Ola i Upu Uma e Tulei mai i le Fofoga o le Atua

E ao ona talia e tagata uma ona e pulea e le Silisiliese le atulaulau atoa i tulafono e le mafaafitia, o le tagata, o le palealii o ana foafoaga uma, e ao ia te ia ona usitaia na lava tulafono. Ua folafola manino ma uunai malosi mai e le Alii lenei upumoni e ala i se faaaliga i le Ekalesia:

“O malo uma lava na tuuina atu i ai le tulafono;

“Ma e tele foi malo; aua e leai se avanoa e leai se malo o i ai; ma e leai foi se malo e leai se avanoa o i ai, o se malo tele po o se malo itiiti.

“Ma ua tuuina atu i malo taitasi se tulafono; ma ua i ai foi i tulafono taitasi ni tuaoi ma ni tuutuuga faapitoa.

“O tagata uma o e e le ola i ia tuutuuga e le tauamiotonuina.” (MF&F 88:36–39.)

O lenei upumoni e le taufaamatalaina. O lea, ua alagatatau lo tatou iloa o le malo o le Atua e puleaina e tulafono ma o i latou uma e naunau e ulufale atu i ai e ao ona usitaia tulafono. “Faauta, o lo’u fale o se fale o le maopoopo, ua fetalai mai ai le Alii le Atua, ae le o se fale o le fenumia’i.” (MF&F 132:8.)

Ua tuuina mai e le Alii i le tagata se seti o tulafono ua tatou faaigoaina o le talalelei a Iesu Keriso. Ona o le utiuti o musumusuga ma taitaiga faaleagaga, atonu o le a eseese tagata e tusa ai ma nei tulafono ma lo latou faatinoina, ae e seasea ona feeseeseai e tusa ai ma le mea moni o loo i ai nei tulafono, ma o i latou uma e saili e ulufale atu i lena malo e tatau ona usitai i ai.⁴

Ua ia i tatou upumoni uma, aoaoga faavae uma, tulafono ma aiaiga uma, o faatinoga ma sauniga uma e moomia e faasao ma faaeaina ai i tatou i le lagi aupito i maualuga o le malo selesitila.⁵

O lo tatou tiutetauave i le Ekalesia o le tapuai i le Alii i le agaga ma le faamaoni, ma o lenei tatou te saili e faia ma o tatou loto, malosi, ma le manatu atoa. Na fetalai Iesu: “E te ifo atu i le Alii lou Atua, ua na o ia lava e te auauna i ai.” (Mata. 4:10.)

Tatou te talitonu o le tapuai ua le faapea na o le tatalo ma lauga ma gaoioiga o le talalelei. O le faatumutumuga o le ala o tapuaiga o le tausia lea o poloaiga, mulimuli i tulaga aao o le Alo o le Atua, ma faia mea e fiafia i ai o ia. O se tasi o mea o le auauna atu i le Alii i laugutu; ae o le isi o le faaaloalo ma faamamalu i lona finagalo e ala i le mulimuli i faataitaiga ua ia faia mo i tatou. … Ou te olioli i le ala ou te mulimuli ai i ona tulaga aao. Ou te faafetai i upu o le ola e faavavau ua ou maua, ou te fiafia e faapea atu, i lenei lalolagi, ma mo le faamoemoe i le ola e faavavau lea o le a fai mo a’u i le olaga a sau pe afai ou te tumau i le faatuatua ma le faamaoni e oo i le iuga.⁶

Ata

Jesus Christ standing on a mountainside. A group of men are seated in a circle around Him. Christ is offering the Lord's Prayer. Jerusalem is visible in the background.

O le tulafono lenei mo tagata o le Ekalesia, i upu a le Faaola: “O le ua ia te ia au poloaiga, ma tausi iai, o ia lea e alofa mai ia te au. …” (Ioane 14:21.) Ma lenei foi, na fetalai le Faaola: “Afai tou te alolofa mai ia te au, tausi i au poloaiga.” (Ioane 14:15.) …

Sa le i faia lava e le Faaola se agasala pe tauave se manatu faiifo e faaletonu. Sa lēi tatau ia te ia ona salamo e faapei o oe ma au; ae o nisi o tulaga ou te le malamalama i ai, sa ia tauave le mamafa o a tatou soligatulafono. … Sa Ia afio mai ma ofo mai o ia lava o se taulaga e totogi ai le aitalafu a i tatou taitoatasi o e naunau e salamo i ana agasala ma toe foi atu ia te Ia ma tausia ana poloaiga. Ia mafaufau i ai, pe a mafai. Sa tauave e le Faaola le avega i se auala e le oo i ai lo tatou malamalama. Ou te iloa lena mea, aua ua ou talia lana upu. Ua ia tau mai ia i tatou puapuaga na oo ia te ia; o puapuaga matautia sa ia ole atu ai i lona Tama pe a finagalo i ai ia aveese lenei ipu oona: “… ae ui i lea aua nei faia lo’u loto, a o lou finagalo.” (Luka 22:42.) O le tali na ia maua mai lona Tama e faapea, “E tatau ona e inu i ai.”

Pe mafai ea ona muta lo’u alofa ia te ia? Leai, ou te le mafai. Pe e te alofa ia te ia? Afai o lea, ona tausi lea o ana poloaiga.⁷

Afai tatou te le mulimuli i poloaiga na tuuina mai e le Alii e taialaina ai i tatou, o lona uiga e leai sa tatou aia i ana faamanuiaga.⁸

O le a se aoga ia i tatou e ole atu ai i le Alii, pe afai e leai so tatou faamoemoe e tausi i Ana poloaiga? O na ituaiga o tatalo ua na o se faataitaiga e leai se uiga o le amio e tatau ai i luma o le nofoalii o le alofa tunoa. E faapefea ona tatou manatu ane e maua se tali manaomia pe afai o le tulaga lea? “Ia outou saili ia Ieova manu o mafai ona maua o ia, ia outou valaau ia te ia manu o latalata mai o ia: Ia lafoai e le ua amioleaga lona ala, ma le tagata agasala ia lafoai e ia ona manatu: a ia foi mai i le Alii, ona alofa mai lea o ia ia te ia; ma ia foi mai i lo tatou Atua, aua na te matua faamagaloina.” Sa fai mai ai Isaia (Isaia 55:6–7). Ae pe le faalatalata mai pea ea le Alii pe a tatou ole atu ia te Ia? E moni e leai! Ua Ia fetalai mai, “Sa gese ona latou faalogo i le siufofoga ole Alii lo latou Atua; o lea, ua gese ai ona faafofoga mai o le Alii lo latou Atua ia latou tatalo, e tali mai i latou i le aso o lo latou faalavelave. I le aso o lo latou filemu sa latou manatu māmā ai i latou i la’u fautuaga; ae, i le aso o lo latou faalavelave, ua latou tautagotago a’u ona ua tatau ai” [MF&F 101:7–8]. Afai tatou te faalatalata atu ia te Ia, o le a faalatalata mai o Ia ia te i tatou, ma o le a le tuulafoaiina i tatou; ae afai tatou te le faalatalata atu ia te Ia, o le a leai se folafolaga o le a Ia tali mai i o tatou fouvalega.⁹

Tatou te le mafai ona tatalo atu i le Alii ma faapea atu: “Faalogo mai i lo matou faamoemoega, ia matou maua le manumalo, fai le mea matou te mananao e te faia, ae aua nei fai mai matou te faia le mea tou te mananao matou te faia.”¹⁰

E ao ia i tatou ona tatou savavali i le malamalama atoa o le upumoni, ae le na o se vaega o le upumoni. E le o ia te au le faitalia e faatuatuanai ai nisi o mataupu faavae o le talalelei ae talitonu i isi, ma lagona ai ua ia te au le aia tatau i faamanuiaga atoatoa o le faaolataga ma le faaeaina i le malo o le Atua. Afai tatou te manaomia le faaeaga, afai tatou te manaomia le nofoaga ua saunia e le Alii mo e faamaoni ma amiotonu, e ao ona tatou naunau e savavali i le malamalama atoatoa o le talalelei a Iesu Keriso, ma tausia poloaiga uma. Tatou le mafai ona faapea o nisi o i latou e iti ma e leai so latou taua ma o le a le popole i ai le Alii pe afai tatou te solia. Ua poloaiina i tatou e ola i upu uma ua tulei mai ai le fofoga o le Atua [tagai Teuteronome 8:3; MF&F 98:11]. “Aisea e valaau mai ai ia te au le Alii e, le Alii e,” sa ia fetalai mai ai, “ae le faia mea ou te fai atu ai?” [Tagai Luka 6:46.]¹¹

Ata

A father sitting on a sofa as he reads from the scriptures to two young boys and an infant held on his lap.

Ua finagalo le Alii tatou te talitonu ia te ia, ia talia lana talalelei e faavavau, ma ola ai i le agaga autasi e tusa ai ma ana faatulagaga ma tuutuuga. E le o so tatou tofi le filifili ma usiusitai i mataupu faavae tatou te fiafia i ai ae faagalo uma isi. E le o sa tatou matafaioi le filifili faapea o nisi o mataupu faavae ua le toe aoga i o tatou tulaga faaagafesootai ma faaleaganuu.

O tulafono a le Alii e faavavau, ma ua ia te i tatou le atoaga o lana talalelei e faavavau ma ua avea ma o tatou tiute le talitonu i ana tulafono uma ma le upumoni ma savavali tonu ai. E leai se mea sili atu ona taua i soo se tasi nai lo le tausia o poloaiga a le Alii. Ua ia finagalo tatou te pipii atu i mataupu faavae moni uma, ina ia faamuamua i o tatou olaga mea o lona malo, ina ia fetuleni atu i luma ma le filiga ia Keriso, ma auauna ia te ia i o tatou loto, manatu, ma le malosi atoa. I le gagana faatusitusiga paia, i na tatou faalogo ia i le iuga o ia mea uma: “Ia e matau i le Atua, ma e anaana i ana poloaiga: aua o mea ia e tatau i tagata uma.” (Failauga. 12:13.)¹²

E masani ona ou mafaufau, ou te manatu e faapea foi oe, i lena saunoaga matagofie— se lauga aupito sili na folafolaina, e tusa ai ma lo tatou iloa—ua tatou ta’ua o le Lauga i luga o le Mauga. … Afai tatou te usitaia na aoaoga, o le a mafai ona tatou toe foi atu i le afioaga o le Atua, le Tama, ma Lona Alo o Iesu Keriso.

E masani ona ou mafaufau pea i lena mea, o le aotelega o ana aoaoga:

“O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.” [Mataio 5:48.] …

… Ou te talitonu i le uiga o le mea na fetalai i ai le Alii, ina ia atoatoa ona lelei o la tatou amio, e faapei o lo tatou Tama i le Lagi e atoatoa ona lelei o ia. E le mafai ona atoatoa i le taimi e tasi ae o le a tuuina atu i lea fuaiupu i lea fuaiupu ma lea mataupu i lea mataupu, o lea faataitaiga ma lea faataitaiga, ma o le a le gata ai i le taimi o tatou ola ai i lenei olaga, ae tatou te oo atu lava i talaatu o le tuugamau ae tatou te le i taunuu i le atoatoaga ma avea ai faapei o le Atua.

Ae o lenei ua tatou faataoto le faavae. O iinei tatou te aoao ai nei upumoni faigofie o le Talalelei a Iesu Keriso, i lenei olaga faataitai, e saunia ai i tatou mo lena atoatoaga. O lo’u tiute, o lou tiute, ia sili atu ona lelei i le aso nai lo le tulaga sa ou i ai ananafi, ma ia sili ae foi oe i le aso nai lo le tulaga sa e i ai ananafi, ma sili ae foi taeao nai lo le tulaga sa e i ai i le aso. Aisea? Aua o loo tatou i ai i lena ala, afai tatou te tausia poloaiga a le Alii, ua tatou i ai i lena ala o le atoatoaga, ma e mafai e ala i le usiusitai ma le naunautaiga o o tatou loto ina ia faatoilaloina le lalolagi. …

… Afai ua iai se mea ua tatou toilalo ai, afai ua i ai se mea ua tatou vaivai ai, o iina e tatau ona ave i ai le faamuamua, ma le naunautaiga ina ia faaleleia, seia tatou maua ma manumalo ai. Afai e lagona e se tama le faigata ona ia totogi lana sefuluai, o lona uiga o le mea lena e tatau ona ia faia, seia ona ia aoao e totogi lana sefuluai. Afai o le Upu o le Poto, o le mea lena e tatau ona ia fai, seia oo ina ia aoao e fiafia i lena poloaiga.¹³

Ina ia faafiafiaina [le Alii], ia le na o lo tatou tapuai ia te ia i le agaga faafetai ma le faamanu, ae ia tuuina atu le usiusitai ma le naunautai i ana poloaiga. O le faia o lea, o le a mautinoa ai le liligi mai o ana faamanuiaga; aua o lenei mataupu faavae (usiusitai i tulafono) e autu i ai faamanuiaga uma lava [tagai MF&F 130:20–21].¹⁴

Na tuuina mai e le Atua ia i tatou [poloaiga] ina ia tatou latalata atili atu ai ia te Ia ma ia atiina ae ma faamalosia i le faatuatua. E leai se poloaiga, i soo se taimi lava, ua Ia aumai ai se mea e le mo lo tatou faamafanafanaina ma faamanuiaga. Ua le aumaia e tau ina faafiafiaina ai le Alii, ae ia faaleleia ai i tatou o ni alii ma ni tamaitai, ma agavaa ai mo le faaolataga ma le faaeaga i Lona malo.¹⁵

Afai tatou te malaga atu i le malumalu e sii o tatou lima ma osi feagaiga o le a tatou auauna i le Alii ma tausia ana poloaiga ma tausia i tatou ma le mama mai lenei lalolagi. Afai la tatou te malamalama i le mea ua tatou faia, ona avea lea o le faaeega paia o se puipuiga ia i tatou i o tatou olaga atoa— o se puipuiga e le maua e se tagata e le alu i le mamalu

Na ou faalogo i lou tama o fai mai faapea, i le itula o tofotofoga, i le itula o faaosoosoga, na te mafaufau ai i folafolaga, o feagaiga sa ia faia i le Maota o le Alii, sa avea ma puipuiga mo ia. … O lenei puipuiga o le aoga lena o nei sauniga, i se vaega. Ua latou faasaoina i tatou i le taimi nei ma e faaeaina ai i tatou i se taimi o mulimuli mai, pe afai tatou te faamamaluina. Ou te iloa ua tuuina mai lenei puipuiga aua ua ou iloaina foi, e faapei foi o le afe o isi ua manatua a latou matafaioi.¹⁶

Ata

Daytime exterior photo of the Tampico Mexico Temple.

O le a foai mai e le Alii ia i tatou meaalofa. O le a ia faamalamalamaina o tatou mafaufau. O le a ia aumai ia i tatou le poto e tafi ese ai faigata uma ae faapaegamalie i tatou ma poloaiga na ia tuuina mai ia i tatou; o le a ia aumai ia i tatou le atamai e mauaa loloto i o tatou agaga ma e le mafai lava ona aveesea, pe afai lava tatou te saili mo le malamalama ma le upumoni ma le malamalama ua folafola mai ia i tatou ma e mafai ona tatou maua pe afai lava tatou te faamaoni ma faatuatua i feagaiga ma matafaioi uma e faatatau i le talalelei a Iesu Keriso. ¹⁷

O le folafolaga sili ua faia i tagata o lenei Ekalesia o e naunau e usitaia le tulafono ma tausia poloaiga a le Alii e faapea e le gata o le a i ai so latou nofoaga i le malo o le Atua, ae o le a latou i ai foi i le afioaga o le Tama ma le Alo; ma e le na o le pau lea, aua ua poloai le Alii o mea uma ua ia te ia o le a foaiina atu ia i latou [tagai MF&F 84:33–39].¹⁸

O le usiusitai i ia poloaiga ua faatulagaina i le Talalelei a Iesu Keriso, ma le ola tutumau ai pea, o le a tatou maua ai le tino ola pea, mamalu, ola e faavavau, ma ola ai i le afioaga o le Atua ma lona Alo o Iesu Keriso, i le mea o le a tatou iloa moni ai i laua.¹⁹

Afai tatou te savavali i ala o le amiomama ma le paia, o le a liligi mai e le Alii ana faamanuiaga i o tatou luga i se tulaga tatou te manatu e le mafai. O le a tatou i ai i galuega uma, e pei ona faamatala mai e Peteru, “o se tupulaga filifilia, o le perisitua paia, o le nuu paia, o tagata filifilia.” (1 Pete. 2:9.) Ma o le a avea i tatou ma tagata filifilia aua o le a le faapei i tatou o isi tagata o e le ola ai i nei tulaga faatonuina. …

I le avea ai o ni auauna a le Alii, o lo tatou faamoemoe o le savavali i le ala ua ia faataatia mo i tatou. E le gata ina tatou mananao e fai ma tautala i mea e fiafia i ai o ia, ae tatou te saili e ola ina ia pei o tatou olaga o lona soifua.

O Ia lava na avea o se faataitaiga atoatoa mo i tatou i mea uma ma sa fetalai mai ia i tatou e faapea: “Mulimuli mai ia te au.” I ona soo Sa Nifae sa ia fesili: “… pe faapefea la outou amio e tatau ai?” ona ia tali lea: “E moni ou te fai atu ia te outou, e pei lava o au nei.” (3 Nifae. 27:27.)

O lenei ua tatou punouai i le galuega silisili i le lalolagi. O lenei perisitua ua tatou maua o le pule ma le mana o le Alii lava ia; ma ua ia folafola mai ia i tatou afai e faalauteleina o tatou valaauga ma savavali i le malamalama, e pei ona i ai o ia i le malamalama, o le a tatou maua le mamalu male viiga faatasi ma ia e faavavau i le malo o lona Tama.

E tusa ai ma lenei faamoemoe maualuga i o tatou luma, pe mafai ea ona tatou faia se mea e itiiti ifo nai lo le lafoaia o ala faatiapolo a le lalolagi? Pe tatou te le faamuamua ea i o tatou olaga mea o le malo o le Atua? Pe tatou te le saili ea e ola i upu uma ua tulei mai i lona fofoga?²⁰

Ou te molimau atu ua fetalai mai le Alii i o tatou aso; o lana savali o le savali o le faamoemoe ma le olioli ma le olataga; ma ou te folafola atu ia te outou pe afai tou te savavali i le malamalama o le lagi, faamaoni i o outou talitonuga, ma tausi i poloaiga, o le a ia te outou le filemu ma le olioli i lenei lalolagi ma le ola e faavavau i le lalolagi a sau.²¹

Tausi i poloaiga. Savavali i le malamalama. Tumau e oo i le iuga. Faamaoni i feagaiga uma ma matafaioi, ma o le a faamanuia oe e le Alii e sili atu i lo au miti e te aupito faananau i ai.²²

• Iloilo le faamatalaga i le faaiuga o le “Mai le Soifuaga o Iosefa Filitia Samita.” Aisea e suia ai o tatou lagona e uiga i le talalelei pe a tatou taumafai e tausia poloaiga?

• O a mea ua e aoao mai i fuaitau o mau o loo sii mai le vaega 1?

• E faapefea ona avea lo tatou usiusitai i poloaiga o se faailoga e faaali atu ai le alofa mo Iesu Keriso? E faapefea ona avea lenei mea ma faailoga e faaali atu ai le faafetai mo Lana taulaga togiola? E faapefea ona avea o se faailoga o lou tapuai atu? (Tagai vaega 2.)

• Manatunatu i aoaoga i le vaega 3. Aisea e sese ai le manatu e faamanuia i tatou e le Alii pe afai tatou te le o taumafai e usiusitai?

• E faapefea ona fesoasoani ia te oe le iloa e le tatau ona e manatu e atoatoa oe i le taimi e tasi pe faapena foi i lenei olaga (Tagai i le vaega 4). Mafaufau i mea e mafai ona e fai i aso taitasi, ma le fesoasoani a le Alii, e tumau ai “i lena ala i le atoatoaga.”

• I le vaega 5, na lisi ai e Peresitene Samita e le itiiti ifo i le 10 auala e faamanuia ai i tatou e le Alii pe a tatou tausia poloaiga. O a ni mea e mafai ona e faasoa mai sa e maua ai nisi o nei faamanuiaga?

Mataio 4:4; 2 Nifae 31:19–20; Ominae 1:26; MF&F 11:20; 82:8–10; 93:1; 130:20–21; 138:1–4

“Fesili atu i e o auai e faasoa mai mea sa latou aoaoina mai a latou suesuega faale-tagata lava ia o le mataupu. Atonu e fesoasoani pe afai e faafesootai ni nai tagata i le gasologa o le vaiaso ma fai i ai e sauni mai e faasoa mea sa latou aoaoina” (mai le itulau ix i le tusi lenei).