Mga Panalangin sa Templo

Ang matag templo nga gitukod sa Ang Simbahan ni Jesukristo sa mga Santos sa Ulahing mga Adlaw nagbarug isip usa ka pahayag sa atong pagpamatuod niini nga mga tawo nga ang Dios atong Mahangturong Amahan buhi, nga Siya adunay plano alang sa pagpanalangin sa tanang mga henerasyon, nga ang Iyang Hinigugmang Anak, nga si Jesukristo, kinsa natawo sa Betlehem sa Judea ug gilansang sa krus sa Golgota, mao ang Manluluwas sa kalibutan, kansang maulaong sakripisyo naghimong posible sa kinabuhing dayon sa matag usa kinsa nagdawat ug nagsunod sa ebanghelyo.⁸

Ang tanang nahitabo diha [sa] templo usa ka makapabayaw ug makapahalangdon nga matang. Kini nagpasabut ngadto sa kinabuhi dinhi ug sa kinabuhi lapas sa lubnganan. Kini nagpasabut sa importansya sa indibidwal isip usa ka anak sa Dios. Kini nagpasabut sa importansya sa pamilya isip nilalang sa labaw nga Makagagahum. Kini nagpasabut sa kahangturan sa relasyon sa kaminyoon. Kini nagpasabut sa pagpadayon ngadto sa mas dako nga kahimayaan. Kini lugar sa kahayag, usa ka lugar sa kalinaw, usa ka lugar sa gugma diin kita nagbuhat sa mga butang sa kahangturan.⁹

Ang tanang templo … sa ingon nagbarug isip usa ka monumento sa atong pagtuo sa imortalidad sa tawhanong kalag, nga kini nga yugto sa mortal nga kinabuhi pinaagi diin kita molabay kabahin sa usa ka nagpadayong pagsaka sa ibabaw, ingnon ta nga pagkasulti, ug nga ingon ka siguro nga adunay kinabuhi dinhi, adunay kinabuhi didto. Kana mao ang atong lig-on nga pagtuo. Kini mahinabo pinaagi sa Pag-ula sa Manluluwas, ug ang templo mahimong, ingon nga akong gipasabut, ang taytayan gikan niini nga kinabuhi ngadto sa sunod. Ang templo may kalabutan sa mga butang sa imortalidad¹⁰

Kining talagsaon ug nindot kaayo nga mga building, ug ang mga ordinansa nga gipangalagad dinha niana, nagrepresentar sa atong labing taas nga pagsimba. Kini nga mga ordinansa mahimo nga labing halawom nga mga pahayag sa atong relihiyon.¹¹

Ang sagradong mga butang angayan lamang sa sagradong konsiderasyon. … Kon ikaw mobiya sa mga pultahan sa Balay sa Ginoo, pagpakatinuod sa usa ka sagrado nga pagsalig sa dili pagsulti nianang diin sagrado ug gibalaan.

“Hinumdumi nga kana nga moabut gikan sa kahitas-an sagrado, ug kinahanglan gayud ipamulong uban sa pag-amping, ug pinaagi sa pagtugot sa Espiritu.” (D&P 63:64.) Ayaw pagtiaw-tiaw sa sagrado nga mga butang. (D&P 6:12.)¹²

Kini nga mga templo, diin karon anaa sa daghang dapit sa kalibutan, gikinahanglan sa hingpit nga katumanan sa Pag-ula sa Manluluwas. Dinhi, ubos sa awtoridad sa Balaang Priesthood, ipangalagad kadtong mga ordinansa nga modala dili lamang ngadto sa kaluwasan, apan usab ngadto sa kahimayaang dayon.¹³

Si Jesukristo, ang Anak sa Dios, mihatag sa Iyang kinabuhi diha sa krus sa Kalbaryo isip usa ka pag-ula alang sa mga sala sa katawhan. Ang Iya mao ang usa ka sakripisyo ilis alang sa matag usa kanato. Pinaagi niana nga sakripisyo miabut ang saad sa pagkabanhaw alang sa tanan. Kini miabut pinaagi sa grasya sa Dios, walay paningkamot diha sa bahin sa mga tawo. Ug lapas niini, pinaagi sa mga yawe sa balaang priesthood nga gitugyan diha sa Napulog Duha pinaagi sa Ginoo sa dihang Siya nakig-uban kanila, nga ang mga yawe gipahiuli niini nga dispensasyon pinaagi niadtong kinsa naghupot niini sa karaang panahon—pinaagi niini miabut ang gidugang nga dagkong mga panalangin, lakip niadtong talagsaon ug takus ilhon nga mga ordinansa nga gipangalagad diha sa balay sa Ginoo. Niadto lamang nga mga ordinansa nga natumang nagamit “ang kahingpitan sa priesthood.” (D&P 124:28.)¹⁴

Ang mga ordinansa sa templo [mao] ang kinatas-an nga mga panalangin nga ikahatag sa Simbahan.¹⁵

Ang mga panalangin sa templo alang sa mga kalalakin-an ug sa mga kababayen-an kinsa takus sa pagsulod ngadto niini … naglakip sa atong mga paghugas ug mga pagdihog nga unta kita malimpyo diha sa atubangan sa Ginoo. Kini naglakip sa serbisyo nga panudlo nga kita hatagan og tuga nga mga obligasyon ug mga panalangin nga mag-awhag kanato og pamatasan nga kaangay sa mga baruganan sa ebanghelyo. Kini naglakip sa mga ordinansa sa sealing pinaagi diin kana nga gibugkos dinhi sa yuta ibugkos didto sa langit, naghatag alang sa pagpadayon sa pamilya.¹⁶

Ako [makausa] gitawag ngadto sa ospital kiliran sa katre sa usa ka inahan nga anaa sa terminal nga kahimtang sa usa ka seryusong sakit. Namatay siya sa wala madugay, nagbiya sa iyang bana ug sa upat ka mga anak, lakip ang gamay nga batang lalaki nga unom ka tuig ang panuigon. Dihay kasubo, lawom ug sakit ug masulub-on. Apan makita bisan pa sa ilang mga luha ang usa ka hugot nga pagtuo nindot ug tataw nga ingon katinuod nga karon adunay masulub-ong panagbulag, adunay umaabut nga adlaw sa malipayong panaghiusa, kay kana nga kaminyoon gisugdan og sealing [pagbugkos] alang sa karon ug sa kahangturan diha sa balay sa Ginoo, ubos sa awtoridad sa balaang priesthood. …

Daghan ang nagbiyahe [lagyo kaayo] aron sa pagdawat sa mga panalangin sa templo nga kaminyoon. Nakakita ako og usa ka grupo sa mga Santos sa Ulahing mga Adlaw gikan sa Japan kinsa sa wala pa tukura ang usa ka templo diha sa ilang yutang natawhan—naghikaw sa ilang mga kaugalingon og mga pagkaon aron mahimong posible ang layo nga biyahe ngadto sa Templo sa Laie Hawaii. Sa wala pa kitay templo sa Johannesburg, nahimamat namo kadtong kinsa miadto nga gisakripisyo ang mga butang nga kinahanglanon aron makaplete sa 7,000 ka milya (911,00 ka km) nga lupad sa eroplano gikan sa Habagatang Africa ngadto sa templo sa Surrey, England. Dihay kahayag sa ilang mga mata ug mga pahiyom diha sa ilang mga nawong ug nagpamatuod nga kadto walay katapusan ka bililhon labaw pa kay sa bili sa nagasto.

Ug nakahinumdom ako nga nakadungog didto sa New Zealand daghang tuig nga nanglabay sa pagpamatuod sa usa ka tawo gikan sa layong bahin sa Australia kinsa, naminyo kaniadto pinaagi sa sibil nga awtoridad ug unya mipasakop sa Simbahan uban sa iyang asawa ug mga anak, mibiyahe ngadto tabok sa lapad nga kontinente sa Dagat sa Tasman ngadto sa Auckland, ug ngadto sa templo sa nindot nga walog sa Waikito. Ingon sa akong mahinumduman sa iyang mga pulong, miingon siya, “Dili kami makahimo sa pag-adto. Ang among kalibutanong mga kabtangan naglakip og daang sakyanan, among mga muebles, ug among mga gamitunon sa pagkaon. Gisultihan ko ang akong pamilya, ‘Dili kita makahimo sa pag-adto.’ Dayon gitan-aw ko ang mga nawong sa akong matahum nga asawa ug sa among mga anak, ug akong giingnan, ‘Dili mahimo nga kita dili mangadto. Kon ang Ginoo mohatag kanako og kusog, makatrabaho ako ug makakwarta og igo alang sa laing sakyanan ug muebles ug mga gamitunon sa pagkaon, apan kon ako mawagtangan niining akong mga gihigugma, kabus ako sa pagkatinuod sa kalibutan ug sa kahangturan’”¹⁷

Dili katingad-an akong mga kaigsoonan, nga sa pag-abli sa … mga templo akong nakita ang mga luha sa kusgan nga mga lalaki kinsa naggakos sa ilang mga asawa diha sa mga altar niining sagrado nga mga balay. Akong nakita ang mga luha sa mga amahan ug mga inahan samtang ilang gigakos ang ilang mga anak diha niining mao gihapon nga mga altar. Pinaagi sa gahum nga gigamit dinhi miabut sila sa kahibalo nga dili ang panahon o kamatayon ang makabugto sa mga higot nga nag-usa pagbugkos kanila.¹⁸

Apan adunay dili maihap nga mga minilyon kinsa naglakaw sa yuta ug kinsa wala gayuy oportunidad nga makapaminaw sa ebanghelyo. Sila pagahikawan ba sa ingon nga mga panalangin sama sa gitanyag diha sa mga templo sa Ginoo?

Pinaagi sa buhi nga mga proxy nga mobarug alang sa mga patay, ang sama nga mga ordinansa madawat niadtong nangamatay na. Sa kalibutan sa espiritu kining sama nga mga indibidwal gawasnon sa pagdawat o pagsalikway niadtong yutan-on nga mga ordinansa nga gipahigayon alang kanila, lakip ang bunyag, kasal, ug ang pagsilyo sa mga relasyon sa pamilya. Walay pagpamugos diha sa buhat sa Ginoo, apan kinahanglan gayud nga adunay oportunidad.¹⁹

Kini sagradong dapit sa pagserbisyo. Kadaghanan sa mga buhat nga gihimo dinhi niini nga sagradong balay gipahigayon sa puli nga paagi alang niadtong kinsa milabay sa tabil sa kamatayon. Ako walay nahibaloan nga laing buhat nga ikatandi niini. Kini hapit mahisama sa pagpuli nga sakripisyo sa Anak sa Dios alang sa tanang katawhan kay sa bisan hain nga buhat nga akong namatngunan. Ang mga pasalamat wala paabuta gikan niadtong kinsa tua sa laing kalibutan nga nahimong mga manununod niining gipahinungod nga pag-alagad. Kini usa ka pag-alagad sa buhi alang sa patay. Kini usa ka pag-alagad nga sa lintunganay gayud dili hinakog.²⁰

Mga kabataang lalaki ug babaye sa dinaghan kaayo … gipahimangnoan nga kining mga templo dili lamang alang sa ilang mga ginikanan apan alang usab kanila. Kon 12 anyos ang panuigon, mahimo silang mosulod sa balay sa Ginoo ug mobarug isip mga proxy diha sa mga bunyag alang niadtong milabay sa tabil sa kamatayon. Unsa kadako ug kadili hinakog nga pag-alagad kini. Unsa ka nindot kaayo nga butang alang sa atong mga kabatan-onan nga malakip niining hingpit nga dili hinakog nga lihok alang sa uban kinsa walay gahum sa pagtabang sa ilang mga kaugalingon.

Lain nga epekto uban … sa nagkadaghang kalihokan sa templo mao ang pagdaghan sa atong family history nga buhat. Ang computer sa nagkalain-laing mga teknolohiya niini nagpakusog sa buhat, ug ang mga tawo nagpahimulos sa bag-ong mga pamaagi nga gitanyag nganha kanila. Sa unsa nga paagi nga ang usa ka tawo dili makaingon nga ang Ginoo anaa sa tanan niini? Samtang ang mga kagamitan sa computer nag-uswag ang gidaghanon sa mga templo nagtubo aron sa pagpahiluna sa nagkadaghan nga buhat sa family history.²¹

Responsable kita alang sa panalangin, sa mahangturong panalangin, sa tanan kinsa natawo dinhi sa yuta, ang wala maihap, ang daghan kaayong mga henerasyon sa mga lalaki ug mga babaye kinsa mipuyo dinhi sa yuta, ang tanan kinsa karon nagpuyo dinhi sa yuta ug ang tanan kinsa mopuyo pa dinhi sa yuta. Unsa ka dako sa atong responsibilidad. Kinahanglan kitang mobarug nga mas lig-on ug motrabaho nga mas maayo og gamay aron sa pagtuman niini.²²

Kadtong atua sa pikas bahin, kinsa dili patay apan kinsa buhi sa espiritu, magmaya ug malipay sa ilang pagmata ug magpadayon sa ilang dalan ngadto sa “pagka-imortal ug sa kinabuhi nga dayon” (Moises 1:39).²³

Naghimo ako … og hagit alang sa matag usa kaninyo niining adlawa sa pagpahimutang sa inyong mga kinabuhi og tarung, aron mahimong takus nga moadto sa balay sa Ginoo ug didto modawat sa mga panalangin nga kaugalingong imo. … Dako ang mga gikinahanglan, apan mas dako pa gihapon ang mga panalangin.²⁴

Giawhag ko ang atong mga katawhan sa tanang dapit, uban sa tanang pagdani diin ako makahimo, sa pagpuyo nga takus sa paghupot og usa ka temple recommend, sa pagkuha og usa ug tan-awon kini isip usa ka mahal nga kabtangan, ug sa paghimo og mas dako nga paningkamot sa pag-adto sa balay sa Ginoo ug dawaton ang espiritu ug ang mga panalangin nga anaa dinha niini.²⁵

Makaadto ka sa [sa templo] kanunay o dili, pagpakatakus sa usa ka temple recommend ug tagoi ang recommend diha sa inyong bulsa. Kini pahinumdom kaninyo sa unsay inyong gipaabut isip usa ka Santos sa Ulahing mga Adlaw.²⁶

Ako nakontento nga ang matag lalaki o babaye kinsa moadto sa templo uban sa espiritu sa pagkatim-os ug hugot nga pagtuo mobiya sa balay sa Ginoo nga usa ka mas maayo nga lalaki o babaye. Adunay panginahanglan sa makanunayon nga pagpausbaw sa tibuok natong kinabuhi. Adunay panginahanglan usahay sa pagbiya sa kasaba ug sa kasamok sa kalibutan ug motikang sulod sa sagradong balay sa Dios, didto aron mobati sa Iyang espiritu sa palibut sa kabalaan ug kalinaw.²⁷

Kining sagrado nga building nahimong usa ka eskwelahan sa panudlo sa matam-is ug sagradong mga butang sa Dios. Dinhi atong gi-outline ang plano sa usa ka mahigugmaong Amahan alang sa Iyang mga anak sa tanang mga henerasyon. Dinhi atong gi-sketch sa atong atubangan ang odyssey [panimpalad] sa mahangturong panaw sa tawo gikan sa premortal [kinabuhi nga wala pa dinhi sa yuta] ngadto niini nga kinabuhi hangtud sa kinabuhi human ang kamatayon. Ang labing mahinungdanon ug sukaranang mga kamatuoran gitudlo og maayo sa katin-aw ug kayano nga masabtan sa tanang naminaw. …

Ang templo usa usab ka lugar sa personal nga inspirasyon ug pagpadayag. Daghan niadtong kinsa sa panahon sa kabug-at, kon ang malisud nga mga desisyon kinahanglan gayud nga himoon ug makalibug nga mga problema kinahanglan gayud nga atubangon, mianha sa templo sa espiritu sa pagpuasa ug pag-ampo aron mangayo og balaan nga direksyon. Daghan ang mipamatuod nga samtang ang mga tingog sa pagpadayag wala madungog, mga hunahuna kalabut sa dalan nga sundon nasinati niana nga panahon o sa kadugayan nga nahimong mga tubag sa ilang mga pag-ampo.

Imahe

Si Presidente Hinckley diha sa batong pamag-ang sa templo

Kini nga templo usa ka pundasyon sa mahangturong kamatuoran. “Bisan kinsa nga magainom sa tubig nga akong igahatag kaniya dili na gayud pagauhawon” (Juan 4:14) Dinhi gitudlo kadtong mga kamatuoran nga balaan sa ilang lintunganay ug mahangturon sa ilang mga implikasyon.

Alang niadtong kinsa mosulod niini nga mga bongbong, kini nga balay nahimong balay sa mga pakigsaad. Dinhi kita nagsaad, sa kaligdong ug kasagrado, sa pagsunod sa ebanghelyo ni Jesukristo sa labing maayo nga pagpahayag. Nakigsaad kita sa Dios nga atong Amahan sa Kahangturan sa pagsunod niadtong mga baruganan nga mao ang lig-on nga pundasyon sa tanang tinuod nga relihiyon.²⁸

Ang kinabuhi ba alang kanimo puno sa mga kahingawa? Aduna ka bay mga problema, mga kabalaka ug mga kaguol? Gusto mo ba ang kalinaw sa inyong kasingkasing ug oportunidad sa pagpakigsulti sa Ginoo ug pagpamalandong sa Iyang dalan? Adto sa balay sa Ginoo ug didto batia ang Iyang Espiritu ug pakigsulti Kaniya ug imong mahibaloan ang usa ka kalinaw nga dili nimo makit-an bisan asa pa.²⁹

Sa panahon sa kalisud, paninguha sa pag-adto sa balay sa Ginoo ug didto takpi ang kalibutan. Dawata ang Iyang balaang mga ordinansa, ug ilugway kini ngadto sa imong mga kaliwatan. Sa katapusan sa sesyon diha sa templo, lingkod og hilum sa celestial room ug pamalandonga ang mga panalangin nga imong nadawat alang sa imong kaugalingon o nga imong gilugway ngadto niadtong kinsa namatay na. Ang imong kasingkasing modako sa pasalamat, ug ang mga hunahuna sa mahangturong mga kamatuoran sa Ginoo sa dakong plano sa kalipay motuhop sa imong kalag.³⁰

Niining langas, nagkapuliki, lumbaanay nga kalibutan, unsa nga pribilehiyo kini nga adunay sagradong balay diin mahimo kitang makasinati sa makabalaang impluwensya sa Espiritu sa Ginoo. Ang elemento sa kahakog mo-impluwensya kanato kanunay. Kinahanglan natong buntugon kini, ug walay laing paagi kay sa moadto sa balay sa Ginoo ug didto moalagad sa pagpuli nga relasyon alang niadtong kinsa namatay na. …

… Giawhag ko kamo nga mas magpahimulos niining balaang pribilehiyo. Kini mohashas sa inyong mga kinaiyahan. Kini mopaminos sa atong kahakog nga kadaghanan kanato aduna. Kini sa literal modala og makapabalaan nga elemento sa atong mga kinabuhi ug mohimo kanato nga mas maayong mga lalaki ug mga babaye.³¹

Ako nasayud nga ang inyong mga kinabuhi nagkapuliki. Apan ako mohimo og usa ka saad nga kon kamo moadto sa balay sa Ginoo, kamo mapanalanginan, ang kinabuhi mahimong mas maayo para kaninyo. Karon, palihug, palihug, minahal kong mga kaigsoonan, pahimulos sa inyong mga kaugalingon sa dakong oportunidad sa pag-adto sa balay sa Ginoo ug diha niana ambit sa tanan nga nindot kaayong mga panalangin nga inyong pagadawaton diha.³²

• Si Presidente Hinckley miingon nga ang mga ordinansa sa templo mao “ang labing halawom nga mga pahayag sa atong relihiyon” (seksyon 1) ug “ang kinatas-an nga mga panalangin nga ikahatag sa Simbahan” (seksyon 2). Unsa ang pipila ka mga panalangin nga inyong nadawat pinaagi niini nga mga ordinansa?

• Misulti si Presidente Hinckley kabahin sa mga lalaki ug mga babaye nga nanaghilak sa kalipay sa mga templo (tan-awa sa seksyon 2). Gikan sa inyong kasinatian, ngano nga ang mga ordinansa sa templo mokutaw og ingon ka lawom nga mga pagbati?

• Sa buhat nga pagluwas sa patay, miingon si Presidente Hinckley, “Unsa ka nindot kaayong butang alang sa atong kabatan-onan nga maapil niining hingpit nga dili hinakog nga buhat” (seksyon 3). Unsa ang mabuhat sa mga ginikanan ug kabatan-onan sa pagtinabangay niini nga pag-alagad?

• Unsa ang atong mabuhat sa paghatag og panahon sa pag-alagad ug pagsimba diha sa templo? Sa unsa nga mga paagi nga ang atong pag-alagad diha sa templo maka-impluwensya sa atong kinabuhi sa gawas sa templo? (alang sa pipila ka mga ehemplo, tan-awa sa seksyon 4.) Sa unsa nga paagi nga ang pag-adto sa templo mipanalangin kaninyo?

Exodo 25:8; 1 Mga Hari 6:11–13; D&P 88:119–20; 109:12–13, 24–28; 110:1–10; 128:22–24

“Ipakigbahin kon unsay imong nakat-unan. Samtang ikaw magbuhat niini, ang imong mga hunahuna mahimong mas klaro ug ang imong gahum sa pagpabilin niini molambo” (Pagtudlo, Walay Labaw Ka Mahinungdanon Nga Tawag [1999], 17).