24. Capernaum
Capernaum, wɔ Galilee Po no mpoano etsifi, hɔ yɛ Jesus ne Galilee ɔsomdwuma bea no ne finimfin (Matt. 9:1–2; Mark 2:1–5). Hɔ yɛ bea a no ho hia na woyi nam ara yie wɔ na ɔyɛ guadzibea, hɔ yɛ Amanamamfo nye Jewfo so fie. Mfe ɔha a odzi kan wɔ Christ N’Awoo Ekyir no dɔm a wɔtse hɔ no ammbor nyimpa 1,000. Capernaum da eguadzifo hɔn akwan no nkwanta do, a asaase a etwa ho ehyia no yɛ asaaseber. Romefo nsordaafo sisii eguaree na mbea a wɔdze ndzɛmba sie wɔ ha. Etumdze pii a ɔyɛɛ wɔ ha nyina ekyir no, nkorɔfo no poow Agyenkwa no somdwuma no. Dɛm ntsi, Jesus paa kuropɔn no (Matt. 11:20, 23–24). Mber guu mu no, Capernaum dwuruwii guu famu na obesi aber yi nyimpa nntse do.
Dza Osisii Tsitsir: Nna wonyim Capernaum dɛ ɔyɛ Agyenkwa “nankasa No kurow mu” (Matt. 9:1–2; Mark 2:1–5). Ɔyɛɛ etumdzi pii wɔ bea yi do. Mfatoho bi nye, Ɔsaa nkorɔfo pii yarba (Mark 1:32–34), a ɔhamupanyin bi n’akowaa (Luke 7:1–10), Peter n’asew (Mark 1:21, 29–31), mbubuinyi a wɔdze ne kɛtɛ duaa dan etsifi sii famu (Mark 2:1–12), na banyin bi no a ne nsa adwe (Matt. 12:9–13) kã ho. Ha so na Jesus paam esunsum bɔn pii no (Mark 1:21–28, 32–34), Onyaan Jairus ne babaa no fiir owu mu (Matt. 9:18–19, 23–26; Mark 5:22–24, 35–43), na Ɔmaa nkwa-panoo nkyerɛkyerɛ no wɔ Capernaum nhyiamudan mu (John 6:24–59). Agyenkwa no see Peter dɛ ɔnkɔ Galilee Po mu nkɛfa nam, mbue n’ano, nhwehwɛ dwetɛbona a ɔdze botua no tow (Matt. 17:24–27).