Ibuot 5
Sariah ɔtɔhɔ ye Lehi—Mmɔ mbiba edaresit ebaŋa nyɔŋ ndi nditɔ iren mmɔ—Mmɔ ewa uwa—Mme usan brass ɔdɔŋɔ mme ŋwet Moses ye mme prophet—Mme usan oro owut Lehi nte eke ubon Joseph—Lehi etiŋ nte prophet abaŋa ubon esie ye nte eketimde mme usan oro enim. Ŋkpɔ nte 600–592 M.C.
1 Ndien edikem ete ke ini ima ike isuhɔre ika wilderness ibine ete nnyin, sese, enye ama ɔyɔhɔ ye idara, ndien nko eka mi, Sariah, ama enem esit ata eti eti, koro enye ke akpan ikɔ ama ɔfuhɔ ke ntak nnyin.
2 Koro enye ama ekere ke nnyin ima itak ke wilderness; ndien enye nko ama ɔtɔhɔ ye ete mi, ɔdɔhɔ enye ete ke enye edi owo nkukut; ete: Sese afo emeda nnyin ɔwɔrɔ ke isɔŋ inyene nnyin, ndien nditɔ iren mi iduhe aba, ndien nnyin itak ke wilderness.
3 Ndien ke utɔ usuŋ usem ntem ke eka mi eketɔhɔ ye ete mi.
4 Ndien edikem ete ete mi ɔdɔhɔ enye, ete: Ami mefiɔk nte ke ndi owo nkukut; koro edieke mme mkpekwe mme ŋkpɔ Abasi ke nkukut ami mkpefiɔkke ima Abasi, edi mkpedu ke Jerusalem, ndien mkpetak ye nditɔ eka mi iren.
5 Edi sese, ami mebɔ isɔŋ enwɔŋɔ, ke mme ŋkpɔ emi ami medaresit; iŋ, ndien ami mefiɔk nte ke Jehovah eye enam nditɔ mi iren ebɔhɔ ke ubɔk Laban, ndien afiak ada mmɔ ɔsuhɔre edinɔ nnyin ke wilderness.
6 Ndien ekedi ke utɔ usuŋ usem ntem ke ete mi, Lehi, ɔkɔdɔŋ eka mi, Sariah esit, ke abaŋa nnyin, ke ini nnyin ikesaŋade ke wilderness idɔk isim isɔŋ Jerusalem, ndibɔ ŋwed mme Jew.
7 Ndien ke ini nnyin ima ikefiak inyɔŋ tent ete mi, sese idara mmɔ ama ɔyɔhɔ, ndien eka mi enyene ndɔŋ esit.
8 Ndien enye ɔdɔhɔ, ete: Idahaemi ami mefiɔk ke akpanikɔ nte ke Jehovah ama ɔnɔ ebe mi uyo ete efehe aka ke wilderness; iŋ, ndien ami nko mefiɔk ke akpan ikɔ nte ke Jehovah ama ekpeme nditɔ iren mi, ndien eyenyaŋa mmɔ osio ke mme ubɔk Laban, ndien ɔnɔ mmɔ odudu emi mmɔ ekaŋde enam ŋkpɔ emi Jehovah ɔnɔde mmɔ uyo. Ndien ke utɔ usuŋ usem emi ke enye eketiŋ.
9 Ndien edikem ete mmɔ edaresit ata eti eti, ndien enyuŋ ewa uwa ye mme edifɔp uwa enɔ Jehovah; ndien mmɔ enɔ Abasi Israel ekɔm.
10 Ndien ke mmɔ ema eke enɔ Abasi Israel ekɔm, ete mi, Lehi, ataŋ mme ŋwet emi ekemiŋde ke mme usan brass, ndien enye ɔduŋɔde mmɔ tɔŋɔ ke eritɔŋɔ.
11 Ndien enye okut ete ke mmɔ edɔŋɔ mme ŋwed Moses ition, emi eke enɔde mbuk eribot eke ererimbot, ndien nko eke Adam ye Eve, emi eke edide akpa ete ye eka nnyin;
12 Ndien nko ŋwet eke mme Jew tɔŋɔ ke eritɔŋɔ, tutu esim ntɔŋɔ ukara Zedekiah, edidem Judah;
13 Ndien nko mme prophecy eke mme ndisana prophet, tɔŋɔ ke eritɔŋɔ, tutu esim ntɔŋɔ ukara Zedekiah; ndien nko ediwak mme prophecy emi eketiŋde ke inua Jeremiah.
14 Ndien edikem ete ete mi, Lehi, nko okut ke mme usan brass mbuk emana mme ete esie; ke ntre enye ɔfiɔk ete ke enye oto ubon Joseph; iŋ, kpa Joseph oro emi ekedide eyen Jacob, emi eke eyamde esin ke Egypt, ndien emi ubɔk Jehovah eke etimde enim, man enye etim ete esie, Jacob enim, ye kpukpru mbon ufɔk esie iditak ye akaŋ.
15 Ndien mmɔ ke eke eda ewɔrɔ ke nkpɔkɔbi ye ke isɔŋ Egypt, kpa Abasi oro emi eke ekpemede mmɔ.
16 Ndien ke ntre ete mi, Lehi, ama eke ɔdiɔŋɔ mbuk emana mme ete esie. Ndien Laban nko ekedi eke ubon Joseph, ke ntre enye ye mme ete esie ema enim mme ŋwed oro.
17 Ndien idahaemi ke ini ete mi eke okutde mme ŋkpɔ emi, enye ɔyɔhɔ ye spirit Abasi, ndien ɔtɔŋɔ nditiŋ nte prophet mbaŋa ubon esie—
18 Ete ke mme usan brass emi ena eka ebine kpukpru idut, mme iman, mme usem, ye mme owo emi ekedide eke ubon esie.
19 Ke ntre, enye ɔdɔhɔ ete ke mme usan brass emi inaha etak, ini idinimeke mmɔ. Ndien enye etiŋ ediwak ŋkpɔ nte prophet abaŋa ubon esie.
20 Ndien edikem ete ke tutu esim ini oro ami ye ete miima inim ibet emi Jehovah ɔkɔnɔde nnyin uyo.
21 Ndien nnyin ima ibɔ mme ŋwed emi Jehovah ɔkɔnɔde nnyin uyo, ndien iduŋɔde mmɔ inyuŋ ikut ite ke mmɔ efɔn; iŋ, kpa eke akamba udori enɔ nnyin, tutu ete ke nnyin iyenim ibet Jehovah inɔ nditɔ nnyin.
22 Ke ntre, ekedi ifiɔk Jehovah ete yak nnyin imen mmɔ ye nnyin, nte nnyin isaŋade ke wilderness ika isɔŋ eŋwɔŋɔ.