1 Xcʼulmataj chi xquikʼijilaj ri Ajawaxel, y xebe wucʼ. Xkachacuj ri cheʼ rucʼ jun mayilaj ka noʼjibal, y ri Ajawaxel xucʼut chnuwäch jujun tak mul jas ri u banic quinban che u chacuxic ri cheʼ che ri jucub.

2 Xane cʼu ri in, Nefi, man xinchacuj taj ri cheʼ je jas ri quetamabal ri achijab, y man xinban tä ri jucub je jas ri u banic ri cäquiban ri achijab. Xane tza xinban che je jas ri u sucʼ ri xucʼut ri Ajawaxel chnuwäch. Rumal waʼ man je taj jas ri u banic ri cäquiban ri achijab che.

3 Y ri in, Nefi, tza qʼui mul xinpakiʼ puwiʼ ri juyub, u xinban chʼawem rucʼ ri Ajawaxel. Rumal tak waʼ ri Ajawaxel xucʼut chnuwäch nimak tak jastak.

4 Y xcʼulmaxic chi aretak xintoʼtaj che u banic ri jucub je jas ri xubij ri Ajawaxel, xxquil ri wachalal chi utz u banic, y ri u chacuxic sibalaj jeʼl cäcaʼyic. Y rumal waʼ, xquimachʼachʼej quib jumul chic che ri Ajawaxel.

5 Y cʼäte riʼ, xbantajic chi ri u chʼabal ri Ajawaxel xopan rucʼ ri in tat, xubij che chi cujwalajic y cujoc pa ri jucub.

6 Y ri jun kʼij chic, aretak xkasucʼumaj ronojel ri ka jastak ri cäkacʼam bic, sibalaj uwo cheʼ y tiʼj re ri ulew cätzʼinowic, xikujeʼ sibalaj cab rech ri wonon, y ronojel jas ri ka cʼamom ulok kucʼ je jas xutak ri Ajawaxel chke, xujoc pa ri jucub, y xkacʼam ulok ronojel ri kechbal, ri ijaʼ ke, y jachique jastak ri xkacʼam ulok kucʼ. Je xkabano chkajujunal je jas ri ka junab. Kas jeriʼ, xujoc konojel pa ri jucub cucʼ ri kixokilal y ri kalcʼual.

7 Y wachanim, xebalax quieb nu chakʼ e ralcʼual ri in tat pa ri ulew cätzʼinowic. Ri nabial u biʼ Jacob, y ri u chakʼ José.

8 Y cʼäte riʼ, xcʼulmatajic chi uj oquinak chic konojel pa ri jucub rucʼ ri cäkatijo y ronojel jas ri xbix chke, xujbe pa ri nimalaj jaʼ. Are cʼu ri cakikʼ xujuchʼiquimij bic sucʼ pa ri tasom ulew.

9 Y cʼäte uj chʼiquimim bic qʼui kʼij rumal ri cakikʼ, kas jeʼ, ri wachalal y ri ralcʼual ri tat Ismael, rucʼ ri quixokilal, xquichap jun qui sakʼorinic cʼä xekaj che xojowem, y xebixonic, y xetzijon rucʼ itzel tak tzij, jeʼ, cʼä xsach pa qui jolom ri cuinem ri xecʼam ulok cʼä ja ri e cʼo wi. Kastzij xenimaric pa u kʼab ri jun cowilaj etzelal.

10 Y ri in, Nefi, kas xinchaplej xinxej wib chi ri Ajawaxel cäpe na royowal kucʼ, y chi cucʼajisaj ka wäch umal rech ri ka mac, y chi cujbikʼic chuxeʼ ri nimalaj jaʼ. Rumal cʼu riʼ, ri in, Nefi, xinchap qui chʼabexic rucʼ ri utzalaj nu chomabal, xane xpe coyowal wucʼ, xquibij: Uj man cäkaj taj chi ri ka chakʼ coc che ka nimal.

11 Y xcʼulmatajic chi ri Lamán y ri Lemuel xinquichapo y xinquiximo che colob, y xeyokʼow chwe, tzare ri Ajawaxel xraj cucʼut ri u cuinem che u tzʼakatisaxic ri u bim chquij ri itzel tak winak.

12 Y xcʼ ulmatajic chi cʼäte riʼ, xinximataj cumal, rech man quincuin taj quinsalabaxic wib. Ri cʼoloquicalaj chʼichʼ ri u yaʼom ri Ajawaxel chke rech cucʼam ka be, xutänabaʼ cächacunic.

13 Xane rumal waʼ, man quetaʼm tä chic jawi cäquicʼam ri jucub cʼä xkajic jun nimalaj jäb rucʼ cäkuljaʼ. Kastzij, jun nimalaj jäb y lawalo ri kʼakʼ chupam, y xujtzelej chkij pa ri nimalaj jaʼ oxib kʼij rumal. Y xquichaplej sibalaj xquixej quib chi we ne quejikʼ can xeʼ ri nimalaj jaʼ. Pune waʼ, man xinquitzokopij taj.

14 Y chucajib kʼij, xujuchʼiquimij chkij ri jäb rucʼ cäkuljaʼ, xux tza sibalaj lawalo.

15 Y xcʼulmatajic chi xaʼ jubikʼ cäraj chi cujcanaj can chuxeʼ ri nimalaj jaʼ. Y cʼäte riʼ, chi uj chʼiquimim chic chkij pa cajib kʼij, kas jeʼ xquichap u chomaxic chi ri royowal ri Dios petinak chquij, y chi tza quesach na qui wäch we man cäquiqʼuex tä qui cʼux, y we quemacun chic. Rumal rech waʼ, xebul wucʼ, y xquitur ri colob ri ximatal wi ri nu kʼab. Are cʼu waʼ, sibalaj e sipojinak chic ri nu chʼec y ri u kul wakan tza e sipojinak, y quekʼoxowic xukujeʼ.

16 Je puch, xinyaʼo wanimaʼ che ri Dios, y xinkʼijilaj ronojel ri kʼij, y man xinwixwit taj chrij ri Ajawaxel umal rech ri nu cʼäx.

17 Y qʼui ri jastak ri xbix chque ri wachalal rumal ri in tat, Lehi, y chque ri u cʼojol ri tat Ismael xukujeʼ, tzare qui bim chi cäquichʼayo jachin ri cunim rib chi cächʼaw pa nu biʼ. Are cʼu ri in tat y ri nu nan e nimak tak winak chic, qui rikom ri cʼäx umal quech ri calcʼual, kastzij xeyawajic chi xekʼoyic pa qui chʼat.

18 Are cʼu riʼ, umal rech ri qui kʼoxom y ri qui bisonem, y ri qui mac ri wätz, xaʼ jubikʼ cäraj chi xecʼam bic rucʼ ri Dios. Kastzij, chi ri sak tak qui wiʼ cäraj xaʼ jubikʼ rech cäcanaj can chuxeʼ ri ulew. Kas jeʼ chi xaʼ jubikʼ cäraj chi ri in tat y ri nu nan queqʼuiak bic chquimukic chuxeʼ ri tak jaʼ.

19 Y ri Jacob y ri José, rumal e areʼ cʼä acʼalab na, y rajwaxic chi cäquitij ri qui wa, sibalaj xebison rumal ri u yabil ri qui nan. Are cʼu riʼ, ri wixokil xokiʼic, y xuban chʼawem rucʼ ri Dios panuwiʼ, y xukujeʼ ri walcʼual. Pune tä waʼ, man xpax tä qui cʼux ri wätz che nu turic.

20 Man cʼo tä chi baʼ, xak xu ri u cuinem ri Dios, ri xpe chusachic qui wäch, xcuin chupaxixic ri qui cʼux. Aretak xquilo chi xaʼ jubikʼ xraj chi xemuk can cʼä chuxeʼ ri nimalaj jaʼ, cʼäte riʼ xquiqʼuex ri qui cʼux che jas ri qui banom chwe y xinquituru.

21 Y xcʼulmatajic puch chi cʼäte ri xinquituru, chiwilampeʼ xinchap ri cʼoloquic chʼichʼ, ri cʼamal ka beʼ, y xuban ri chac je jas ri xinwaj. Xcʼulmataj chi xinban ri chʼawem rucʼ ri Ajawaxel. Cʼäte nu bim ri chʼawem rucʼ ri Dios, xtaniʼ ri cakikʼ, y ri nimalaj jäb rucʼ cäkuljaʼ xtaniʼ xukujeʼ, y xjekic ronojel.

22 Y xbantajic chi cʼäte riʼ, in, Nefi, xinbinisaj ri jucub je u banic che sucʼ pa ri tasom ulew.

23 Y xbantajic chi are uj benak chic puwiʼ ri jaʼ qʼui kʼij, xujopan cho ri tasom ulew. Y xujkaj cho ri ulew, y xkacoj ri ka panibal, xkayaʼri biʼ ri tasom ulew che.

24 Y xcʼulmaxic chi xkachap ri u tajixic ri ulew, y xkaticʼ u wäch. Kastzij xkaticʼ conojel ri ijaʼ kech ri e ka cʼamom ulok pa Jerusalén. Y xbantajic chi sibalaj jeʼl xeqʼuiyic, y xujtewichix rucʼ jun tzʼebemalaj ticʼon ronojel cuyaʼo.

25 Y xcʼulmaxic chi aretak xujbin pa ri ulew cätzʼinowic re ka tasom ulew, xkarik qʼui qui wäch awaj pa ri cʼachelaj: wacäx, but, quiej, qʼuisicʼ y ri qʼuisicʼ re juyub, y conojel qui wäch ri awaj re juyub ri rajwaxic che ri achi. Y xkarik ronojel qui wäch abäj re juyub xukujeʼ; kʼän puak, sak puak, y quiäk chʼichʼ.