1 Na em bai kamap we, sapos ol lain bilong Jentail bai harim long Pikinini Sipsip bilong God long dispela de, we em bai soim em yet long ol long toktok na tu wantaim pawa na pasin long rausim ol samting i save mekim ol man pundaun—

2 Na i no kamapim belhat long ol birua wantaim Pikinini Sipsip bilong God, ol bai kaunim wantaim lain pikinini bilong papa bilong yu, ye, ol bai kaunim wantaim haus bilong Israel, na ol bai kamap wanpela gutpela pipol tru long graun bilong promis long oltaim, na ol bai i no moa kalabus, na haus bilong Israel bai ol i no inap daunim moa.

3 Na dispela bikpela hul tru, em dispela bikpela na nogut na giaman sios tru i bin dikim long ol, em tewel wantaim ol lain pikinini bilong em ol i bin kirapim, olsem em bai lidim ol sol bilong ol man i go daun long hel—ye, dispela bikpela hul tru ol i bin dikim long bagarapim ol man bai pulumapim wantaim ol lain ol i bin dikim em, long bagarapim olgeta, Pikinini Sipsip bilong God i tok, i no long bagarapim sol, tasol long tromoi sol i go insait long dispela hel i nogat arere.

4 Long wanem, lukim, dispela i olsem long kalabus pasin bilong tewel, na tu olsem long stretpela pasin bilong God, long olgeta husat lain bai wokim nogut pasin na pasin nogut tru long ai bilong God.

5 Na em i kamap we ensel i tokim mi, Nifai, olsem: Yu bin lukim olsem, sapos ol lain bilong Jentail tanim bel, em bai gutpela long ol, na tu yu save long ol promis bilong Bikpela long haus bilong Israel, na tu yu harim olsem husat man i no tanim bel mas idai.

6 Olsem, na, wo long ol lain bilong Jentail sapos ol kamapim belhat na birua wantaim Pikinini Sipsip bilong God.

7 Long wanem, taim bai kam, Pikinini Sipsip bilong God i tok, we mi bai wokim wanpela bikpela na naispela wok tru namel long ol lain pikinini bilong man, wanpela wok em bai i stap oltaim oltaim, long wanpela han o long narapela—long mekim ol bilip long bel isi na laip oltaim, o long mekim ol long kamapim belhat na kamapim pasin ai pas long tingting bilong ol na karim ol i go daun long kalabus, na tu long bagarap, long skin na tu long spirit, olsem long kalabus pasin bilong tewel, long em mi bin autim.

8 Na em i kamap we bihain ensel i bin autim ol dispela toktok, em i askim mi: Yu tingim ol promis bilong Papa long haus bilong Israel? Mi bekim em, Ye.

9 Na em i kamap we em i tokim mi: Lukluk, na lukim dispela bikpela na nogut na giaman sios tru, em i mama bilong nogut na giaman pasin, em tewel i bin kirapim.

10 Na em i tokim mi: Lukim, i gat tupela sios tasol, wanpela i sios bilong Pikinini Sipsip bilong God, na narapela i sios bilong tewel, olsem na, ol lain ol i no memba long sios bilong Pikinini Sipsip bilong God i memba long dispela bikpela sios tru, em i mama bilong ol nogut na giaman tru pasin, na em i pamuk meri bilong olgeta graun.

11 Na em i kamap we mi lukluk na lukim pamuk meri bilong olgeta graun, na em i sindaun antap long planti solwara, na em i bosim olgeta graun, namel long olgeta nesen, olgeta hauslain, olgeta tok ples na olgeta pipol.

12 Na em i kamap we mi bin lukim sios bilong Pikinini Sipsip bilong God, na namba bilong em i liklik, bikos long pasin nogut na nogut na giaman pasin bilong pamuk meri em i sindaun antap long planti solwara, tasol, mi lukim olsem sios bilong Pikinini Sipsip, em i ol seint bilong God, ol i bin kamap long olgeta pes bilong graun, na pawa bilong bosim olgeta pes bilong graun i liklik, bikos long ol pasin nogut bilong dispela bikpela pamuk meri em mi bin lukim.

13 Na em i kamap we mi bin lukim dispela bikpela mama tru bilong giaman na nogut pasin tru, em i bungim planti pipol long pes bilong olgeta graun, namel long olgeta nesen na ol lain bilong Jentail, long pait wantaim Pikinini Sipsip bilong God.

14 Na em i kamap we mi, Nifai, bin lukim pawa bilong Pikinini Sipsip bilong God, olsem em kamdaun long ol seint long sios bilong Pikinini Sipsip, na long ol pipol bilong promis bilong Bikpela, ol i bin go nabaut long olgeta pes bilong graun, na ol i bin kamap wantaim stretpela pasin na wantaim pawa bilong God long bikpela glori.

15 Na em i kamap we mi bin lukim olsem belhat bilong God i bin kapsaitim long dispela bikpela na nogut na giaman sios tru, inap long bai gat bikpela pait na wintok bilong ol bikpela pait i bin kamap namel long olgeta nesen, na hauslain bilong graun.

16 Na taim ol bikpela pait na wintok long pait i stat long kamap namel long olgeta nesen ol i stap wantaim mama bilong ol nogut na giaman pasin tru, ensel i bin tokim mi, olsem: Lukim, belhat bilong God kamap long mama bilong ol pamuk meri, olsem na yu lukim olgeta dispela samting—

17 Na taim de i kam we God bai kapsaitim belhat bilong em long mama bilong ol pamuk meri, em i bikpela na nogut na giaman sios tru bilong olgeta graun, husat tewel i kirapim, bihain long dispela, de, wok bilong Papa bai i stat, long redim rot long mekim kamap tru ol promis bilong em, em i bin wokim wantaim ol pipol bilong em na em i haus bilong Israel.

18 Na em i kamap we ensel i bin tokim mi, olsem: Lukim!

19 Na mi lukaut na lukim wanpela man, na em i bin pasim waitpela klos.

20 Na ensel i tokim mi: Lukim wanpela long ol wanpela ten tu aposel bilong Pikinini Sipsip.

21 Lukim, em bai lukim na raitim hap tok bilong ol dispela samting, ye, na tu em bai lukim na raitim planti samting em i bin kamap pinis.

22 Na tu, em bai rait long wanem samting bai kamap long arere bilong graun.

23 Olsem na, ol samting em bai raitim i stret na tru, na lukim ol samting i bin raitim long buk yu lukim i bin kamaut long maus bilong wanpela lain bilong Juda, o long dispela taim buk bai kamaut long maus bilong wanpela lain bilong Juda, ol samting em i bin raitim bai kamap klia na klin tru, na dia tumas na isi long ol man ken save.

24 Na lukim, ol samting dispela aposel bilong Pikinini Sipsip bai raitim i planti olsem yu bin lukim, na yu bai lukim hap tok i stap yet.

25 Tasol yu no inap raitim ol samting yu bai lukim bihain long dispela, long wanem, God Bikpela i bin odenim aposel bilong Pikinini Sipsip bilong God long raitim ol.

26 Na tu God i bin soim olgeta samting long ol narapela lain em ol i bin kam bipo, na ol i bin raitim ol samting na pasim long em mas kamaut klin tru olsem long trupela toktok i stap insait long Pikinini Sipsip, long taim stret bilong Bikpela, na go long haus bilong Israel.

27 Na mi, Nifai, i bin harim na witnesim, olsem nem bilong aposel bilong Pikinini Sipsip i Jon, olsem ensel i bin tok.

28 Na lukim, mi, Nifai, i bin tambu long raitim hap tok i stap yet long ol samting mi bin lukim na harim, olsem na ol samting mi raitim i inap long mi, na mi raitim liklik hap tok tasol long ol samting mi bin lukim.

29 Na mi witnesim olsem ensel bilong Bikpela i bin soim long mi ol samting papa bilong mi i bin lukim.

30 Na nau mi pinisim toktok long ol samting mi bin lukim, taim mi bin i go long spirit, na sapos olgeta samting mi lukim ol i no bin raitim, em bai ol samting mi bin raitim i tru. Na em i olsem. Amen.