Sapta 7
Ol pikinini man bilong Lihai i bin go bek long Jerusalem na askim Ismael wantaim famili bilong em long bung wantaim ol long wokabaut bilong ol—Leman wantaim ol narapela lain i no harim tok—Nifai i strongim gutpela tok long ol brata bilong em long bilip long Bikpela—Ol pasim em wantaim rop na pasim toktok long bagarapim em—Em i kamap fri wantaim pawa bilong bilip—Ol brata bilong em askim em long fogivim ol—Lihai wantaim lain bilong em givim ofa na kukim ofa. Klostu 600–592 krismas bipo Krais.
1 Na nau mi laikim olsem yu bai save, olsem bihain papa bilong mi, Lihai, i bin pinisim profesai long ol pikinini bilong em, em i kamap we Bikpela i bin tok long em gen, olsem, em i no gutpela long em, Lihai, long kisim famili bilong em tasol na go long ples we nogat man i stap, tasol, olsem ol pikinini man bilong em mas kisim ol pikinini meri, long marit, long kamapim ol pikinini bilong Bikpela long graun em i bin promisim ol.
2 Na em i kamap we Bikpela em i bin tokim em olsem, mi Nifai wantaim ol brata bilong mi mas go bek gen long graun bilong Jerusalem, na kisim kamdaun Ismael wantaim famili bilong em long ples we nogat man i stap.
3 Na em i kamap we mi, Nifai, gen wantaim ol brata bilong mi i bin go long ples we nogat man i stap long go antap long Jerusalem.
4 Na em i kamap we mipela i bin go antap long haus bilong Ismael, na winim bel bilong Ismael na mipela i bin autim ol toktok bilong Bikpela.
5 Na em i kamap we, Bikpela i bin mekim bel bilong Ismael wantaim famili bilong em long kamap isi, inap long ol; bihainim mipela long wokabaut i go daun long ples we i nogat man i stap long haus sel bilong papa bilong mipela.
6 Na em i kamap we taim mipela wokabaut long ples we nogat man i stap, lukim, Leman wantaim Lemuel, na ol tupela pikinini meri bilong Ismael, na ol tupela pikinini man bilong Ismael wantaim famili bilong ol, ol i bin sakim tok long mipela, ye, long mi Nifai, na Sem, na papa bilong ol, Ismael, na meri bilong em, wantaim ol tripela pikinini meri bilong em.
7 Na em i kamap we, ol i bin sakim tok long go bek long graun bilong Jerusalem.
8 Na nau mi, Nifai i bin sore nogut tru bikos ol i bin kamapim belhat bilong ol olsem na mi bin toktok long ol, ye, tru tumas long Leman na Lemuel olsem: Lukim yu tupela i nambawan brata bilong mi, olsem wanem na bel bilong yupela i hat tumas na tingting bilong yupela i pas tumas, inap long yupela nidim mi yangpela brata bilong yupela, olsem mi mas toktok long yupela, ye, na soim eksampel long yupela?
9 Bilong wanem yupela i no harim toktok bilong Bikpela?
10 Bilong wanem yupela lus tingting olsem yupela i bin lukim wanpela ensel bilong Bikpela?
11 Ye, na bilong wanem yupela lus tingting long wanem bikpela ol samting Bikpela i bin wokim long yumi, long seivim yumi long han bilong Leban na tu olsem yumi bai kisim rekot?
12 Ye, na bilong wanem yupela lus tingting olsem Bikpela ken wokim olgeta samting, long laik bilong em long lain pikinini bilong ol man, sapos ol i bilip long em? Olsem na yumi mas gat bilip long em.
13 Na sapos yumi bilip long em, yumi bai kisim graun em bin promis long yumi, na yupela bai save long sampela taim bihain olsem toktok bilong Bikpela, olsem Jerusalem bai bagarap em bai kamap tru, bikos olgeta samting Bikpela i bin tokaut long bagarapim Jerusalem em i mas kamap tru.
14 Long wanem, lukim, Spirit bilong Bikpela em bai klostu pinis long i stap wantaim ol, bikos lukim, ol bin les long ol profet na ol i bin tromoi Jeremaia long kalabus. Na ol i bin traim long kilim papa bilong mi, i go inap ol i bin ronim em go aut long graun.
15 Nau lukim, mi tokim yupela olsem sapos yupela go bek long Jerusalem, yupela tu bai i dai wantaim ol. Na nau sapos yupela laik, go antap long Jerusalem na tingim long ol toktok em mi bin tokim yupela, olsem, sapos yupela go, yupela tu bai i dai, long wanem, Spirit bilong Bikpela i tokim mi long tok olsem.
16 Na em i kamap we taim mi, Nifai autim ol dispela toktok long ol brata bilong mi, ol i bin belhat wantaim mi. Na em i kamap we ol i bin kisim mi, bikos lukim, ol i bin belhat nogut tru, na pasim mi wantaim ol rop, long wanem, ol i bin traim long kilim mi, olsem ol bai lusim mi long ples we nogat man i stap long ol animal long bus long kaikai mi.
17 Tasol, em i kamap we mi bin beten long Bikpela olsem: O, Bikpela, olsem long bilip bilong mi long yu inap yu seivim mi long han bilong ol brata bilong mi, ye, tru tumas, givim mi strong olsem mi bai brukim ol rop ol i pasim mi wantaim.
18 Na em i kamap we taim mi autim ol dispela toktok, lukim, ol rop i bin slek long ol han na lek bilong mi, na mi sanap long pes long ol brata bilong mi, na mi toktok long ol gen.
19 Na em i kamap we ol i bin belhat wantaim mi gen, na traim long kisim mi, tasol lukim, wanpela pikinini meri bilong Ismael ye, wantaim mama bilong em na wanpela pikinini man bilong Ismael, ol i bin askim gut tru yet long ol brata bilong mi, inap long mekim bel bilong ol kamap isi, olsem na ol i pinis long traim long kisim laip bilong mi.
20 Na em i kamap we ol brata bilong mi ol i bin sore nogut tru, bikos long pasin nogut bilong ol, inap long ol i bin bau daun long pes bilong mi, na askim gut tru yet olsem mi bai fogivim ol long samting ol i bin wokim long mi.
21 Na em i kamap we mi bin fogivim olgeta stret long olgeta pasin ol i bin wokim, na mi bin givim strongpela gutpela toktok long ol, olsem ol i mas beten long Bikpela, na God bilong ol bai fogivim ol. Na em i kamap we ol i bin wokim olsem. Na bihain ol i beten pinis long Bikpela, mipela i stat wokabaut gen i go long hap bilong haus sel bilong papa bilong mipela.
22 Na em i kamap we mipela i bin kamdaun long haus sel bilong papa bilong mi. Na bihain mi wantaim ol brata bilong mi na Ismael wantaim famili bilong em kamdaun long haus sel bilong papa bilong mi, na ol i bin givim tok tenkyu long Bikpela, God bilong ol na ol i givim ofa na kukim ofa long em.