Ang Kinabuhi ug Pangalagad ni John Taylor

Sa dihang namatay si Brigham Young niadtong 29 sa Agosto 1877, si John Taylor nag-edad og 68 anyos. Sulod sa misunod nga tulo ka mga tuig, si Presidente Taylor nangulo sa Simbahan isip Presidente sa Korum sa Napulog Duha ka mga Apostoles. Sa usa ka kinatibuk-ang komperensya niadtong 10 sa Oktubre 1880, siya gipaluyohan isip propeta, manalagna, ug tigpadayag, ug Presidente sa Ang Simbahan ni Jesukristo sa mga Santos sa Ulahing mga Adlaw, usa ka katungdanan nga iyang gihuptan hangtud sa iyang kamatayon niadtong 25 sa Hulyo 1887. Sa iyang panahon isip Presidente ug sulod sa miaging mga dekada sa iyang pangalagad isip usa ka Apostol, si John Taylor kanunayng andam nga motudlo ug manalipod sa kamatuoran. Sa usa sa labing malisud nga mga yugto sa kasaysayan sa Simbahan, tinubdan siya sa hilabihang kalig-on ug direksyon alang sa mga Santos.

Deskripsyon ni Presidente Taylor

Gihulagway si Presidente Taylor nga usa ka tawo nga ambongan, mga unom ka tiil ang gitas-on ug adunay langitnong panagway. Ang iyang buhok puti, ug ang iyang pamanit itumon. Naghupot og halangdon ug maligdong nga kinaiya, “dili siya usa ka tawo nga mahimo lang pikpikon sa buko-buko, sa higala bisan unsa pa kasuod, o lamanohon nga talikdan; ang mao nga buhat dili maayo sama sa labing mapagarbuhon nga hari.”¹ Apan walay pagpanghambog sa iyang kinaiya; siya mabination, matinahuron, ug mahigalaon sa tanan. “Bisag kinsa ang moduol kaniya, mapribado man o sa mapubliko, makapanghinuktok nga siya anaa sa atubangan sa halangdong tawo, usa ka tawo sa dungog ug kaayo.”²

Si Sir Richard Burton, usa ka tagsulat nga Taga-Britanya ug biyahidor sa tibuok kalibutan kinsa nakahimamat ni Presidente Taylor, mihulagway kaniya nga usa ka “lawason, ambongan, may pagkahamtong, may mabinationg abuhon nga mata, maayo og sinultihan, ug dangas og agtang.”³ Laing tigsaysay misulat, “Sa dihang ako gipailaila ngadto kaniya niadtong 1884, si Mr. Taylor nga nag-edad na og kapitoan og pito ka tuig, miduol… ang usa ka putig buhok, maayog buot nga tawo nga kasarangan ang gitas-on ug limpyo og hitsura, taason og nawong, abuhon, lawom og mata, dangas og agtang, maayong pagkatakdo nga mga ngabil, nagpakita og malig-on nga determinasyon, medyo masulubon ang panagway, nga mapaabot gikan sa usa ka tawo nga miagi og daghang mga pagsulay.”⁴

Ang Iyang Unang Kinabuhi

Natawo niadtong 1808 sa Westmoreland rehiyon sa amihanang kasadpan sa England, si John Taylor nabulahan uban sa mapainubsanon, mabination, ug mahigugmaong mga ginikanan kinsa mitudlo kaniya sa pagbasa ug pagtuo sa Biblia, sa pagsalig sa Dios, ug sa pagbaton og paglaum diha ni Kristo. Ang iyang mga ginikanan, nga sila si James ug Agnes Taylor, mipabunyag kaniya sa Simbahan sa England pagkahuman sa iyang pagkatawo. Ang iyang pagdako diha sa Simbahan sa England nakahatag kaniya og dakong pagtamud sa sagrado nga mga awit ug musika, pormal nga biblikanhong pagtudlo, ug pribado ug publikong pag-ampo. Usa ka lawom ug makanunayong debosyon ug gugma alang sa Dios mao ang mga hiyas nga napalambo ni John Taylor isip usa ka bata. “Sa sayong panahon sa akong kinabuhi nakat-on ako sa pagduol sa Dios,” misulti siya sa mga Santos sa Ulahing mga Adlaw sa dihang nahimo siyang Presidente sa Simbahan. “Daghang mga higayon nga miadto ako sa uma ug mitago sa mga kahoy-kahoy, miyukbo sa atubangan sa Ginoo ug mitawag Kaniya sa paggiya ug sa pagtudlo kanako. Ug naminaw Siya sa akong pag-ampo…. Ingon niana ang akong espiritu sa dihang ako gamay pa nga bata… . Ang akong espiritu giganoy paingon ngadto sa Dios; ug susama gihapon ang akong gibati karon.”⁵

Isip usa ka bata iyang nakita “diha sa panan-awon, ang usa ka anghel sa kalangitan, naggunit og trumpeta ngadto sa iyang baba, nagpadala og mensahe ngadto sa mga nasud.” Bisan og wala niya masabti ang mapanagnaong matang nianang panan-awon hangtud sa ulahing bahin sa iyang kinabuhi, nagpadayon siya nga mibatig kasuod sa Dios sa tibuok mga tuig sa iyang pagkatinedyer. Sa kasagaran kon mag-inusara,” siya misulat, “ug usahay diha sa pundok, ako makadungog og matam-is, malumo, mahunihong musika ingon nga gipasundayag sa anghel, o sa talagsaong mga binuhat.”⁶

Sa mga 16 anyos na siya mibiya sa Simbahan sa England ug nahimong Methodist. Pagkasunod tuig siya gitudlo nga tig-awhag, o wala maorden nga tigsangyaw, niana nga simbahan—usa ka talagsaong responsibilidad alang sa usa ka batan-ong lalaki. Ang pagkamaisugon nga gibase sa piho nga pagtuo nagtimaan sa iyang kinabuhi bisan kaniadto—pagtuo gibase sa iyang kaugalingong kasinatian. Niining samang panahon sa iyang kinabuhi siya nakadawat og kusog nga impresyon nga ang Dios motawag kaniya sa pagsangyaw sa ebanghelyo didto sa Tinipong Bansa sa Amerika.

Ang Iyang Pagpangita sa Gingharian sa Dios

Niadtong 1830 ang mga ginikanan ni John Taylor ug ubang mga sakop sa pamilya mibalhin ngadto sa Toronto, Canada, mibilin niya sa England aron mobaligya sa uma sa pamilya ug moatiman sa ubang mga negosyo sa pamilya. Sa dihang nahuman na, siya mibiya sa England sakay sa barko paingon sa Siyudad sa New York. Sa ilang pagbiyahe, ang barko nakasugat og kusog nga bagyo nga nakaguba na og pipila ka mga barko sa maong dapit. Ang kapitan ug mga opisyal sa barko nagtuo nga sila malunod na, apan ang tingog sa Espiritu nagpamatuod ngadto ni JohnTaylor, “Moadto pa ikaw sa Amerika ug mosangyaw sa ebanghelyo.” Nahinumdom si Presidente Taylor: “Masaligon kaayo ako sa akong kapalaran, nga mibalik sa akong lugar sa tungang gabii, ug taliwala sa mapintas nga mga elemento mibati ko og kakalma ingon og ako naglingkod sa sala sa among balay. Ako nagtuo nga ako makaabut sa Amerika ug mohimo sa akong buhat.”⁷ Luwas siyang miabut sa New York, ug paglabay sa pipila ka mga bulan mitipon pag-usab sa iyang mga ginikanan didto sa Toronto, diin nagpadayon siya sa Methodist nga pagtuo ug nagsugod sa pagsangyaw. Niining panahona, iyang nahimamat si Leonora Cannon, siya usa ka deboto sa Methodist nga bag-o lang mibalhin ngadto sa Canada gikan sa England. Parehong adunay hugot nga relihiyosong pagtuo ug gugma sa pagkat-on, kultura, ug sa usag usa, sila nagminyo niadtong 28 sa Enero 1833 sa Toronto.

Samtang didto sa Canada, siya miapil sa usa ka grupo sa mga higala sa seryoso nga paningkamot sa pagtuon sa Biblia ug nadugangan ang iyang pagsabut sa kamatuoran. Mao kining higayona sa mainitong pagsiksik nga si Elder Parley P. Pratt, usa ka sakop sa Korum sa Napulog Duha ka mga Apostoles, gipadala ngadto sa Toronto alang sa usa ka misyon.

Sa pag-abut sa Toronto, si Elder Pratt mihangyo sa daghang mga ministro ug mga opisyal sa siyudad og usa ka lugar nga kawalihan. Bisan pa niana, ang iyang hangyo gisalikway. Bisan si John Taylor kinsa nakadungog og daghang mga hungihong mahitungod sa Simbahan, mao ang unang wala modawat ni Elder Pratt. Walay nakitang paglaum sa kalampusan, si Elder Pratt nakahukom sa pagbiya sa Toronto ug mihapit sa balay ni Taylor aron manamilit. Mibati nga si Elder Pratt usa ka tawo sa Dios, ang silingan ni John Taylor mitanyag sa pagpakaon ug pagpapuyo ni Elder Pratt ug mitugot kaniya sa paghimo og mga miting. Midawat si Elder Pratt sa tanyag ug sa wala madugay gipaila-ila ngadto sa mga higala ni John Taylor kinsa nagmiting sa pagpangita sa kamatuoran.

Si John Taylor nagsugod sa bug-os nga pag-imbistigar sa mga doktrina sa Simbahan. “Kanunay ko kining gibuhat sulod sa tulo ka mga semana,” siya miingon, “ug misunod kang Brother Parley gikan sa usa ka lugar ngadto sa laing lugar.” Iyang gisulat ug gitun-an ang mga sermon ni Elder Pratt ug gitandi kini uban sa mga kasulatan. Sa katapusan, ang Balaan nga Espiritu misaksi sa katinuod sa mensahe ni Elder Pratt, ug si John ug Leonora Taylor gibunyagan niadtong 9 Mayo 1836. Unya siya mipamatuod nga siya “wala gayud magduha-duha sa bisan unsang baruganan sa Mormonismo.”⁸

Usa ka Matinud-anong Bag-ong Sakop ug Lider

Sa wala madugay human nagpasakop sa Simbahan, si John Taylor gitawag sa pag-alagad isip tigdumalang opisyal sa Simbahan sa Canada, katungdanan nga iyang gihuptan sobra og gamay sa usa ka tuig. Ang iyang mga katungdanan nagkinahanglan og daghang pagbiyahe, apan siya walay hunong nga misangyaw sa ebanghelyo ug miatiman sa daghang espirituhanon ug temporal nga mga butang kalabut sa Simbahan didto. Niining higayona usa sa iyang dakong tinguha mao ang paghimamat ni Propeta Joseph Smith. Niadtong Marso 1837 mibiyahe siya ngadto sa Kirtland, Ohio, diin gidawat siya sa panimalay sa Propeta. Mihulagway siya sa pagbati “nga sama sa nakoryentihan” sa dihang iyang gilamano ang Propeta.⁹ Sa panimalay sa Smith, ang Propeta mitudlo kaniya og daghang dugang nga mga kamatuoran kalabut sa buhat sa ulahing adlaw. Ang duha ka mga lalaki nakahimo dayon og talikala sa panaghigalaay ug pagsalig nga dili gayud mabungkag.

Samtang didto sa Kirtland, si John Taylor nakasugat og daghang pagpanaway bahin ni Propeta Joseph Smith. Sa kasagaran, ang prangka nga mibiya sa kamatuoran maghimo og mga miting diin sila mosaway sa Propeta. Sa hapit na mahuman ang usa sa mga miting diha sa Templo sa Kirtland, si Elder Taylor mihangyo nga tugutan nga makasulti, ug sa walay kahadlok nanalipod sa Propeta. “Si Joseph Smith, ubos sa Makagagahum, kinsa nakahimo sa unang mga baruganan,” siya miingon, “ug ngadto kaniya kita kinahanglan motan-aw alang sa dugang nga mga panudlo. Kon ang espiritu nga iyang gipakita dili makahatag og mga panalangin, nan ako dili motuo nga ang espiritu nga ilang gipakita niadtong namulong makahatag usab og panalangin. Ang mga anak sa Israel, kaniadto, human makakita sa gahum sa Dios nga gipakita sa ilang atubangan, mirebelde ug misimba og dios-dios, ug namiligro kaayo kita nga maghimo sa samang butang.”¹⁰ Samtang ang daghang mibiya sa kamatuoran nagpadayon sa ilang tumong, ang matinud-anong mga Santos nalig-on sa pagkamaunungon ug konbiksyon ni Elder Taylor.

Ang Iyang Balaang Tawag ug Pag-alagad isip usa ka Apostol

Niadtong tinglaglag sa 1837, si John Taylor nakadawat og pulong gikan ni Joseph Smith nga mobalhin ngadto sa Far West, Missouri, aron mopuli sa bakante diha sa Korum sa Napulog Duha ka mga Apostoles (siya pormal nga gi-orden niadtong Disyembre 1838). Nagpasabut sa gilauman nga pag-alagad sa usa ka Apostol, mipahayag si John Taylor: “Ang buhat mahinungdanon, ang mga katungdanan malisud ug may kapangakohan. Akong gibati ang akong kahuyang ug kagamay; apan mibati ako nga determinado, ang Ginoo ang akong tigtabang, sa pagpaningkamot sa pagpalambo niini.”¹¹ Ang pagpaubos sa atubangan sa Dios ug usa ka pasalig sa pagtinguha sa Iyang giya mahimong ilhanan sa pag-alagad ni Elder Taylor. Sa dihang nahimo siyang Presidente sa Simbahan, siya misulti sa mga Santos: “Ako walay mga ideya gawas gihatag kini sa Dios ngari kanako, ni kamo. Ang pipila ka mga tawo mapugsanon kaayong magpadayon sa ilang kaugalingong paagi ug mopadayon sa ilang lahi nga mga teyoriya. Ako walay hunahuna niana nga matang, apan ako adunay tinguha, kon adunay moabut, sa pagkat-on sa kabubut-on sa Dios, ug dayon sa pagbuhat niini.”¹²

Usa ka Saksi sa Pagkamartir

Isip usa ka Apostol, si Elder Taylor usa ka maunungon ug kasaligan nga kauban ni Propeta Joseph Smith. Naghisgot sa pakighigala ni Elder Taylor uban sa Propeta, si Elder Franklin D. Richards sa Napulog Duha miingon, “Pipila lamang ka mga tawo ang nakakab-ot sa mainiton, personal nga relasyon nga iyang nakab-otug malampuson kaayo uban ni Propeta Joseph Smith hangtud siya namatay, ug ang sugilanon nianang personal nga pagbati nahuman sa mga bala nga iyang nadawat didto sa bilanggoan sa Carthage uban sa Propeta.”¹³

Usa sa labing malisud nga mga hitabo sa kinabuhi ni John Taylor mao ang pagkamartir ni Propeta Joseph Smith. Si Elder Taylor boluntaryong miadto sa Bilanggoan sa Carthage, diin ang Propeta ug ang iyang igsoon nga si Hyrum ilegal nga gipriso niadtong 25 sa Hunyo 1844. Sa wala madugay kini naklaro nga ang mga manggugubot nga panon sa Carthage walay tinguha sa pagbuhi kanila ug nga sila anaa sa kakuyaw. Pagka-27 sa Hunyo, ang ubang mga sakop sa Simbahan kinsa miadto sa Carthage gikan sa Nauvoo naghimo og lain-laing buluhaton aron sa pagtabang nga makaangkon og hustisya. Nianang pagkahapon, si Elder Taylor ug sa kaubang Apostol si Willard Richards lamang ang nagpabilin sa bilanggoan uban ni Joseph ug Hyrum. Uban sa usa ka plano sa paghiusa sa mga kaigsoonan sa Nauvoo sa pagluwas ni Propeta Joseph, si Elder Taylor miingon, “Brother Joseph, kon ikaw motugot niini, ug mosulti, ako mopagawas kanimo gikan niining bilanggoan sulod sa lima ka mga oras, kon gikinahanglan nga ang bilanggoan maguba aron sa paghimo niini.”¹⁴ Nagdumili si Joseph niining maong kalihokan.

Sa pag-abut sa kahapunon sa 27 sa Hunyo, ang pagbati sa dakong kasubo miabut sa upat ka mga tawo. Nga adunay gasa sa maanindot nga tenor nga tingog, si Elder Taylor gihangyo sa pagkanta sa makaduha sa “Usa ka Tawong Tigpanaw”⁴ aron sa pagtabang nga mabayaw ang ilang mga espiritu. Sa wala madugay human sa iyang pagkanta sa himno sa ikaduhang higayon, ang manggugubot nga panon nga giituman ang mga nawong nagdali og panaka sa hagdanan sa bilanggoan. Si Hyrum Smith ug Willard Richards diha-diha miali sa pultahan aron kini dili maabli. Sa unang mga pagbuto sa pusil milapos kini sa pultahan, si Hyrum naigo ug namatay. Ang manggugubot nga panon nagpadayon sa pagpamusil ug kalit nga mipugos sa pagpasulod sa ilang mga riple agi sa naablig gamay nga agianan sa pultahan. Ginamit ang bug-at nga sungkod, si Elder Taylor mibarug kilid sa may agianan sa pultahan ug misulay sa pagpasimang sa mga sumbohan sa riple nga gipunting sa lawak. “Kini usa gayud ka makalilisang nga talan-awon,” mitaho si Elder Taylor. “Mga kalayo ingon kadako sa akong bukton miagi kanako sa dihang kining mga tawhana mipusil, ug, …kini ingon og piho na ang kamatayon. Ako nahinumdom nga mibati nga ingon og ang akong panahon miabut na, apan ako wala makahibalo kon kanus-a, sa bisan unsang kritikal nga pagkabutang, ako mas kalma, wala mahasol, malagsik, ug milihok sa walay langan ug mihimog desisyon.”¹⁵

Sa taliwala niini nga talan-awon, ang Propeta Joseph, kinsa naningkamot usab pagbatok sa manggugubot nga panon, miingon ngadto ni Elder Taylor, “Husto kana, Brother Taylor ipasimang ang ilang mga armas kutob sa imong mahimo.”¹⁶ Mao kini ang katapusang mga pulong nga iyang nadungog nga gisulti sa Propeta dinhi sa yuta.”¹⁷ Nakahibalo nga ang ilang pagkabutangsa luyo sa pultahan dili magdugay, si Elder Taylor midagan ngadto sa bintana. Sa dihang moambak na unta siya, gipusil siya gikan sa sulod sa bilanggoan miigo sa iyang wala nga dapi-dapi. Sa pipila ka mga gutlo siya nag-akbo sa may kordiso sa bintana ug mahulog unta, apan gipusil siya gikan sa gawas sa bilanggoan miigo sa relo sa bulsa sa iyang dughan, mipabalik kaniya ngadto sa lawak. Niini nga kondisyon, si Elder Taylor naningkamot sa pagkamang ilawom sa higdaanan sa lawak. Sa iyang pagkamang siya gipusil sa tulo ka higayon. Naigo siya may ubos og gamay sa walang tuhod, wala na gayud makuha. Laing bala miigo sa palad sa iyang wala nga kamot. Ikatulong bala miigo sa unurong bahin sa iyang wala nga bat-ang ug migisi og pipila ka mga pulgada sa unod. Bisan og nasamdan og grabe ug nag-antus og hilabihang kasakit, si Elder Taylor nakalingkawas sa pagpang-atake ug dayon gidala ngadto sa Nauvoo sa pipila ka mga Santos.

Sulod sa pipila ka mga gutlo human mapusili si Elder Taylor, si Propeta Joseph misulay usab sa paglayat gikan sa bintana sa bilanggoan apan diha-diha gipusil ug nahulog ngadto sa yuta sa gawas. Unya gitala ni Elder Taylor nga sa dihang iyang nahibaloan ang nahitabo sa Propeta, mibati siya og walay kadasig, kamingaw, masakit nga pagbati.”¹⁸

Ang Doktrina ug mga Pakigsaad seksyon 135 naglakip og usa ka asoy sa Pagkamartir nga gisulat ni Elder Taylor. Ang seksyon wala maghatag og daghang mga detalye sa hitabo, apan kini nahimong usa ka gamhanang pagpamatuod ni Propeta Joseph: “Si Joseph Smith, ang Propeta ug Manalagna sa Ginoo, nakahimo og daghan, gawas lamang kang Jesus, alang sa kaluwasan sa mga tawo niining kalibutan, kay ni bisan kinsang tawo nga nakapuyo niini…. Siya nabuhi nga halangdon, ug siya namatay nga halangdon sa mga mata sa Dios ug sa iyang mga katawhan; ug sama sa kadaghanan sa dinihogan sa Ginoo sa karaang mga panahon, misilyo sa iyang misyon ug sa iyang mga buhat sa iyang kaugalingong dugo.”¹⁹

Tigpanalipod sa Pagtuo

Isip usa ka sakop sa Korum sa Napulog Duha, si Elder Taylor mipahinungod sa iyang panahon ug mga talento sa pagpahayag ug pagpanalipod sa ebanghelyo. Ginamit ang iyang gasa sa pagsulat, siya mialagad isip editor alang sa Times and Seasons, [Mga Higayon ug mga Panahon] ang Wasp [Lampinig], ug ang Nauvoo Neighbor, [Silingan sa Nauvoo] ang tanan mga pamantalaan sa Nauvoo. Sa wala madugay, samtang nagdumala sa Simbahan sa silangang Estados Unidos, siya mi-edit ug mimantala sa The Mormon, [Ang Mormon] senemana nga pamantalaan nga nagbase sa New York nga nagpakita sa mga doktrina sa Simbahan. Ang iyang sinulat nga libro naglakip sa duha ka gibatbat nga mga doktrina, The Government of God and An Examination into and an Elucidation of the Great Principle of the Mediation and Atonement of Our Lord and Savoir Jesus Christ [Ang Pangagamhanan sa Dios ug pag-eksamin ug paghatag og Katinawan sa Talagsaong Baruganan sa Pagpataliwala ug sa Pg-ula sa Atong Ginoo ug Manluluwas nga si Jesukristo] (gimantala samtang siya mao ang Presidente sa Simbahan). Ang kahanas ni Elder Taylor sa pagsulat ug pag-edit maoy nakahatag kaniya og mga ulohan nga “Tigpanalipod sa Pagtuo” ug Kampyon sa Kamatuoran” sa mga sakop sa Simbahan. Si Presidente Brigham Young mihisgot kang Elder Taylor: “Ako moingon nga siya mao ang labing intelehente ni bisan kinsang tawo nga makita; siya usa ka gamhanan nga tawo, siya usa ka kusgan nga tawo…. Siya mao ang usa sa labing lig-on nga mga editor nga sukad misulat.”²⁰

Dugang sa pagpahayag sa ebanghelyo pinaagi sa sinulat nga pulong, si Elder Taylor mialagad og upat ka full-time nga mga misyon: duha sa Great Britain, usa sa France ug Germany, ug usa sa New York. Miabut og pito ka mga tuig ang iyang tanang full-time nga misyonaryo nga pag-alagad. Bisan og kining dugay nga pagkawala gikan sa iyang mga minahal nagkinahanglan og dakong sakripisyo, ang pagtuo ni Elder Taylor sa buhat sa Ginoo wala gayud mausab. Sa usa ka sulat ngadto sa iyang pamilya sa usa sa iyang misyon, siya misulat: “Naghimo ako sa buluhaton sa Ginoo; usa ako ka ministro ni Jehova sa pagpahayag sa Iyang kabubut-on ngadto sa mga nasud. Ako moadto aron ablihan ang pultahan sa kinabuhi sa usa ka dakong nasud, aron sa pagmantala sa mga baruganan sa kinabuhi, kahayag ug kamatuoran, kaalam ug kaluwasan ngadto sa minilyon ka mga tawo, sa pagtangtang sa ilang mga posas, sa pagluwas sa dinaug-daug, sa pagpatarung sa nahisalaag, sa pagkorihir sa ilang mga panglantaw, sa pagpalambo sa ilang mga moral, sa pagluwas kanila gikan sa pagkaut-ot, pagkaguba ug pagkaalaot, ug pagtultol kanila ngadto sa kahayag, kinabuhi, kamatuoran ug celestial nga himaya. Dili ba makigtambayayong ang inyong espiritu uban kanako? Ako nasayud nga sila makigtambayayong.”²¹

Bana ug Amahan

Bisan og daghang panahon ang gikinahanglan sa iyang pagalagad sa Simbahan, si John Taylor usa ka matinguhaon ug mahigugmaon nga bana ug amahan. Iyang gihandom ang panahon nga iyang magahin uban sa iyang pamilya ug sa kasagaran mopahimulos sa mga kahigayunan nga malingaw sa ilang panaguban ug sa pagtudlo kanila. Isip sangputanan, siya gimahal pagayo sa iyang pamilya. Sa ulahing mga katuigan, ang iyang anak nga si Moses W. Taylor misulat, “Gitahud siya pag-ayo sa iyang mga anak nga ang pagpahimuot kaniya mao ang ilang labing dakong tinguha.”²²

Sa iyang inter-aksyon sa iyang mga anak, si John Taylor mipakita og mainiton, mabination, ug maayong buot. Ang iyang anak nga si Ezra Oakley Taylor nahinumdom sa mosunod nga kasinatian:

“Samtang nagdako ako, naandan kaniadto nga magtigum sa Domingo sa hapon didto sa Tabernakulo. Kaming tanan gipaabut nga moadto, ug dayon motaho kon kinsa ang mihatag sa sermon, bahin sa unsa kini, kinsa ang mihatag sa mga pag-ampo, ug unsa nga mga himno ang gikanta. Niining Domingoha, ang pipila kanamo nakahukom nga dili motambong ug mohangyo sa usa sa among mga higala sa paghatag kanamo sa gikinahanglan nga impormasyon. Dayon miabut ang konseho sa [pamilya] ug wala gayud masipyat si Papa nangutana kanako mahitungod sa sermon, ug kinsa ang mihatag niini. Ang tanan naandam, ang akong higala miingon nga wala kaayo siya makahinumdom, akong gisubli ang iyang mga pulong, ‘O, usa man kadto ka makapuol nga tigulang, ug wala ako makahinumdom sa iyang pangalan, apan dili gayud kini makapaikag,’ Uban sa pagkidhat sa iyang mata, si Papa miingon, “Kadtong tigulang mao ang inyong papa ug mipadayon sa tigum sa konseho.”²³

Isip usa ka Apostol, ug sa wala madugay isip Presidente sa Simbahan, si Presidente Taylor kanunay nga nag-awhag sa mga Santos sa paghigugma ug paglig-on sa ilang mga pamilya. Siya nag-awhag sa mga sakop sa paggahin og usa ka gabii matag semana alang sa pagtuon sa ebanghelyo ug kalingawan sa pamilya, ug siya misaad kanila “og usa ka kalinaw ug gugma, kaputli ug kalipay, nga makapahimo sa [ilang] kinabuhi sa panimalay nga sulundon” kon sila matinud-anong mohimo niana nga buhat.²⁴

Nagdumala sa Simbahan

Sa mga katuigan nga si Presidente Taylor migiya sa Simbahan isip Presidente sa Korum sa Napulog Duha ug dayon isip Presidente sa Simbahan, siya nagpadayon sa pag-alagad uban sa kalagsik ug debosyon sa iyang mga paningkamot sa paghatag og kaayohan sa mga Santos.

Kapunongan ug Pagkamatarung sa Priesthood

Usa sa iyang labing mahinungdanong mga paningkamot isip Presidente naglakip sa paghan-ay sa mga korum sa priesthood ug pag-awhag kanila sa pagtuman sa ilang mga katungdanan. Siya mitudlo sa mga bishop sa paghimo og senemana nga priesthood miting sa ilang mga ward ug mitambag sa mga stake president sa paghimo og binulan nga stake priesthood miting. Si Elder B. H. Roberts mitala, “Kinsa ang wala mahinumdom sa kamadasigon ug gahum diha sa mga komperensya ug sa ubang publikong mga tigum, siya naanad sa pagpahimangno sa mga Presidente sa mga Stake ug sa mga bishop sa mga ward sa paghan-ay sa priesthood ug sa institusyon ubos sa ilang pagdumala?”²⁵

Sa usa ka pagpadayag nga gihatag pinaagi ni Presidente Taylor niadtong Oktubre 1882, ang Ginoo mitudlo sa mga Santos, ilabi na sa kaigsoonan sa priesthood, sa pag-organisar sa ilang mga kaugalingon ug sa paglakaw diha sa kabalaan sa Iyang atubangan. Ang mosunod nga mga parapo mao ang mga kinutlo niana nga pagpadayag:

“Ug himoa nga ang mga Presidente sa mga Stake magmaputli usab sa ilang mga kaugalingon, ug ang priesthood ug ang mga katawhan sa mga Stake nga ilang gidumala, ug mo-organisar sa priesthood sa ilang nagkalain-laing mga Stake sumala sa akong balaod, sa tanang nagkalain-laing mga Departamento niana, sa mga High Council, sa Elders Quorum, ug sa mga Bishop ug sa ilang mga konseho, ug sa mga korum sa mga Priest, Teacher ug mga Deacon, aron ang matag korum hingpit nga maorganisar sumala sa kapunongan sa akong Simbahan….

“Ug himoa nga ang akong pagkapari magpaubos sa ilang mga kaugalingon sa akong atubangan, ug dili magtinguha sa ilang kaugalingong kabubut-on apan sa akong kabubut-on; kay kon ang akong pagkapari, nga akong gipili, ug gitawag, ug gitugahan uban sa espiritu ug sa mga gasa sa ilang daghan nga balaang mga tawag, ug uban sa gahum niini, dili moila kanako Ako dili moila kanila, miingon ang Ginoo; kay ako pagapasidunggan ug pagasundon sa akong priesthood.

“Ug, dayon, ako motawag sa akong priesthood, ug sa akong tanang mga katawhan, sa paghinulsol sa ilang tanang mga sala ug mga kahuyang, sa ilang pagkamasinahon ug garbo ug pagkamapatuyangon, ug sa ilang tanang mga kadautan diin sila nakasala batok kanako; ug sa tumang pagkamapainubsanon magtinguha sa pagtuman sa akong balaod, isip akong priesthood, akong mga santos ug akong mga katawhan; ug ako motawag sa mga pangulo sa mga pamilya sa pagpahimutang sa ilang mga balay sa kahusay sumala sa balaod sa Dios, ug mohimo sa nagkalain-laing mga katungdanan ug mga kapangakohan nga uban niini, ug sa paglimpyo sa ilang mga kaugalingon sa akong atubangan, ug pagkuha sa kadautan gikan sa ilang mga panimalay. Ug ako mopanalangin ug magauban kaninyo, miingon ang Ginoo, ug kamo magpundok diha sa inyong balaang mga dapit diin kamo magpundok aron sa pagtawag kanako, ug kamo mangutana sa maong mga butang nga husto, ug ako maminaw sa inyong mga pagampo, ug sa akong Espiritu ug gahum magauban kaninyo, ug ang akong panalangin inyong madawat, sa inyong mga banay, sa inyong mga pagpuyo ug sa inyong mga panimalay, sa inyong mga panon ug mga kahayopan ug mga kaumahan, sa inyong mga prutasan ug mga ubasan, ug sa tanan nga may labot nganha kaninyo; ug kamo akong mga katawhan ug Ako inyong Dios.”²⁶

Paghingpit sa mga Santos

Aron madugangan ang pagsabut ug pagtuo sa ebanghelyo sa mga Santos, si Presidente Taylor mi-iskedyul og nga komperensya sa stake matag tulo ka bulan sa tibuok Simbahan. Kutob sa mahimo, siya motambong niini nga mga komperensya. Kon dili siya makatambong, siya mopadala og usa ka sakop sa Korum sa Napulog Duha. Nagpasabut niini nga naandan, si Elder B.H. Roberts sa Kapitoan mitala: Ang mga Santos nakadawat og daghang mga pagtulun-an ug panudlo gikan sa mga Apostoles, mas daghan tingali kay sa bisan unsang miaging panahon sa kasaysayan sa Simbahan. Ang sangputanan mao ang talagsaon nga espirituhanong pagkahigmata sa mga Santos.”²⁷ Laing mahinungdanong hitabo nga sayong nahitabo sa iyang kapangulohan mao ang pormal nga pagka-organisar sa Primarya niadtong 1878 alang sa labing epektibo nga pagtudlo sa mga bata sa Simbahan. Si Presidente Taylor mipadayon usab sa paghatag og gibug-aton sa kamahinungdanon sa misyonaryo nga buhat, ug sa gidaghanon sa mga elder nga gipadala mapun-an aron molambo ang pagpahayag sa ebanghelyo.

Sa iyang daghang mga diskurso, si Presidente Taylor mipadayon sa pag-awhag sa mga Santos sa pag-atiman sa ilang mga katungdanan sa tanang mga bahin sa ilang mga kinabuhi, mga sakop sa pamilya, mga sakop sa Simbahan, mga silingan, o mga lungsuranon. Siya mitudlo sa mga Santos nga kon sila magmasulundon ug mobutang sa ilang pagsalig sa Ginoo, sila walay angay nga kahadlokan. Siya mitudlo nga ang “Dios anaa sa pagdapig sa Israel, kon ang Israel anaa lamang sa dapit sa katarung.”²⁸

Panalipod sa Kalingkawasan

Bisan unsa pa kalig-on ang pagtuo ni Presidente Taylor, bisan pa niana, siya kanunay nga mitahud ug namulong alang sa indibidwal nga mga kagawasan. Sa iyang mga katuigan isip usa ka Apostol sa Nauvoo, siya gitawag nga ang “Kampyon sa Kalingkawasan,” ug isip Presidente sa Simbahan siya nagpadayon sa pagdala niini nga titulo. Sa panahon sa diha nga ang mga Santos sa Ulahing mga Adlaw mas daghan diha sa Utah, si Presidente Taylor mibalik-balik sa pagsangyaw sa kagawasan sa relihiyon ug kalingkawasan sa tanlag alang sa tanan. Siya mipahayag: “Usahay kita adunay dili maayong pagbati batok sa mga tawo kinsa wala maghunahuna sama sa atong gihunahuna. Aduna silay katungod sa paghunahuna sa ilang gusto, ug mao usab kita. Busa, kon ang usa ka tawo dili motuo sama sa akong gituohan, ako walay labot niana. Ug kon ako dili motuo sama sa iyang gituohan, siya walay labot niana. Manalipod ba kamo sa tawo nga wala motuo sama sa inyong gituohan? Oo, kutob sa mahimo. Siya adunay pareho nga hustisya sama kanako; ug dayon ako magpaabot nga mapanalipdan sa akong mga katungod.”²⁹

Kang Presidente Taylor, ang kamahinungdanon sa kalingkawasan nga gamiton usab diha sa Simbahan. Sa mga konseho, siya kanunay nga miawhag sa mga sakop sa pagsulti sa ilang mga hunahuna nga gawasnon. Bisan og siya nakasabut sa hingpit sa kamahinungdanon sa panaghiusa, siya mibati nga ang tinuod nga panaghiusa makab-ut pinaagi sa kagawasan.

Mga Panahon sa Pagsulay

Ang mga kahimtang sa mga Santos sa Estados Unidos nahimong usa ka hagit niining pagmahal sa kagawasan. Ubos sa direksyon sa Ginoo, ang mga Santos nagbuhat sa dinaghan nga kaminyoon sa Simbahan sukad sa mga adlaw ni Joseph Smith sa Nauvoo. Sa panahon sa 1860 ug 1870, ang gobyerno sa Estados Unidos mipasar og balaod nga nagsalikway sa dinaghan nga kaminyoon ug naghikaw nga mahimong estado ug sa ubang mga katungod ngadto sa Teritoryo sa Utah ug sa mga lumulupyo niini. Nakombinser nga ang balaod usa ka pagsupak sa kagawasan sa relihiyon nga gisulti sa Batakang Balaod, ang Simbahan migamit sa iyang impluwensya nga madala ang isyu ngadto sa Korte Suprema sa Estados Unidos. Niadtong 1879, mga duha ka tuig human si Presidente Taylor misugod sa pagpangulo sa Simbahan, ang Korte Suprema sa Estados Unidos miuyon sa balaod sa federal nga gobyerno batok sa dinaghan nga kaminyoon sa 1862. Niadtong 1882 ug usab sa 1887, ang Kongreso sa Estados Unidos mipasar og dugang nga mga balaod nga mitugot sa federal nga gobyerno sa pagbungkag sa Simbahan isip usa ka legal nga kapunongan ug sa pagkompiskar sa tanang mga kabtangan sa Simbahan nga molabaw sa $50,000 (nga naglakip sa upat ka mga templo nga anaa sa nagkalain-laing ang-ang sa pagkakompleto, ang Tabernakulo, mga balay-tigumanan, ug sa daghang ubang mga kabtangan). Ang balaod gihimo aron kuhaon ang sukaranang sibil nga mga katungod sa mga sakop sa Simbahan, lakip na ang katungod sa pagbotar. Kini nga kalamboan nag-abli sa mga agianan alang sa paggukod sa mga Santos sa Ulahing mga Adlaw kinsa nagbuhat sa dinaghan nga kaminyoon. Ang Simbahan nagpadayon sa paghimo sa legal nga hangyo, apan walay kahimoan.

Taliwala sa nagtubo nga panag-away sa isyu sa dinaghan nga kaminyoon, si Presidente Taylor gipahibalo nga ang mga opisyal sa gobyerno nagplano sa pagdakop kaniya sa dili madugay. Nga nahimo na ang tanang legal nga mga paghangyo, siya kinahanglang mohukom sa pagsunod sa Dios o sa tawo. Sa iyang katapusang diskurso sa publiko, siya misulti sa mga Santos, “Ako isip usa ka madungganong tawo dili makasupak sa Dios… ug moyatak niining balaan ug mahangturong mga obligasyon nga gihatag sa Dios nga akong sundon, nga adunay epekto sa kahangturan nga moabut.”³⁰ Gikan sa adlaw nga iyang gihatag kini nga sermon hangtud sa adlaw sa iyang kamatayon hapit moabut og duha ug tunga ka mga tuig, siya mitago sa lain-laing mga lugar sa tibuok Utah. Kay sa mopahilayo gikan sa mga panudlo sa Ginoo bahin sa dinaghan nga kaminyoon, si Presidente Taylor mipili sa pagtago isip usa ka paagi sa pagsunod sa Ginoo ug unta makapakunhod sa pagpanggukod batok sa Simbahan. Si Elder B.H. Roberts mitala, “Sa dihang si Presidente Taylor mibiya gikan sa publiko sa gabii sa unang adlaw sa Pebrero, 1885, dili kini tungod sa bisan unsang konsiderasyon alang sa iyang personal nga kahilwasan, o kasayon o kahayahay, apan alang sa kaayohan sa publiko ug sa tinguha sa kalinaw.”³¹

Bisan og wala diha sa publiko, si Presidente Taylor mipadayon sa pagpangulo sa Simbahan pinaagi sa mga sulat ug panudlo ngadto sa gisaligan nga mga kauban. Bisan pa niana, ang pagtago-tago, ang pagkabulag gikan sa pamilya ug mga higala, ug ang kabug-at sa iyang mga responsibilidad negatibong nakaapekto kaniya. Sayo niadtong 1887, ang iyang panglawas nagsugod sa pagkaluya. Sulod sa pipila ka mga bulan siya nakigbatok sa iyang sakit ug misulti sa uban nga siya sa dili madugay mamaayo ra, apan sa pagka-Hulyo tataw nga ang iyang kondisyon grabe na. Sa pagkagabii sa 25 sa Hulyo 1887, si Presidente Taylor namatay nga malinawon sa panimalay ni Thomas Roueche sa Kaysville, Utah.

Mga Halad ngadto ni Presidente Taylor

Ang pipila ka labing angay nga paghulagway sa pangalagad ni John Taylor gihatag niadtong kinsa nag-alagad uban kaniya ug iyang natudloan. Namulong sa lubong ni Presidente Taylor, si Elder Franklin D. Richards sa Korum sa Napulog Duha mipahayag: “Si Presidente Taylor usa ka maisug nga tawo ug dili mahadlok sa kamatuoran. Siya walay gikahadlokan. … Sa dihang siya ug ako nagmisyon sa Uropa, siya nag-alagad sa France…. Siya nag-alagad niana nga lugar sa makugihon; ug usa niana ka higayon may pundok sa relihiyoso nga mga pangulo [o klerigo] naghiusa sa pagpahunong niining laing tinuohan, sumala nila. Si Presidente Taylor, uban niana nga kaisug nga maoy timailhan sa iyang pagkatawo, miuyon nga makigkita kanilang tanan…. Siya miatubang kanila ug iyang gipadayon ang pagtudlo sa kamatuoran.”³²

Si Elder Daniel H. Wells, kinsa nag-alagad isip usa ka magtatambag ni Brigham Young, naghisgot ni Presidente Taylor ingon sa mosunod: “Siya nagpuyo sa walay kahadlok, halangdon ug kinabuhi nga sama sa Dios—himoa nga kadtong nagpakabuhi pa nga magtinguha sa pagsunod sa iyang halangdong ehemplo. … Siya mao ang kampyon sa tawhanong mga katungod, ang kampyon sa kalingkawasan, kamatuoran ug kagawasan. Siya nagpuyo og usa ka halangdon, mapuslanong kinabuhi, puno sa dungog ug pagkadalaygon ngadto sa iyang kaugalingon ug pamilya, ang katagbawan ngadto sa mga katawhan ug ang himaya ngadto sa Dios. Akong gikalipay ang paghatag niini nga pagpamatuod sa kamatinud-anon ug debosyon ni Presidente Taylor, sa iyang kaligdong ngadto sa Dios ug sa gugma sa iyang mga katawhan.”³³

Si Angus M. Cannon, presidente sa Salt Lake Stake, mao ang katapusang mamumulong sa lubong ni Presidente Taylor ug mihatag sa mosunod nga halad ngadto sa tawo kinsa migugol og daghang mga tuig sa pagtukod sa gingharian sa Dios: “Siya nahupay gikan sa iyang mga kasakit. Siya natulog diha sa Dios, ug akong mahanduraw nga nakakita sa ganghaan sa langit nga naabli nga mao ang iyang giagian…. Si Brother Taylor midala sa pagpamatuod nga gihatag ni Joseph kaniya, nga gihatag ni Jesus ngadto ni Joseph, nga gisugo sa Dios nga paminawon ni Joseph gikan sa mga ngabil sa iyang hinigugmang Anak—ug siya mipamatuod niadtong mga balita ngadto sa langyaw nga mga yuta, ug nakapasanting sa atong mga kasingkasing uban sa mga pulong nga iyang gilitok didto. Akong nakita ang hingpit nga kalipay ug kamaya nga naangkon ni Presidente Taylor sa iyang pagkakita sa iyang mga isig ka mamumuo sa pikas tabil, giliyokan sa mga apostoles ni Jesukristo, nga hilabihan.”³⁴