1 Y xcʼulmatajic chi cʼäte ri in, Nefi, nu bim waʼ chque ri wachalal, are je u sucʼ waʼ xquibij chwe: At xabij cʼäxalaj tak jastak chke, cʼäx xeboc pa kanimaʼ, man cäkachʼij taj.

2 In xintzelej uwo ri xquibij, xinbij chque chi wetaʼm chi cʼäx ri xinchʼawic chquij ri itzel tak winak, je jas ri kastzij. Y xebinkʼ alajisaj ri sucʼum tak achijab, y xinbij chi cäpe na ri kʼij ri quewalajisax na. Jeʼ, ri e cʼo qui mac sibalaj cʼäx cäquinaʼo are cäbix ri kastzij chque, sibalaj cäkʼututic ri canimaʼ.

3 Je puch, wachalal, we tä ix sucʼum tak achijab, y quiwaj quitatabej ri kastzij, y quixniman che rech quisucʼumaj iwib cho ri Dios, mixwixwitic che ri u tzij, y mibij chi cʼäx ri quinchʼaw chiwe.

4 Xcʼulmatajic chi in, Nefi, sibalaj xinsacʼajanic che u taʼic chque ri wachalal rucʼ ronojel nu chukʼab rech queniman che ri u pixab ri Kajawal.

5 Xbantajic chi xquimachʼachʼej quib cho ri Kajaw. Jeʼ puch, chi xcuʼbiʼ nu cʼux, y xinquicotic chi quebin na pa ri be re utzil.

6 Ronojel waʼ jastak xbixic y xbantajic aretak ri in tat xcʼojiʼ pa jun panibal pa ri lianic ri xcoj Lemuel che u biʼ.

7 Xbantajic chi ri in, Nefi, xincʼuliʼ rucʼ jun chque ri u mial ri tat Ismael. Xukujeʼ ri wätz xecʼuliʼc cucʼ ri nicʼaj u mial chic. Cʼu ri Zoram xucʼam ulok ri nabial u mial ri tat Ismael je ri rixokil.

8 Are je cʼu waʼ, ri in tat xniman chque ronojel ri u takbal ri Kajaw ri u yaʼom che. Je cʼu ri in, Nefi, sibalaj xintewichixic rumal ri Ajawaxel.

9 Xcʼulmatajic chi ri Kajawal chakʼab chic xuchʼabej ri in tat. Xtakan canok che chi ri jun kʼij chic cucʼam na bic chi jumul ri u be pa ri ulew cätzʼinowic.

10 Y xcʼulmaxic chi akʼab che ri jun kʼij chic, xwalaj ri in tat, cʼu kas xel bic chuchiʼ ri u panibal, cʼäte riʼ, sibalaj xmayinic rumal xrilo cho ri ulew jun cʼoloquic chʼichʼ sibalaj jeʼl ri u banic. Banom riʼ rumal jeʼlelaj jastak, y e cʼo quieb alaj bak chupam. Jun chque cucʼutu jachique ri be ri cäkacʼam bic pa ri ulew cätzʼinowic.

11 Y xbantajic chi xkamulij ronojel ri ka jastak ri ka cʼamom bic pa ri ulew cätzʼinowic, y ri jutak bic chic ka jastak, ri cäkatijo ri u yaʼom ri Kajawal chke, y xkamulij ronojel tak ri ijaʼ kech rech cäkacʼam bic pa ri ulew cätzinowic.

12 Cʼu xcʼulmaxic chi xkekaj ri ka panibal y xujbe pa ri ulew cätzʼinowic. Xkakʼaxej ri nimaʼ re Lamán.

13 Y xcʼulmatajic chi cajib kʼij xujbinic, xujtzelej jubikʼ cho ri nicʼaj u wiquiakʼab ri relbal kʼij. Cʼäte riʼ, xkacoj ri ka panibal xkayaʼ Shazer che u biʼ ri cʼolbal.

14 Y xbantaj chi jumul chic xujbe rucʼ ka chʼab ri ka qʼuiakbal chʼab che qui chapic ri tak chicop ri queriktaj chupam ri ulew cätzʼinowic, rech cäkayaʼ chque ri ka familias. Cʼäte riʼ xcacämisaj ri tak chicop cumal ri ka familias, y xujtzelej cucʼ ri ka familias pa ri cʼolbal u biʼ Shazer. Y xkachap ri ka be jumul chic pa ri ulew cätzʼinowic, tza xkaterenej ri junam ka be, tza xkatzucuj ri chʼakalic tak utz ulew ri cʼo pa ri ulew cätzʼinowic, ri cʼu chuchiʼ ri cak nimalaj jaʼ nimjaʼ.

15 Y xcʼulmatajic chi xujbin qʼui kʼij, xkachap ri tak chicop pa tak ri ka be rech cʼo ri cäkatijo, xkabano cucʼ ri ka chʼab, ri qʼuiakbal chʼab, abäj y ri iquiäkʼ kech.

16 Xkaterenej jas ri cucʼutu ri jun cʼoloquic chʼichʼ chkawäch, ri xujucʼam bic pa tak ri chʼak tak utz ulew chupam ri ulew cätzʼinowic.

17 Y cʼäte ri uj benak chic sibalaj kʼij, xkacuʼbaʼ ri ka panibal che jun uxlanem, y che u tzucuxic jas cäquitij ri ka familias.

18 Y xcʼulmax chi in, Nefi, xinel bic pa qui tzucuxic tak ri chicop, xinkʼipij ri nu qʼuiakbal chʼab banom rucʼ räx chʼichʼ sibalaj jeʼlic. Y kastzij waʼ chi xpe coyowal ri wachalal wucʼ umal rech ri nu qʼuiakbal chʼab ri xkʼipinic, man xkarik tä chic jas ri xkatijo.

19 Y xcʼulmaxic chi man cʼo tä xkacʼam lok chque ri ka familias are xujtzelej cucʼ, y umal rech ri be sibalaj cʼäx, e cosinak chic, y xquirik cʼäx rumal man cʼo tä jas ri xquitijo.

20 Y xcʼulmatajic chi ri Lamán y Lemuel, y ri ralcʼual ri tat Ismael, qʼui xewixwitic, umal rech ri qui cʼäxcʼolil ri xquirik pa ri ulew cätzʼinowic. Y ri in tat xuchap u wixwitem chrij ri Rajaw u Dios xukujeʼ. Kastzij, chi conojel e areʼ sibalaj xquirik bis cʼä chi xewixwit chrij ri Dios.

21 Y xcʼulmatajic chi ri in, Nefi, xoc ri bis pa wanimaʼ chque ri wachalal rumal xkʼipinic ri nu qʼuiakbal chʼab, y rumal ri qui qʼuiakbal chʼab areʼ man cuyuk tä chi rib che u qʼuiakic ri chʼab. Kastzij xkarik cʼäx che ri man cʼo tä jas cäkachap che ka wa.

22 Are cʼu ri in, Nefi, xintzijon cucʼ ri wachalal umal rech chi xquicowirisaj chic jumul ri canimaʼ, cʼä xechʼachʼatic chrij ri Cajaw Dios.

23 Y xbantajic chi in, Nefi, xinban jun qʼuiakbal chʼab re cheʼ, y jun chʼab re jun sucʼ cheʼ, y xincʼam lok waʼ rucʼ jun iquiakʼ y rucʼ abäj. Cʼäte riʼ xintaʼ che ri in tat, ¿ja quinbe wi chutzucuxic jas cäkatijo?

24 Y xcʼulmatajic chi ri in tat xchʼaw rucʼ ri Kajaw, rumal xquimachʼachʼej quib umal rech ri nu tzij ri xinbij chque, rumal ri in qʼui u sucʼ ri jastak ri xinbij chque rucʼ ri u chukʼab ri wanimaʼ.

25 Y xbantajic chi ri u tzij ri Ajaw xopan che u chʼabexic ri in tat. Y kastzij puch, xyajtajic rumal xwixwitic chrij ri Ajaw. Rumal riʼ, xujikʼaj.

26 Y xbantajic chi ri u tzij ri Ajaw xubij che: Chawilaʼ ri cʼoloquic chʼichʼ, y chasiqʼuij u wäch ri jastak ri tzʼibatal chrij.

27 Y xcʼulmatajic chi aretak ri in tat xril ri jastak ri tzʼibatal chrij ri cʼoloquic chʼichʼ, xbirbatic y xuxej rib. Ri wachalal xukujeʼ, y ri ralcʼual ri tat Ismael y ri kixokilab xukujeʼ xebirbatic.

28 Y xcʼulmatajic chi in, Nefi, xinwil ri tak bak ri e cʼo chupam ri cʼoloquic chʼichʼ, chi utz quesalabic we cʼo ri ka cojobal, y ri ka sacʼajinic, y we cʼo ri ka siqʼuinic che.

29 Y cʼo chquij nicʼaj cʼacʼ tzʼib, chi man cʼäx taj cäban chusiqʼuixic xukujeʼ. Y are waʼ xuyaʼo ka noʼj rech cäketamaj ri u sucʼ ri Ajaw. Y xtzʼibataj riʼ, y xqʼuextaj jutak mul. Are cuterenej ri ka cojobal y ri ka sacʼajinic ri cäkayaʼ che. Chi jewaʼ cäketamaj chi rucʼ nitzʼ u chac, ri Ajawaxel cuban nimak tak jastak.

30 Y xcʼulmatajic chi ri in, Nefi, xinpakiʼ cʼä puwiʼ ri juyub, je jas xucʼut ri cʼoloquic chʼichʼ.

31 Y xbantajic chi xincämisaj e qʼui tak awaj re juyub, y jewaʼ xincʼam ulok jas ri cäquitij ri ka familias.

32 Y xcʼulmatajic chi xintzelej pa ri ka panibal cucʼ ri awaj ri xoncämisaj, y aretak xquilo chi xinriko ri ka tijowic, sibalaj xequicot ri canimaʼ, y xcʼulmatajic chi xquimachʼachʼej quib cho ri Ajawaxel, y xquitioxij che.

33 Y xcʼulmatajic chi xkachap chic ri ka be, y xkachap ri ka be ri ka chapom canok, y tza are u sucʼ xujbec. Y aretak uj benak chic qʼui kʼij, xkacuʼbaʼ ri ka panibal jumul chic rech cujuxlan jun quieb oxib kʼij chilaʼ.

34 Y xcʼulmaxic chi xcäm ri tat Ismael, y xmuk pa jun cʼolbal u biʼ Nahom.

35 Y xcʼulmaxic chi ri u mial ri tat Ismael sibalaj xquijikʼaj y xcokʼej che ri qui tat, y xukujeʼ xebokʼic umal rech ri cʼäx ri xquirik pa ri ulew cätzʼinowic. Y xewixwit chrij ri in tat, rumal xeresaj ulok pa ri ulew re Jerusalén, xquibij: Ri ka tat cäminak. Y kastzij baʼ, ri uj benak chic qʼui pa ri ulew cätzʼinowic, y man ka rikom taj jun ka cʼolbal. Ka chʼijom qʼui cʼäx, y ri wijaʼl, ri chakiʼj chiʼaj, ri cosical y cʼäte conojel waʼ, cujcäm na che wijaʼl pa ri ulew cätzʼinowic.

36 Are jeʼ xquibij waʼ aretak xewixwit chrij ri in tat, y xukujeʼ chwij ri in. Y areʼ xcaj quetzelej pa Jerusalén.

37 Y ri Lamán xubij che ri Lemuel y xukujeʼ chque ri u cʼojol ri tat Ismael: Chiwilampeʼ, chkacämisaj ri ka tat, y xukujeʼ ri ka chakʼ Nefi, areʼ u tzucum chi cuban na nimalaj achi chkaxol y kajtij, cʼu ri uj nabial che.

38 Camic cubij chi ri Ajawaxel tzijoninak rucʼ, y xukujeʼ cubij che e petinak rucʼ ri angelib chutewichixic. Xane ri uj ketaʼm chi xak cuban tzij. Y areʼ cubij waʼ jastak chke. Y cuban nicʼaj jastak chic umal rech ri itzel tak noʼj, rech cʼo chi cujusubu, cuchomaj chi cäraj ne cäcuinic cujucʼam bic pa jun najalaj sachinak ulew ri man cäkachʼob taj. Cʼäte riʼ, u chomam cuban ri kajawal y ka nimal, rech cujutak wi je jas cubij ranimaʼ. Cʼu are je u sucʼ waʼ ri wätz Lamán xuyaʼo tzij pa ri qui jolom rech cäpe coyowal wumal in.

39 Y xbantajic chi ri u tzij ri Ajawaxel cʼo kucʼ. Kastzij, ri u chʼabal ri Dios xulic y xubij qʼui tak tzij chque, y sibalaj co xebuyajo ri wätz. Cʼäte riʼ, chi xeyajic canok rumal ri u chʼabal ri Ajawaxel, jumul chic xpacun ri coyowal y xquiqʼuex qui cʼux chi man quemacun tä chic. Rumal waʼ, ri Ajawaxel xujutewichij rucʼ ri ka wa rech man cujcäm taj che ri wiʼjal.