Akpa Ŋwed Nephi
Ukara ye Utom Esie
Mbuk Lehi ye ŋwan esie Sariah, ye nditɔ iren esie inaŋ, emi ekotde, (ke nditɔŋɔ ye emi okponde akan) Laman, Lemuel, Sam, ye Nephi. Jehovah ɔdɔhɔ yak Lehi ɔwɔrɔ ɔkpɔŋ isɔŋ Jerusalem, koro enye etiŋde nte prophet ɔnɔ mme owo abaŋa ukwaŋ-ŋkpɔ mmɔ ndien mmɔ eyom ndibiat uwem esie. Enye ada isaŋ usen ita aka wilderness ye mbon ufɔk emana esie. Nephi ada nditɔ eka esie afiak aka isɔŋ Jerusalem okoyom ŋwed mme Jew. Mbuk ufen mmɔ. Mmɔ eda nditɔ iban Ishmael nte ŋwan. Mmɔ eda mbon ufɔk emana mmɔ eduk ke wilderness. Ufen ye ukut mmɔ ke wilderness. Usuŋ isaŋ mmɔ. Mmɔ edisim akamba mmɔŋ. Nditɔ eka Nephi etɔhɔ ye enye. Enye etimere mmɔ, onyuŋ ɔkɔŋ ubom. Mmɔ ekot enyiŋ ebiet oro Ediwak. Mmɔ ebe akamba mmɔŋ oro eka isɔŋ enwɔŋɔ, ye efen ntre. Emi edi nte mbuk Nephi edide; mme ke usuŋ efen, ami, Nephi, ŋwet ŋwed emi.
Ibuot 1
Nephi ɔtɔŋɔ ŋwed ikɔt esie—Lehi okut ke ndap adaha ikaŋ onyuŋ okot oto ŋwed prophecy—Enye otoro Abasi, ebemiso etiŋ abaŋa edidi eke Messiah, onyuŋ etiŋ nte prophet abaŋa nsobo Jerusalem—Mme Jew ekɔbɔ enye. Ŋkpɔ nte 600 M.C.
1 Ami, Nephi, emi nkemanade nto ete ye eka emi eke efɔnde, ke ntre ema ekpep mi kpukpru mme ukpep ŋkpɔ ete mi; ndien ke mma nke kut ediwak ukut ke eyo uwem mi, edi, ke mma nke bɔ akamba edidiɔŋ nto Jehovah ke ofuri eyo uwem mi; iŋ, ke mma nke nyene akamba ifiɔk ke abaŋa mfɔnido ye ndedibe ŋkpɔ Abasi, ke ntre, ami ŋwet ŋwed kabaŋa se ami nkenamde ke eyo uwem mi.
2 Iŋ, ami ŋwet ŋwed emi ke usem ete mi, emi ɔdɔŋɔde ukpep ŋkpɔ mme Jew ye usem mbon Egypt.
3 Ndien ami mefiɔk nte ke ŋwed emi ami nwetde edi akpanikɔ; ndien ami ŋwet enye ke ubɔk mi; ndien ami ŋwet enye ntiene ifiɔk mi.
4 Ndien edikem ke ntɔŋɔ akpa isua ukara eke Zedekiah, edidem mme Judah, (ete mi, Lehi, ke ama ekeduŋ ke Jerusalem ke ofuri eyo uwem esie); ndien kpa ke ukem isua oro ediwak mme prophet edi, etiŋ nte prophet eno mme owo ete ke ana mmɔ ekabare esit, ke midihe ntre ana esobo akwa obio Jerusalem.
5 Ke ntak oro edikem ete, ete mi, Lehi, nte enye asaŋade aka ɔbɔŋ akam ɔnɔ Jehovah, iŋ, tutu ye ofuri esit esie abaŋa ikɔt esie.
6 Ndien edikem nte enye ɔbɔŋde akam ɔnɔ Jehovah, adaha ikaŋ edi onyuŋ odoro ke itiat ke iso esie; ndien enye okut onyuŋ okop ediwak; ndien ke ntak mme ŋkpɔ oro emi enye ekekutde onyuŋ okopde enye eyek ke ɔkpɔsɔŋ.
7 Ndien edikem enye afiak ɔnyɔŋ ufɔk esie ke Jerusalem; ndien enye ana ke ŋkpɔ nna esie, ɔyɔhɔ ye spirit ye mme ŋkpɔ emi enye ekekutde.
8 Ndien nte enye ɔyɔhɔde ye Spirit, emen enye ewɔrɔ ke nkukut, tutu enye okut nte mme enyɔŋ ekubɔrede, ndien enye ekere ke imɔ imokut Abasi nte etiede ke ebekpo esie, anana ibat udim mme angel ekanare enye ekuk ke edu ukwɔ ikwɔ ye nditoro Abasi mmɔ.
9 Ndien edikem enye okut nte Kiet ɔsuhɔrede ɔwɔrɔ ke ufɔt enyɔŋ, ndien enye okut ete ke unwana esie ama ayama akan utin uwemeyo.
10 Ndien enye nko okut nte duopeba efen etienede enye, ndien unwana mmɔ ama akan eke mme ntanta ɔfiɔŋ ke ikpa enyɔŋ.
11 Ndien mmɔ esuhɔre edi enyuŋ eka ke enyɔŋ iso isɔŋ; ndien akpa edi onyuŋ ada ete mi ke iso, onyuŋ ɔnɔ enye ŋwed, onyuŋ ɔdɔhɔ enye ete yak enye okot.
12 Ndien edikem nte enye okotde, enye ɔyɔhɔ ye Spirit Jehovah.
13 Ndien enye okot, ete: Eyedɔdiɔk, osuk ɔdɔdiɔk ɔnɔ Jerusalem, koro ami nkutde mme mbubiam ido mbufo! Iŋ, ndien ediwak ŋkpɔ ke ete mi eke kot kabaŋa Jerusalem—ete ke ana esobo enye, ye mme andiduŋ ke esit; ana ediwak etak ke ofut, ndien ana nte etaŋ ediwak ewɔrɔ nte mbon ŋkpɔkɔbi eka ke Babylon.
14 Ndien edikem ke ini ete mi ama okokot onyuŋ okut ediwak akwa ye utibe ŋkpɔ, enye ama eseme ediwak ŋkpɔ ɔnɔ Jehovah; nte: Akwa ye utibe ke mme utom fo edi, O Jehovah Abasi Andikpon nkan! Ebekpo fo okoŋ ke mme enyɔŋ, ndien odudu, ye eti ido, ye mbɔm fo odu ye ofuri mme andiduŋ ke ererimbot; ndien, koro afo enyenede mbɔm, afo uduyake mbon oro edide etiene fi etak!
15 Ndien ntem ekedi usem ete mi ke nditoro Abasi esie; koro ukpɔŋ esie ama adaresit, ndien ofuri esit esie ɔyɔhɔ ke ntak mme ŋkpɔ emi enye ekekutde, iŋ, emi Jehovah okowutde enye.
16 Ndien idahaemi ami, Nephi, ntiŋke ofuri mbuk eke mme ŋkpɔ emi ete mi ekewetde, koro enye ama ewet ediwak ŋkpɔ emi enye ekekutde ke mme nkukut ye mme ndap; ndien enye nko ama ewet ediwak ŋkpɔ emi enye eketiŋde nte prophet onyuŋ etiŋ ɔnɔ nditɔ esie, emi ami mendiwetke ofuri ofuri.
17 Edi ami nyewet mbuk se ami nkenamde ke eyo uwem mi. Sese, ami nnam ibio ibio ŋwet ete mi, ke mme usan emi ami nkenamde ke mme ubɔk mi; ke ntre, ke mma nkenam ibio ibio ŋwet ete mi do ke ndinwet mbaŋa uwem mi.
18 Ke ntre, ami nyom mbufo efiɔk ete, ke Jehovah ama okowut ete mi, Lehi, ata ediwak utibe ŋkpɔ, iŋ, ke abaŋa nsobo Jerusalem, sese enye aka ke otu mme owo, onyuŋ ɔtɔŋɔ nditiŋ nte prophet nyuŋ ntiŋ nnɔ mmɔ ke abaŋa mme ŋkpɔ emi enye ekekutde onyuŋ okopde.
19 Ndien edikem ete mme Jew esak enye ke ntak mme ŋkpɔ emi enye eke etiede ntiense abaŋa mmɔ; koro enye ama etie ntiense abaŋa ibak mmɔ ye mme mbubiam ido mmɔ; ndien enye etie ntiense ete ke mme ŋkpɔ emi enye ekekutde onyuŋ okopde, nko ye mme ŋkpɔ emi enye ekekotde ke ŋwet oro, owut anwanwa edidi eke Messiah, nko ye erifak eke ererimbot.
20 Ndien ke ini mme Jew ekekopde mme ŋkpɔ emi mmɔ eyat esit ye enye; iŋ, ukem ukem nte mme prophet ke eset, emi mmɔ ekebinde esio, enyuŋ etɔde ke itiat, enyuŋ ewotde; ndien mmɔ nko eyom uwem esie, man mmɔ emen enye efep. Edi sese, ami, Nephi, nyewut mbufo nte ke mme mmem mmem mbɔm Jehovah ofuk kpokpru mbon emi enye emekde, ke ntak mbuɔtidem mmɔ, ndinam mmɔ ekpon tutu enyene odudu ndibɔhɔ.