31. Ephesus
Greek ɔyɛkyerɛbea a ɔwɔ Ephesus a wodwuruwii guu famu no, bea a Ɔsomafo Paul kãa asɛmpa wɔ. Ahyɛmu Fofor mber do no, Ephesus bɛyɛɛ atsenkã wɔ wiadze nyina mu osian ne temple fɛfɛw a wosii dze hyɛɛ Romefo hɔn nyamebaa Artemis enyimnyam ntsi. Sesei oedwuruw egu famu, nna nkyɛ Ephesus yɛ Romefo hɔn Asia mansin mu no ahenkurow na eguadzibea kɛse. Dwetɛ-edwimfo no a wɔwɔ kuropɔn no mu no tɔɔn Artemis no honyin na iyi maa eguadzi no bɛyɛɛ prɔmprɔm.
Dza Osisii Tsitsir: Ɔsomafo Paul kɛseraa Ephesus ber a n’asɛmpasomafo akwantu a otsĩa ebien reba ewiei no (Ndwu. 18:18–19). N’akwantu a otsia ebiasa no ɔtsenaa kuropɔn no mu mfe ebien. Wɔhyɛɛ no ma ofii hɔ osian basabasayɛ a dwetɛ-edwimfo no maa osii hɔ no, ber a Paul kasaa tsiaa nyamebaa ɔtorfo Artemis no som no ntsi, iyi maa nna hɔn guadzi no resɛɛ (Ndwu. 19:1, 10, 23–41; 20:1). Ephesus ɔyɛkyerɛbea no nye dza ɔyɛ kɛse koraa wɔ dza Greekfo no esi pɛn, na hɔ nye bea a Paul na ne mfɛfo no hyiaa basabasayɛfo dɔm no (Ndwu. 19:29–31). Paul kyerɛɛw nwoma kɛmaa Asɔrmba a wɔwɔ Ephesus ber a ɔwɔ ndɔmmum mu wɔ Rome no. Asɔr a ɔwɔ Asia no nkorbata esuon a ɔwɔ hɔ no no mu kor no a wɔkyerɛɛw Nyikyerɛ nwoma no kɛmaa no wɔ Ephesus (Nyi. 1:10–11; 2:1).