich a deleuill er kid.
KId a sebechel el meral mo ungil a rengud—el chad me a de telungalek—sel de kiei el oltirakl a osisecheklel a Jesus Kristo.
Ngokiu a ebangkelio er a Jesus Kristo, ea telungalek a mukngeltengat er tial klengar e sebecherir el mo dmak el mo cherechar e kiei lobengkel a Dios.
Ker el Kau a Sebechem Loker er a Rechad
Aikal beldukl el ker a di okesiu el kau a sebechem loker er a rechad. Aikal ker a sebechel ngosukau er a cheldecheduch meng morngii a belkul a cheldechedemiu el mo medengei a lousbech a chad ma uldesuel.
Ngera omodengei el kirel a Jesus Kristo?
Ngera belkul merkau el kmo ngarngii a klaumerang er kau er a Jesus Kristo?
Ngera soam el melodech er a klengar er kau?
Ngera ke medengei el kirel a ouchel reng?
Ngera ke medengei el kirel a techolbechelid? Ngera sebechem el rulii er chelechang el mengedmokl el kirel a techolbechelid?
Mekera sebechel Chedaol Reng el ngosukau er a omerolem el lemuut el mora Dios?
Ngera metacherbesul el kau me a telungalek er kau a chelbangel? Ng sebecham louchais a bebil er a teletael el ebangkelio er a Jesus Kristo a sebechel ngosukau?
Ongit el Sebechem Lodars
Ng sebechem lolengit er a Dios loba nglunguuch el mo ngosukau el momedengei el kmo aikal ki bla molisechakl a klemerang? (Mesa “Teaching Insights: Prayer” ngara ulebengelel a suobel 1.)
Ng sebechem el mera ikelesia er chelechal Sandei el mo mesuub a lmuut el bebil er a ikal ki bla molisechakl?
Kau ng sebechem el mo menguiu er a Babier er a Mormon e meluluuch el mo medengei el kmong tekingel a Dios? (Locha ungil obsang a bebil er a bliongel malechub a bades.)
Tial bliongel a meskau a suobel me a bades el bo mosuub el mo melisiich a klemedengei me a klaumerang er kau er a ebangkelio e ngosukau el olisechakl.
siasing/Llecheklel
Tirka el Teruich me a terung a Mlodurokl er a Jesus, mlara Walter Rane
Chedaol Urrerel a Jesus Kristo
A Chedam er a Babeluades a uldureklii a Dital Ngelekel, el Jesus Kristo, el mera beluulechad me bol sebeched el rokui el mo nguu a deureng er tial beluulechad me a diak a ulebengelel klengar er sel mei el beluulechad. Me tial ebangkelio, el ungil chais, … el [Jesus Kristo] a mlei er a beluulechad … el mo ngmai a kngtil a beluulechad, me bol klikiid a beluulechad, e bol beches er a ikel rokui el chelbirukel; me ngokiu ngii ea rokui a mo suobel mesa (Doctrine and Covenants 76:40–42).
Sel de chad, e kede rokui el ruebet ra klengit, ke de rokui el di mo mad. Klengit me a kodall a tomer rekid el monguu a diak a ulebengelel klengar lobengkel a Dios dil merekmo lengarngii a Olsobel er kid (mesa 2 Nephi 9). Uchei er a lobeob a beluulechad, ea Chedam er a Babeluades a ngileltii a Jesus Kristo el mo olsobel er kid. Ngar sel kot el ngarbab el teletelel a beltikelreng, ea Jesus a mlei er a beluulechad el mo oltaut er sel chedaol el urerel. Ngii a rirelii meng mo sebeched el mo klikiid er a kngtid, e ngii a rirelii meng sebeched el lemuut el me ngar sel demad.
A Jesus Kristo a kiliei er a klikiid el klengar. Sera bochul merek a urerel er a beluulechad, e Ngii a ngilai a rokui el kngtid lokiu sel ongarm el mlo er ngii er a lengara Sers er a Gethsemane me sera le mekerus (mesa 1 Nephi 11:33). A ongarm el blor ngii a Jesus a mle ulis el mesisiich meng rirelii el mo omritel er a ringel, e mlo olengerngars a bedengel er a rasech mesa (Doctrine and Covenants 19:18). Uriul er a le Mekerus, ea Jesus a milekiis er a kodall, el mlo mesisiich er a kodall. Uldekial rokui, aikal mlekedmokl el tekoi a Tngakireng er a Jesus Kristo.
A kngtid a rullid el mo kikiongel a chedaol klengar er kid, “e diak a kikiongel el sebechel kiei lobengkel a Dios” (1 Nephi 10:21). A lmuut el tang, a llechul a kerrekeriil a ultebechel ngarngii a belsel a klengit.
A uldersel a tngakireng er a Jesus a meskid a techall el mo mukbeches er a kngtid e mo klikiid sel bo douchel a rengud ra kngtid. Tia dirrek el meskid a techall el mo sumecheklii a longerchir rengii a llach (mesa Alma 42:15, 23–24). A Osobel a millekoi el kmo, Ngak … a mlo chuarm er aikal tekoi el kirir a rokui, me lak el bol charm a lsekum me te mouchel ra kngterir; endi a lsekum meng diak el bo louchel a kngterir e ng kirir el mo chouarm el di uai ngak (Doctrine and Covenants 19:16–17). A lsekum eng dimlak el Jesus Kristo, ea klengit a torob a rokui el doureng er a ngarmedad lobengkel a Chedam er a Babeluades.
Sera bo lodersii el tenget el kired, ea Jesus a dimlak el choit a ngerchelel a derta er kid. Ng kired el mo oumerang er Ngii, ouchel ra kngtid, e melasem el mengull a llechul. Sel douchel a rengud, ea Jesus a nguu a lemeltel er a klechubechub el ngara Demal el meskid (mesa Moroni 7:27–28). Ele uchul a Osobel el ngilai a rokui, ea Chedam er a Babeluades a ousubes er kid, ngmai a rokui el berraod ma meringel uldesued ra kngtid (mesa Mosiah 15:7–9). Kid a mo klikiid a klengar er kid meng mo sebechel mengemedaol er kid el morsel ngarngii a Dios.
A chedaol urerel a Jesus a dirrek el olsobel er kid er a kodall. E le Ngii el milekiis ra kodall, kid a dirrek el momekiis er a kodall sel de mad. Tia a belkul a kmo a delbengel a chad me a bedengel a lmuul el mo dmak, me a derta er kid a mo obang a cherrungel, el mla mokiis el bedenged. Okmo meng dimlak a Jesus Kristo, ea kodall a mekoad a rokui el doureng el kirel a ngarmedad el klengar lobengkel a Chedam er a Babeluades.
Sel kot el osisechakl er a ebangkelio a klaumerang er a Rubak el Jesus Kristo. A klaumerang tia ea uchetemel a rokui el llach er a ebangkelio.
A klaumerang er a Jesus Kristo uldimukl a obang klou el reng el kmo Ngii a Dita el Ngelekel a Dios. Tia uldimukl a oumerang er Ngii el Osobeled e Olsobel er kid—el kmo Ngii a dita el rael el ngoikid el lemuut el mora medal a Dios. (mesa Rellir 4:10–12; Mosiah 3:17; 4:6–8). Kid a bla lolengit er kid el mo ouedikel el kirel a “diak el mesim el klaumera er kid er ngii, el ultuil er a urerel ngii el meral sebechel lolsobel” (2 Nephi 31:19).
A klaumerang er a Jesus Kristo uldimukl a oumerang el kmo Ngii a mora ringel el kirel a kngtid er sel uldarsel er a tngakireng. Ele a uchul sel mlo choarm er Ngii, eng mocha sebeched el mo mukbeches e klikiid sel bo douchel. Tial omekbeches a ngosukid el metik a budech me a urunguled er tial klengar. Tia dirrek el rullid el mo ngmai a cherrengelel a deurreng ruriul sel de demad.
A klaumerang er a Jesus Kristo uldimukl a oumerang el kmo ng okiu Ngii, e kid el rokui a mo mekiis era kodall ruriul er a demad. Tiaikid el klaumerang a sebechel melkakl e mengelaod er kid sel temel a kodall. A klengit el reng ra kodall a sebechel mo dibus el okiu a mla yaksok el kirel a Okiis er a Kodall.
A klaumerang er a Jesus Kristo uldimukl a oumerang el kmo Ngii a ngilai a ringel me a tellemall (mesa Isaiah 53:3–5). Ngii a medengei lokiu a blal siseb er ngii el kmo ng mekera lokiu a klechubechub e lolengeseu er kid er a ikel ringelel a klengar (mesa Alma 7:11–12; Doctrine and Covenants 122:8). Mesel doruul lokiu a klaumerang er kid, e Ngii a ngosukid el merael bedul uchei er a chelsel a ringel.
Ngokiu a klaumerang er kid er Ngii, ea Jesus a sebechel lomekungil er kid er a bedenged mea reng. Ngii a di kldmokl el lolengeseu er kid sel dolebedebek er sel ongtil el mo omes el bedul ngii er a bek el uldesued; diak de dou mededenger, diak demedakt mesa (Doctrine and Covenants 6:36).
Ng Llach er a Omeruul me a Klisiich
Klaumerang er a Jesus Kristo a ngoikid el mo ouedikel kirel. Kid a olecholt a klaumera er kid sel doltirakl a llechul e meruul a ungil er a bek el sils. Ke de ouchel a rengud er a kngtid. Ke de oltirakl er Ngii. Ke de melasem el mo uai Ngii.
Mesel doruul loba klaumerang, eng sebeched el mesang a klisichel a Jesus er a klengar er kid ra bek el sils. Ngii a mo ngosukid er a ikel sebeched. Ngii a mo ngosukid el mukeroul e oldngakl a ngibesereng.
Melisiich a Klaumerang er Kid
A prophet Alma a ulsisechakl el kmo a meleketek a klaumerang a sebechel lomuchel loba kekerei el “klemeriar reng el moumerang” (Alma 32:27). Okor, a lsekum a klaumerang er kid er a Jesus Kristo a mo mukeroul, eng kired el mo omekeroul er ngii lokiu a omesubel a tekingel, meruul a ikel Ngii olsisechakl, e oltirakl a Llechul. A Alma olisechakl el kmo sel klou a rengud, el blak a rengud lomekeroul a tekingel a Dios er a rengud, “eng morngii a risel [e merael eldi moua] kerrekar el merael mo klou el mora diak a ulebenelel klengar“—meng melisiich a klaumera er kid (Alma 32:41; mesa bades 26–43).
Gospel Topics: “Jesus Christ,” “Atonement of Jesus Christ,” “Faith in Jesus Christ”
Ouchelreng ra klengit
Ngera Ouchelreng er a klengit?
Ouchelreng er a klengit a ongeru el osisechakl er a ebangkelio. A klaumera er a Jesus Kristo me a beltkil a rengud el mor Ngii a ngoikid el mo ouchel a kngtid (mesa Helaman 14:13). A ouchelreng a omelodch ra klengar el bedul a Dios e mocheroid er a klengit. Sel douchel, ea omerelled, me a soad, me a uldesued a mengodech el mo tabesul ngii me a soal a Dios. A klausubes er a klengit a mekedmokl lokiu a uldersel a tngakirel er a Jesus Kristo.
A ouchelreng a diak el di dousbech ra klisichel a rengud el mo melodech a blekerdeled malechub e bode mesisiich ra chelitechetud. A ouchelreng a meral kirel ngara rengud el obult el mora Kristo, el ngii a meskid a klisiich el mo mesa sel “klou el mlongodech” er a rengud (Alma 5:12–14). Sel desa sel klou el mlo ngodech ra rengud, e kid a mla mechell el beches (mesa Mosiah 27:24–26).
Ngokiu a ouchelreng, e kid a mekdebechii a beches el osenged er a Dios, mekid, me a beluulechad. Ke de omelchesiu er a beches el beltikerreng er a Dios el mora rengelekel—me a beltikerreng er a Osobel er merkid. A techall el mouchel a rengud a kot el tara ngarbab el klengeltengat el Dios a odersii lokiu a Ngelekel.
Teletelel a Ouchelreng
Sel douchel, e kede mes a kngtid e maral moberaod a rengud el kirel. Ke do ouchais a kngtid el mora Dios e olengit a klausubes. Ke dirrek el ouchais a oberaod el klengit el deriruul el mora oba ngerachel el mengeteklel a Ikelesia, el ngii a mo ngosukid sel bocha douchel kirel. Ke de remuul a ikel sebeched el metechei a deriruul mekngit el mora tang, belkul a kmo kede melasem el meruul el moungil aikel miltemall leng omerreled a uchul. A meral ouchelreng a ungil mocholt lokiu a llemalt el omeruul er a kemanget el taem.
A ouchelreng a doruul er a bek el sils er a klengar er kid. “Ke de rokui el mla ruebet ra klengit, e kedeb er a klebkellel a Dios” (Rom 3:23). Ng kired el di melemolem el ouchel a rengud ra kngtid, e melatk el kmo kid “a sebeched el kudmokl a rokui lokiu a Kristo el ngii a melisiich” er kid (Filipi 4:13). A Rubak a mla oterkeklii el merkid el kmo sel bek el bo louchel a rechedal e Ngii a mousubes er tir er a ikel mekngit el riruul (mesaMosiah 26:30).
Klengeltengat er a Ouchelreng ra Kngtid
Ouchelreng a ungil osisechakl el ngii a meskid a deurreng me a budech. Ngoikid el mora klisichel a Olsobel, meng mo suobel a [bedenged] (Helaman 5:11).
Sel bo douchel, ea berraod ra kngtid me a klengitelreng a mo muchel el moungil er a omerolel a taem. Ke de mo klou el omelchesiu a odbechel a Reng. Sel soad el mo oltirakl er a Dios a di merael mo klou.
siasing/Llecheklel
President Russell M. Nelson
“Te betok el chad a omdasu er a ouchelreng el ua lomengelebus—el tara tekoi el dolechib er kid er ngii. … Eng di tial domelchesiu el uaia lomekringel er kid a a ngara Dibalong el mei. Ngii a melasem el tomer er kid meng diak domes el bedul Jesus Kristo, el ngii a dechor el blerk a chimal, loureng e soal mo omekungil, ousubes, omekbeches, melisiich, mengikiid e mengedaol er kid” (Russell M. Nelson, “Sebeched el Meruul a Lmuut Lungil e mo Meral Lungil,” Ensign or Liahona, May 2019, 67).
Gospel Topics: “Repentance,” “Atonement of Jesus Christ”
siasing/Llecheklel
ngeasek el dil el mocha metecholb
Techolbechelid: Kot el Tebiled lobengkel a Dios.
A klaumerang er a Jesus Kristo me a ouchelreng a mengedmokl er kid el mo melai chedaol ruoll er a techolbechelid me a moterekokl. A techolbechelid a kot el olsobel chedaol ruoll el ngara ebangkelio er a Jesus Kristo. Sel denguu tial loldeu a reng el chedaol ruoll el meskid a urunguled, e kid a soiseb er a kot el dauch er a telbiil lobengkel a Dios.
A chedaol ruoll a chedaol lomeruul longetmokl er ngii a robang a ngerachel er a priesthood. A bebil er a chedaol ruoll, el reua techolbechelid, a usbechall el kirel a osobeled.
Ngokiu a ikal chedaol ruoll, e kede meruul a telbiil lobengkel a Dios. Aikal telbiil a chedaol yaksok er a delongeled kid me a Dios. Ngii a yaksok el mo omekngeltengat er kid sel doltirakl a ble de yaksok el mo er Ngii. Ng kirel ngarngii a mesisiich el ngercheled el mo oltirakl a telbiled lobengkel a Dios.
A Dios a mla meskid a chedaol ruoll me a telbill el mo olngeseu er kid el me er Ngii e nguu a diak a ulebengelel klengar. Sel de nguu a chedaol ruoll er a priesthood e oltirakl aikel telbiil lobengkel, eng sebeched el mo nguu sel klisiich el di moua teletelel a Dios el mera chelsel a klengar er kid (Doctrine and Covenants 84:20).
Telbiil el ngara Techolbechelid
A Osobel a ulsisechakl el kmo a techolbechelid a ulsbechall el mo soiseb er a rengedel a babeluades (mesa Johanes 3:5). Ng dirrek el kired el mo chedal a Ikelesia er a Jesus Kristo. A Osobel a mileskid a okesiul er sera bol metecholb (mesa Mateus 3:13–17).
Sel bla de metechold e doltirakl a telbiled, ea Dios a yaksok el mo ousubes a kngtid (mesa Rellir 22:16; 3 Nephi 12:1–2). Tial klou el klengeltengat a sebechel lokiu a uldersel el tngakireng a Jesus Kristo, el ngii a “mle betik a rengul er kid, e ngilubet a kngtid loba rsechel” (Ocholt 1:5). A Dios a dirrek el yaksok er kid el mo omekngeltengat er kid loba kldemed el Chedaol Reng meng sebeched el mo klikiid, mukrael, e nguu ongelaod.
Sel ngercheled er tial telbiil er a techolbechelid, e kid a sioning el kmo kede mimokl el nguu a ngklel a Jesus Kristo. Kede dirrek el kongei el mo blechoel melatk er Ngii e oltirakl a Llechul. Ke de kongei el mo oubeltikerreng e mesiou er a rebebil e mo “ngara klengitelreng lobengterir a rengara klengitelreng; … e mengelim er a chelmongel, e dechor el sioning er a Dios er a rokui el taem me a rokui el tekoi, me a rokui el basio” (Mosiah 18:9; see bades 8–10, 13). Kede ocholt a blakelreng er kid el mo mesiou er a Jesus Kristo el mo lmuut er sel rekil a klengar er kid (mesa Doctrine and Covenants 20:37; Mosiah 2:17).
A ngercheled er a telbiled er a techolbechelid a kmal klou el ngerachel. Aika dirrek el omekllomes e mui er a deurreng. Ng mekdebechii a tokubets el deleuill er kid lobengkel a Chedam er a Babeluades el Ngii a melemolem loldars er a beltkil a rengul.
Techolbechelid lokiu a Moduleb ra Ralm
A Jesus a ulisechakl el kmo ngkired el mo metecholb el moduleb er a ralm el kirel a ngebetel a kngtid (mesa Doctrine and Covenants 20:72–74). A techolbechelid el mo moduleb a okesiu el mora kodall, medakl, me a Okisel a Jesus Kirsto (mesa Rom 6:3–6).
A techolbechelid el mo moduleb a dirrek msa mesisiich el olangch el mer a derta er kid. Ngokesiu el mora kodellel sel mechut el klengar er kid, e melakl er seikid el klengar, e me a duum el mechell el beches. Sel de metecholb, e ke domuchel er a klengar el mla mechell el beches el mocha ngelekel a Kristo el sechal me a redil. (mesa Mosiah 5:7–8; Rom 8:14–17).
Rengalek
A rengalek a diak el bol metecholb dil merekmo lebor sel rak el mla mo bekengerachel, el ngii a eai a rekil (mesa Doctrine and Covenants 68:27). A rengalek el mad ruchei er a bol eai a rekil a mo suobel lokiu a Tngakireng er a Jesus Kristo (mesa Moroni 8:4–24; Doctrine and Covenants 137:10). Uchei ra bol metecholb a ngalek, eng kirir el mosisechakl er a ebangkelio mel sebechir el kldmok el kirel tial klou a ultutelel dauch er a klengar er tir el soiseb er a telbiil lobengkel a Dios.
Chedaol Belsoil
A Demad er a Babeluades a soal a bol blak a rengud er a telbiil el de riruul lobengkel. Sel mo ngosukid er tiang, e Ngii a mla meskid a llach el mo kldibel a melai er a chedaol belsoil. A chedol belsoil a chedaol ruoll el ngara priesthood el Jesus a ulechotii el mora re Apostol er Ngii ruchei er sel Tngakireng er Ngii.
A omelai el chedaol belsoil sei ea moktek er a miting er a sakrament sel bek el sandei. A blauang me a ralm a mechedaol e mora rechad el ngara ikelesia. Sel blauang a olechotel a bedengel a Osobel el ngii a mlodersii el kired. Sel ralm a olechotel a Rsechel, el ngii a milechubel el kired.
Kede melai a ikal bedengel ma rsechel el melatk er sera Osobel a blolcharm e omekbeches a telbiled lobengkel a Dios. Ke de mo nguu a beches el telbiil el kmo a Chedaol Reng a mo obengked.
A techolbechelid a eru a teletelel. A Jesus a ulisechakl el kmong kired el “mechell ra ralm ma Reng” e mo soiseb er a rengedel a Dios (Johanes 3:5; smisichii a belkul). A Joseph Smith a ulsisechakl, “A techolbechelid er a ralm a di tedobech, meng diak a ultutelel a lak sel tara tebedechel—el ngii, a techolbechelid er a Chedaol Reng” (Teachings of Presidents of the Church: Joseph Smith [2007], 95).
A techolbechelid er a ralm a kirel motirakl lokiu a techolbechelid er a Reng meng mo mecherrungel. Sel de nguu ngii el eru el techolb, e kid a mo klikiid e diak a kngtid e mocha mechell el beches. Seikid e kid a omuchel er a beches el chedaol klengar el oltirakl er a Kristo
Kede nguu a techolb er a Reng lokiu a chedaol ruoll lokedongall el kmo olterekokl. Tial chedaol ruoll a mekedmokl lokiu a tang a lechub te bebil er a roba priesthood el mo omor chimorir ra bdelud. A kot e te oterkeklid el mo chedal a Ikelesia, e okor e meskid a sengk er a Chedaol Reng. Tia osisiu el chedaol ruoll el ngii a ngara Beches el Renged me a Babier er a Mormon (mesa Rellir 8:14–17; 3 Nephi 18:36–37).
A Chedaol Reng a ongedei el chedal a Kle Dios. Ngoureor el dmak lobengkel a Chedam er a Babeluades ma Jesus Kristo. Sel de nguu a sengk er a Chedaol Reng, eng sebeched el nguu el mo kldemed er a chelsel a klengar er kid sel de kedung.
Mekera Chedaol Reng a Lomekngeltengat er Kid
A sengk er a Chedaol Reng a tara ngarbab el sengk er a Chedam er a Babeluades. A Chedaol Reng a omekbeches e mengikiid er kid, rullid el merael mo klikiid, e cherrungel, el uai a Dios (mesa 3 Nephi 27:20). Ngii a ngosukid el obult e merael mo mesisiich er a chedaol tekoi sel dosiik el moltirakl er a uldesuel a Dios.
A Chedaol Reng a ngosukid el subii e mtebengar a klemerang (mesa Moroni 10:5). Ng dirrek el loterekokl a klemerang el mora rengud me a uldesued. A lmuut el tang, a Chedaol Reng a ngosukid lolisechakl a klemerang (mesa Doctrine and Covenants 42:14). Sel dosuub e dolisechakl a klemerang lokiu a klisichel a Chedaol Reng, e Ngii a nguu el mera chelsel a rengud (mesa 2 Nephi 33:1).
Sel doba ngariou el reng losiik a ulekrael er a Chedaol Reng, e Ngii a mo omekrael er kid (mesa 2 Nephi 32:5). Tia dirrek luldimukl a odbechel a reng er a teletelel a dosiou er a rebebil.
A Chedaol Reng a meskid a chedaol klisiich el mo ngosukid er a ikel chelitechetud. Ngolngeseu er kid el loldngakl a ngibesereng. Ng sebechel louchas sel ngarngii a kengaol sebechel tomelli a bedenged me a reng.
A Chedaol Reng a ngosukid er a ikel metacherbesul er a klengar er kid. Ngii a mo mengelaod er kid ra taem er a ringel malechub eng klengiterreng, e meskid a urunguled. (see Moroni 8:26). Ngokiu a Chedaol Reng, eng sebeched lomelchesiu er a beltikelreng er a Dios el merkid.
Sel de metecholb e moterekokl, e kid a soiseb er a telbiil lobengkel a Dios. A bebil er a tekoi, e kid a yaksok el mo oltirakl a llechul e mesiou er ngii er a klengar er kid el rokir (mesa Mosiah 18:8–10, 13; Doctrine and Covenants 20:37).
Uriul er a desiseb er a rael er a ebangkelio lokiu a techolbechelid e moterkokl, e kede melasem el mora tkur rebab el sebeched el di ngar tial rael. Sel de tobed er tial rael ngii mesel dil kekerel bakes, e kede oba klaumerang er a Kristo e mo ouchel a rengud. A klengeltengat er a ouchelreng a meskid a techall el lemuut el mora rael er a ebangkelio e lmuut lorekked aikel klengeltengat er a telbiil lobengkel a Dios. Sel meral ngara rengud el mo ouchel, ea Dios a blechoel el mimokl el ousubes e mengemedaol er kid el lmuut el mei.
A outekangel el mora ulebongel a belkul a kmo ke di melemolem el ngara klaumerang er a Dios el mora terkel a klengaer er kid—er a chelsel a ungil ma meringel el taem, er a chelsel a ungil klengar me a lak. Kedi mecherei a Kristo meng ngodechid el rullid el di mo uai Ngii. Kede omes el bedul a Kristo loba klaumerang, me a urunguled el diak el iior er a ngii di el ngerang el mera chelsel a klengar er kid.
A outekangel el mo er a ulebongel a diak el belkul a kmo kedi urekodel el mora kodall. Ngbai, belkul a kmo kede omes er a klengar er kid, uldesued, ma omerelled el ngara Jesus Kristo. Tia uldimukl a melemolem el omeruul loba a klaumerang er a Kristo er a bek el sils. Ke de dirrek el melemolem el mo ouchel a rengud, oltirakl a telbiled lobengkel a Dios, e osiik er a Chedaol Reng el mo obengked.
Outekangel el mora ulebongel a uldimukl er a “outekangel di merael moruchei el mla tibir a rengum el kirel a Kristo, e bleketakl ongilem, me a beltikerreng el mo er a Dios me a rokui el chad.” A Demad er a Babeluades a yaksok el kmo sel doutekangel el mora ulebongel, e ke “de monguu a diak a ulebengelel klengar” (2 Nephi 31:20)
A Ebangkelio er a Jesus Kristo a Omekngeltengat er a Rokui el Ngelekel a Dios
A ebangkelio er a Jesus Kristo a mora rokui el re ngelekel a Dios. A chedaol llechukl a olisechakl el kmo a rokui a diosisiu er medal a Dios el diak el iior er a mle teletelel ra klengaer ma lechub a teletael ngara chelsel er chelechang. Ngii oleker ra rokui el me er ngii me bololai er a klungiaol lobang; e ngii a diak el tomer er a ngii di el chad el mei er ngii (2 Nephi 26:33).
A ebangkelio a omekngeltengat er kid er a klengar er kid er tial beluulechad molmuut er sel diak a ulebengelel klengar. Kid a sebeched el mo ngara deurreng—el kuk di chad me a kuk di telungalek—sel de kiei loltirakl a osisecheklel a Jesus Kristo (mesa Mosiah 2:41; “Telungalek: Chais el mora Beluulechad,” ChurchofJesusChrist.org). A kiei loltirakl er a ebangkelio a dochelir a deurreng, omekllomes a doruul, e melisiich a deleuill el kid.
A kiei loltirakl er a ebangkelio er a Jesus Kristo a sebechel sobecheklid er a dolilt el tekoi el sebechel mo tomellii a bedenged me a reng. Ngosukid el metik a klisiich me a ongelaod sel dengara ringel ma chelebuul. Ng meskid a rael el mora deurreng er a diak a ulebengelel klengar.
A tara kot el ngarbab el klumech er a mla moluut el ebangkelio a kmo kid a tebedechel a telungalek er a Dios. Kid a betik ra rengul el ngelekel sechal ma redil. Ng diak el iior er a teletelel a telungalek er kid er tial beluulechad, a derta er kid a chedal a telungalek er a Dios.
A tara ungil tebedechel a klemeched a kmo a telungalek a sebechir el mo dmak el mo cherechar. A telungalek a mechedaol ra Dios. A uldesuel a Chedam er a Babeluades er a deurreng a sobecheklii a deleuill er a telungalek meng melemolem ruriul er a kodall. A chedaol ruoll er a templo me a telbiil a rulii meng mo sebechel a telungalek el mo dmak el mo cherechar.
Ngokiu a llemesel a ebangkelio, ea telungalek a sebechir el smaod a mle cheleuid, ultok, me a chetituokel. A telungalek el mlo mekngit a delongelir a sebechir el nguu omekungil lokiu a ouchel reng, klausubes, me a klaumerang er a klisichel a Tngakireng er a Jesus Kristo.
A ebangkelio er a Jesus Kristo a ngosukid el mukdubech a mesisiich el deleuill er a telungalek. A blai sei ea kot el ungil basio el dengarngii e olisechakl e mesuub a osisechakl er a ebangkelio. A blai el ngii a mukdubech lokiu a osisechakl er a ebangkelio a mo basio le ngarngii e selbechakl. Ng mo basio el Reng er a Rubak a sebechel kiei er ngii.
Di kedeb el mora telkib el Kemanget el Llecheklel a Suobel
A ikal llechukl riou a di okesiu er a sebechem lolisechakl el mora chad a le ngarngii a telkib el temiu. Sel mousbech aikal beldukl, em nguu a imong adang teblong el suobel e molisechakl. Aikel suobel el dodai er a derta er a ikal osisechakl a obetik ra uchelel.
Sel molsisechakl, bo moker a ker e morrenges. Modars a ongit el ngii a mo ngosuterir a rechad el kmo ngmekeral mukeroul el mo kmeed er a Dios. A tara klou a ultutelel ongit a mora chad mel luut el mo omes er kemiu. A temel osisechakl a di ultuir er a ker el kau oker e orenges.
siasing/Llecheklel
re misionari el lolisechakl er a redil.
Ngera sesbechem el olisechakl el mo er a rechad er a chelsel a edei el mo er a teruich el bung.
A Dios a uldureklii a Betik ra Rengul Ngelekel, Jesus Kristo, el mora beluulechad el mo olsobel er kid era a klengit me a kodall.
A klaumerang er a Jesus Kristo a osisechakl er a omeruul me a klisiich. A klaumerang a ngosukid el mesa melisiich el klisichel a Osobel er a klengar er kid.
Klaumerang er a Jesus Kristo a mekrolid el mo ouchel a rengud ra kngtid. A ouchelreng a rael el ngoikid el mora Dios e chemoit a klengit. Sel douchel a rengud, ea doruul, soad, me a domdasu a mengodech el mo tabesul ngii me a uldesuel a Dios.
Sel douchel ra rengud, ea Dios a ousubes er kid. A ousubes a sebechel leng Jesus Kristo a uldersii el kirel a kngtid.
A techolbechelid a eru teletelel: techolbechelid lokiu a ralm me a Reng. Sel de metecholb e moterekokl, e kid a mo klikiid er a kngtid, el meskid a beches el bakes er a klengar.
Nguriul e ra de metecholb, e kede nguu a sengk ra Chedaol Reng lokiu chedaol ruolll el ngii a olterekokl.
Sel de blak a rengud el oltirakl er a rael er a ebangkelio el mora ulebengel a klengar er kid, ea Dios a yaksok el bo denguu a diak a ulebengelel klengar.