Kapitulo 12

Pagtrabaho ug Kinaugalingon nga Pagpaninguha

Ang Ginoo mopanalangin kanato samtang nagtrabaho kita sa kinatibuk-an sa atong abilidad.

Gikan sa Kinabuhi ni Heber J. Grant

Si Presidente Heber J. Grant sa kanunay nagsangyaw sa mga baruganan sa pagkugi og maayo ug kinaugalingon nga pagpaninguha. Siya mitambag: “Ipabati sa matag tawo nga siya mao ang arkitekto ug tigtukod sa iyang kaugalingong kinabuhi, ug nga siya magtinguha nga makahimo og kalampusan niini pinaagi sa pagtrabaho. ‘Sa unom ka adlaw magbuhat ka, ug buhaton mo ang tanan nga imong buluhaton, ’ ug mopahulay sa ikapito [tan-awa sa Exodo 20:9–11]. Ayaw pagtrabaho og upat o lima ka adlaw ug unya dili pa gyud tininuod nga pagtrabaho. Pahatagi og bili sa matag Santos sa Ulahing mga Adlaw ang tanan nga iyang madawat, ma trabaho man kini, o ma bisan unsay iyang buhaton.”¹

Sa dihang si Presidente Grant namulong mahitungod sa bili sa pagtrabaho, namulong siya gikan sa tibuok kinabuhi nga kasinatian. Ingon nga bugtong anak sa iyang biyudang inahan, sayo siyang nakat-on sa pagsilhig sa salog ug sa pagpanghugas ug pagpanrapo sa mga plato. Mitabang usab siya sa iyang inahan sa iyang trabaho isip mananahi aron makasuporta nilang duha. “Nagyaka ko sa salog sa gabii hangtud na sa tungang gabii, ” siya sa kaulahian nahinumdom, “ug mitindak sa makina sa panahi aron makapahulay ang iyang gikapoy na nga mga bitiis.”² Ang mga pagpaningkamot ni Heber sa pag-abag sa iyang inahan nagpadayon lapas pa sa iyang pagkabata, ingon nga siya misulod sa natad sa patigayon sa iyang pagkabatan-on aron pagtabang sa pagsuporta kaniya.

Usa sa dakong mga tinguha ni Presidente Grant mao ang “pagsilsil diha sa hunahuna sa kabatan-onan sa Zion sa gahum ug epekto, ang dili mahulagway nga gahum ug epekto sa pagtrabaho.”³ Diha sa nagsunudsunod nga mga artikulo sa Improvement Era nga magasin sa Simbahan, si Presidente Grant misaysay og personal nga mga kasinatian, naghulagway sa unsang paagi nga ang iyang pagkaandam sa pagtrabaho nagdala og sayong kalampusan sa natad sa patigayon. “Ako mobuhat sa ingon, ” siya nagkanayon, “dili sa katuyoan sa pag-itsa og pungpong nga mga bulak ngari sa akong kaugalingon, sa sinambingay nga pagkasulti, apan uban sa panghinaut nga ako makadasig unta sa akong mga magbabasa sa tinguha nga motrabaho. Ginaingon nga ang mga pamahayag sa personal nga kasinatian, gisulti o gisulat, magdala og dugang gibug- aton, ug makahimo og mas malungtaron nga impresyon diha sa mga hunahuna sa mga tigpaminaw ug mga magbabasa kay sa mahimo sa bisan unsa nga paagi. Kini maoy akong rason sa pagsaysay og daghan kaayong mga panghitabo sa akong kaugalingong pagtrabaho.

“Sa dihang [ako kaniadto] usa pa ka batan-on, nga nag-eskwela, usa ka tawo gitudlo ngari nako kinsa nagtipig og mga talaan sa Bangko sa Wells, Fargo and Co., sa Dakbayan sa Salt Lake, ug giingon nga siya nagdawat og sweldo nga siyento singkwenta dolyares sa usa ka bulan. Nahinumdom gyud ko nga naghunahuna nga siya nagdawat og sais dolyares matag adlaw, walay labot sa mga Domingo, nga daw para nako dako gyud kaayo nga kantidad…. Nangandoy ko nga mahimong bookkeeper, ug sa pagtrabaho sa Wells, Fargo & Co., ug dihadiha dayon miapil ko sa klase sa bookkeeping diha sa Unibersidad sa Deseret [karon ang Unibersidad sa Utah], sa panghinaut nga sa umaabot nga adlaw makadawat sa unsay akong gihunahuna nga dako kaayo nga suweldo.

“Malipayon akong mokutlo … gikan kang Lord Bulwer Lytton: ‘Wala kinahanglana sa tawo ang talento, kondili ang katuyoan; dili gahum sa paglampus, apan ang kabubut-on sa pagtrabaho.’ Si Samuel Smiles miingon: ‘Ang mga katuyoan, sama sa mga itlog, gawas kon kini mapusa ngadto sa paglihok, mahimo kining binugok.’

“Si Lord Lytton mibaliwala lang sa walay duhaduha nga kon ang usa ka batan-on madungganon ug madasigong mangandoy, nga kini makadasig kaniya sa pagbaton og katuyoan sa kinabuhi, ug sa ‘pagpusa sa ingon ngadto sa paglihok, ’ ug dili motugot niini nga ‘mahimong binugok.’ Human mapalig-on ang katuyoan nga mahimong usa ka bookkeeper, ako dihadiha dayon naninguha sa pagkab-ot niini nga tumong. Nahinumdom gyud ko sa kahimuot nga akong nahatag sa akong kaubang mga estudyante. May usa nga miingon nga sa dihang nagtan-aw sa akong mga basahon, ‘Unsa man ni; mga kinakhaan sa himungaan?’ Ang lain miingon, ‘Naigo ba sa kilat ang usa ka botelya sa tinta?’ Kini nga mga nasulti ug lain pa, samtang wala himoa aron ko masakitan apan pasi-aw lang, bisan pa niana midulot gyud og maayo, ug nakapadasig kanako og usa ka diwa sa determinasyon. Nagtinguha ko sa paghatag og mga kopya alang sa tanan kinsa mieskwela sa unibersidad, ug nga mamahimong magtutudlo sa pagsulat ug sa bookkeeping niana nga institusyon. Nagbaton sa usa ka katuyoan ug usab ‘sa tinguha sa pagtrabaho, ’ ug miuyon ni Lord Lytton nga, ‘Diha sa diksyonaryo sa kabatan-on walay sama sa pulong nga pagkapakyas, ’ nagsugod ko sa paggamit sa akong libreng oras sa pagtuon sa pagsulat, nagpadayon sa katuigan hangtud nga gitawag ko og ‘ang labing bantugan nga magsusulat sa yuta.’

“Ang resulta mao nga mga pipila ka tuig sa kaulahian, nakadawat ko og usa ka posisyon isip bookkeeper ug klerk sa usa ka buhatan sa insurance. Bisan og kinse anyos pa, ang akong pagsulat maayo ug klaro, ug mao lang kana ang gikinahanglan aron mabutang sa posisyon nga akong gihuptan nianang higayona, apan wala gihapon ko matagbaw apan nagpadayon sa pagdamgo ug sa ‘pagsulat, ’ kon walay gibuhat. Nagtrabaho ko diha sa atubangan nga bahin sa bangko sa A. W. White & Co., ug, kon dili bisi, mibulontaryo sa pagtabang sa buluhaton sa bangko, ug sa pagbuhat sa bisan unsa ug sa tanan nga akong mahimo aron magamit ang akong oras, wala gayud maghunahuna nga bayaran ba ko o dili, apan nagbaton lamang og tinguha sa pagtrabaho ug sa pagkat-on. Si Mr. Morf, ang bookkeeper sa bangko, maayong mosulat, ug naghago aron sa pagtabang nako sa akong mga paninguha nga mahimong banggiitan nga tigsulat. Nakakaton ko sa pagsulat og mas maayo nga sa kasagaran mas dako pa ang akong kita sa wala pa ug sa pagkahuman sa tingtrabaho pinaagi sa pagsulat og mga kard, mga imbitasyon, ubp., ug sa paghimo og mga mapa, kay sa kantidad sa akong regular nga sweldo. Pipila ka mga tuig sa kaulahian, usa ka diploma diha sa Territorial Fair gihatag kanako alang sa pinakamaayo og agi sa Utah. Sa dihang nagsugod ko sa akong kaugalingong negosyo, dihay bakante sa unibersidad sa posisyon nga magtutudlo sa pagsulat ug bookkeeping, ug aron sa pagtuman sa akong saad sa kaugalingon, nga gihimo sa dihang batan-on pa nga mga dose o trese, nga ako sa umaabot nga adlaw magtudlo niini nga mga klase, miaplay ko alang sa posisyon. Ang akong aplikasyon gidawat, ug ang akong obligasyon sa akong kaugalingon sa ingon natuman.”⁴

Si Presidente Grant dihay “tinguha sa pagtrabaho” diha sa iyang espirituhanong mga paningkamot maingon man usab sa iyang temporal nga mga paninguha. Siya usa ka walay pagkakapoy nga trabahante isip usa ka amahan, usa ka magtutudlo sa ebanghelyo, ug usa ka linain nga saksi ni Ginoong Jesukristo. Ang tanang mga aspeto sa iyang kinabuhi nagpakita sa usa ka baruganan nga kanunay niya nga gitudlo: “Ang balaod sa kalampusan, dinhi ug human dinhi, mao ang pagbaton og usa ka mapainubsanon ug usa ka mainampoong kasingkasing, ug ang pagtrabaho, pagtrabaho, PAGTRABAHO.”⁵ Siya mitambag: “Kon kamo adunay mga ambisyon, pangandoy sa unsay gusto ninyo nga makab-ot ug dayon mobuhat kutob sa inyong mahimo ug motrabaho. Ang pagpangandoy sa mga butang og walay buhaton walay padulngan; ang aktwal nga pagtrabaho maoy mahinungdanon. Ang hugot nga pagtuo patay kon walay mga binuhatan, ingon nga si Santiago misulti kanato, maingon nga patay ang lawas nga mahimulag sa espiritu [tan-awa sa Santiago 2:17, 26]. Adunay daghang mga tawo kinsa adunay hugot nga pagtuo, apan kulang sila sa mga binuhatan, ug ako nagtuo sa mga tawo nga adunay hugot nga pagtuo ug binuhatan ug determinado sa pagbuhat sa mga butang.”⁶

Mga Pagtulun-an ni Heber J. Grant

Kinahanglan kita nga motrabaho sa kinatibuk-an sa atong abilidad.

Kinahanglan kita nga magbaton og ambisyon, kinahanglan kita nga magbaton og tinguha sa pagtrabaho sa kinatibuk-an sa atong abilidad. Ang pagtrabaho makapahimuot sa Ginoo.⁷

Wala pa gayuy adlaw nga ako dili andam nga mobuhat sa labing minos [o labing ubos] nga trabaho, (kon aduna man ugaling matawag nga minos nga trabaho, nga duda ko) kay sa mahimong tapulan.⁸

Naninguha ko niining buntaga sa pagbasa sa Doktrina ug mga Pakigsaad mahitungod sa tapulan, ug kita adunay pipila ka mga tapulan sa atong taliwala. Atong makita diha sa Seksyon 75 sa Doktrina ug mga Pakigsaad:

“Himoa nga ang matag tawo makugihon diha sa tanan nga mga butang. Ug ang tapulan walay dapit sa Simbahan, gawas nga siya maghinulsol ug mag-usab sa iyang mga pamaagi.” [D&P 75:29.] …

Sa Seksyon 88, atong mabasa:

“Hunong sa pagkatapulan; hunong sa pagkahugawan; hunong sa pagpangita og kasaypanan sa usag usa; hunong sa pagkatulog og labaw pa kay sa gikinahanglan; mopahulay sa higdaanan og sayo, nga kamo dili kapuyon; bangon og sayo, nga ang inyong mga kalawasan ug ang inyong hunahuna mahimo nga malagsik.” [D&P 88:124.]

Palihug hinumdumi nga kini dili mga pamahayag ni Heber J. Grant, apan kini mga pamahayag sa Ginoo:

“Ug ang mga lumulupyo sa Zion usab kinahanglan mahinumdom sa pagbuhat sa ilang mga buluhaton, tungod kay sila gitudlo sa paghago, diha sa tanan nga pagkamatinud-anon; kay ang tapulan hinumduman sa atubangan sa Ginoo.

“Karon, Ako, ang Ginoo, wala mahimuot sa mga lumulupyo sa Zion, kay adunay mga tapulan diha kanila; ug ang ilang mga anak usab nagtubo diha sa pagkadautan; sila usab wala magtinguha nga makugihon sa mga katigayunan sa kahangturan, apan ang ilang mga mata napuno sa pagkahakog.” [D&P 68:30–31.]

“Dili kamo magtinapulan; kay siya nga tapulan dili makakaon sa pan ni makasul-ob sa mga sapot sa mamumuo.” [D&P 42:42.] …“Tan-awa, sila gipadala sa pagsangyaw sa akong ebanghelyo taliwala sa katiguman sa mga dautan; busa, Ako mohatag ngadto kanila og sugo, nga ingon: Ayaw kamo pag-usik sa inyong panahon, ni kamo motago sa inyong kahibalo nga kini dili masayran.” [D&P 60:13.] …

Maglaum kita nga ang diwa sa kagawasan nga diha sa atong pioneer nga mga amahan mahimong mapukaw pag-usab ngari kanato, ug nga walay usa kinsa mga Santos sa Ulahing mga Adlaw nga naghupot sa Priesthood sa Dios ang mahimong sad-an sa pagkatapulan. Magtrabaho kita og sayo ug magtrabaho hangtud sa hapon.⁹

Adunay diwa nga nagkadako sa kalibutan karon nga naglikay sa paghatag og serbisyo, ang pagkadili andam sa paghatag og hingpit nga pagserbisyo, sa pagsulay sa pagtan-aw kon unsa ka gamay ang atong mabuhat ug pila may atong makuha alang sa pagbuhat niini. Kining tanan sayop. Ang atong diwa ug tumong kinahanglan gayud nga mao ang pagbuhat sa tanan kutob sa atong mahimo, sa piho nga panahon, alang sa kaayohan sa tanan niadtong kinsa nagpatrabaho nato ug sa kaayohan niadtong kinsa atong nakauban.

Ang lain nga diwa––ang pagkuha sa tanan kutob sa atong mahimo, ug paghatag sa labing gamay kutob sa mahimo isip bugti–– maoy sukwahi ngadto sa ebanghelyo ni Ginoong Jesukristo.¹⁰

Naningkamot ko sa pagsilsil diha sa mga hunahuna sa kabatan- onan sa kamahinungdanon sa ilang pagtrabaho kutob sa maabot sa ilang abilidad, ug usab samtang nagtrabaho nga dili gayud mawad-an og paglaum….

“Tindog ug magbuhat, ug ang Ginoo magauban kanimo.” [Tan-awa sa 1 Cronicas 22:16.] …

Wala koy nakit-an diha sa akong kinabuhi nga mas bililhon ngari kanako kay sa pagbuhat sa katungdanan karon sa pinakamaayo sa akong abilidad, ug nasayud ko nga kon ang batan-ong mga lalaki mobuhat niini, sila mamahimong mas andam alang sa mga buluhaton sa umaabot….

Pagka disenuebe [ang pangidaron], nag-bookkeeper ko ug mibarug isip klerk alang kang Mr. Henry Wadsworth, ang ahente sa Wells, Fargo & Co. Ang akong oras wala kaayo magamit. Wala ko magtrabaho alang sa kompanya apan alang sa ahente lang. Ako … miboluntaryo sa paghan-ay og daghang mga sulat sa bangko, ubp., ug sa pagtipig og hugpong sa mga libro sa Sandy Smelting Co., nga gibuhat mismo ni Mr. Wadsworth.

Aron sa paghatag og gibug-aton sa kamatuoran sa kinutlo sa ibabaw gikan sa 1 Cronicas, moingon ko nga ang akong gibuhat nakapahimuot ni Mr. Wadsworth nga iya kong gipatrabaho sa pagpaningil alang sa Wells, Fargo & Co., ug mibayad kanako og baynte dolyares alang niini nga trabaho agig dugang sa akong regular nga sweldo nga setentay singko dolyares gikan sa negosyo sa insurance. Sa ingon nakatrabaho ko sa Wells, Fargo & Co., ug usa sa akong mga damgo natinuod.

Sa dihang miabut ang Gabii sa Bag-ong Tuig, nagabhian ko sa opisina … si Mr. Wadsworth misulod ug mabinationg miingon nga ang negosyo maayo, nga wala gayud moulan apan kini mibu- bu, o morag maingon-ingon niini. Nagpasabut siya sa akong pagtipig sa mga libro sa Sandy Smelting Co. nga walay bayad, ug misulti og pipila ka mga pagdayeg nga nakapalipay nako og maaayo. Siya mitunol dayon nako og tseke nga usa ka gatus ka dolyares nga doble pa nga bayad alang sa akong dugang nga pagtrabaho. Ang katagbawan nga akong natagamtam sa pagbati nga akong nakuha ang pagdayeg ug pagsalig sa akong amo mas bililhon pa ngari kanako kay sa duha ka taggatus nga dolyares.

Ang matag batan-ong lalaki kinsa maningkamot sa paggamit sa tanan niyang oras, nga dili gayud mohunong aron sa pag-ihap sa kantidad sa bayad nga iyang pagadawaton alang sa iyang mga serbisyo, apan hinoon madasig uban sa usa ka tinguha sa pagtrabaho ug pagkat-on, ako mosaad, makakab-ot gayud sa kalampusan sa kinabuhi.¹¹

Ang trabaho makatabang kanato nga mahimong makabarug sa kaugalingon.

Adunay usa ka balaod, nga dili mausab nga sugo didto sa langit, nga diha ang tanan nga mga panalangin gipasikad, ug walay tawo nga makakuha sa panalangin nga dili motuman sa balaod [tan-awa sa D&P 130:20–21]. Nagtinguha ko sa pagsilsil diha sa mga Santos sa Ulahing mga Adlaw nga atong makuha niining kinabuhia ang unsay atong gitrabahoan, ug gusto ko nga awhagon ang matag Santos sa Ulahing mga Adlaw nga mahimong usa ka magbubuhat.¹²

Ang atong unang katuyoan [sa pagpasiugda sa programa sa kaayohan sa Simbahan] mao ang pagpahimutang, kutob sa posible nga mahimo, og usa ka sistema nga diin tungod niini ang tunglo sa pagkatapulan mahanaw, ang mga kadautan sa pagdawat lang mawala, ug ang pagkagawasnon, pagkugi, pagdaginot, ug ang pagtahud sa kaugalingon sa makausa mapalig-on pag-usab diha sa atong katawhan. Ang tumong sa Simbahan mao ang pagtabang sa mga tawo nga tabangan ang ilang mga kaugalingon. Ang pagtrabaho kinahanglan nga ipahimutang pag-usab isip ang madumalaong baruganan sa mga kinabuhi sa atong mga sakop sa Simbahan.

Ang atong bantugang lider, nga si Brigham Young, ubos sa susamang mga kahimtang, miingon:

“Patrabahoa ang mga kabus––magtanum og mga prutas, magbugha og mga kahoy, magkalot og mga kanal, maghimo og mga koral, o bisan unsa nga mapuslanon, ug sa ingon makapahimo kanila nga makapalit og bugas ug harina ug sa mga panginahanglan sa kinabuhi.” [Tan-awa sa Discourses of Brigham Young, pinili ni John A. Widtsoe (1954), 275.]

Kini nga tambag ingon ka mahinungdanon karon sama sa panahon nga dihang kini gisulti ni Brigham Young.¹³

Magmakugihon kitang tanan ug magmapuslanon kutob sa maabot sa kahingpitan sa atong kusog ug abilidad. Giingnan kita nga makakaon kita sa tinapay pinaagi sa singot sa atong nawong [tan-awa sa Genesis 3:19].

… Sayon ra ang paghatag og kwarta ngadto sa usa ka tawo, apan nagkinahanglan og kalooy ug kasingkasing ang pagbaton og interes diha kaniya ug ang pagsulay sa pagplano alang sa iyang kaayohan ug kapuslanan. Ug kini usa ka baruganan sa ebanghelyo ni Jesukristo, karon, sama sa kanunay nga nahitabo, ang pagtabang sa matag tawo nga tabangan ang iyang kaugalingon––ang pagtabang sa matag anak sa atong Amahan sa langit nga maningkamot alang sa iyang kaugalingong kaluwasan, sa temporal ug sa espirituhanong paagi.¹⁴

Nagtinguha ko sa pagkutlo sa usa ka pamahayag ni Presidente Brigham Young:

“Ang akong kasinatian mitudlo kanako, ug nahimo na kining usa ka baruganan kanako, nga dili gayud makaayo nga magsige na lang og hatag og hatag, ngadto sa lalaki o babaye, kwarta, pagkaon, sinina, o bisan unsa pa, kon sila makahimo ug makatrabaho ug matrabahoan ang ilang gikinahanglan, kon aduna pay bisan unsa sa kalibutan nga ilang mabuhat. Kini mao ang akong baruganan ug naningkamot ko sa pagbuhat niini. Ang pagpadayon sa sukwahi nga dalan makaguba og bisan unsang katilingban sa kalibutan ug makapahimo kanila nga mga tapulan.” [Tan-awa sa Discourses of Brigham Young, 274.]

Ug kon unsay makaguba sa usa ka katilingban makaguba og usa ka estado, ug ako modugang usab, nga kini makaguba og usa ka nasud.¹⁵

Atong isilsil diha sa mga hunahuna sa mga tawo kutob sa mahimo kana nga pamahayag ni Brigham Young … diin siya namahayag nga iya kadtong lagda nga dili mohatag ni bisan kinsa og bisan unsa gawas iya kining gihagoan; nga ang mga tawo kinahanglan adunay buhaton aron makabaton nianang unsay ilang nadawat. Walay laing makadaot sa pagkatawo sa usa ka lalaki, usa ka babaye, o usa ka bata sama sa pagkapakyas nga makabarug sa kaugalingon.¹⁶

Ang pagtrabaho usa ka tibuok kinabuhi nga responsibilidad.

Ang pagtrabaho makapabatan-on. Ang pagkatapulan maoy mosugod sa ilang pagkaluya gikan sa panahon sa ilang paghunong sa pagtrabaho. Si Presidente Young usa ka aktibo, lig-on nga tawo sa dihang namatay siya, apan ang appendicitis maoy mihunos sa iyang kinabuhi. Ang misunod niya, si John Taylor, setentay tres anyos dihang nahimo siyang Presidente sa Simbahan. Ang misunod ni John Taylor, si Wilford Woodruff, sobra sa otsenta anyos ang panuigon sa dihang nahimo siyang Presidente sa Simbahan, ug sumala sa uban, angayan na unta siya nga mopahulay sobra na sa baynte ka tuig sa wala pa nang panahona … si Lorenzo Snow miabut sa kapangulohan niini nga Simbahan nga ingon ka aktibo ni bisan kinsang batan-ong lalaki, ug may maayong paghukom, sa edad nga otsentay singko anyos, ug dihang ang Simbahan nakasinati sa daw lisud kaayo nga kahimtang sa panalapi, diin iya kining naluwas. Sa panahon sa iyang tulo ka tuig nga administrasyon, hangtud nga siya otsentay otso anyos ang pangidaron, ang iyang hunahuna klaro ug aktibo sama sa bisan kinsa nga tawo nga nagdumala niini nga Simbahan.

Si Joseph F. Smith, sumala sa daghang mga tawo, duha ka tuig ang sobra sa edad nga angayan na unta siya nga mopahulay, sa dihang nahimo siyang Presidente niini nga Simbahan, ug mao usab ang nahitabo nako. Sunod bulan, sumala sa pipila ka mga tawo, baynte dos ka tuig na sukad nga angay na unta ko nga mopahulay.¹⁷

Wala ako mohangyo ni bisan kinsang tawo o bata niini nga Simbahan, bisan tuod nga ako sobra na sa otsenta anyos ang pangidaron, sa pagtrabaho og sobrang mga oras kay sa akong gibuhat…. Wala koy nahibaloang butang nga makadaot sa panglawas sa tawo nga mas dali kay sa dili pagtrabaho.¹⁸

Nagtuo ko nga mahimong adunay kinaiya diha sa pipila sa mga Santos sa Ulahing mga Adlaw nga moingon, “Siguro, human nga moabut na ta og saysentay singko, dili na kinahanglan nga motrabaho pa ta.”… Nagtrabaho ko og daghan usab nga mga buluhaton sulod sa nangaging disesais ka tuig, sukad ko milapas sa saysentay singko, sama sa akong nahimo kaniadto. Ug uban sa mga panalangin sa Ginoo, kon Iya pa kong tugutan nga magpabilin dinhi sa laing kinse o disesais ka tuig––nga duda ko––gusto nakong motrabaho sa ingon ka daghan kon dili man gani labaw pag gamay kay sa akong nabuhat sa miaging disesais ka tuig. Nagtuo ko nga ang pagtrabaho dili makapatay ni bisan kinsa, apan kanang pagkatapulan makapatay sa usa ka tawo sa sayo nga pangidaron.

Kinahanglan anaa diha sa kasingkasing sa matag lalaki ug babaye, ang determinadong mga pulong, “Magpakabuhi gyud ko. Walay gihatag ngari nako kondili ang panahon nga mabuhi, ug maningkamot ko sa matag adlaw sa akong kinabuhi sa pagbuhat og pipila ka mga buluhaton nga mahimong madawat diha sa panan- aw sa akong Langitnong Amahan, ug kon kini posible, mobuhat og maayo pa karon kay sa akong nabuhat kagahapon.”¹⁹

Mga Sugyot alang sa Pagtuon ug Panaghisgutan

Unsay atong mabuhat diha sa atong mga pamilya aron sa pagsiguro nga ang pagtrabaho maoy madumalaong baruganan sa atong mga kinabuhi? Sa unsang mga paagi nga ang mga ginikanan makatudlo sa ilang mga anak sa pagtrabaho?
Unsaon nato sa pagkakita og kaligdong sa tanang mga trabaho nga atong gibuhat? Unsay atong makat-unan o mabatonan gikan sa pagtrabaho bisan kon kini wala magustohi o wala mauyoni?
Diha sa proseso sa pagkab-ot sa iyang damgo nga makabaton og maayong sweldo, unsa pay laing mga ganti nga nadawat sa batan-ong Heber J. Grant? Unsay pipila ka mga ganti nga inyong nadawat nga resulta sa edukasyon ug pagkugi og maayo?
Nganong importante man alang kanato nga trabahoan ang unsay atong nadawat? Sa unsang paagi nga ang pagkapakyas nga mahimong mapaningkamoton sa kaugalingon makaapekto sa tagsa-tagsa kanato? isip mga pamilya? diha sa atong mga katilingban ug mga nasud?
Sa unsang paagi nga ang pagtrabaho makaapekto sa hunahuna, lawas, ug espiritu? Unsay inyong nakat-unan gikan sa mga tawo kinsa nagpadayon sa pagtrabaho sa tibuok nilang kinabuhi?