1 Ndien edikem ete ami, Nephi, ke ema eke emen mi ewɔrɔ ke Spirit, ndien nkut kpukpru ŋkpɔ emi, ami mfiak nyɔŋ tent ete mi.

2 Ndien edikem ete ami nkut nditɔ eka mi iren, ndien mmɔ ekeneni ye kiet eken ke abaŋa mme ŋkpɔ emi ete mi eke etiŋde ɔnɔ mmɔ.

3 Koro enye ke akpanikɔ ama etiŋ ediwak akamba ŋkpɔ ɔnɔ mmɔ, emi ekesɔŋde ndidiɔŋɔ, ibɔhɔke owo obup oto Jehovah; ndien mmɔ sia esɔŋde ke esit mmɔ, ke ntak oro mmɔ ikibereke edem ke Jehovah nte mmɔ ekpe enade nte.

4 Ndien idaha emi ami, Nephi, mma mfuhɔ ke ntak isɔŋ esit mmɔ, ndien nko, ke ntak mme ŋkpɔ emi ami nkekutde, nyuŋ mfiɔk ete ke ana mmɔ edi ewɔrɔ esu owo ikanke inyaŋa ke ntak akamba ibak nditɔ owo.

5 Ndien edikem ete idem emem mi ke ntak mme ukut mi, koro ami nkekere nte ke mme ukut mi okpon akan kpukpru, ke ntak nsobo mme owo mi, koro ami mma nkut iduɔ mmɔ.

6 Ndien edikem ete ke ini mma nkefiak nyene odudu ami ntiŋ ye nditɔ eka mi iren, nyene udɔŋ ndifiɔk nto mmɔ ntak mme efaŋa mmɔ.

7 Ndien mmɔ edɔhɔ ete: Sese, iŋwaŋake nnyin mme ikɔ emi ete nnyin eketiŋde abaŋa ŋkɔk eto olive nte obot edide, ndien nko ke abaŋa mme Gentile.

8 Ndien ami ndɔhɔ mmɔ nte: Ndi mbufo eme ebup Jehovah?

9 Ndien mmɔ edɔhɔ mi ete: Nnyin ibupke, koro Jehovah inamke nnyin ifiɔk utɔ ŋkpɔ ntre.

10 Sese, ami ndɔhɔ mmɔ nte: Ntak emi mbufo minimke ibet Jehovah? Ntak emi mbufo editakde, ke ntak isɔŋ esit mbufo?

11 Ndi mbufo itihi mme ŋkpɔ emi Jehovah eke etiŋde ete?—Edieke mbufo midisɔŋke esit mbufo, ndien ebeŋe mi ke akpanikɔ, enim ete mbufo eye ebɔ, ye nsin ifik ke ndinim mme mbet mi, ke akpanikɔ eyenam mbufo efiɔk mme ŋkpɔ emi.

12 Sese, ami ndɔhɔ mbufo, nte ke ekedomo ufɔk Israel ye eto olive, oto ke Spirit Jehovah emi eke odude ke ete nnyin; ndien sese nte owo ibuŋke nnyin isio ikpɔŋ ufɔk Israel, ndien ndi nnyin idihe ŋkɔk kiet ke ufɔk Israel?

13 Ndien idahaemi, ŋkpɔ emi ete nnyin eke okutde ke abaŋa ndibɔp ndian kiet mme ŋkɔk nte obot edide oto ke uyɔhɔ mme Gentile, edi, man ke mme ukperedem usen, ke ini ubon nnyin ema etaha ke unana edinim, iŋ, ke ufaŋ ediwak isua, ndien ediwak emana ke ini ema eyarare Messiah ke obukidem enɔ nditɔ owo, ke ini oro ke uyɔhɔ ikɔ Abasi Messiah edidi ibine mme Gentile, ndien oto ke mme Gentile esim nsuhɔ ubon nnyin—

14 Ndien ke usen oro ke nsuhɔ ubon nnyin edifiɔk ete ke mmɔ edi eke ufɔk Israel, ndien ke mmɔ edi mbio ediomi Jehovah; ndien ke ini oro ke mmɔ edifiɔk inyuŋ inyene ifiɔk ibaŋa mme ete ete mmɔ, ndien nko enyene ifiɔk ebaŋa gospel Andifak mmɔ, emi enye ekenamde ɔnɔ mme ete mmɔ; ke ntre, mmɔ eye edinyene ifiɔk ebaŋa Andifak mmɔ ye se isinede ke ukpep-ŋkpɔ esie, man mmɔ efiɔk nte edide ebine enye enyuŋ ebɔ erinyaŋa.

15 Ndien ke usen oro ke mmɔ mididarake inyuŋ inɔhɔ nsinsi Abasi mmɔ itoro, itiat mmɔ ye erinyaŋa mmɔ? Iŋ, ke usen oro, ke mmɔ midinyeneke odudu ye udia ito ata vine? Iŋ, ke mmɔ midi idihe ididuk ata ufɔk Abasi?

16 Sese, ami ndɔhɔ mbufo nte, Iŋ; eyefiak eti mmɔ ke ufɔk Israel; eyebahare mmɔ esin, koro mmɔ edide ŋkɔk eto olive nte obot edide, esin ke ata eto olive.

17 Ndien emi edi se ete nnyin ekekutde; ndien enye okut ete ke mmɔ idiwɔrɔke isu tutu ke ini mme Gentile ema ekesuan mmɔ; ndien enye okut ete ke edito ke mme Gentile, man Jehovah owut mme Gentile odudu esie, ke ntak emi mme Jew edisinde enye, ke ufɔk Israel.

18 Ke ntre, ete iketiŋke ibaŋa ubon nnyin ikpɔŋ, edi nko abaŋa ufɔk Israel, owut ediomi emi anade nte enam ke mme ukperedem usen; ediomi emi Jehovah eke anamde ye ete nnyin Abraham, ete: Edito ke ubon fo ke edidiɔŋ kpukpru iman ererimbot.

19 Ndien edikem ete ami, Nephi, ntiŋ ediwak ikɔ nnɔ mmɔ ke abaŋa mme ŋkpɔ emi; iŋ, ami ntiŋ nnɔ mmɔ ke abaŋa mfiak nnim ke itie mme Jew ke mme ukperedem usen.

20 Ndien ami mma nnam anwaŋa nnɔ mmɔ mme ikɔ Isaiah, emi enye eketiŋde ke abaŋa mfiak nnim ke itie mme Jew, mme ufɔk Israel; ndien ke ini ema eke efiak enim mmɔ ke itie inaha etimere mmɔ aba, ndien inaha efiak esuan mmɔ. Ndien edikem ete ami ntiŋ ediwak ikɔ nnɔ nditɔ eka mi iren, tutu esit emem mmɔ ndien esuhɔre-idem mmɔ ke iso Jehovah.

21 Ndien edikem ete mmɔ efiak etiŋ ye ami, ete: Ŋkpɔ emi ete nnyin eke okutde ke ndap ɔwɔrɔ nso? Nso ke eto emi enye eke okutde ɔwɔrɔ?

22 Ndien ami ndɔhɔ mmɔ nte: Enye ekada ɔnɔ eto uwem.

23 Ndien mmɔ edɔhɔ mi ete: Esaŋ ukwak emi ete nnyin eke okutde ɔwɔrɔ nso, emi eke adade aka eto uwem?

24 Ndien ami ndɔhɔ nte ke ekedi ikɔ Abasi; ndien owo ekededi emi edi ikpaŋde utɔŋ inɔ ikɔ Abasi, ndien ɔsɔŋ omum enye akama, mmɔ iditakke; ndien mme idomo ye mme enyin ikaŋ asua idikanke mmɔ isin ke nnan, man eda mmɔ eka nsobo.

25 Ke ntre, ami, Nephi, mma mbeŋe mmɔ nte yak ekpaŋ utɔŋ enɔ ikɔ Jehovah; iŋ, ami mma mbeŋe mmɔ ye kpukpru odudu ukpɔŋ mi, ndien ye kpukpru ukeme emi ami nke enyenede, man mmɔ ekpaŋ utɔŋ enɔ ikɔ Abasi enyuŋ eti ndinim mme ibet esie kpukpru ini ke kpukpru ŋkpɔ.

26 Ndien mmɔ edɔhɔ mi ete: Akpa mmɔŋ emi ete nnyin eke okutde ɔwɔrɔ nso?

27 Ndien ami ndɔhɔ mmɔ nte ke mmɔŋ emi ete mi eke okutde ekedi ndek; ndien ekikere esie ama ɔyɔhɔ ofuri ofuri ye mme ŋkpɔ efen tutu enye ikanke ikut ndek ke mmɔŋ oro.

28 Ndien ami ndɔhɔ mmɔ nte ke ekedi enyene ndik ukpe, emi akabaharede idiɔk owo ɔkpɔŋ eto uwem, ndien nko ɔkpɔŋ ndisana owo Abasi.

29 Ndien ami ndɔhɔ mmɔ nte ke eke ada ɔnɔ enyene ndik hell oro, emi angel oro eke ɔdɔhɔde mi ete ke ekenim enɔ idiɔk owo.

30 Ndien ami ndɔhɔ mmɔ nte ke ete nnyin nko ama okut nte mbet Abasi nko abahare idiɔk owo ɔkpɔŋ nnen nnen owo; ndien unwana esie eke etie nte unwana edeme ikaŋ, emi eke ɔdɔkde enyɔŋ etiene Abasi ke nsinsi ye nsinsi, ndien inyeneke utit.

31 Ndien mmɔ edɔhɔ mi ete: Ndi ŋkpɔ emi ɔwɔrɔ ndutuhɔ ikpɔk idem ke mme eyo udomo, mme ndi enye ɔwɔrɔ akpatre idaha ukpɔŋ ke ini ikpɔk idem emi edibede ifep ama akpa, mme ndi enye etiŋ abaŋa mme ŋkpɔ emi edibede ifep?

32 Ndien edikem ete ami ndɔhɔ mmɔ nte ke enye eke eda ɔnɔ mme ŋkpɔ emi edibede ifep ini kiet ye eke spirit; koro ana nte usen edi emi anade ebiere ikpe mmɔ ebaŋa mme utom mmɔ, iŋ, kpa ye mme utom emi ekenamde ke ikpɔk idem emi edibede ifep ke mme eyo udomo.

33 Ke ntre, edieke mmɔ ekpade ke ibak mmɔ ana nte ebin mmɔ nko esio, ke abaŋa mme ŋkpɔ eke spirit, emi abaŋade nnen nnen ido; ke ntre, ana nte eda mmɔ edida ke iso Abasi, man ebiere ikpe ebaŋa mme utom mmɔ; ndien edieke mme utom mmɔ eke edide ndek ana nte mmɔ edi ndedehe; ndien edieke mmɔ edide ndedehe ana edi nte ke mmɔ ikemeke ndidu ke obio ubɔŋ Abasi; edieke edide ntre, obio ubɔŋ Abasi ana edi ndedehe nko.

34 Edi sese, ami ndɔhɔ mbufo, obio ubɔŋ Abasi idihe ndedehe, ndien ŋkpɔ ndek ndomo kiet ikemeke ndiduk obio ubɔŋ Abasi; ke ntre ana enam ebiet ndek emi enim enɔ nkpɔ emi edehede.

35 Ndien ebiet odu emi enimde, iŋ, kpa enyene ndik hell oro emi ami nke etiŋde, ndien satan edi andinim enye; ke ntre akpatre idaha mme ukpɔŋ owo edi ndidu ke obio ubɔŋ Abasi, mme ndibin nsio ke ntak mbet oro ami nke etiŋde.

36 Ke ntre, esio mme idiɔk owo ekpɔŋ ndinen owo, ndien nko ekpɔŋ eto uwem oro, emi mfri esie ɔsɔŋde urua onyuŋ ɔfɔnde akan kpukpru mme mfri eken; iŋ, ndien enye edi enɔ Abasi emi okponde akan. Ndien ntem ke ami nke etiŋ ye nditɔ eka mi iren. Amen.