Faamamaluina o Ki o le Perisitua na Toefuatai Mai e ala ia Iosefa Samita

E i ai le eseesega o le maua o se tofi o le perisitua ma le mauaina o ki o le perisitua. O le mea lenei e ao ona tatou malamalama lelei i ai. …

… E ui e umia uma e alii le perisitua ma faauuina i se tofi o lena perisitua, ae e i ai pule, po o taitaiga, e faaee atu i luga o i latou e tofia e pulefaamalumalu. O na pule ua ta’ua o ki.⁶

O ki o le[Perisitua] o aia tatau ia a le au peresitene; o le mana ma le pule e pulea ma taitaiina ai mataupu uma a le Alii i le lalolagi. O i latou e umia ki o lo o i ai le mana e pulea ma faafoe ai le auala e auauna uma atu ai i le perisitua.⁷

Afai e faatonuina alii e se tasi o umia nei ki, ua tauaogaina a latou galuega. O mea latou te fai ua faamauina ma faamaonia i le Ekalesia i le lalolagi ma le lagi.⁸

Tatou te talitonu o le mulimuli i le po umi o le pouliuli, le talitonu, ma le aluese mai mea moni o le Kerisiano mama ma le atoatoa, o le Alii i lona poto e le iu ua toe toefuatai maia i le lalolagi le atoatoaga o le talalelei e faavavau.

Ua tatou iloa o Iosefa Samita o se perofeta; na faaali le Tama ma le Alo ia te ia i le tautotogo o le 1820 e tatalaina lenei tisipenisione mulimuli o le talalelei; sa ia faaliliuina le Tusi a Mamona e ala i le meaalofa ma le mana o le Atua; na ia mauaina ki ma le pule mai agelu na auina mai mo lenei lava faamoemoe; ma na faaali mai e le Alii ia te ia aoaoga faavae o le faaolataga.⁹

E le aloaia e le Alii se sauniga po o se faapaiaga, tusa lava pe na faia ma faataunuuina i lona suafa, sei vagana ua faia e tusa ai ma lona finagalo ma faataunuuina e se tasi ua aloaia o sana auauna ua faatagaina. O le mafuaaga lena ua ia auina mai ai mai lona afioaga avefeau paia ia Iosefa Samita ma isi, e toefuatai mai mea na aveese mai le lalolagi, o le atoatoaga o le talalelei, ma le atoatoaga ma ki o le perisitua.¹⁰

Sa tatau ona toefuatai mai ki o le perisitua. Sa le lava le oo mai o Ioane le Papatiso ma ki o le Perisitua Arona, ma Peteru, Iakopo, ma Ioane ma ki o le Perisitua Mekisateko, o le ala na faatuina ai le Ekalesia, ae sa tatau ona tatala mai le lagi ma se toefuataiga mai o ki sa umia e perofeta uma sa taitaia tisipenisione mai le taimi o Atamu seia oo mai i le taimi o Peteru, Iakopo, ma Ioane. Na o mai nei perofeta i o latou taimi ma faaee mai le pule sa ia umia.¹¹

Ata

Study sketch with grid for Melchizedek Priesthood restoration. Peter, James and John are ordaining a kneeling sandy haired Joseph while Oliver, dressed in brown kneels at the side.

O ki uma o tisipenisione uma sa tatau ona aumai ina ia faataunuu ai folafolaga a perofeta ma faamoemoega o le Alii i le faataunuuina o le toefuataiga atoa o mea uma. O lea o le tamā o tagata uma, le uluai tagata i le lalolagi, o Atamu, sa tatau ona oo mai, ma na sau o ia ma lona mana. Na oo mai Mose, ma isi. O i latou uma na i ai ki na oo mai ma faaee mai a latou pule. … Ua le ia i tatou aso na faaali mai ai nisi o nei pule, ae o le Perofeta o Iosefa Samita i lana tusi i le Au Paia i Navu e faatatau i le faaolataga o e ua maliliu na tautino mai, e pei ona faamauina i le Vaega 128 o le Mataupu Faavae ma Feagaiga [fuaiupu 17–21], o nei perofeta uma na oo mai ma ki i le tisipenisione o lo o tatou ola ai.¹²

Ina ua uma ona faatulaga le Ekalesia na poloaiina e le Alii Lana Au Paia e fausia se fale i Lona suafa. Sa le i malamalama lelei le Au Paia i le taua o lenei mea, ma sa le i galulue i latou i lea taimi e fausia se fale, o lea na aoai ai i latou e le Alii [tagai MF&F 95:1–4]. Ina ua tuanai le aoaiga sa latou galulue loa i lo latou malosi e ui ina matitiva ma fausia le Malumalu i Katelani. Aisea na fausia ai? E fai o se malumalu paia e afio mai i ai Iesu Keriso, o le nofoaga na te auina mai i ai Ana auauna, o perofeta, ma ki e pulea ai. … Ua tatou iloa e toatolu o perofeta tautaua o anamua o e na umia ki taua, na oo mai i le aso 3 o Aperila i le tausaga e 1836.

Na muamua oo mai Mose [tagai MF&F 110:11]. Na ia tuuina atu ia Iosefa Samita ma Oliva Kaotui ki o le faapotopotoina o Isaraelu. … Sa ia faapotopoto Isaraelu, ma e ui ina sa le ia te ia le aia e tuu atu ai ia i latou e pulea fanua, ae sa i ona lima ia ki mo le faapotopotoina. Sa oo mai o ia ia Peteru, Iakopo, ma Ioane i le mauga na liua ai ma tuuina atu ia i latou ki lava e tasi mo le faapotopotoina o Isaraelu i aso sa latou ola ai. Sa auina atu o ia i le Perofeta o Iosefa Samita ma Oliva Kaotui e tuuina atu i ai ki o le faapotopotoina o Isaraelu i le tisipenisione o le atoatoaga o taimi. …

Ina ua mavae Mose, sa oo mai Elaia, ma tuu mai ki ma aumai le tisipenisione o le talalelei na soifua ai Aperaamo [tagai MF&F 110:12]. O mea uma e faatatau i lena tisipenisione, o faamanuiaga na faaee i luga o Aperaamo, o folafolaga na tuuina atu i ana fanau, sa tatau ona toefuataiina uma mai lava, ma o Elaia, na umia ki o lena tisipenisione, na sau.

Ona oo mai lea o Elia, o le perofeta mulimuli na umia ki o le mana o faamauga i Isaraelu anamua, na oo mai ma faaee mai lena mana, o le mana o faamauga [tagai MF&F 110:13–16]. O nisi o le Ekalesia na le i malamalama i le mafaufau faapea, na sau Elia ma ki o le papatisoga o e ua maliliu po o le faaolataga o e ua maliliu. O ki a Elia e sili atu nai lo lea. O ki ia o faamauga, ma o nei ki o faamauga e faatatau mo e o lo o soifua ma e aofia ai ma e ua maliliu ua naunau e salamo.¹³

O Elia le perofeta …na faaeeina atu ia i laua [Iosefa Samita ma Oliva Kaotui] le mana o faamauga, le mana e faaaoga ai le perisitua e fusifusia ai i le lalolagi ma faamauina i le lagi.¹⁴

[O le] mana o faamauga ua faamaufaailogaina ai le faamaoniga i luga o sauniga taitasi o lo o faia i lenei Ekalesia ma e faapitoa lava i sauniga o lo o faia i totonu o malumalu o le Alii.¹⁵

Ata

Elijah in the air above Joseph Smith and Oliver Cowdery

Uso e ma tuafafine, o se tisipenisione maoae lenei. O isi tisipenisione uma e tofu sao i ai. O pule uma, o mana uma, ua faatotonugalemu i lenei tisipenisione o lo o tatou ola ai. Ua faamanuiaina i tatou e maua nei faamanuiaga e ala i lo tatou faamaoni.¹⁶

Sei ou faapea atu nei—i le manino ma le faamalosi—ua ia i tatou le perisitua paia ma o ki o le malo o le Atua ua iinei. Ua na o le Ekalesia lava a Iesu Keriso o le Au Paia o Aso e Gata Ai e maua ai.¹⁷

I se taimi puupuu a o le i faamaturoina o ia, na faaee atu ai e le Perofeta o [Iosefa Samita] i luga o Aposetolo e Toasefululua—ua avea ma korama lona lua i le Ekalesia—o ki uma ma sauniga uma ma le perisitua e tatau ai, latou te umia ina ia mafai ai ona latou faaauauina lenei galuega maoae ma le ofoofogia mo le faaolataga o tagata uma.¹⁸

O lenei perisitua ma nei ki … ua tuuina atu i alii taitasi ua vaetofia e avea ma sui auai o le Aufono a le Toasefululua. Ae ona ua ia i latou le aia tatau e avea ai ma peresitene, o lea e mafai ai ona faaaogaina i le atoatoa na o le aposetolo sinia a le Atua i le lalolagi, o ia lea o le Peresitene o le Ekalesia.¹⁹

O le Peresitene o le Ekalesia o lo o umia ki mo le Ekalesia atoa. … O ia o lo o i ai le mana atoa o le Perisitua. O lo o umia e ia o ki uma o natura taitasi, e faatatau i le tisipenisione o le Atoaga o Taimi. O ki uma o isi tisipenisione ua mavae ua uma ona faaalia mai, ua umia uma e ia.²⁰

[O le Peresitene o le Ekalesia] e ia te ia le aia tatau e faamatuu atu ai le pule ma aveesea le pule e tusa ai ma lana silasila ua talafeagai ma maua musumusuga e faia ai.²¹

Ia manatua e tasi lava le o lo o i luga o le fogaeleele o lo o umia le mana faamau o le perisitua, ma e na te faamatuu atu lena mana i isi, ina ia latou galulue ma faia faamauga i le lalolagi ma e tauaogaina, e fusifusia ai, pe a faamaonia e ia; afai e aveesea e ia, e le mafai e se tasi ona faaaogaina lena mana.²²

E leai se alii e mafai ona taitai sauniga ma tuuina atu ni faamanuiaga o le malumalu e aunoa ma le pule e faia ai e pei ona faamatuu mai ia te ia e le Peresitene o le Ekalesia. E leai se tasi e mafai ona taitai sauniga i soo se tulaga i lenei Ekalesia e aunoa ma le pule e taitoalua ma ia i lena galuega, e pei ona maua mai le mana ma ki o umia e le Peresitene o le Ekalesia. … Afai a tusa ai ma le pule o ana ki e tatau ai ona faapea mai, ua tatau ona aveesea mai tagata ni aia, ona leai lea o se alii e i ai se pule e taitai ai e faaee atu na aia faapitoa. Afai e taumafai se tasi na te faia, o le a le taulia lena galuega, ma o le o lo o taumafai e faia lena sauniga o le a tali atu i luma o le faamasinoga a le Atua, pe a le faia i luma o le Ekalesia, ma o le a ta’u solitulafono o ia. …

… A asiasi mai aposetolo po o nisi uso i siteki o Siona ma ua tofia e faatulaga ni mea o manaomia iina, latou te faia e tusa ai ma le faatonuga, po o le pule, ua faamatuuina ia i latou e le Peresitene o le Ekalesia. O lenei lava mataupu faavae e faaaoga foi i vaega laiti i siteki ma uarota.²³

O alii taitasi ua filifilia i le auala tatau e pulefaamalumalu i so o se tofiga i le Ekalesia e ao ona faamamaluina i lona valaauga. A faauuina se alii i le tofi o le epikopo, ua tuuina atu ia te ia ki e pulefaamalumalu ai i le uarota o lo o tofia i ai ma e faamamaluina lona valaauga e tagata uma o le uarota, po o le a lava le tofi ua umia e se alii. E faapea foi i le peresitene o le siteki, o le peresitene o le korama, po o le a lava le tofi. Ina ia faataitai le uiga o lenei mea ua aoaoina i tatou e leai se tamā e i ai se aia, e ui ina o lo o umia e ia le Perisitua Mekisateko, e papatiso ai se tasi o ana lava fanau seia muamua ona maua mai se faatagaga a lana epikopo. A maua le faatagaga, ona mafai lea e le tamā ona fai le sauniga mo lona atalii. Afai e ave e se tamā i ona lava luga le faia o se papatisoga, po o le faauu o lona atalii, e aunoa ma le maua mai o se faatagaga mai le tofi pulefaamalumalu i le uarota po o le siteki, po o le a lava le tulaga, o le o lo o umia ki e pulea ai, o le a tausalaina o ia. E faapea lava i se aposetolo e oo lava i se toeaina i le uarota. E oo lava i le Peresitene o le Ekalesia e le mafai lava ona manatu e faia lea tulaga e aunoa ma le malamalama i le epikopo o lana uarota po o le peresitene o lana siteki ma le pule ua faamatuu atu i le epikopo po o le peresitene o le siteki.²⁴

Ou te manatu e tasi le mea e ao ona malamalama lelei i ai o tatou mafaufau. O le a le taitaiseseina lava e le Peresitene o le Ekalesia, po o le Au Peresitene Sili, po o le leo autasi o le Au Peresitene Sili ma le Toasefululua le Au Paia pe auina atu foi se fautuaga i le lalolagi e ese mai le finagalo ma le agaga o le Alii.

Atonu e pau i le ala se tagata e toatasi, pe i ai ni ona manatu, pe tuu atu ni timaiga e le tusa ai ma le finagalo o le Alii. Ae o le siufofoga o le Au Peresitene Sili ma le leo autasi o isi o e o lo o umia ki o le malo o le a taitaiina pea le Au Paia ma le lalolagi i na ala e finagalo le Alii latou te ui ai. …

Ou te molimau atu afai tatou te vaai atu i le Au Peresitene Sili ma mulimuli i a latou timaiga ma taitaiga, e leai se mana i le lalolagi e mafai ona suia lo tatou ala o se ekalesia, ma o le a tatou maua taitoatasi le filemu i lenei olaga ma fai ma suli o le mamalu e faavavau i le lalolagi a sau [tagai MF&F 59:23].²⁵

• O a ni auala e mafai ai ona tatou mulimuli i faataitaiga a Peresitene Samita a o tatou lagolagoina i latou o umia ki o le perisitua? (Tagai “Mai le Soifuaga o Iosefa Filitia Samita.”)

• E faapefea e le vaega 1 ona fesoasoani ia te oe e malamalama ai i le eseesega o le umia o le tofi i le perisitua ma le umia o ki o le perisitua? Aisea e te manatu ai o se eseesega taua lenei?

• O a ni auala ua faamanuiaina ai oe ona o le toefuataiga mai o ki o le perisitua i le lalolagi? (Tagai vaega 2.)

• E faapefea ona e manatu o lo o faamalosia le Ekalesia e le faalapotopotoga o lo o faamatalaina i le vaega 3 ma le 4? E faapefea ona faamalolosia tagata taitoatasi o le Ekalesia?

• O a ni ou lagona a o e manatunatu loloto i saunoaga a Peresitene Samita e uiga i le lotogatasi i le Au Peresitene Sili ma le Korama a Aposetolo e Toasefululua? O anafea na e maua ai se taitaiga e ala i lo latou “leo autasi”? (Tagai vaega 5.)

Mataio 16:13–19; Galuega 3:21; MF&F 21:4–6; 27:5–13; 65:2; 128:8–21; 132:7

“Atonu e i ai … taimi e te le iloa ai le tali i se fesili. Afai o lea, e faigofie ona e faapea atu e te le iloa. E mafai ona e fai atu o le a e taumafai e saili le tali. Pe e te manao e valaau atu ia i latou o lo o aoaoina e saili le tali, tuu atu i ai le taimi i le isi lesona e lipoti mai ai mea ua latou aoaoina” (O Le Aoao Atu, E Leai Se Isi Valaauga E Sili Ai [1999], 64).