Kapitulo 20

Ang Ligdong, Hinay nga Tingog sa Pagpadayag

Samtang kita nagsunod sa ebanghelyo, kita makadawat sa kahayag, pagdasig, ug paggiya sa Espiritu Santo.

Gikan sa Kinabuhi ni Heber J. Grant

Si Presidente Heber J Grant mipahayag, “ang tanang butang walay bili kon itandi sa pagbaton sa espiritu sa Ginoo nga maoy mogiya kanako.”¹ Siya mihimo niini nga pamahayag dihang hapit na matapos ang taas nga kinabuhi diin siya gipanalanginan sa pagpakig- uban sa Espiritu Santo. “Ako nasayud sama sa akong pagkasayud nga ako buhi.” Siya sa makausa misulti, “nga ang [Dios] miggiya kanako sukad pa sa akong pagkabata, nga siya naminaw ug mitubag sa akong mga pag-ampo, nga ako dihay mga pagpadayag … gikan sa Ginoo, ug naninguha sa pagtuman niini.”²

Agi og dugang sa pagdawat og giya sa iyang personal nga kinabuhi, si Presidente Heber J. Grant nakadawat og mga pagpadayag isip Presidente sa Simbahan aron sa paggiya sa tibuok Simbahan. Usa niana nga pagpadayag miabut human dayon sa paggahin kaniya isip Presidente sa Simbahan, sa dihang siya nagtinguha sa kabubut-on sa Ginoo mahitungod sa pagtudlo sa bagong sakop sa Korum sa Napulog Duha ka mga Apostoles. Samtang siya namalandong niini nga kapangakohan, ang iyang hunahuna nagbalikbalik ngadto sa iyang dugay na nga higala nga si Richard W. Young, usa ka matinuoron nga Santos sa Ulahing mga Adlaw ug napamatud-an na nga pangulo. Si Presidente Grant mihisgut niini nga kalagmitan uban sa iyang mga magtatambag, kinsa misuporta sa iyang desisyon. Sa dihang siya mibati na sa kasigurohan sa iyang buhaton, siya misulat sa ngalan sa iyang higala diha sa usa ka papel ug gidala ang papel ngadto sa senimana nga miting sa Unang Kapangulohan ug sa Korum sa Napulog Duha ka mga Apostoles. Apan sa diha nga iya na untang ipahayag ang ngalan alang sa pagtugot sa iyang mga Kaigsoonan, wala kini niya mahimo. Imbis nga ngalan ni Richard W. Young, iyang gipresentar ang ngalan ni Melvin J. Ballard, usa ka tawo nga wala kaayo niya hiilhi.³ Si Presidente Grant dayon miasoy sa gibug-aton niini nga kasinatian diha kaniya:

“Ako mibati sa pagdasig sa buhi nga Dios nga naggiya sa akong mga buhat. Sukad niadtong adlaw nga ako mipili sa wala kaayo hiilhi nga tawo nga mamahimong usa ka apostol, imbis sa akong dugay na ug suod kaayo nga higala, akong nailhan sama sa akong nasayran nga ako buhi, nga ako adunay katungod sa kahayag ug sa pagdasig ug sa paggiya sa Dios diha sa pagdumala sa Iyang buhat dinhi sa yuta.”⁴

Mga Pagtulun-an ni Heber J. Grant

Samtang kita magtuman sa mga kasugo-an ug mangalagad sa Dios, ang Balaang Espiritu mahimo natong kanunay nga kauban ug giya.

Ang Ginoo naghatag sa daghan kanato sa ligdong, hinay nga tingog sa pagpadayag. Kini moabut nga tino ug makusog sama nga kini uban sa makusog nga tingog. Kini moabut sa matag tawo, sumala sa iyang mga panginahanglan ug pagkamatinuoron, aron mahayagan mahitungod sa mga butang nga may kalabutan sa iyang kaugalingong kinabuhi.

Alang sa tibuok Simbahan kini moabut ngadto niadtong kinsa gi-orden sa pagpamulong alang sa tibuok Simbahan. Kining kasayuran nga atong gibatonan diin ang magiyahon nga impluwensya gikan sa Ginoo mahimong mabatyagan diha sa tanang mga kasinatian sa kinabuhi, sumala sa atong mga panginahanglan ug pagkamatinuoron, maoy usa sa mga dagkong panalangin nga gihatag sa Dios sa mga katawhan.⁵

Ako nalipay … nga ang matag Santos sa Ulahing mga Adlaw, matag mapaubsanon nga anak nga lalaki ug babaye sa Dios nga midawat sa ebanghelyo ug nahimong sakop sa Simbahan ni Jesukristo sa mga Santos sa Ulahing mga Adlaw midawat sa pagsaksi sa Espiritu Santo; nga ang gasa sa mga pinulongan, ang gasa sa pagpanagna, sa pag-ayo sa masakiton ug sa ubang mga gasa ug mga panalangin, makita diha sa Simbahan, ug kini gihatag dili lang sa mga kalalakin-an nga naghupot og dagko nga mga katungdanan sa Simbahan. Ako nakapaminaw na sa pipila sa labing espirituhanon ug madasigon ug pipila sa labing maayo nga mga pakigpulong sa akong kinabuhi gikan sa mga kalalakin-an kinsa wala maghupot og opisyal nga katungdanan….

Dili katungdanan, dili edukasyon ang naghatag sa Espiritu sa Dios; apan ang pagtuman sa mga kasugoan sa Labawng Makagagahum nga Dios ug ang pagkamapainubsanon sa kasingkasing ug ang pagtinguha sa pagtuman sa mga kasugoan sa Dios sa atong matag adlaw nga kinabuhi ug pagpakighinabi.⁶

Matinguhaon akong naghangyo kaninyo mga higala, matinguhaon akong naghangyo kaninyo akong mga igsoong lalaki ug babaye, matag usa, sa pagpuyo sa paagi nga ang kahayag sa Balaang Espiritu sa Dios mahimo unta ninyong makanunayong kauban, maglamdag sa inyong hunahuna, makapadugang sa inyong salabutan, magdasig sa inyong tinguha sa paglihok uban sa tanang gahum, sa tanang abilidad nga gihatag sa Dios kaninyo alang sa katumanan sa Iyang mga katuyoan.⁷

Tinguhaa ang Dios ug Siya maanaa kaninyo. Kon kita mapakyas sa pagtinguha sa Dios walay kasiguroan alang sa matag usa kanato. Walay lalaki o babaye kinsa nagtinguha sa Espiritu sa Dios ug nagsunod sa iyang mga pag-aghat nga mapakyas.⁸

Ang kalagmitan sa daghan kaayo nga mga tawo mao ang pagbuhat sa mga butang nga makapatagbaw sa atong mga kaibog ug sa mga kahinam; apan ang mga sugo sa ebanghelyo wala motugot kanato sa pagtagbaw sa atong kahangol; gikinahanglan nga kita makigbatok nianang mga kahangol ug mga kahinam. Kon atong suta-on kana nga mga sugo sama sa Pulong sa Kaalam, atong makaplagan nga pinaagi sa pagtuman niini kita motubo diha sa kalig-on sa hunahuna ug sa kalig-on sa panglawas, ug ang atong tabernakulo angayan nga puy-an sa Balaang Espiritu sa Dios. Kita molambo ug mahimong mas diosnon kon kita mobuntog niining mga kahinam ug mga kaibog nga sukwahi sa hunahuna ug kagustohan sa atong Langitnong Amahan.⁹

Kon ang usa ka tawo nagkulang sa Espiritu sa Dios, pabuhata og pahagoa siya alang sa kauswagan sa gingharian sa Dios, ug siya makabaton sa Espiritu sa Dios.¹⁰

Tugbang sa imo ug akong paghago ug pagtuman sa mga kasugoan sa Dios kita panalanginan pinaagi sa kahayag ug pagdasig sa Espiritu sa Labaw nga Makagagahum nga Dios.¹¹

Akong nakat-unan nga kon ang mga katawhan moalagad Kaniya ug magtuman sa Iyang mga kasugoan, sila motubo diha sa kahibalo sa kamatuoran, nga sila motubo nga lig-on ug mahayagon pinaagi sa buhong nga pagbubo sa Iyang Balaan nga Espiritu.¹²

Kon kita magpasagad sa atong mga katungdanan, ang Espiritu Santo mobiya kanato, bisan pa man kon giunsa kita pagpapanalangin sa nangagi.

Sama kasiguro nga ang pagpalta sa kaon makaluya sa atong mga lawas ug mamatay, mao usab kasiguro nga ang pagpasagad sa kinahanglanon sa atong espirituhanon nga mga kinaiyahan maoy makaingon sa kamatayon niini.¹³

Kon ang mga tawo dili magmabinantayon, dili magpakabana, sa panahon nga sila mosupak sa Pulong sa Kaalam, sa panahon nga sila magpasagad sa ilang mga tigum, sa panahon nga sila mapakyas sa pagtudlo sa ilang mga anak pinaagi sa lagda og panigingnan sa ebanghelyo ni Ginoong Jesukristo, nga sila mopalayo gikan sa hugot nga pagtuo, ang Espiritu sa Dios kuhaon gikan kanila ug sila magpabilin diha sa kangitngit.¹⁴

Isip mga Santos sa Ulahing mga Adlaw nga nakadawat sa pagpamatuod sa Ebanghelyo, nahimo natong kapangakohan ang paglambo diha niini nga pagpamatuod pinaagi sa pagtuman sa kasugoan sa Dios; ug, ako moingon nganha kaninyo nga ang tawo nga molambo sa matag adlaw sa iyang kinabuhi mao ang tawo nga tataw nga nagtuman sa yano, matag adlaw nga mga katungdanan nga gikinahanglan niyang buhaton. Dili ang mga pamatuod nga atong nabatonan, dili ang daghang mga panan-awon nga miabut kanato. Ngano, ang mga tawo nga labaw pa sa ubang mga tawo nga buhong nga gipanalanginan pinaagi sa pagpakita sa mga anghel, gani pinaagi sa pagpakita sa atong Ginoo ug Manluluwas nga si Jesukristo, sama ni Sidney Rigdon ug Oliver Cowdery—kini nga mga tawo wala mapabiling lig-on ug makanunayon diha sa Simbahan pinaagi niining dagko nga mga panalangin ug mga pagpakita. Apan ang mga tawo kinsa mituman sa mga kasugoan sa Dios, ang mga tawo kinsa matinouron sa ilang mga pag-ampo, ang mga tawo kinsa mipaluyo ug milaban sa Prieshood sa Dios sa tanang higayon ug ubos sa tanang kahimtang, ang mga tawo kinsa mituman sa Pulong sa Kaalam, ang mga tawo kinsa mibayad sa ilang ikapulo, sa kanunay nagmatinuoron ug nagmatinud-anon, ug wala biyai sa Espiritu sa Dios. Sa laing bahin, kadtong kinsa mibutang sa ilang kaugalingon sa malisud nga kahimtang, sa pagpangita og sala sa uban, pag-inom, ug paglingawlingaw, ug pagpakigsalo ug paghimo ug tinago nga mga miting, naghunahuna nga sila wala hatagi og makatarunganon nga pagtagad, ug wala hatagi og igong pagtamud—kini nga klase sa mga tawo mawad-an sa Espiritu sa Dios.¹⁵

Walay pundok sa mga Elder nga nagbarug diha sa pulpito nga nakapaikag kanako, walay bisan kinsa nga nakatandog og maayo sa akong kasingkasing sama sa namauli na nga mga misyonaryo. Sila namauli nga puno sa espiritu sa ilang misyon, napuno sa Espiritu sa Dios ug sa gugma alang sa ilang isigkatawo…. Apan maora og sa kasagaran gayud, sulod sa mubo kaayo nga panahon human sa ilang pagpauli; sa panimalay, nawad-an sila sa ilang kaikag, ug nagpuyo na lang, walay laing gihimo gawas sa ilang kaugalingong mga kalihokan.

Tataw lang nga mahinungdanon alang kaninyo ug kanako, kon kita buot nga makabaton og ganti sa matinuoron nga pangalagad, ang makugihon nga paghago sa pagsangyaw sa mga baruganan sa Ebanghelyo sa atong kaugalingong dapit o sa gawas. Walay tawo nga magdahum nga mahimong aktibo ug adunay malagsik nga panglawas gawas kon siya mohimo sa tukma nga mga ehersisyo; ug ang mao nga mga baruganan sama ra usab diha sa kahimsog sa atong espirituhanon nga organisasyon. Ang tawo nga motungha sa kolehiyo ug mokuha og abogasiya, kinahanglang dili lang magmakugihon aron makalampos sa iyang gipili nga propesyon, apan kinahanglan usab siyang magmakugihon human siya makagradwar o siya mahimo nga abogado nga walay bili. Mao usab sa tawo kinsa molakaw aron magsangyaw sa Ebanghelyo ug mahimong malampuson nga misyonaryo; kon dili siya magpadayon sa pagbansay sa iyang kaugalingon ug sa espirituhanon nga kaayohan sa iyang isig kaingon human siya mopauli, siya mawad-an sa Espiritu nga iyang naangkon sa dihang siya diha sa misyon.¹⁶

Sa akong pagkamatikod kon unsa ka daghan kadtong kinsa buhong nga gipanalanginan sa Ginoo ang nawad-an sa espirituhanon nga kaikag mahitungod sa ilang isig ka tawo, kini nagpuno kanako sa pagkamapainubsanon. Kini nagpuno kanako sa espiritu sa kaaghup ug sa matinuoron nga tinguha nga masayran gayud nako ang tinguha ug kabubut-on sa Dios ug mosunod sa Iyang mga kamandoan kay sa motuman sa akong kaugalingong mga tinguha.¹⁷

Kon kita makat-on sa kabubut-on sa Dios pinaagi sa pagdasig sa Balaang Espiritu, kita adunay katungdanan sa pagtuman niini sa atong mga kinabuhi.

Ang pagtuman sa mga kasugoan sa Dios magdala kanato sa kahayag ug pagdasig sa Iyang Espiritu. Dayon ang mga tinguha sa atong mga kasingkasing mao ang pagkahibalo sa hunahuna ug kabubut-on sa Ginoo, ug kita mag-ampo alang sa kalig-on ug kaarang sa pagtuman niini, sa ingon niana magsunod sa mga lakang sa atong Ginoo ug Agalon nga si Jesukristo.

Ako nasayud nga kita adunay kaugalingon nga mga kahuyang, ug nga kita makahimo ug makasulti og mga butang nga dili ikahimuot sa mga mata sa atong Langitnong Amahan; apan kon kita magtinguha sa pagpakisayud sa kabubut-on sa Dios labaw pa sa ubang butang, ug kon kita magtinguha sa kalig-on sa kinaiya, human kita masayud sa hunahuna ug kabubut-on sa atong Langitnong Amahan, aron sa pagtuman niini sa atong kinabuhi, ako nasayud nga ang Dios motabang kanato, ug diha sa pag-uswag sa atong edad ug kahibalo ug panabut kita usab molambo diha sa gahum ug sa pagpatuman sa Iyang kabubut-on.¹⁹

Kon wala ang kahayag ug ang paggiya sa Espiritu sa Dios ang buhat sa Dios dili molampus; kini malusno ug mabungkag. Apan anaa diha sa kasingkasing sa mga katawhan kanang malungtarong kasayuran nga maoy naghiusa ug nagbugkos kanila. Kon ilang madungog ang tinuod nga tingog sa magbalantay sa karnero, ila kining maila, ug sila andam ug tagana nga mosunod niini.²⁰

Walay laing butang nga makahatag og sama kahingpit nga kalipay ngadto ni bisan kinsa sama sa pagbuhat samga butang nga gikinahanglan nilang buhaton ug nga ikahimuot sa Dios. Kita mianhi sa kalibutan aron sa pagbuhat sa hunahuna ug kabubut-on sa Ginoo, ug gikinahanglan sa matag usa ug tanan kanato nga magpuyo sa paagi nga kita mahimong angayan sa mga pagpadayag sa Iyang Espritu, ug nga kon kita makadawat niini kita adunay kaisug ug determinasyon sa pagtuman niini.²¹

Mahinungdanon sa matag Santos sa Ulahing mga Adlaw ang pagpangita sa kahayag ug pagdasig sa Espiritu sa Dios, ug human modawat niini, mohimo sa tanang kahibalo nga anaa kaniya aron mapadayon ang pag-uswag sa buhat sa Dios. Ayaw gayud pagpakig- uban sa mga katawhan nga nagtinguha nga gamay ra ang ilang mahimo; apan sa kanunay pakig-uban sa mga katawhan nga nagtinguha nga daghan ang ilang mahimo. Patas-i ang inyong panglantaw.²²

Hinaut nga ang kahayag ug pagdasig sa Dios mahimong atong makanunayon nga giya ug kauban. Hinaut unta nga kita molambo ug mouswag diha sa Espiritu sa Dios ug diha sa pagpamatuod sa Ebanghelyo, ug diha sa gahum ug kasarang sa pagtuman sa mga kasugoan sa atong Langitnong Amahan dinhi sa yuta; ug hinaut nga kita molambo diha sa tinguha sa pagbuhat sa ingon, mao ang akong pag-ampo ug tinguha.²³

Mga Sugyot alang sa Pagtuon ug Panaghisgutan

Nganong mahinungdanon man ang pagsabut nga ang pagpadayag moabut sa usa ka tawo sumala sa iyang kaugalingong panginahanglan? Sa unsa nga paagi ang pagpadayag makagiya sa mga ginikanan, mga magtutudlo, ug mga pangulo sa Simbahan sa ilang mga kapangakohan? Unsa ang mahimong mahitabo kon ang mga tawo mosulti nga nakadawat og pagpadayag mahitungod sa mga butang nga walay labut sa ilang kauglingong katungdanan?
Nganong ang pagsunod sa mga kasugoan usa ka panginahanglan aron atong mabatunan ang pagpakig-uban sa Espiritu Santo? Nganong atong madawat ang impluwensya sa Espiritu kon kita motrabaho ug maghago alang sa kauswagan sa gingharian sa Dios?
Sa unsa nga paagi nato mailhan ang “ligdong ug hinay nga tingog sa pagpadayag” ug ikatandi kini sa uban nga mga impluwensya? (tan-awa sa D&P 16:15, 22–23; 8:2–3; 11:13–14.)
Unsa ang ubang mga kasinatian nga inyong ipaambit diin inyong gisunod ang mga pag-aghat sa Espiritu? Sa unsa nga paagi ang pagsunod sa mga pag-aghat sa Espiritu midala kaninyo og kalinaw ug direksyon sa inyong kaugalingon nga kinabuhi? sa inyong pamilya? sa inyong buluhaton sa Simbahan? sa inyong trabaho?