Kapitulo 22

Pagtabang uban sa Gugma sa Bag-ong mga Kinabig ug sa Dili Kaayo Aktibo nga mga Miyembro

“Kita kinahanglan nga kanunayng [nga] magpakabana sa dakong obligasyon sa pagpakigdait … niadtong nahimong mga miyembro sa Simbahan isip mga kinabig, ug sa pagtabang uban sa gugma niadtong kinsa … nahimong dili kaayo aktibo.”

Gikan sa Kinabuhi ni Gordon B. Hinckley

Usa ka tema nga gihatagan ni Presidente Hinckley og gibug-aton sa tibuok niyang pagserbisyo isip Presidente sa Simbahan mao ang importansya sa pagtabang sa bag-ong mga kinabig ug niadtong dili mga aktibo sa Simbahan. Mipakigbahin siya og daghang mga ehemplo sa iyang personal nga mga paningkamot kalabut niini, diin ang usa mahinuklugon niyang gihulagway isip “usa sa akong mga kapakyasan.” Siya mipasabut:

“Samtang nagserbisyo isip usa ka misyonaryo sa British isles, ang akong kompanyon ug ako mitudlo, ug kalipay nako nga mibunyag, sa usa ka batan-ong lalaki. Maayo siya og edukasyon. Maayo siya og pamatasan. Mahunahunaon siya. Mapasigarbuhon kaayo ako niining tinugahan nga batan-ong lalaki nga nagpamiyembro sa Simbahan. Akong gibati nga aduna siya sa tanang mga kwalipikasyon aron mahimong usa ka lider sa atong katawhan sa umaabut.

“Padulong na siya sa paghimo sa dakong kausaban gikan sa pagkakinabig ngadto sa pagkamiyembro. Sulod sa mubong higayon sa wala pa ako na-release, oportunidad nako nga mahimo niyang higala. Dayon gi-release na ko aron mopauli. Gihatagan siya og gamay nga responsibilidad diha sa branch sa London. Wala siya masayud unsay gilauman gikan kaniya. Nakahimo siya og sayop. Ang lider sa organisasyon diin siya miserbisyo usa ka tawo nga labing maayo nakong mahulagway nga wala kaayoy gugma alang sa ubang tawo ug dali ra nga makapanaway. Sa medyo walay kalooy nga paagi, iyang gikasab-an ang akong higala nga nakahimo sa gamay nga sayop.

“Ang batan-ong lalaki mibiya sa among inabangan nga balay-tigumanan nga nasagmuyo ug nasakitan. … Miingon siya sa iyang kaugalingon, ‘Kon ingon ana sila nga klase sa mga tawo, nan dili na ko mobalik.’

“Mipalayo siya ngadto sa pagkadili aktibo. Ang mga katuigan milabay. … Dihang didto ko sa England [pag-usab], naningkamot ko og maayo nga makakita kaniya. … Miuli ko ug sa katapusan, human sa dugay nga pagpangita, nasayran nako kon asa siya.

“Misulat ko kaniya. Mitubag siya apan wala maghisgot sa ebanghelyo.

“Sa sunod higayon nga didto ko sa London, gipangita nako siya pag-usab. Sa adlaw nga mobiya na ko, ako siyang nakit-an. Gitawagan nako siya, ug nagkita mi sa underground nga estasyon [sa tren]. Nagginaksanay mi. Gamay na lang kaayo ko og oras sa dili pa molupad ang sakyan nako nga eroplano, apan nag-istorya mi sa makadiyot ug uban sa akong gihunahuna nga tinuod nga kahinangup sa usag usa. Gigakos ko niya pag-usab sa akong pagbiya. Nakahukom ko nga dili gayud mahunong pag-usab ang akong pakigkontak kaniya. …

“Ang mga katuigan milabay. Nagkatigulang ko ug mao usab siya. Miretiro siya sa iyang trabaho ug mibalhin ngadto sa Switzerland. Sa usa ka okasyon sa dihang didto ko sa Switzerland, gituyo gayud nako pagpangita ang lugar nga iyang gipuy-an. Gigahin namo ang halos tibuok adlaw nga nag-uban—siya, iyang asawa, akong asawa, ug akong kaugalingon. Nalingaw mi kaayo, apan tataw nga dugay na kaayong nawagtang ang iyang hugot nga pagtuo. Gisulayan nako ang tanang paagi nga akong nahibaloan, apan wala ko kakita og paagi nga makapabuhi niini og balik. Nagpadayon ko sa akong pagsulat kaniya. Gipadad-an nako siya og mga libro, mga magasin, mga rekording sa Tabernacle Choir, ug ubang mga butang diin mipahayag siya og pasalamat.

“Namatay siya pipila lang ka bulan ang milabay. Ang iyang asawa misulat kanako aron sa pagpahibalo kanako niini. Miingon siya, ‘Ikaw ang labing suod niya nga higala sukad.’

“Mga luha midagayday sa akong mga aping sa dihang akong gibasa kadto nga sulat. Nasayud ko nga napakyas ko. Tingali kon didto pa ko sa dihang una siyang napasakitan, tingali lahi ang iyang nabuhat sa iyang kinabuhi. Siguro nakatabang ko niya niadtong higayuna. Siguro akong natambalan ang samad nga iyang giantus. Aduna lang akoy usa ka kunsuylo: Naningkamot ko. Aduna lang akoy usa ka kasubo: Napakyas ko.

“Ang hagit karon mas dako kay sa kaniadto tungod kay ang gidaghanon sa mga kinabig mas daghan kay sa atong nahibaloan sukad. … Ang matag kinabig bililhon. Ang matag kinabig anak sa Dios. Ang matag kinabig usa ka dako ug seryuso nga responsibilidad.”¹

Ang pagpakabana ni Presidente Hinckley alang sa bag-ong mga kinabig ug dili kaayo aktibong mga miyembro maoy resulta sa iyang kasinatian nga makita kon sa unsang paagi ang ebanghelyo nakapanalangin sa mga kinabuhi. Usa ka tigbalita kausa nangutana kaniya, “Unsay nakahatag kanimo og labing dako nga katagbawan samtang imong makita ang buhat sa Simbahan karon?” Si Presidente Hinckley mitubag:

“Ang labing makatagbaw nako nga kasinatian mao ang makita kon unsay mabuhat niini nga ebanghelyo alang sa mga tawo. Naghatag kini kanila og usa ka bag-ong panglantaw sa kinabuhi. Naghatag kini kanila og panglantaw nga wala pa gayud nila mabati sukad. Nagtabang kini kanila nga motinguha sa mga butang nga halangdon ug balaan. Adunay nahitabo kanila nga milagrusong tan-awon. Sila mitan-aw ngadto ni Kristo ug nalagsik.”²

“Ang Ginoo mibiya sa nubenta y nuwebe aron sa pagpangita sa nawala nga karnero.”

Mga Pagtulun-an ni Gordon B. Hinckley

Kita adunay dakong responsibilidad sa pagpangalagad ngadto sa indibidwal.

Kita kinahanglang moamuma sa indibidwal. Si Kristo kanunay nga naghisgot kabahin sa mga indibidwal. Iyang giayo ang mga masakiton, sa indibidwal nga paagi. Naghisgot Siya sa Iyang mga sambingay kabahin sa mga indibidwal. Kini nga Simbahan nagpakabana sa mga indibidwal, bisan pa sa atong gidaghanon. Bisan pa kon sila 6 o 10 o 12 o 50 ka milyon, dili gayud nato kalimtan ang kamatuoran nga ang indibidwal mao ang importante.³

Nagkaanam kita sa pagkahimong tibuok kalibutan nga katilingban. Apan ang atong mga interes ug hunahuna kinahanglan kanunay anaa sa indibidwal. Ang matag miyembro niini nga simbahan usa ka indibidwal nga lalaki o babaye, batang lalaki o batang babaye. Ang atong dako nga responsibilidad mao ang pagsiguro nga ang matag usa “mahinumduman ug maamumahan pinaagi sa maayo nga pulong sa Dios” (Moro. 6:4), nga ang matag usa adunay oportunidad alang sa pagtubo ug pagpahayag ug pagbansay diha sa buhat ug mga pamaagi sa Ginoo, nga walay nagkulang sa mga kinahanglanon sa kinabuhi, nga ang mga panginahanglan sa mga kabus natubag, nga ang matag miyembro adunay pag-awhag, pagbansay, ug oportunidad sa pagpadayon sa dalan sa pagka-imortal ug kinabuhing dayon. …

Kini nga buhat kabahin sa mga tawo, matag usa anak sa Dios. Sa paghulagway sa mga nakab-ot niini kita nagsulti kabahin sa mga numero, apan ang tanan natong mga paningkamot kinahanglan ipahinungod sa pagpalambo sa indibidwal.⁴

Gusto nakong ipasabut og maayo nga adunay usa ka positibo kaayo ug talagsaong paglambo sa Simbahan. … Daghan kaayo kita og rason aron magmadasigon. Apan bisan kinsa nga kinabig nga nawagtangan sa ilang hugot nga pagtuo usa ka trahedya. Bisan kinsa nga miyembro nga nahimong dili aktibo angay nga ikabalaka og maayo. Ang Ginoo mibiya sa nubenta y nuwebe aron sa pagpangita sa nawala nga karnero. Ang Iyang kahingawa alang [sa usa] grabe kaayo nga Iya kining gihimo nga tema sa usa sa Iyang mahinungdanon nga mga leksyon [tan-awa sa Lucas 15:1–7]. Dili kita makahimo sa pagrelaks. Kinahanglang ipaamgo nato kanunay sa mga lider ug mga miyembro sa Simbahan ang dakong obligasyon sa pagpakigdait diha sa tinuod ug mainiton ug nindot kaayo nga paagi niadtong nahimong mga miyembro sa Simbahan isip mga kinabig, ug sa pagtabang uban sa gugma niadtong kinsa tungod sa usa ka rason o sa lain nahimong dili kaayo aktibo. Adunay igong ebidensya nga kini mahimo kon adunay determinasyon sa pagbuhat niini.⁵

Ang matag kinabig bililhon ug usa ka dako ug seryuso nga responsibilidad.

Akong gibati nga ang labing dako nga trahedya sa Simbahan mao ang pagkawagtang niadtong nagpamiyembro sa Simbahan ug dayon mipalayo. Gawas sa pipila ka eksepsyon dili kini kinahanglang mahitabo. Kumbinsido ako nga hapit tanan sa mga nabunyagan sa mga misyonaryo natudloan sa igong paagi aron makadawat og igo nga kahibalo ug pagpamatuod aron tugutan nga mabunyagan. Apan dili sayon ang paghimo og kausaban nga may kalabutan sa pagkahimong miyembro niini nga Simbahan. Nagpasabut kini sa pagputol sa karaang mga relasyon. Nagpasabut kini sa pagbiya sa mga higala. Mahimong nagpasabut kini sa paghiklin sa gihambin nga mga tinuohan. Kini mahimong magkinahanglan og kausaban sa kinaiya ug pagpugong sa mga gana. Sa daghan kaayong mga sitwasyon kini nagpasabut nga mag-inusara ug gani mahadlok sa wala mahibaloi. Kinahanglan gayud nga adunay pag-amuma ug paglig-on niining lisud nga panahon sa kinabuhi sa kinabig. Dako kaayo ang presyo nga gibayad alang sa iyang presensya diha sa Simbahan. Ang dugay nga mga paningkamot sa mga misyonaryo ug ang bili sa ilang pagserbisyo, ang pagkahimulag gikan sa daan nga mga relasyon ug ang kasakit nga konektado niining tanan nagkinahanglan nga kining bililhong mga kalag hangupon, hupayon, tabangan sa ilang mga panahon sa kahuyang, hatagan og responsibilidad diin sila mahimo nga malig-on, ug awhagon ug pasalamatan sa tanan nilang nabuhat.⁶

“Akong dapiton ang matag miyembro nga mopakigdait diha sa panaghigalaay ug gugma niadtong nagpamiyembro sa Simbahan isip mga kinabig.”

Walay pulos ang paghimo sa misyonaryo nga buhat kon pasagdan nato nga mawala ang mga bunga niana nga paningkamot. Ang duha kinahanglan nga dili mabulag. Kini nga mga kinabig bililhon. … Ang matag kinabig usa ka dako ug seryuso nga responsibilidad. Kinahanglan gayud nga atong amumahon kadtong nahimong kabahin kanato. …

Nakadawat ko sa miaging adlaw og usa ka makapaikag kaayo nga sulat. Gisulat kini sa usa ka babaye nga nagpamiyembro sa Simbahan usa ka tuig na ang milabay. Siya misulat:

“Ang akong panaw ngadto sa Simbahan talagsaon ug medyo mahagiton. Ang milabay nga tuig mao ang labing lisud nga tuig nga akong nasinati sa akong kinabuhi sukad. Mao usab kini ang labing mabungahon. Isip usa ka bag-ong miyembro, padayon ko nga gihagit kada adlaw.” …

Miingon siya nga “ang mga miyembro sa Simbahan wala masayud kon sama sa unsa ang pagkahimong bag-o nga miyembro sa Simbahan. Busa, halos imposible alang kanila nga masayud kon unsaon pagsuporta kanamo.”

Hagiton ko kamo, akong mga kaigsoonan, nga kon wala kamo masayud kon sama sa unsa kini, sulayi ninyo sa paghunahuna kon sama sa unsa kini. Mahimo kini nga hilabihan ka magul-anon. Mahimo kini nga makasagmuyo. Mahimo kini nga makahahadlok. Kita nga anaa niini nga Simbahan lahi gayud kaayo sa kalibutan kay sa unsay atong sagad mahunahuna kon unsa kita kalahi. Kini nga babaye nagpadayon:

“Sa dihang kami isip mga investigator nahimong mga miyembro sa Simbahan, kami nakalitan sa pagkadiskubre nga kami misulod sa usa ka hingpit ka langyaw nga kalibutan, usa ka kalibutan nga adunay kaugalingong mga tradisyon, kultura, ug pinulongan. Kami nakadiskubre nga walay tawo o walay tinubdan sa impormasyon nga mahimo namong adtoan alang sa giya sa among pagbiyahe niining bag-o nga kalibutan. Sa pagsugod ang biyahe makapaikag, ang among mga sipyat gani makalingaw, dayon mahimo kining makapahigawad ug sa katapusan, ang kahigawad mahimong kasuko. Ug dinhi niini nga mga yugto sa kahigawad ug kasuko nga kami mobiya. Mobalik kami ngadto sa kalibutan diin kami gikan, diin nasayud kami kon kinsa kami, diin kami nakatampo, ug diin kami makasulti sa pinulongan.”⁷

Ang ubang tawo gibunyagan lamang, wala sila gipakigdaitan, ug sulod sa duha o tulo ka bulan sila manamilit. Importante kaayo, akong mga kaigsoonan, ang pagsiguro nga ang [bag-ong gibunyagan nga mga miyembro] nakabig, nga sila nagbaton diha sa ilang mga kasingkasing og usa ka kombiksyon mahitungod niining mahinungdanon nga buhat. Dili lang kini kabahin sa panghunahuna. Kini kabahin sa kasingkasing ug nga kini gitandog sa Espiritu Santo hangtud nga sila nasayud nga kini nga buhat tinuod, nga si Joseph Smith sa pagkatinuod usa ka propeta sa Dios, nga ang Dios buhi ug nga si Jesukristo buhi ug nga sila mipakita ngadto sa bata nga si Joseph Smith, nga ang Basahon ni Mormon tinuod, nga ang priesthood anaa uban sa tanan niini nga mga gasa ug mga panalangin. Kinahanglang kusganon ko kining mapasabut og maayo.⁸

Ang matag kinabig nagkinahanglan og panaghigalaay, responsibilidad, ug pag-amuma pinaagi sa pulong sa Dios.

Uban sa nagkadaghan nga mga kinabig, kinahanglang mohimo kita og nagkadako nga paningkamot sa pag-abag kanila samtang nagsunod sila sa mga sugo. Ang matag usa kanila nagkinahanglan og tulo ka butang: usa ka higala, usa ka responsibilidad, ug pag-amuma pinaagi sa “maayo nga pulong sa Dios” (Moro. 6:4). Kini atong katungdanan ug oportunidad sa paghatag niini nga mga butang.⁹

Panaghigala

[Ang mga kinabig] moapil sa Simbahan uban sa kadasig alang sa unsay ilang nakit-an. Diha-diha dayon kinahanglang atong palamboon kana nga kadasig. … Paminaw kanila, giyahi sila, tubaga ang ilang mga pangutana, ug tabangi sila sa tanan nga mga sirkumstanya ug sa tanan nga mga kahimtang. … Akong dapiton ang matag miyembro nga mopakigdait diha sa panaghigalaay ug gugma niadtong nagpamiyembro sa Simbahan isip mga kinabig.¹⁰

Aduna kitay mahinungdanon nga obligasyon ngadto sa mga nabunyagan diha sa Simbahan. Dili kita makabaliwala kanila. Dili kita makahimo nga pasagdan sila nga mag-inusara. Nagkinahanglan sila og tabang samtang nag-anam sila og kaanad sa mga paagi ug kultura niini nga Simbahan. Ug atong dako nga panalangin ug oportunidad nga makahatag niana nga tabang. … Usa ka mainitong pahiyom, usa ka mahigalaon nga lamano, usa ka makapaawhag nga pulong mahimo nga epektibo kaayo.¹¹

Mopakigdait kita niini nga mga tawo! Makighigala kita kanila! Magmabination kita kanila! Awhagon nato sila! Atong pun-an ang ilang hugot nga pagtuo ug ilang kahibalo niini, ang buhat sa Ginoo.¹²

Ako mohangyo kaninyo … nga inyong hangupon ang mga nagpamiyembro sa Simbahan ug makighigala kanila ug moabi-abi kanila ug mohupay kanila ug atong makita ang maanindot nga mga resulta. Ang Ginoo mopanalangin kaninyo sa pagtabang niining talagsaong proseso sa retensyon sa mga kinabig.¹³

Responsibilidad

Kini nga Simbahan adunay gipaabut gikan sa mga tawo. Kini adunay taas nga mga sumbanan. Kini adunay lig-on nga doktrina. Kini nagpaabut og mahinungdanon nga pagserbisyo gikan sa mga tawo. Dili lang sila tinapulan nga magsunod-sunod. Gipaabut nato nga aduna silay pangbuhaton. Ang mga tawo mosanong niana. Ilang hangupon ang oportunidad nga makaserbisyo, ug samtang ila kining buhaton, sila molambo diha sa ilang kapasidad, sa ilang panabut, ug sa ilang mga kwalipikasyon sa pagbuhat sa mga butang ug sa pagbuhat niini nga maayo.¹⁴

Hatagi [ang bag-ong mga miyembro] og usa ka butang nga buhaton. Dili sila mahimong lig-on diha sa hugot nga pagtuo kon dili nila gamiton kana nga pagtuo. Ang hugot nga pagtuo ug pagpamatuod sama sa mga muskulo [muscle] sa inyong bukton. Kon gamiton ko kadto nga mga muskulo ug amumahon kini, mahimo kining mas kusgan. Kon akong ibutang ang akong bukton sa usa ka sambilayan [sling] ug pasagdan kini, mamahimo kini nga huyang ug dili epektibo, ug mao usab kini sa mga pagpamatuod.

Karon, pipila kaninyo moingon nga sila dili andam sa pagdawat og responsibilidad. Apan walay usa kanato nga andam sa dihang miabut ang tawag. Makasulti ko niana sa akong kaugalingon. Nagtuo ba mo nga andam ko alang niining dako ug sagrado nga calling? Gibati nako nga nasanapan. Gibati nako nga dili sarang. Gibati gihapon nako nga nasanapan. Gibati gihapon nako nga dili sarang. Apan naningkamot ko nga mopadayon, nagtinguha sa panalangin sa Ginoo ug naningkamot sa pagbuhat sa Iyang kabubut-on ug naglaum ug nag-ampo nga ang akong pagserbisyo mahimong Iyang ikahimuot. Ang una nakong responsibilidad sa Simbahan mao ang magtatambag ngadto sa presidente sa deacons quorum sa dihang napulog duha ka tuig ang akong panuigon. Wala ko mobati nga sarang. Gibati nako nga nasanapan. Apan naningkamot ko, sama kaninyo, ug pagkahuman niana miabut ang uban pang mga responsibilidad. Wala gayud ang pagbati nga sarang, apan kanunay ang pagbati nga mapasalamaton ug ang kaandam nga mosulay.¹⁵

Ang matag kinabig nga nagpamiyembro niini nga Simbahan kinahanglan nga adunay responsibilidad dayon. Kini mahimong gamay kaayo, apan makahimo kini og dakong kalainan sa iyang kinabuhi.¹⁶

Siyempre ang bag-ong kinabig wala masayud sa tanan. Siya makahimo tingali og mga sayop. Pero ngano man diay? Kitang tanan masayop. Ang importanteng butang mao ang paglambo nga resulta sa paglihok.¹⁷

Si Presidente Hinckley mitudlo nga ang bag-ong mga kinabig nagkinahanglan nga makadawat og mga oportunidad sa pagserbisyo diha sa Simbahan.

Pag-amuma uban sa maayong pulong sa Dios

Nagtuo ko … nga kini nga mga kinabig adunay pagpamatuod sa ebanghelyo. Nagtuo ko nga sila adunay hugot nga pagtuo diha ni Ginoong Jesukristo ug nasayud sa Iyang balaanong reyalidad. Nagtuo ko nga sila tinud-anay nga naghinulsol sa ilang mga sala ug adunay determinasyon sa pagserbisyo sa Ginoo.

Si Moroni [nag-ingon] mahitungod kanila human sila mabunyagi: “Ug human sila madawat ngadto sa bunyag, ug nabag-o ug nahugasan pinaagi sa gahum sa Espiritu Santo, sila giihap uban sa mga katawhan sa simbahan ni Kristo; ug ang ilang mga ngalan gikuha, nga sila mahinumduman ug maamumahan pinaagi sa maayo nga pulong sa Dios, aron pag-agak kanila sa matarung nga agianan, pag-agak kanila sa kanunay nga mabinantayon ngadto sa pag-ampo, mosalig lamang diha sa mga maayo nga buhat ni Kristo, kinsa mao ang tigpasiugda ug ang tighingpit sa ilang hugot nga pagtuo” (Moro. 6:4).

Niini nga mga adlaw sama niadto nga mga adlaw, ang mga kinabig “giihap uban sa mga katawhan sa simbahan … [aron] mahinumduman ug maamumahan pinaagi sa maayo nga pulong sa Dios, aron pag-agak kanila sa matarung nga agianan, pag-agak kanila sa kanunay nga mabinantayon ngadto sa pag-ampo.” … Tabangan nato sila samtang mohimo sila sa ilang unang mga lakang isip mga miyembro.¹⁸

Importante gayud nga [ang matag bag-o nga kinabig] mahisakop sa korum sa priesthood o Relief Society, sa Young Women, sa Young Men, sa Sunday School, o sa Primary. Kinahanglan siyang awhagon sa pagtambong sa sakrament miting aron sa pag-ambit sa sakrament, mobag-o sa mga pakigsaad nga gihimo sa panahon sa bunyag.¹⁹

Daghan kaayo kita og makuha ug walay mawala kon mobalik sa pagkaaktibo sa Simbahan.

Adunay liboan sa tibuok kalibutan … kinsa mga miyembro sa Simbahan sa rekord lamang, apan mibiya, ug kinsa karon sa ilang mga kasingkasing nangandoy nga mobalik, apan wala masayud kon unsaon ug maulawon kaayo nga mosulay. …

Kaninyo, akong mga kaigsoonan, kinsa mikuha sa inyong espirituhanong kabilin ug mibiya, ug karon adunay kahaw-ang sa inyong mga kinabuhi, ang dalan alang sa inyong pagbalik abli na. … Kon inyong buhaton ang unang maulawong lakang aron sa pagbalik, makakaplag kamo sa bukas nga mga bukton nga motimbaya kaninyo ug mainitong mga higala nga moabi-abi kaninyo.

Siguro nahibalo ko nganong ang pipila kaninyo mibiya. Nasilo kamo sa usa ka tawo nga walay paghunahuna nga mipasakit kaninyo, ug nasaypan ninyo ang iyang mga binuhatan nga nagrepresentar sa Simbahan. O tingali mibalhin mo gikan sa usa ka dapit diin nailhan mo ngadto sa usa ka dapit diin halos nag-inusara mo, ug nagdako didto nga gamay ra kaayo og kahibalo sa Simbahan.

O tingali nadani mo ngadto sa laing pundok o mga kinaiya nga gibati ninyo nga dili haum sa pagpakig-uban diha sa Simbahan. O tingali gibati ninyo nga mas maalamon kamo diha sa kaalam sa kalibutan kay sa inyong mga kaubanan sa Simbahan, ug samtang inyong gihunahuna nga mas maayo kamo kay kanila, gipalayo ang inyong kaugalingon gikan sa pakig-uban kanila.

Wala ko moanhi aron magsige og hisgot sa mga rason. Nanghinaut ko nga dili pud ninyo gusto. Kalimti na ang nangagi. … Daghan kaayo kita og makuha ug walay mawala. Balik, akong mga higala. Adunay dakong kalinaw nga makaplagan diha sa Simbahan kay sa inyong nasayran sa dugay na nga panahon. Adunay daghan kansang pakighigala inyong maganahan.²⁰

Akong minahal nga mga kaigsoonan kinsa tingali … mipalayo, ang Simbahan nagkinahanglan kaninyo, ug kamo nagkinahanglan sa Simbahan. Makakaplag kamo og daghang mga dunggan nga maminaw uban sa pagsabut. Adunay daghang mga tawo nga andam motabang kaninyo sa pagpangita sa inyong dalan pabalik. Adunay mga kasingkasing nga mopainit sa inyong kaugalingong mga kasingkasing. Adunay mga luha, dili sa kapait, apan sa pagmaya.²¹

Alang sa mga Santos sa Ulahing mga Adlaw nga mobalik sa pagkaaktibo sa Simbahan, nindot ang bation nga makauli pag-usab.

Usa ka Dominggo miadto ko sa usa ka siyudad sa California alang sa komperensya sa stake. Ang akong ngalan ug litrato anaa sa lokal nga pamantalaan. Ang telepono mibagting diha sa stake center samtang ang stake president ug ako misulod sa building nianang buntaga. Ang tawag alang kanako, ug ang caller mipaila sa iyang kaugalingon. Gusto siyang makigkita kanako. Nananghid ko nga dili moapil sa miting nga ako unta ang mopahigayon nianang sayo sa buntag ug mihangyo sa stake president nga mopadayon niini. Aduna koy mas importanteng buhaton.

Siya mianhi, kining akong higala, maulawon ug medyo mahadlukon. Mipahilayo siya sa dugay na nga panahon. Nagginaksanay kami isip mga igsoon nga dugay na nga nagkabulag. Sa sinugdanan kiwaw ang pag-istoryahanay, apan sa wala madugay nahimo kining mas mahigalaon samtang naghisgot mi sa mga adlaw nga gigahin didto sa England daghang tuig na ang milabay. Adunay mga luha sa mga mata niining lig-on nga tawo samtang namulong siya kabahin sa Simbahan diin siya kanhi usa ka epektibo kaayo nga parte, ug dayon nanugid sa dugay, haw-ang nga mga katuigan nga misunod. Siya naghisgot niini sama sa usa ka tawo nga nanugid og makalilisang nga mga damgo. Sa dihang nahulagway na niya kadtong nausik nga mga katuigan, among gihisgutan ang iyang pagbalik. Nagtuo siya nga lisud kining buhaton, nga makauulaw kini, apan miuyon siya nga mosulay.

[Nakadawat] ko og sulat gikan kaniya dili pa lang dugay. Miingon siya, “Mibalik na ko.” Mibalik na ko, ug pagkanindot sa bation nga makauli pag-usab.”

Ug kaninyo, akong mga higala, kinsa, sama kaniya, nangandoy nga mobalik apan nagduha-duha sa paghimo sa unang lakang, sulayi. Sugaton kamo namo kon asa kamo karon nagbarug, ug gunitan ang inyong mga kamot ug motabang kaninyo. Mosaad ko kaninyo nga nindot ang bation nga makauli pag-usab.²²

Mga Sugyot alang sa Pagtuon ug Pagtudlo

Mga Pangutana

Nganong kinahanglan man nga ang “atong mga interes ug hunahuna … kanunay anaa sa indibidwal,” bisan sa tibuok kalibutan nga simbahan? (Tan-awa sa seksyon 1.) Kanus-a kamo napanalanginan sa usa ka tawo kinsa mihimo og personal nga interes diha kaninyo? Unsa ang pipila ka mga paagi nga mahimo kitang mas sensitibo sa pag-atiman sa matag indibidwal?
Unsay atong makat-unan ug magamit gikan sa sulat nga gipakigbahin ni Presidente Hinckley diha sa seksyon 2? Pamalandungi kon unsay inyong mahimo sa paglig-on niadtong naningkamot sa pagpalambo sa ilang hugot nga pagtuo.
Nganong ang matag bag-ong kinabig nagkinahanglan man sa panaghigalaay, responsibilidad, ug pag-amuma pinaagi sa pulong sa Dios? (Tan-awa sa seksyon 3.) Unsa ang pipila ka mga paagi nga makighigala kita sa bag-ong mga kinabig? Sa unsang paagi kita makasuporta sa bag-ong mga kinabig sa ilang mga responsibilidad sa Simbahan? Unsaon nato pagtabang ang mga bag-ong kinabig nga “maamumahan pinaagi sa maayo nga pulong sa Dios”?
Nganong lisud man usahay alang sa mga miyembro nga mobalik sa pagkaaktibo sa Simbahan? (Tan-awa sa seksyon 4.) Unsaon nato pagtabang ang mga tawo nga makabalik? Kanus-a kamo nakasinati o nakasaksi og paglipay nga resulta sa usa ka pagbalik ngadto sa pagkaaktibo sa Simbahan?
Unsay inyong makat-unan gikan sa istorya nga gipakigbahin ni Presidente Hinckley diha sa seksyon 5? Ikonsiderar kon unsaon ninyo pagtabang ang usa ka tawo kinsa dili aktibo sa Simbahan nga “mopauli pag-usab.”

May Kalabutan nga mga Kasulatan

Lucas 15; Juan 10:1–16, 26–28; 13:34–35; Mosiah 18:8–10; Helaman 6:3; 3 Nephi 18:32; Moroni 6:4–6; D&P 38:24

Tabang sa Pagtuon

“Daghang nag-ingon nga mas maayong panahon ang pagtuon sayo sa buntag human sa gabii nga pagpahulay. … Mas palabihon sa uban nga magtuon sa hilum nga oras human sa trabaho ug sa mga kahasol sa adlaw. … Tingali ang mas importante kay sa unsang orasa mao ang pag-set og regular nga oras alang sa pagtuon” (Howard W. Hunter, “Reading the Scriptures,” Ensign, Nob. 1979, 64).