Kapitulo 9

Ang Bililhong Gasa sa Pagpamatuod

“Managlahi ang atong mga pinulongan. Nagpakabuhi kita ubos sa lahi-lahi nga mga kahimtang. Apan sa kasingkasing sa matag usa kanato nagpitik ang pareho ra nga pagpamatuod.”

Gikan sa Kinabuhi ni Gordon B. Hinckley

“Ang pinakauna nga higayon diin duna koy panumduman sa espiritwal nga mga pagbati,” miingon si Presidente Gordon B. Hinckley, “mao kadtong mga singko anyos pa ko, sa gamay pa kaayo ko. Naghilak ko sa kasakit sa akong dunggan. … Ang akong mama nag-andam og usa ka bag nga asin ug gibutang kini sa stove aron moinit. Hinay nga gipatong sa akong papa ang iyang mga kamot sa akong ulo ug gipanalanginan ako, mibadlong sa sakit ug sa kangutngot pinaagi sa awtoridad sa balaang priesthood ug sa pangalan ni Jesukristo. Dayon mapinanggaon ko niyang gisapnay ug gibutang ang bag sa init-init nga asin sa akong dunggan. Ang sakit nahanaw ug nawala. Nakatulog ko sa gakus sa kasiguroan sa akong papa. Samtang natulog ko, ang mga pulong sa iyang panalangin misulod sa akong hunahuna. Kadto ang pinakauna nakong panumduman sa paggamit sa awtoridad sa priesthood sa pangalan sa Ginoo.

“Wala madugay sa akong pagkabatan-on, ako ug ang akong igsoong lalaki natulog sa wala mapainit nga kwarto sa usa ka tingtugnaw. … Sa wala pa moligid sa init-init nga higdaanan, nangluhod mi sa pag-ampo. Didto gihimo ang yano nga pagpahayag sa pasalamat. … Nahinumdom ko nga miligid dayon ko sa higdaanan human sa pag-ingon nako og amen, gibutang ang baga nga habol libut sa akong liog, ug naghunahuna sa bag-o lang nakong gipamulong ngadto sa akong Amahan sa Langit sa pangalan sa Iyang Anak. Wala akoy dako kaayong kahibalo mahitungod sa ebanghelyo. Apan ingon og anaa ang matang sa kalinaw nga nagpabilin ug ang kasiguroan gumikan sa pagpakigsulti uban sa kalangitan ug pinaagi ni Ginoong Jesus. …

“Kadto nga pagpamatuod milambo sa akong kasingkasing isip usa ka misyonaryo dihang gibasa nako ang Bag-ong Tugon ug ang Basahon ni Mormon, nga dugang nga misaksi mahitungod Kaniya. Kadto nga kahibalo nahimo nga pundasyon sa akong kinabuhi, nga naggikan sa natubag nga mga pag-ampo sa akong pagkabata. Sukad niadto ang akong pagtuo nagkahugot pa gayud. Nahimo ako nga Iyang Apostol, gipili nga mohimo sa Iyang kabubut-on ug motudlo sa Iyang pulong. Nahimo ako nga Iyang saksi sa kalibutan.”¹

Isip mga Santos sa Ulahing mga Adlaw, nagkahiusa kita sa atong pagpamatuod kang Jesukristo.

Mga Pagtulun-an ni Gordon B. Hinckley

Ang pagpamatuod mao ang talagsaong kusog sa Simbahan ug ang tubod sa pagtuo ug kaaktibo.

Nahimo kitang dako kaayong pamilya nga mikatap tadlas niining lapad kaayong kalibutan. Managlahi ang atong mga pinulongan. Nagpakabuhi kita ubos sa lahi-lahi nga mga kahimtang. Apan sa kasingkasing sa matag usa kanato nagpitik ang pareho ra nga pagpamatuod: Kamo ug ako nahibalo nga ang Dios buhi ug anaa sa timon niining balaan Niya nga buhat. Nahibalo kita nga si Jesus ang atong Manunubos, kinsa nagbarug nga pangulo niini nga Simbahan nga nagdala sa Iyang pangalan. Nahibalo kita nga si Joseph Smith usa ka propeta ug mao ang propeta nga nagbarug nga pangulo niini nga dispensasyon sa kahingpitan sa mga panahon. Nahibalo kita nga ang priesthood napahiuli diha sa iyang ulo ug nga kini miabut diri kanato niining mga adlawa sa wala mabugto nga kutay. Nahibalo kita nga ang Basahon ni Mormon usa ka tinuod nga testamento sa reyalidad ug katinuod sa Ginoo nga si Jesukristo.²

Kining butanga nga gitawag nato og pagpamatuod mao ang talagsaong kalig-on sa Simbahan. Tubod kini sa pagtuo ug kaaktibo. … Sama kini sa katinuod ug kagamhanan sa bisan unsang pwersa sa kalibutan. Gihulagway kini sa Ginoo dihang namulong Siya ngadto ni Nicodemo ug miingon, “Ang hangin bitaw mohuros man ngadto sa buot niyang padulngan, ug mabati mo ang iyang tingog; ngani dili nimo mahibaloan diin siya gikan o asa siya padulong. Maingon usab niana ang tanan nga gianak sa Espiritu.” (Juan 3:8). Kining butanga nga gitawag nato og pagpamatuod lisud nga ipasabut, apan ang mga bunga niini klaro kaayo. Ang Balaang Espiritu mao ang nagpamatuod pinaagi kanato.³

Ang pagpamatuod usa ka hilum, makadasig nga tingog nga nagsuporta kanato samtang maglakaw kita uban sa pagtuo ug motulod kanato sa paglihok.

Ang personal nga pagpamatuod mao ang butang nga makapausab sa mga tawo sa ilang pagpakabuhi dihang nagpasakop sila niini nga Simbahan. Mao kini ang elemento nga nag-aghat sa mga miyembro nga biyaan ang tanan alang sa pag-alagad sa Ginoo. Mao kini ang hilum, makadasig nga tingog nga nagsuporta sa walay paghunong niadtong kinsa naglakaw uban sa pagtuo hangtud sa katapusang mga adlaw sa ilang kinabuhi.

Usa kini ka milagruso ug talagsaong butang, gasa gikan sa Dios ngadto sa tawo. Buntugon niini ang bahandi o kakabus kon ang usa ka tawo tawagon na sa pagserbiyo. Kini nga pagpamatuod nga anaa sa kasingkasing sa atong mga katawhan nag-aghat kanato sa usa ka makadasig nga katungdanan. Anaa kini sa tanang batan-on ug tigulang. Anaa kini sa estudyante sa seminary, sa misyonaryo, sa bishop ug sa stake president, sa mission president, sa sister sa Relief Society, sa matag General Authority. Madungog kini gikan niadtong walay gihuptan nga office kondili ang pagkamiyembro ra. Mao kini ang mahinungdanong bahin niini nga buhat. Mao kana ang nagpalihok sa buhat sa Ginoo nga magpadayon tadlas sa kalibutan. Motulod kini sa paglihok. Nagtulod kini nga buhaton ang gipabuhat kanato. Naghatag kini og kasiguroan nga ang kinabuhi puno sa katuyoan, nga ang ubang butang may mas dako nga importansya kay sa uban, nga kita anaa sa mahangturon nga panaw, nga kita manubag sa Dios. …

Mao kini nga elemento, nga sa sinugdanan huyang ug magkurog, nga nagpalihok sa matag investigator padulong sa pagkakabig. Nagduso kini sa matag kinabig padulong sa kasiguroan sa hugot nga pagtuo. …

Bisan asa may iorganisar nga Simbahan mabatyagan ang gahum niini. Maisugon kitang mopahayag nga kita nahibalo niini. … Ang yanong kamatuoran mao nga kita gayud nahibalo nga ang Dios buhi, nga si Jesus mao ang Kristo, ug kini mao ang ilang kawsa ug gingharian. Yano ra ang mga pulong; ang ekpresyon naggikan sa kasingkasing. Naglihok kini bisan asa ang Simbahan naorganisar, bisan asa nga naay mga misyonaryo nga nagtudlo sa ebanghelyo, bisan asa nga dunay mga miyembro nga nagpakigbahin sa ilang pagtuo.

Butang kini nga dili malalis. Ang mga kaatbang mahimong mokutlo og kasulatan ug walay katapusang makiglantugi sa doktrina. Posibling igmat sila ug maagnihon. Apan kon ang usa ka tawo moingon, “Ako nahibalo,” wala nay angay pang lalisan. Posibling walay pagdawat, apan kinsa ang makalalis o makalimod sa hilom nga tingog sa kinahiladman sa kalag nga namulong uban sa personal nga kombiksyon?⁴

“Kahayag nganha sa atong kinabuhi”

Si [David Castañeda], iyang asawa, si Tomasa, ug ang ilang mga anak namuyo sa uga gamay nga walay atiman nga ranso duol sa Torreón [sa Mexico]. Nanag-iya sila og 30 ka manok, 2 ka baboy, ug 1 ka niwang o daot nga kabayo. Ang mga manok makapangitlog og igo nga ikasustiner kanila ug maoy paagi nga panagsa mokita sila og peso. Kabus kaayo sila. Dayon ang mga misyonaryo mibisita nila. Miingon si Sister Castañeda, “Ang mga elder mitangtang sa tabon sa among mga mata ug midala og kahayag sa among kinabuhi. Wala gayud kami makaila ni Jesukristo. Wala gayud kami makaila bahin sa Dios hangtud nga miabut sila.”

Nakaeskwela siya og duha ka tuig, ang iyang bana wala. Gitudloan sila sa mga elder, ug sa katapusan nabunyagan. … Sa ngadto-ngadto nakatukod sila og malambuong negosyo diin ang amahan ug ang iyang lima ka anak nga lalaki didto nagtrabaho. Uban sa yano nga pagtuo gibayaran nila ang ilang ikapulo. Gibutang nila ang ilang pagsalig sa Ginoo. Nagpakabuhi sila sa ebanghelyo. Nagserbisyo sila bisan asa gitawag sa paghimo. Upat sa ilang anak nga mga lalaki ug tulo sa ilang anak nga mga babaye nakahuman og misyon. … Gibugal-bugalan sila sa ilang mga kritiko. Ang ilang tubag mao ang usa ka pagpamatuod sa gahum sa Ginoo diha sa ilang kinabuhi.

Gibana-bana nga mga 200 sa ilang pamilya ug mga higala mipasakop sa Simbahan tungod sa ilang impluwensya. Kapin sa 30 ka anak nga mga lalaki ug anak nga mga babaye sa pamilya ug mga higala ang nakaserbisyo og misyon. Nagdonar sila og yuta diin ang usa ka chapel karon nagbarug.

Ang mga anak, karon nangahingkod na, ug ang mga ginikanan magbanus-banus sa pag-adto sa Mexico City matag bulan, didto moapil sa buhat sa templo. Nagbarug sila isip buhi nga pagpamatuod sa talagsaong gahum niini nga buhat sa Ginoo sa pagbayaw ug pag-usab sa mga tawo. Sanglitanan sila sa liboan ngadto sa liboan sa tibuok kalibutan kinsa nakasinati og milagro sa Mormonismo isip usa ka pagpamatuod sa kabalaan sa buhat nga miabut sa ilang kinabuhi.⁵

“Tinuod kini, di ba? Nan unsa pay laing kinahanglan?”

Nakahimamat ko og usa ka naval officer gikan sa layo nga nasud, usa ka maalamon nga batan-on kinsa gidala ngadto sa Estados Unidos alang sa advance nga training. Ang pipila sa iyang mga kaubanan sa United States Navy, kansang kinaiya nakadani kaayo kaniya, mipakigbahin kaniya sa iyang hangyo bahin sa relihiyuso nilang gituohan. Dili siya Kristiyano, apan interesado siya. Ila siyang gitudloan mahitungod sa Manluluwas sa kalibutan, kang Jesukristo, nga natawo sa Bethlehem, kinsa mibuhis sa iyang kinabuhi para sa tanang katawhan. Ila siyang gisultihan mahitungod sa pagpakita sa Dios, ang Mahangturong Amahan, ug sa nabanhaw nga Ginoo ngadto sa bata nga si Joseph Smith. Gihisgutan nila ang bahin sa modernong mga propeta. Ila siyang gitudloan sa ebanghelyo sa Agalon. Ang Espiritu mitandog sa iyang kasingkasing, ug nabunyagan siya.

Gipaila siya ngari nako dihang hapit na siya mopauli ngadto sa yuta nga iyang natawhan. Gihisgutan namo kining mga butanga, ug dayon miingon ko: “Ang imong mga tawo dili mga Kristiyanos. Unsa ang mahitabo kon ikaw mopauli sa inyo nga usa ka Kristiyano, ug ilabi na, usa ka Mormon nga Kristiyano?”

Ang iyang nawong naminghoy, ug siya mitubag, “Ang akong pamilya mahiubos. Mahimo nga ila akong isalikway ug isipon nga patay. Alang sa akong kaugmaon ug sa akong trabaho, ang tanan nga oportunidad mahimo nga dili ihatag kanako.”

Nangutana ako, “Ikaw andam ba sa pagbayad sa ingon ka dako nga bili alang sa ebanghelyo?”

“Ang iyang itumon nga mga mata, naumog sa mga luha, misanag gikan sa iyang gwapo nga tabunong nawong samtang siya mitubag, “Tinuod kini, dili ba?”

Naulaw nga nakapangutana sa pangutana, mitubag ako, “Oo, kini tinuod.”

Diin siya mitubag, “Nan unsa pay lain nga kinahanglan?”

Kini nga mga pangutana ang gusto nakong ipangutana diha ninyo: “Tinuod kini, di ba? Nan unsa pay lain nga kinahanglan?”⁶

Usa ka bag-ong panglantaw sa kinabuhi

Kausa naminaw ko sa kasinatian sa usa ka engineer nga bag-o lang nagpasakop sa Simbahan. Ang mga misyonaryo mibisita sa iyang balay, ug ang iyang asawa mipasulod kanila. Madasigon kaayo ang asawa nga misanong sa ilang mensahe, samtang siya mibati nga daw siya gipugos. Usa ka gabii miingon ang iyang asawa nga gusto siyang magpabunyag. Hilabihan ang iyang kasuko. Wala ba siya kahibalo unsay ipasabut niini? Nagpasabut kini og panahon. Nagpasabut kini nga mobayad siya og ikapulo. Nagpasabut kini nga talikdan ang ilang mga higala. Nagpasabut kini nga wala nay pagpanabako. Gisul-ob niya ang iyang coat ug milakaw sa kangitngit sa kagabhion, gilamba ang pultahan. Gilakaw niya ang mga karsada, gibalikas ang iyang asawa, gibalikas ang mga misyonaryo, gibalikas ang iyang kaugalingon nganong gitugutan pa niya nga sila motudlo nila. Dihang naluya na siya ang iyang kasuko nahupay, ug ang espiritu sa pag-ampo sa laing paagi misulod sa iyang kasingkasing. Nag-ampo siya samtang naglakaw. Mihangyo siya nga tubagon sa Dios ang iyang mga pangutana. Ug dayon ang usa ka impresyon, tin-aw ug sa walay pagduha-duha, miabut sama nga usa ka tingog namulong nga nag-ingon, “Tinuod kini.”

“Tinuod kini,” balik-balik niya kining giingon sa iyang kaugalingon. “Tinuod kini.” Ang kalinaw misulod sa iyang kasingkasing. Dihang milakaw siya pauli sa balay, ang mga restriksyon, ang mga panginahanglan, ang mga rekisito nga maoy gikasuk-an niya pag-ayo nagsugod sa pagkahimong mga oportunidad. Dihang giablihan niya ang pultahan, nakita niya ang iyang asawa nga nagluhod sa pag-ampo.

… Atubangan sa kongregasyon diin iya kining gisugilon, gipamulong niya ang kalipay nga miabut sa ilang kinabuhi. Ang ikapulo dili usa ka problema. Ang pagpakigbahin sa unsay anaa kanila ngadto sa Dios, kinsa mihatag kanila sa tanang butang, ingon og gamay ra kaayo. Ang panahon sa pagserbisyo dili usa ka problema. Nagkinahanglan lamang kini og gamayng kamainampingon sa pag-budget sa mga oras sa semana. Ang responsibilidad dili usa ka problema. Gumikan niini miabut ang kalamboan ug bag-ong panglantaw sa kinabuhi. Ug dayon kining tawhana nga maalamon ug nabansay, kining engineer nga naanad sa paghisgot og mga kamatuoran sa pisikal nga kalibutan nga atong gipuy-an, mihatag sa balaang pagpamatuod nga nagluha tungod sa milagro nga miabut sa iyang kinabuhi.⁷

“Kinsa ang makalalis o makalimod sa hilom nga tingog sa kinahiladman sa kalag nga namulong uban sa personal nga kombiksyon?”

“Ang pinakabililhong butang sa akong kinabuhi”

Pipila ka tuig nang milabay usa ka maalamon ug labihan ka edukada nga batan-ong babaye namulong sa Berchtesgaden, Germany, sa usa ka komperensya sa mga kawani sa militar nga mga miyembro sa Simbahan. Didto ko ug nakabati ko niya. Usa siya ka major sa army, usa ka medical doctor, tinahud kaayo nga espesyalista sa iyang trabaho. Miingon siya:

“Labaw sa tanan dinhi sa kalibutan gusto kong moalagad sa Dios. Apan bisan giunsa nako sa pagpaningkamot dili nako siya makit-an. Ang milagro niining tanan mao nga siya nakakita kanako. Usa ka Sabado sa hapon niadtong Septyembre 1969 didto ko sa balay sa Berkeley, California, ug nakabati nga mibagting ang akong doorbell. Dunay duha ka batan-ong mga lalaki, nagsul-ob og mga amerikana, nga nag-polo og puti ug nag-necktie. Ang ilang buhok hapsay ang pagka-hinapay. Nakadayeg kaayo ko nila nga ako miingon: ‘Wala ko kahibalo unsay inyong gipamaligya, apan mopalit ko niini.’ Ang usa sa batan-ong lalaki miingon: ‘Wala mi mamaligya og bisan unsa. Mga misyonaryo kami sa Simbahan ni Jesukristo sa mga Santos sa Ulahing mga Adlaw, ug gusto kami nga makig-istorya nimo.’ Gipasulod nako sila, ug gisulti nila ang mahitungod sa ilang gituohan.

“Sinugdanan kadto sa akong pagpamatuod. Nagpasalamat ako lapas pa sa mga pulong sa pribilehiyo ug dungog nga nahimong miyembro sa Simbahan ni Jesukristo sa mga Santos sa Ulahing mga Adlaw. Ang kalipay ug kalinaw nga gidala niining makalipay nga ebanghelyo sa akong kasingkasing mao ang langit dinhi sa yuta. Ang akong pagpamatuod bahin niini nga buhat mao ang pinakabililhong butang sa akong kinabuhi, usa ka gasa sa akong Langitnong Amahan, diin akong pasalamatan hangtud sa hangtud.”⁸

Mao usab ngadto sa gatusan ka libo sa daghang kayutaan—ang mga lalaki ug mga babaye nga may kapasidad ug binansay, sa negosyo ug sa mga propesyon, mga gahi og ulo, praktikal [nga mga tawo] kinsa nagahimo og mga butang sa kalibutan, kansang mga kasingkasing anaa ang hilum nga kainit sa pagsaksi nga ang Dios buhi, nga si Jesus mao ang Kristo, nga kini nga buhat balaan, nga kini gipahiuli dinhi sa yuta alang sa pagpanalangin sa tanan kinsa moambit sa mga oportunidad niini.⁹

Matag usa kanato makabaton og pagpamatuod sa reyalidad sa Dios ug sa Iyang Hinigugmang Anak ug sa pagpahiuli sa Ilang buhat.

Kini nga pagsaksi, kini nga pagpamatuod, mahimo nga pinakabililhon sa tanang gasa sa Dios. Langitnon kini nga pagtugyan kon anaa ang eksakto nga paningkamot. Oportunidad kini, responsibilidad kini sa matag lalaki ug babaye niini nga Simbahan ang pagbaton diha sa iyang kaugalingon og usa ka kombiksyon sa kamatuoran niining talagsaong buhat sa ulahing adlaw ug niadtong kinsa nangulo niini, gani ang buhi nga Dios ug sa Ginoo nga si Jesukristo.

Gitudlo ni Jesus ang dalan alang sa pag-angkon niana nga pagpamatuod dihang miingon Siya: “Ang gitudlo ko dili akong kaugalingon, kondili iya sa nagpadala kanako.

“Kon tuyuon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulut-an” (Juan 7:16–17).

Nagtubo kita diha sa pagtuo ug kahibalo samtang kita nagserbisyo, nagtuon, ug samtang kita nag-ampo.

Dihang gipakaon ni Jesus ang 5,000 sila nakamatikud ug natingala sa milagro nga Iyang gihimo. Ang uban nangadto og balik. Gumikan niini Iyang gitudlo ang doktrina sa Iyang kabalaan, mahitungod sa Iyang Kaugalingon isip mao ang Tinapay sa Kinabuhi. Iya silang giakusahan sa kawalay interes sa doktrina apan sa pagtagbaw lamang sa kagutom sa ilang mga lawas. Ang uban, dihang nakadungog Kaniya ug sa Iyang doktrina, miingon, “Lisud kining sultiha; kinsa may makapatalinghug niini?” (Juan 6:60). Kinsa ba ang makatuo sa unsay gitudlo niining tawhana?

“Tapus niini daghan sa iyang mga tinun-an mitalikod ug wala na managpanglakaw uban kaniya.

“Ug si Jesus nangutana sa Napulog-Duha, [sa akong pagtuo mibati og kasagmuyo] Buot ba usab kamong mobiya kanako?

“Si Simon Pedro mitubag kaniya, Ginoo, kang kinsa man kami moadto? Ikaw mao ang may mga pulong mahitungod sa kinabuhing dayon.

“Ug kami nagatuo, ug among nasinati, nga ikaw mao ang Balaan sa Dios [mao kanang Kristo, ang Anak sa buhi nga Dios]” (Juan 6:66–69).

Mao kini ang dako nga pangutana, ug ang tubag, nga kinahanglan gayud natong dawaton. Kon dili man diha Kanimo nan “Ginoo, kang kinsa man kami moadto? ikaw mao ang may mga pulong mahitungod sa kinabuhing dayon. Ug kami nagatuo, ug among nasinati, nga ikaw mao ang Balaan sa Dios [mao kanang Kristo, ang Anak sa buhi nga Dios].”

Mao kini nga kombiksyon, kini nga tin-aw nga kasiguroan nga anaa sa kahiladman mahitungod sa buhi nga Dios, ang kabalaan sa Iyang Hinigugma nga Anak, ang pagpahiuli sa ilang buhat niini nga panahon, ug ang mahimayaong mga pagpakita nga misunod maoy nahimong pundasyon sa atong pagtuo sa matag usa kanato. Nahimo kini nga atong pagpamatuod.

… Bag-o lang ko nga naadto sa Palmyra, New York [duol sa dapit diin nadawat ni Joseph Smith ang Unang Panan-awon]. Sa mga nanghitabo didtong dapita, ang usa ka tawo kinahanglan gayud nga moingon: “Posibling nahitabo gayud kining mga butanga o wala. Dili mahimo kana nga duha ka hunahuna puro tinuod.”

Ug dayon ang tingog sa hugot nga pagtuo mihunghong: “Tanan kini nahitabo. Nahitabo kini sama sa iyang giingon nga kini nahitabo.”

Sa duol mao ang Bungtod sa Cumorah. Gikan didto miabut ang karaang rekord diin gihubad ang Basahon ni Mormon. Ang usa ka tawo kinahanglan gayud nga modawat o dili modawat sa balaan nga tinubdan niini. Ang pagtimbang-timbang sa ebidensya kinahanglan gayud nga mohatud sa matag lalaki ug babaye kinsa nakabasa uban sa hugot nga pagtuo sa pag-ingon nga, “Tinuod kini.”

Ug mao usab sa ubang mga elemento niining milagruso nga butang nga atong gitawag og pagpahiuli sa karaang ebanghelyo, sa karaang priesthood, ug sa karaang Simbahan.

Kini nga pagpamatuod karon, maingon man sa kanunay, usa ka pagpamahayag, usa ka walay lipud-lipud nga pagbarug sa kamatuoran sigon sa atong nahibaloan.¹⁰

Kinahangalan gayud nga molihok kita subay sa atong pagpamatuod ug ipakigbahin kini ngadto sa uban.

Miingon si Pablo kang Timoteo: “Tagda ang imong kaugalingon”—paminawa kini—“ug ang imong pagpanudlo; magpadayon ikaw niini, kay sa pagbuhat mo sa ingon pagaluwason mo ang imong kaugalingon ug ang mga magapatalinghug kanimo.” (1 Timoteo 4:16). Pagkaanindot nga direksyon nga gihatag ni Pablo ngadto sa batan-ong Timoteo.

Dayon mipadayon siya sa pag-ingon: “Kay kita wala sa Dios hatagig espiritu sa katalaw kondili sa espiritu sa gahum ug sa gugma ug sa pagpugong sa kaugalingon” (2 Timoteo 1:7). Wala kita hatagi sa Dios og espiritu sa katalaw, kondili sa espiritu sa gahum—ang gahum sa mensahe; ug sa gugma—gugma alang sa mga tawo, sa gugma nga naa nato nga atong ikatanyag; pagpugong sa kaugalingon—ang yano, masabtan nga mga baruganan sa gipahiuli nga ebanghelyo ni Jesukristo.

“Busa ayaw ikaulaw ang pagpanghimatuod alang sa atong Ginoo” (2 Timoteo 1:8). Ayaw gayud, akong mga kaigsoonan, ayaw ikaulaw ang pagpamatuod sa atong Ginoo. … Ania ang dakong mando, usa ka sugo nga gisangon kanato: “Kay kita wala sa Dios hatagig espiritu sa katalaw; kondili sa espiritu sa gahum, ug sa gugma, ug sa pagpugong sa kaugalingon. “Busa ayaw ikaulaw ang pagpanghimatuod alang sa atong Ginoo.”¹¹

Mao kini ang balaan nga buhat sa Dios. Mao kini ang Iyang Simbahan ug gingharian. Ang panan-awon nga nahitabo didto sa Sagradong Kakahoyan mao gayud kadto sigun sa gisulti ni Joseph. Aduna dinhi sa akong kasingkasing ang tinuod nga panabut sa kaimportante sa unang nahitabo didto. Ang Basahon ni Mormon tinuod. Nagpamatuod kini sa Ginoo nga si Jesukristo. Ang Iyang priesthood napahiuli ug ania kanato karon. Ang mga yawe sa priesthood, nga naggikan sa langitnong mga binuhat, gigamit para sa atong mahangturon nga panalangin. Mao kana ang atong pagpamatuod—imoha ug kanako—pagpamatuod nga kinahanglan gayud natong barugan ug kinahanglan gayud natong ipakigbahin sa uban. Akong ibilin kini nga pagpamatuod, akong panalangin, ug akong gugma sa matag usa kaninyo ug ang akong pagdapit nga ipadayon ang pagkahimong usa ka bahin niining talagsaon nga ulahing adlaw nga milagro sa Simbahan ni Jesukristo sa mga Santos sa Ulahing mga Adlaw.¹²

Mga Sugyot alang sa Pagtuon ug Pagtudlo

Mga Pangutana

Sa unsang mga paagi ang inyong personal nga pagpamatuod nakatampo sa kalig-on sa Simbahan? (Tan-awa sa seksyon 1.)
Gihatagan og importansya ni Presidente Hinckley nga ang pagpamatuod mosuporta kanato ug “motulod [kanato] sa pagbuhat” (seksyon 2). Sa unsang paagi ang inyong pagpamatuod nakasuporta kaninyo? Sa unsang paagi ang inyong pagpamatuod naka-impluwensya sa inyong mga buhat? Unsa nga personal nga paggamit [applications] ang inyong mahimo gikan sa mga istorya nga naa sa seksyon 2?
Unsa ang atong makat-unan gikan sa mga pagtulun-an ni Presidente Hinckley mahitungod sa pagbaton og pagpamatuod? (Tan-awa sa seksyon 3.) Unsa nga mga kasinatian ang nakatabang ninyo nga makabaton og inyong pagpamatuod? Unsay atong mahimo sa paglig-on sa atong mga pagpamatuod?
Ngano kaha nga mas molig-on man ang atong pagpamatuod kon kini atong ipakigbahin? Sa unsang paagi nabuntog ninyo ang mga pagbati sa kahadlok mahitungod sa pagpakigbahin sa inyong pagpamatuod? Sa unsang paagi nga kamo napanalanginan tungod sa mga pagpamatuod sa uban? (Tan-awa sa seksyon 4.)

May Kalabutan nga mga Kasulatan

1 Mga Taga-Corinto 12:3; 1 Pedro 3:15; Alma 5:43–46; 32:26–30; Moroni 10:3–5; D&P 8:2–3; 80:3–5

Tabang sa Pagtudlo

“Kon imong mailhan ug masabtan ang matag tawo, mas makaandam ka sa pagtudlo sa mga leksyon nga haum sa ilang indibidwal nga mga sitwasyon. Kini nga pagsabut makatabang kanimo sa pagpangita og mga paagi sa pagtabang sa matag tawo nga moapil sa mga panaghisgutan ug sa ubang mga kalihokan sa pagkat-on” (Pagtudlo, Walay Labaw ka Mahingungdanon nga Tawag [1999], 34).