Kapitulo 4

Pagkamasulundon, usa ka Sagrado nga Katungdanan

Hangtud nga kita magsunod sa mga sugo sa Dios, kita dili angay nga mahadlok sa bisan unsang dautan; kay ang Ginoo magauban kanato karon ug sa kahangturan.¹

Gikan sa Kinabuhi ni John Taylor

Si John Taylor nagpakita og pagkaandam sa pagsunod sa Dios sa iyang tibuok kinabuhi. Kini nakita kaayo sa dihang iyang nadawat ang tawag sa pagbiya sa iyang mga minahal aron sa pagalagad sa Ginoo isip usa ka misyonaryo didto sa England.

Ang tawag sa pagalagad miabut niadtong Hulyo 1838 pinaagi sa usa ka pagpadayag nga natala sa Doktrina ug mga Pakigsaad seksyon 118. Niana nga pagpadayag, ang mga Apostoles gisugo sa paglakaw alang sa ilang misyonaryo nga pagalagad gikan sa dapit sa templo sa Far West, Missouri, sa niadtong 26 sa Abril 1839. Ang pagsunod niini nga sugo malisud kaayo uban sa pagpanggukod ug pagpapahawa sa mga Santos gikan sa Missouri sa tingtugnaw sa 1838–39. Hinoon, bisan pa sa kakuyaw nga ilang giatubang sa pagpauli ngadto sa Missouri, si Elder Taylor ug ang iyang kaubang mga Apostoles misalig sa Ginoo ug nagpabiling masunlundon. Sa wala madugay paglabay sa tungang gabii niadtong 26 sa Abril 1839, sila mibalik ngadto sa Far West ug nagkita sa dapit sa templo, diin ilang gipahimutang ang tukurang bato alang sa templo ug mibiya padulong sa Nauvoo aron mohimo sa katapusang pagpangandam alang sa ilang misyon ngadto sa England.²

Si Elder Taylor mibiya alang sa iyang misyon gikan sa Montrose, Iowa, diin iyang gipahimutang ang iyang pamilya sa daan nga kamalig tabok sa sapa gikan sa Nauvoo. Bisan siya ug ang iyang pamilya nagkasakit og malaria, siya nagmasulundon ngadto sa tawag sa pagalagad og misyon ngadto sa England. Nagkomentaryo sa kasakit sa pagbiya sa iya g pamilya, siya mipahayag: “Ang paghunahuna sa mga kalisud nga bago lang nilang nasinati, ang walay kasiguroan sa ilang pagpadayon diha balay nga ilang gipuy-an karon—ug nga usa lamang ka mamingaw nga lawak—ang pagkaylap sa sakit, ang kakabus sa mga kaigsoonan, ang ilang walay kasiguroan gikan sa manggugubot nga panon, uban sa walay kasiguroan kon unsay mahitabo kon wala ako, nakapahingawa kaayo kanako. Kining kabalaka sa akong mga anak ug asawa nadugangan usab sa panahon ug gilay-on nga magbulag kanamo. Apan ang hunahuna sa pagsunod sa sugo sa Dios sa Israel sa pagbisita pag-usab sa akong yutang natawhan, sa pagsangyaw sa mga baruganan sa mahangturong kamatuoran ug mopahibalo sa mga butang ngagipadayag sa Dios alang sa kaluwasan sa kalibutan, mibuntog sa tanang laing pagbati.”³

Si Presidente Taylor nakaangkon sa iyang kusog gikan sa iyang tugob nga pagpamatuod sa ebanghelyo: “Sa dihang una nakong nadungog ang ebanghelyo, ako napugos sa pagdawat nga adunay butang nga makatarunganon mahitungod niini. Ako naglaum nga dili unta kini tinuod. Kon kini tinuod,’ ako miingon, ‘isip usa ka matinuoron nga tawo ako obligado sa pagsunod niini, o ako dili na makasalig sa akong kaugalingon.’ ”⁴

Mga Pagtulun-an ni John Taylor

Tinuod nga mga tinun-an sa Ginoo mopili sa pagsunod sa Iyang kabubut-on.

Ang Ginoo mopahinabo sa iyang kahibulongan nga katuyoan, ug motuman sa butang nga iyang giplano. Anaa ra kanato ang pagpuyo sa atong relihiyon, sa pagpasalamat sa hingpit sa ebanghelyo nga atong gihuptan, ug sa pagsunod sa hingpit sa mga kinahanglanon, mosunod sa mga balaod, ug mosunod sa iyang mga pagdiktar, mosunod sa direksyon sa balaan nga priesthood, nga naghupot sa mga yawe sa mga misteryo sa mga pagpadayag sa Dios, magpalambo sa atong balaang mga tawag, ug magpasidungog sa atong Dios, aron kita makaandam sa pagtuman sa atong kapalaran dinhi sa yuta, ug mahimong usa ka panalangin ngadto niadtong naglibut kanato, ug sa pagbu-bu sa mga panalangin diha sa atong umaabot nga kaliwat, ug magsabwag sa mahinungdanong mga baruganan sa kahangturan, nga gibana-bana sa pagpanalangin, paglamdag, pagtuboy, ug paghimaya sa tanan kinsa mosunod niini.⁵

Si Jesus miingon, “Isangon ang akong yugo kaninyo, magtuon kamo kanako, kay ako maaghup ug mapainubsanon sa kasingkasing, ug makakaplag kamo ug pahulay sa inyong mga kalag.” [Tan-awa sa Mateo 11:29.] Unsa nga yugo ang gibutang diha sa mga sumusunod ni Jesus? Pareha gayud nianang gibutang nganha kaninyo. … Ang pulong mao: Lakaw diha sa akong ngalan ug uban sa akong awtoridad, ug sa akong Espiritu magauban kaninyo. Ug nahitabo kini, ug ang mga katawhan nahimong usa sa pagtuo, doktrina ug baruganan, sama sa gisulti sa Mga Kasulatan. “Isangon ang akong yugo kaninyo.” Unsa kadto? Miingon siya, “Bulahan ang mga maaghup, kay sila magapanunod sa yuta. … Bulahan ang gigutom ug giuhaw sa katarung, kay sila pagabusgon.” [Tan-awa sa Mateo 5:5–6, 8.] Mao kini ang matang sa yugo ni Jesus nga gibutang diha kanila, ug kini mao ang matang nga gibutang nganha kaninyo—sa paghigugma sa pagkamatarung, pagsunod sa mga sugo sa Dios, sa pagpuyo sa inyong relihiyon ug sa pagsunod sa mga baruganan sa kamatuoran, malisud ba kini nga yugo? Kini mao ang gikinahanglan sa mga Santos sa Ulahing mga Adlaw. “Isangon ang akong yugo nganha kaninyo ug magtuon kamo kanako!” Ug giunsa niya sa paghimo niini? Siya misunod sa kabubut-on sa iyang Amahan, ug dayon siya nagpaabut sa iyang mga tinun-an sa pagsunod sa iyang kabubut-on.⁶

Ang pagkamasinupakon ngadto sa mga balaod sa Dios makahatag og makadaot nga mga sangputanan.

Sumala sa mahangturong mga balaod sa Dios ug sa mahangturong pagpahaum sa mga butang samtang kini anaa uban kaniya sa mahangturong mga kalibutan ug samtang kini ania dinhi sa ibabaw sa yuta, kitang tanan o kinahanglan nga ubos sa giya ug direksyon sa Dios, ug obligado sa pagpaminaw sa iyang balaod ug pagadumalahon sa iyang mga tambag ug mga pagmaymay— ug ako maghunahuna pa og dugang—kay sa atong paghimo nianang lugas nga motubo o napulo ka liboan ka milyon niini nga motubo, kay dili kita makahimo kon walay pagdumala niadtong mga balaod nga gikinahanglan aron makaangkon sa tubo.

Dugang pa, kitang tanan mga anak sa Dios, dili ba? Ako naghunahuna sa mga kasulatan nga mabasa nga “Kitang tanan iyang mga anak, nga siya mao ang Dios ang Amahan sa mga espiritu sa tanang unod;” [tan-awa sa Mga Buhat 17:28; Mga Hebreohanon 12:9] ug nga mao ang Dios ang Amahan sa mga espiritu sa tanang unod, ug nga nakahimo ug usa ka kalibutan alang sa tanang unod nga kapuy-an, ug nga nakatagana alang sa kabuhian niana nga unod, alang sa ilang pagkaon, sinina, kahupayan, kahayahay ug kalipay, ug mihatag kanila og salabutan ug misulti kanila sa paglakaw ug sa pagdumala sa kabuhong sa kinaiyahan sa ilang paggamit, wala ba siyay katungod sa pagpangulo ug paggiya kanato, nga mosugo sa pagsunod sa iyang balaod? Dili ba kana usa ka makatarunganon nga kahigayunan, kon kita maghunahuna bahin niini?

Ang kalibutan moingon, Dili, siya walay katungod; ako ang akong kaugalingong Ginoo; ako independente nga tawo, ako mosubay sa akong kaugalingong dalan, ugbp. Pipila sa mga Santos sa Ulahing mga Adlaw hapit moingon sa sama nga butang; dili kaayo, apan sila buot nga mopaduol niini. “Ako gawasnong tawo; ako panghimarauton kon ako dili mohimo sa akong gusto, ugbp.” Nan, ako mosulti kaninyo sa laing bahin niana nga sugilanon. Kamo panghimarauton kon kamo mohimo unsay inyong gusto, gawas lang kon gusto kamong mohimo ug mosunod sa mga balaod sa Dios. Kita dili makasupak sa iyang mga balaod nga walay silot ni makabaliwala niining mahangturong mga baruganan nga anaa sa tibuok kinaiyahan. Kon ang tibuok kinaiyahan mapugos sa pagdumala sa balaod o mag-antus sa pagkawala, ang tawo pa kaha?

Kita dili makahimo sa atong kaugalingong gusto ug makaangkon sa panalangin sa Dios. Ang tanan nga mosulay niini makahibalo nga siya nasayop. Ang Dios mokuha sa iyang Espiritu gikan niana, ug sila mag-inusara nga maglatagaw sa kangitngit, ug moadto sa kalaglagan. Gipaabut gikan kanato nga kita mopaingon sa taas pa nga dapit, nga kita mobati nga kita mga anak sa Dios, nga ang Dios mao ang atong Amahan, ug siya dili makuhaan og dungog sa masinupakon nga mga anak, o niadtong kinsa makigaway batok sa iyang mga balaod ug sa iyang priesthood. Siya nagpaabut kanato sa pagpuyo sa atong relihiyon, sa pagsunod sa Iyang mga balaod ug mosunod sa Iyang mga sugo.⁸

Kon kita mga Santos sa Dios, gikinahanglan nga kita magsugod sa pagkat-on sa pagbuhat sa kabubut-on sa Dios dinhi sa yuta ingon nga kini gihimo didto sa kalangitan: kay dili ang tanan nga nag-ingon, Ginoo, Ginoo, makasulod sa gingharian ni Kristo, kondili ang nagatuman sa kabubut-on sa akong Amahan nga anaa sa langit [tan-awa sa Mateo 7:21]. Kita naghunahuna usahay nga kita makahimo unsay atong gusto. Mahimong buhaton nato unsay atong gusto, ug dayon ang Dios mohimo sa Iyang gusto, ug sa matag pulong ug sa matag sekreto nga hunahuna kita pagahukman, kita giingnan. …

Kita wala ibutang dinhi sa pagbuhat sa atong kaugalingong kabubut-on, apan sa kabubut-on sa atong langitnong Amahan. Pipila ka mga tawo nagtuo nga maayo ra ang ilang gibuhat, ug naghimo, sumala sa ilang kaugalingong pagbati, “ingon nga sila nahimuot sa hingpit,” makaamgo nga sila wala maghimo sa kabubut-on sa Dios. Tingali sila maghunahuna nga sila adunay mga asawa ug mga anak, apan sila makaamgo nga dili nila sila maangkon, ug nga sila gihikawan niadtong daghang mga panalangin nga ilang gipaabut nga matagamtaman. Uban sa atong tanang kalooy, pagkamabination ug malumo nga mga pagbati sa atong mga kaigsoonan, ug ngadto sa tanang mga katawhan, kita dili makasupak sa balaod sa Dios, ni makalapas niadtong mga baruganan nga Iyang gihimo nga walay silot. Siya naghandom nga kita mobuhat niadtong mga butang nga Iyang mauyunan, ug kon kita dili, kita kinahanglan nga mobayad sa kastigo sa atong pagbiya gikan sa husto nga baruganan.⁹

Kon ang Ginoo adunay katawhan nga maminaw sa iyang balaod, tingali adunay kahigayunan nga matukod ang iyang gingharian dinhi sa yuta. Kon dili, ang bugtong paagi nga iyang matukod ang gingharian mao ang pagkuha niini gikan sa yuta, o hunungon ang iyang gingharian hangtud sa laing panahon; kay imposible ang pagtukod sa iyang gingharian nga walay mga katawhan nga masulundon ngadto kaniya. …

… Diin nga walay pagbati sa pagkamasulundon, ang Espiritu sa Dios pagakuhaon. Ang mga tawo dili makabaton niini ug magrebelde batok sa mga awtoridad ug mga tambag sa simbahan ug gingharian sa Dios.¹⁰

Ang pagkamasulundon nagdala og mga panalangin dinhi niini nga kinabuhi ug sa kahangturan.

Unsa ang katungdanan sa tawo dinhi? Mao ang pagsunod sa mga tigpama-ba sa Dios nga ania kanato, ug hangtud nga kita mosunod sa mga sugo sa Dios, kita dili angay nga mahadlok sa bisan unsang dautan; kay ang Ginoo magauban kanato karon ug sa kahangturan.¹¹

Si Jesukristo miingon, “Kaninyo ihatag ko ang kalinaw: hatagan ko kamo niini dili sama sa hinatagan sa kalibutan.” (Juan 14:27.) Kon adunay kalinaw nga mopatigbabaw, kini magbilin og impluwensya nga makahupay ug makapalagsik sa mga kalag niadtong kinsa moambit niini. Sama kini sa yamog sa kabuntagon ngadto sa giuhaw nga tanom. Kini nga kalinaw mao ang gasa sa Dios lamang, ug kini madawat lamang gikan kaniya pinaagi sa pagsunod sa iyang mga balaod. Kon adunay tawo nga buot nga mopasiugda og kalinaw nganha sa iyang pamilya o sa iyang mga higala, himoa nga siya mougmad niini diha sa iyang kaugalingon; alang sa tiunay nga kalinaw maangkon lamang sumala sa makatarunganon nga lagda ug pagtugot sa langit, ug pagkamasulundon sa mga balaod.¹²

Nakat-unan nato kini, nga ang Dios buhi; nakat-unan nato nga kon kita motawag kaniya siya maminaw sa atong mga pag-ampo; nakat-unan nato nga ang kinatas-an sa tawhanong kalipay mao ang pagkahadlok sa Dios ug sa pagsunod sa iyang mga balaod ug paghupot sa iyang mga sugo; nakat-unan nato nga usa ka katungdanan naglibut kanato sa pagpaningkamot ug paghimo sa tanang mga tawo nga malipayon ug intelehente, nga ang kalipay ug ang pagka-intelehente maangkon lamang pinaagi sa pagsunod sa mga balaod sa Dios.¹³

Isip mga Santos sa Ulahing mga adlaw kita nagtuo nga kining Ebanghelyo gipahiuli, ug dugang pa, kita nasayud nga kita nakabaton niini. Sama nako, ug ingon man kamo; ug pinaagi sa pagsunod sa iyang mga baruganan ug sa pagdawat sa Espiritu Santo kamong mga Santos sa Ulahing mga Adlaw nasayud nga kini mao ang buhat sa Dios, ug kon kamo wala masayud niini, kini tungod kay kamo wala magpuyo sa inyong relihiyon ug magsunod sa mga sugo sa Dios; “kon tuyuon ni bisan kinsa ang pagbuhat sa iyang kabubut-on,” miingon si Kristo, “iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong kabubut-on.” [Juan 7:17.]¹⁴

Atoa ang pagpalambo sa balaang tawag diin kita gitawag, ug gawas kon kitang tanan gibutang ubos sa giya ug direksyon sa Makagagahum, kita dili makahimo—mao kana, kinsa kadtong dili motugyan sa ilang mga kaugalingon ngadto sa balaod sa Dios, dili makahimo nianang butanga. Apan kadtong kinsa motugyan sa ilang mga kaugalingon ubos sa balaod sa Dios, makahimo niini ug sayon nga makahimo niini, kay si Jesus miingon: “Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing, ug makakaplag kamog pahulay alang sa inyong mga kalag. Kay masayon ang akong yugo, ug magaan ang akong luwan.” [Mateo 11:29–30.] Karon, kon kita mosunod ngadto sa Dios ug ngadto sa mga espiritu nga ania kanato, dayon ang atong kahayag mahimong sama niana sa matarung nga nagkahayag ug nagkahayag hangtud sa hingpit nga adlaw; apan kon kita dili mosunod ngadto sa balaod ug sa pulong ug sa kasugoan sa Simbahan ug sa Gingharian sa Dios dinhi sa yuta, ang kahayag nga ania kanato mahimong kangitngit, ug dayon, sa gikaingon na, unsa ka dako niana nga kangitngit! [Tan-awa sa Mateo 6:23.]¹⁵

Kon ang mga tawo mapainubsanon, putli ug mahiyason, ug nagtinguha sa Ginoo alang sa Iyang giya, kay ang kahayag sa Iyang Balaan nga Espiritu motultol kanila ngadto sa mga dalan sa kinabuhi, aron sila makasabut sa Iyang balaod, sa Iyang pulong ug sa Iyang kabubut-on—ug dayon mosunod niini ingon nga kini gipakita ngadto kanila—ang maong mga tawo, kadtong mga kaigsoonan kinsa mosunod niini nga plano, liboan ka pilo-pilo labaw pang makasabut sa mga butang sa Dios kay niadtong dili mabinantayon, walay pagtagad, hungog ug masupilon, ug kinsa misalikway sa mga panalangin ug mga kahigayunan nga gitanyag nganha kanila. Ang kahayag nga anaa nianang mga tawhana nahimong kangitngit, samtang ang dalan sa uban sama sa matarung nga nagkahayag ug nagkahayag hangtud sa hingpit nga adlaw [Tan-awa sa D&P 50:24.]¹⁶

Ang atong kahilwasan ug kalipay ug ang atong bahandi magagad sa atong pagsunod sa Dios ug sa Iyang mga balaod, ug ang atong kahimayaan karon ug sa kahangturan mag-agad sa sama nga butang. Kon adunay mga katigayunan nga gibutang diha sa atong mga kamot atong hangyoon ang atong Amahan nga kita makahimo sa pagbuhat unsa ang matarung alang niini, ug, sa akong gikasulti na, mangayo kita Kaniya sa atong inadlaw nga pan, ug magpasalamat Kaniya alang niini; sama sa gibuhat sa mga anak sa Israel. Gihatagan sila og mana matag karon ug unya sa mga anghel. Wala ko makahibalo unsang matang sa galingan ang anaa kanila o kinsa ang ilang tigluto og pan, apan ilang gidala ang mana. “Walay kapin ang nakatigum og daghan, wala usab magkulang ang nakatigum og diyutay” [Exodo 16:18.] Ako nagtuo nga mao kana ang mahitabo kanato usahay. Ang mga anghel wala magpakaon kanato og mana, apan ang Dios miatiman kanato, ug akong gibati sa tibuok adlaw ang pagpanalangin sa ngalan sa Dios sa Israel; ug kon kita mahadlok sa Dios ug maningkamot sa pagkamatarung, … k ita, ang mga katawhan sa Zion, mao ang labing adunahan sa tanang mga katawhan.¹⁷

Ako nahinumdom sa dihang unang gisangyaw ngari kanako ang Ebanghelyo—sa wala pa ako bunyagi; ako nakadungog og pakigpulong sama niini: “Karon, kami walay laing ikasaad kaninyo, ang pagpabor lamang sa Dios kon kamo magpuyo sa matarung nga paagi ug magsunod sa Iyang mga sugo. Mahimong gigukod kamo, gisakit, gibilanggo o gipahamtangan sa kamatayon tungod sa pagpamatuod nga inyong gipamatuod, tungod sa relihiyon nga kamo giingnan nga inyong sundon; apan kami makasaad kaninyo nga kon ingon man niini ang kahimtang kamo makaangkon og kinabuhing dayon.”¹⁸

Mga Sugyot alang sa Pagtuon ug Panaghisgutan

Ngano sa inyong hunahuna nga ang Ginoo buot nga kita magmasulundon? Unsa ang pipila ka mga panalangin nga Iyang gisaad kanato kon kita magmasulundon?
Unsa nga mga kasinatian ang inyong nasinati nga nakapakita kaninyo sa mga panalangin sa pagkamasulundon? Ngano sa inyong hunahuna nga mibati kamo og kaanindot kon kamo nagmasulundon?
Ngano nga ang kabubut-on importante nga bahin sa pagkamasulundon? Sa unsa nga mga paagi nga ang pagkamasulun-don makahimo kanato nga gawasnon?
Sa unsa nga mga paagi nga ang pagkamasulundon makatabang kanato nga malig-on ang atong mga pagpamatuod? Unsay mga epekto diha sa pagpamatuod sa usa ka tawo sa iyang pagkamasinupakon? Unsa sa inyong pagtuo ang gipasabut ni Presidente Taylor sa dihang siya miingon, “Kita dili makapadayon sa atong kaugalingong paagi ug makaangkon sa panalangin sa Dios”?
Ang pagkahibalo nga ang atong kaugalingong; kaluwasan mag-agad sa atong pagkamasulundon, unsa ang atong mahimo sa pagtudlo sa atong mga anak niini nga baruganan?
Ngano nga ang mga masulundon makasinati og mga pagsulay? (Tan-awa usab sa D&P 58:2–5.) Ngano nga importante nga magpabilin nga masulundon bisan pa sa taliwala sa mapait nga mga pagsulay?

May Kalabutan nga mga Kasulatan:Mateo 11:29–30; Juan 7:17; 14:15; 1 Nephi 3:7; Alma 3:26–27; D&P 58:26–29; 130:20–21