Kapitulo 3

“Higugmaa ang Imong Silingan sama sa Imong Kaugalingon”

Kita kinahanglan gayud magpuyo nga may kalabutan sa kahangturan, mobati nga puno sa pagkamabination, kapuangod, gugma nga putli ug mainantuson ngadto sa tanan.¹

Gikan sa Kinabuhi ni John Taylor

Si Presidente John Taylor kanunay nga motudlo sa mga Santos sa pagkamahinungdanon sa dili pagtuo lamang, apan usab sa pagbuhat sa hangyo sa Manluluwas sa paghigugma sa atong mga silingan. “Maghigugmaay sa usag usa,” siya miawhag, “ug buhata ang mga buhat sa pagkamatarung, ug tan-awa ang kaayohan sa tanan, ug tinguhaa ang pagpasiugda sa kalipay sa tanan. Mao kana ang gibuhat sa Dios.”² Siya nagtuo pag-ayo sa tahas sa Espiritu sa pag-amuma sa atong gugma alang sa uban. “Kon kamo makaangkon sa Espiritu sa Dios,” siya mitudlo, “kamo mobati og puno sa pagkamabination, gugma nga putli, pagkamainantuson, ug kamo andam sa tibuok adlaw sa paghatag ngadto sa matag tawo niana nga imong gusto sa imong kaugalingon. Kamo mobati nga andam na sa tibuok adlaw sa pagbuhat ngadto sa tanang mga tawo unsay inyong buot nila nga buhaton nganha kaninyo.”³

Gikan sa iyang bunyag niadtong 1836 hangtud sa iyang kamatayon niadtong 1887, si John Taylor nakasaksi og hilabihang pagpanggukod ug dili makiangayon nga pagtagad ngadto sa mga Santos. Iyang nakita ang manggugubot nga panon nga miabug sa mga sakop sa Simbahan gikan sa ilang mga panimalay, siya usa ka saksi sa pagkamartir ni Joseph ug Hyrum Smith (ug siya mismo grabe nga nasamdan sa pag-ataki); ug siya uban sa mga Santos sa Utah sa dihang sila padayong gigukod. Bisan pa niana, siya kanunay nga miawhag sa mga sakop sa Simbahan sa paghigugma sa tanang mga tawo. Sa usa ka pakigpulong nga iyang gihatag sa Utah samtang siya mao ang Presidente sa Korum sa Napulog Duha ka mga Apostoles, siya miingon:

“Si David nag-ampo sa Dios sa pagpadala dayon sa iyang mga kaaway ngadto sa impyerno [tan-awa sa Salmo 55:15]. Si Jesus, sa dihang siya gilansang sa krus, nag-antus sa kasakit sa mapintas nga kamatayon, miingon, ‘Amahan, pasayloa sila; kay sila wala masayud sa ilang gibuhat.’ [Lucas23:34.] Ako mas gusto niana nga pag-ampo kay sa pag-ampo ni David. … Kining mao nga pagbati kinahanglang ania kanato. Kinahanglan nga kita aduna niini sa usag usa ug motagad sa usag usa uban sa pagkamabination ug dili magbaton og kasuko. … Ako nakadungog og usa ka tawo nga mosulti usahay, ‘Gikasilagan ko ang maong tawo.’ Ngano, wala ako makaila og usa ka tawo nga akong gikasilagan sa kalibutan. Ang sugo mao ang paghigugma sa usag usa.”⁴

Mga Pagtulun-an ni John Taylor

Kita kinahanglan nga mopakita og gugma alang sa usag usa isip mga igsoon.

Ang Dios mao ang atong Amahan, kita Iyang mga anak, ug kitang tanan kinahanglan nga mag-inigsoonay; kita kinahanglan nga mobati ug molihok sama sa igsoon, ug samtang kita naningkamot sa pag-alagad sa Ginoo nga atong Dios uban sa atong tibuok nga mga kasingkasing, mga hunahuna, mga kalag ug sa kalig-on, kita kinahanglan, sa samang higayon, maningkamot sa paghigugma sa atong silingan sama sa atong mga kaugalingon; kita kinahanglan nga mobati og pagpakabana sa iyang kaayohan, kalipay ug kauswagan, ug sa bisan unsang butang ug sa tanang butang nga mopasiugda sa iyang temporal ug mahangturong kaayohan.⁵

Kon kita mosulay sa paglimbong sa atong kaigsoonan, makapaabut ba kita nga panalanginan sa Dios, kay siya usa ka anak sa atong Langitnong Amahan ingon nga kita mga anak. Ug ingon nga iyang anak siya mibati og pagpakabana sa iyang kaayohan, ug kon kita mosulay sa pagpamintaha ngadto sa kadaot sa anak sa Ginoo; sa inyong hunahuna mahimuot ba siya kanato? … Kita buot nga magmakiangayon ug magmanggihatagon sa usag usa. “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog.” Niini kita giingnan diha sa unang sugo. Ug ang ikaduha sama niini, nga mao ang, “Higugmaa ang imong silingan sama sa imong kaugalingon.” [Marcos 12:30–31.] Nagbuhat ba kita niini? Kon kita naghimo, pagkaanindot nga kita moatubang sa Ginoo. …

… Kita kinahanglang magpuyo aron ang atong gugma alang sa usag usa madugangan sa tanang panahon, ug dili mokunhod, ug makabaton og gugma nga putli diha sa atong mga dughan aron kita mosagubang sa mga kasakit sa usag usa, mobati nga kita mga anak sa Dios magtinguha sa pagpadayon sa iyang mga pulong ug kabubut-on ug balaod. Ug dayon motagad sa tanan sa husto nga paagi.⁶

Kita kinahanglan nga puno sa gugma nga putli, sa inigsoon nga kaayo ug pagbati ug gugma ngadto sa usag usa ug gugma ngadto sa tanang mga tawo. Kita kinahanglan nga mobati sama sa gibati sa atong langitnong Amahan.⁷

Magtinguha sa kaayohan sa usag usa, sama sa gisulti sa kasulatan: “Paghigugmaay kamo sa usag usa sa gugma nga inigsoon; pagpalabwanay kamo sa pagtahud sa usag usa.” [Tan-awa sa Mga Taga-Roma 12:10.] Kamo moingon nga lisud kini; apan, mas maayo nga inyo kining buhaton. Kita gisultihan sa paghigugma sa atong silingan sama sa atong mga kaugalingon. Kon kita makahimo niini, ug dayon palabihon ang atong silingan sa atong kaugalingon, ug kon adunay gamay nga bintaha, ibutang kini sa ilang kiliran, wala lamang kita magtuman sa balaod ug sa mga propeta, apan sa ebanghelyo. Atong ugmaron ang espiritu sa gugma ug pagkamabination, ug kalimtan ang dili kaayo maayo.⁸

Ang ebanghelyo makatabang kanato nga makaugmad og gugma ug panaghiusa.

Ang relihiyon nga atong giapilan, ang espirituhanong kamahinungdanon niini, ug nakapahimo kanato sa pagpakigsulti sa usag usa ug sa pagtabang kanato sa paghigugma sa usag usa, ug ako buot nga anaa untay gamay niana nga kinaiya ngari kanato, ug nga kita dugang maghigugmaay sa usag usa ug dugang mahunahunaon sa tinguha sa usag usa. Ako manghinaut nga mosimpatiya sa atong mga kaigsoonan, ug mapuno sa gugmang inigsoon ug magmanggihatagon sa usag usa. Ako manghinaut nga magpadayon kanang gugmang mabination, ug nga kini mokatap ug magkadaghan, magdagayday, gikan sa tuburan sa kinabuhi— gikan sa Dios, gikan sa kasingkasing ngadto sa kasingkasing sama sa lana nga gibu-bu gikan sa sudlanan ngadto sa laing sudlanan, nga ang panag-uyon, simpatiya, pagkamabination ug gugma mahimong anaa kanatong tanan. Mao kini ang mahimo sa ebanghelyo kanato kon kita motugot niini.⁹

Sa usa ka tigum [sa Simbahan] pipila na ka mga tuig ang milabay dihay kawhaan ug lima ka mga nasyonalidad nga girepresentaran. Diha bay kalainan sa sentimento niining nagkalainlaing mga katawhan? Wala.

Sa pagpakigsulti sa usa ka tawo karong bag-o bahin sa pipila ka mga panagsumpaki tali sa English ug Irish nga mga katawhan, gisultihan ko siya nga subo kaayo nga anaa kanang maong pagbatia. Hinoon, siya miingon, silang duha managlahi og kaliwat ug sila dili magkatipon, nga ang usa Celtic ug ang lain Anglo-Saxon, ug ang ilang mga simpatiya ug mga pagbati dili pareha. Ang ilang mga ideya ug mga pagbati nagkalahi, ang ilang edukasyon ug ang ilang kinaiya magkalahi. Tinuod kaayo nga hangtud karon. Apan unsa man kita? Kita nagpundok dinhi ubos sa inspirasyon sa Espiritu Santo, ug sa ako nang gikaingon, makahatag og panaghiusa sa pagbati ug espiritu, panag-uyon ug simpatiya nga wala dinhi sa kalibutan ug si Jesus miingon, “Ang tanang mga tawo makaila nga kamo mga tinun-an ko pinaagi niini, kon kamo maghigugmaay sa usag usa.” (Juan13:35.)

Ug ngano man kini, mga kaigsoonan? Mga Taga Scandinavia ba kita, mga English ba kita; mga Scotch, Swiss o Dutch, bisan unsa pa kita? Dili; ang Espiritu sa Dios, nga atong naangkon pinaagi sa pagsunod sa mga kinahanglanon sa ebanghelyo, nga natawo pag-usab, sa tubig ug sa Espiritu, nakapahimo kanato nga usa sa kasingkasing, usa sa hugot nga pagtuo, usa sa bunyag; kita walay mga panagbahin sa nasyonalidad o matang niana nga kahimtang taliwala kanato.¹⁰

Kita dili managsama. Ang mga nawong managlahi, ang atong mga kinaiya managlahi, bisan og hinimo sa samang materyal ug adunay samang matang sa pagka-organisar. Lahi kaayo kita nga lisud kaayo pangitaon ang duha ka tawo nga pareha. Ako dili gusto nga ang tanan magtuo sama sa akong pagtuo, ako andam nga mohatag sa tanan og dakong higayon bahin niining mga butanga; apan ako buot nga makakita sa tanan nga mohimo og matarung ug magmatinud-anon ngadto sa Dios. Ug alang sa daghang ginagmay nga mga butang gamay ra ang akong pagtagad niini.¹¹

Kita nagpakita og gugma pinaagi sa aktibo nga pag-amuma sa uban.

Kon ang maayong mga tawo nag-antus sa sagad nga mga kinahanglanon sa kinabuhi, ang mga kasulatan nag-ingon, “Apan kon adunay nakapanag-iyag mga butang alang sa panginabuhi dinhi sa kalibutan, ug kini siya nakakita sa iyang igsoon nga anaa sa kawad- on, ug unya magpagahi lamang siya sa iyang kasingkasing, unsaon man sa pagpabilin diha kaniya sa gugma sa Dios?” [Tanawa sa 1 Juan 3:17.] Ug bahin niadtong mga butanga, kita kinahanglan motan-aw sa panginahanglan sa tanan. … Dili nato sila himoong makililimos; apan ato silang isipon nga mga kaigsoonan, mga maayo, madungganong mga lalaki ug mga babaye, tanawon nato nga sila nasangkapan.

Akong nakita ang pipila ka mga tawo kinsa moluhod ug magampo sa kinasingkasing ngadto sa Dios sa pagpakaon sa kabus ug sa pagpasinina sa hubo. Karon, ako dili gayud mangayo sa Ginoo sa pagbuhat og usa ka butang nga dili nako buhaton. Kon sila ania kanato, atong adtoon ug hupayon sila. … Ug kon ang mga tawo walay maayong palad sa bisan unsang matang, atimana sila ug ihatag ngadto kanila kadtong mga butang nga gikinahanglan alang sa ilang kaayohan ug kalipay. Ug ang Dios mopanalangin kanato sa pagbuhat sa ingon.

Tingali mas maayo pa nga kamo modala, og usa ka sako sa harina, karneng baka,… asukar, mantikilya ug keso, ug sinina, ug sugnod, ug mga kahayahay ug mga kahamugaway sa kinabuhi, ug sa ingon nakalipay sa mga tawo, kay sa tanang mga pag-ampo nga inyong ikahalad ngadto sa Ginoo mahitungod niini, ug siya gusto usab nga makakita niini. Mao kana ang husto nga paagi sa paghimo niini nga butang. Sa pagdawat og mga panalangin sa atong mga kaugalingon, paningkamuti nga maapod-apud kini, ug ang Dios mopanalangin ug mogiya kanato sa mga pamaagi sa kalinaw.¹²

Usa ka tawo miduol ngadto ni Jesus sa usa ka higayon ug nangutana kaniya, kon unsa ang labing dako nga sugo. Ang Manluluwas mitubag kaniya: “Higugmaa ang Ginoo ang imong Dios sa tibuok mong kasingkasing, ug sa tibuok mong kalag, ug sa tibuok mong salabutan. Mao kana ang una ug dako nga sugo. Ug ang ikaduha sama niini, Higugmaa ang imong silingan sama sa imong kaugalingon.” [Mateo 22:37–39.] Makahimo ba kita niana? Usahay kini malisud nga trabaho, dili ba? Kita kanunay nga mobati nga palabihon nato nga mobutang og duha ka mga dolyar sa atong kaugalingong bulsa kay sa bulsa sa atong silingan? Kita buot nga makabaton og duha o tulo sa mga baka kay sa atong silingan nga makabaton og usa? …

Ayoha pagtagad ang tanan, ug buhata unsa ang matarung ngadto sa tanan, ug ugmara ang espiritu sa pagkamabination ngadto sa tanan. Ug kon ikaw makakita sa kahayopan sa laing tawo nga diha sa uma sa laing tawo, tinguhaa ang iyang kaayohan sa pag-adto ug pag-abug niini; ug paningkamuti ang pagpalambo sa kaayohan sa inyong mga silingan ug mohimo kanila nga mobati nga komportable kutob sa inyong mahimo; ug ang Dios mopanalangin kanato, ug kita mopanalangin sa usag usa.¹³

Kita makapakita og gugma pinaagi sa pagpasaylo sa uban ug sa pagpangayo sa ilang pasaylo.

Tagda ang usag usa sa husto. Nakasala ba kamo batok sa usag usa? Busa lakaw ug bayri kini. Nakapanglimbong ba kamo sa uban? Lakaw ug tarunga kini. Nakasulti ba kamo og dili maayo sa inyong mga igsoon? Lakaw ug dawata ang inyong sayop ug pangayo og pasaylo, magsaad sa pagbuhat og mas maayo sa umaabot. Ug dayon siya tingali moingon, sa laing bahin, “Oo, ug ako miingon sa miaging adlaw, palihug pasayloa ko?” Unsa ka maayo ug unsa pa ang dugang sa pagtuman sa balaang tawag sa usa ka santos sa Dios kay sa pagbaton og kayugot diha sa kasingkasing.¹⁴

Magtinagdanay kita sa usag usa uban sa pagkamabination ug motahud sa dungog sa uban, ug magpakabana sa kaayohan sa usag usa, motagad sa uban sama sa atong gusto nga tagdon kita sa Dios. Ug dayon, kon kita moduol sa Ginoo, kita makaingon, “Amahan, pasayloa kami sa among mga utang, maingon usab nga kami nakapasaylo man sa nakautang kanamo,” [tan-awa sa Mateo 6:12, 14] kay kon kita dili mopasaylo sa atong igsoon, makapaabut ba kita sa Langitnong Amahan nga mopasaylo kanato? Kon kita adunay panagbingkil sa atong silingan, atong paningkamutan nga mahusay kini. Isulti, “Igsoon, ang akong konsensya naghasol kanako mahitungod sa butang nga akong nasulti kanimo o gibuhat kanimo, o sa atong panagsabut diin ako namintaha kanimo, ug mianhi ako aron sa pagtarung niini, kay ako determinado sa pagbuhat og husto, bisan unsa pay buhaton sa ubang mga tawo.”¹⁵

Kon ang mga tawo, nga nagsubay sa sayop nga pamaagi, nagdanghag ug nagtinguha sa pagpasakit kanato, magtinguha ba kita sa pagpasakit kanila? Dili, atong paningkamutan ang pagbuhat sa tanang maayong buhat ngadto kanila kutob sa atong mahimo. Apan kana dili kasagaran.” Apan kita kinahanglan nga mag-usab sa atong kinaiyahan ngadto sa balaang hiyas. Si Jesus mipahayag, “Kamo nakadungog na nga giingon, Higugmaa ang inyong silingan, ug dumti ang inyong kaaway. Apan magaingon ako kaninyo, Higugmaa ninyo ang inyong mga kaaway, panalangini ninyo ang nagapanghimaraut kaninyo, buhata ang maayo sa mga nagadumot kaninyo ug pag-ampo kamo alang sa mga nagabuhat kaninyo ug magalutos kaninyo,” ugbp. [Mateo 5:43–44.] Kon kamo nakahimo na niining tanan ug nakabuhat sa tanang gikinahanglan sa balaod, unsa pa ang angay nga pangayoon kaninyo? Wala na. …

. … Kon adunay panagbingkil tali kanako ug ni bisan kinsa, mahimo nga ako makigsabut, oo magsabut-sabut o bisan mouyonuyon na lang ako. Ingon og ako mobati nga magmanunuton. Ako moingon, ako dili gustong makig-away, ako buot nga mahimong usa ka Santos; Ako naningkamot alang sa kaputli, hiyas, panaginigsoonay, ug alang sa pagsunod sa mga balaod sa Dios dinhi sa yuta, ug alang sa mga trono ug mga kayutaan, ug mga dominyon sa mahangturong mga kalibutan, ug ako dili motugot sa walay hinungdan nga mga kalihokan sa pagbabag sa akong mga tumong. Ako naningkamot sa kinabuhi, sa mahangturong mga kinabuhi ug mahangturong mga kahimayaan didto sa gingharian sa Dios.¹⁶

“Pasayloa kami sa among mga kalapasan, sama sa among pagpasaylo niadtong nakalapas batok kanamo.” Kanunay ba kamong naghunahuna niana? Kita moluhod ug daghan kanato naghunahuna nga kita maayo na kaayong mga tawo; apan dunay usa ka igsoon, dili kaayo husto ang iyang gihimo, ug dili kaayo ko gusto niya, ug ako makig-istorya kaniya usahay, kay siya nakahimog kadaut kanako, ug ako buot gayud nga mobalos, apan, O Dios, dili ka ba makapasaylo sa akong mga sala? Ako mopasaylo, miingon ang Ginoo, sa kondisyon nga ikaw mopasaylo sa imong igsoon, ug mao lamang kana ang kondisyon. “Busa kon magdala ka sa imong halad sa halaran, ug diha mahinumdom ikaw nga ang imong igsoon adunay diyutay nga butang batok kanimo; biyai diha ang imong halad sa atubangan sa halaran, ug lumakaw ka, pagpakig-uli una sa imong igsoon, ug unya moduol ka ug ihalad ang imong halad.” [Mateo 5:23–24.] Kon kining balaora natuman na, dayon kita makaingon, pasayloa ang among mga kalapasan sama sa among pagpasaylo niadtong nakalapas batok kanamo.

Sa atong kondisyon karon, kon ang Ginoo motubag sa atong mga pag-ampo, kadaghanan kanato dili mapasaylo. Kon kita buot sa tanang mga katawhan nga mahimong maayong mga santos, kita kinahanglang mahimong maayong mga santos sa atong mga kaugalingon. Himoa nga siya nga moingon ngadto sa lain, “Ikaw kinahanglan nga dili gayud mangawat,” dili mangawat mismo sa iyang kaugalingon. Ikaw nga nagtudlo sa imong igsoon nga dili mosulti og dautan sa iyang silingan, ikaw wala ba magbuhat niini sa imong kaugalingon? …

Kinahanglang maglihok kita alang sa interes sa usag usa, magbaton og simpatiya nga pagbati alang sa usag usa. Kita mga igsoon diha sa simbahan ug sa gingharian sa Dios, gihiusa sa dili mabugto nga mga higot sa walay katapusang Ebanghelyo, dili lamang sa karon, apan sa kahangturan. Tungod niini ang atong tanang mga tumong kinahanglan nga alang niana nga katuyoan, natukod diha sa mga baruganan sa pagkamatarung ug panaghigala.¹⁷

Kita kinahanglan nga mosunod sa hingpit nga ehemplo sa gugma sa Manluluwas.

Ang atong mga pagbati ngadto sa kalibutan sa mga tawo, sa kinatibuk-an, kinahanglan nga sama sa gipakita ni Jesus ngadto kanila. Siya nagtinguha sa pagpauswag sa ilang kaayohan, ug ang atong motto kinahanglan nga pareha sa Iyang motto—“Kalinaw sa yuta ug pakigdait sa mga tawo.” [Tan-awa sa Lucas 2:14.] Bisan kinsa pa sila o unsa sila kita kinahanglan nga magtinguha sa pagpauswag sa ilang kalipay ug kaayohan sa kaliwat ni Adan.¹⁸

Kon kita masayop og gamay ang Manluluwas dili molihok ingon sa usa ka buang, madumtanon nga tawo, sa paghampak sa tawo. Siya puno sa pagkamabination, mainantuson, ug mapailubon, ug motagad sa tanan sa pagkamabination ug pagtahud. Kini mao ang mga pagbati nga atong buot ipatigbabaw ug pagadumalahon, kini mao ang mga baruganan, ug kini mao ang espiritu nga kinahanglan nga modasig sa matag elder sa Israel; ug pinaagi niini siya kinahanglan nga modumala sa iyang kinabuhi ug mga lihok.¹⁹

Kon si Jesus, sa dinhi pa sa yuta, mapailubon nga nakalahutay sa mga pagtamay, pagbiay-biay ug mga pagsaway sa mga tawo nga walay pugong-pugong og walay pagtahud Kaniya; kon ania kanato ang mga baruganan nga Iyang gipahibalo, kita makahimo usab sa pagmahal sa madungganon ug mapasayloon nga mga pagbati nga anaa sa Iyang dughan….

Si Jesus mianhi dinhi sumala sa gi-orden nang daan nga plano ug katuyoan sa Dios kalabut sa tawhanong pamilya isip Bugtong Anak sa Amahan nga puno sa grasya ug kamatuoran. Siya mianhi aron sa paghalad sa Iyang kaugalingon nga usa ka sakripisyo, sa makiangayon alang sa dili makiangayon; sa pagtubag sa mga gikinahanglan sa nasupak nga balaod, nga dili matubag sa tawhanong pamilya, sa pagluwas kanila gikan sa mga kadaot sa pagkapukan, sa pagluwas kanila gikan sa gahum sa kamatayon diin ang tanang mga tawo naulipon tungod sa kalapasan sa usa ka balaod, ug Siya sa Iyang Kaugalingon… mihalad sa iyang kaugalingon, ang Anak sa Dios, isip sarang nga makaula alang sa mga sala sa kalibutan. Ug sa dihang Siya gisupak, gisalikway, ug gibiyaan, gilud-an ug gipakaulawan; ug pag-usab, sa dihang Siya gilansang sa krus, … Siya [miingon], “Amahan, pasayloa sila; kay sila wala masayud sa ilang gibuhat.” [Lucas 23:34.]

Siya mitudlo nga gisulat diha sa balaod sa karaang mga panahon, nga ang “usa ka mata baslan og mata, ug ang ngipon baslan og ngipon:” apan, Siya miingon, “Ako magaingon kaninyo … Higugmaon ninyo ang inyong kaaway, panalanginan ninyo ang nagapanghimaraut kaninyo, buhata ang maayo sa mga nagadumot kaninyo, pag-ampo kamo alang sa mga nagabuhat kaninyo sa dautan ug nagalutos kaninyo; aron mangahimo kamo nga mga anak sa inyong Amahan nga atua sa langit, kay ginapasubang niya ang iyang adlaw ibabaw sa mga dautan ug ibabaw sa mga maayo, nagapaulan siya sa mga matarung ug sa dili mga matarung [Tan-awa sa Mateo 5:38–39, 44–45.] Kini mao ang mga baruganan nga takus sa usa ka Dios; kini mao ang mga pagbati nga kon mahalon sa tawhanong pamilya, makabayaw kanila gikan niana nga ubos, dili takus nga kahimtang diin sila naghago, mobutang kanila sa taas nga plataporma, nga modala kanila ngadto sa pagpakigsulti sa ilang Langitnong Amahan ug moandam kanila alang sa usa ka pagpakig-uban sa Dios didto sa mahangturong mga kalibutan.²⁰

Mga Sugyot alang sa Pagtuon ug Panaghisgutan

Nganong importante sa atong pagpakig-uban sa uban nga mahinumdom nga ang tanang mga tawo mga anak sa atong Langitnong Amahan? Unsay atong mahimo sa pagtabang kanato nga “mobati sama sa gibati sa atong Langitnong Amahan” ngadto sa uban? Unsa ang pipila ka mga paagi nga inyong nakita sa mga tawo nga “nagtinguha sa kaayohan sa usag usa”?
Unsaon nato sa pagpuyo aron “ang atong gugma alang sa usag usa motubo sa tanang higayon ug dili mokunhod”? Unsa ang atong mahimo sa pagtuman niini uban sa atong mga pamilya?
Sa unsa nga paagi nga ang ebanghelyo nakatabang kaninyo sa pag-ugmad og gugma alang sa uban?
Unsa nga mga kahigayunan ang anaa kaninyo sa pagtabang niadtong kinsa “nag-antus sa sagad nga mga kinahanglanon sa kinabuhi”? Unsaon nato nga makahibalo sa labing maayong paagi sa pagtubag niini nga sitwasyon?
Unsaon nato sa pagsulbad ang atong mga panagsumpaki sa uban? Unsaon nato nga motubo ang atong gugma niadtong kinsa wala mouyon kanato?
Nganong importante ang pagpasaylo sa uban? Sa unsa nga paagi nga ang atong pagpasaylo sa uban makaimpluwensya sa atong abilidad sa pagbati sa Espiritu? Sa unsa nga paagi nga ang atong dili pagpasaylo sa uban makaapekto kanato?
Unsaon nato nga makalikay nga makapasakit sa uban o kita mismo mapasakitan? Unsaon nato pagbuntog ang atong garbo sa pagpangayo og pasaylo sa usa ka tawo?
Unsa nga mga ehemplo ang gihatag sa Manluluwas mahitungod sa gugma ug pagpasaylo? Sa unsa nga paagi nga ang Iyang ehemplo nakatabang kaninyo sa paghigugma o sa pagpasaylo sa uban?

May Kalabutan nga mga Kasulatan:Mateo 22:35–40; Juan 13:34–35; Mosiah 23:15; Moroni 7:45–48; D&P 12:8; 64:8–10