1 Wacamic Jacob, quintzijon awucʼ. Ri at at ri nabe walcʼual, ri xinwalcʼualaj pa ri kʼij re nu cʼäxcʼolil pa ri ulew cätzʼinowic. Kastzij wi sibalaj cʼäx y nim ri bis a rikom pa ri awacʼalil rumal ri itzel qui cholaj ri awätz.

2 Pune jeriʼ, Jacob, ri nabe walcʼual aretak in cʼo pa ri ulew cätzʼinowic, ri at awetaʼm ri rutzil ri Kajawaxel. Areʼ cuchʼajchʼobej na ri cʼäx a rikom che ri awutzilal.

3 Rumal cʼu riʼ, ri awanimaʼ cätewichix na, y catcʼojiʼ na pa utzil rucʼ ri awätz Nefi. Y ronojel kʼij capatanij na ri Ajawaxel. Rumal cʼu riʼ, wetaʼm chi xesax a mac rumal ri u suqʼuilal ri Esanel a mac. At awilom chi pa ri tzʼakatisabal kʼijal ri areʼ cäpetic chucʼam ulok ri colotajic chque ri winak.

4 Pa ri awacʼalil awilom ri u juluwem. Rumal cʼu riʼ, at cattewichix na je jas ri e areʼ ri quecojon che ri u tzijobelil are cätijon chque pa ri kʼijal are cäbin na chuwächulew. Jeriʼ rumal ri Uxlabixel xaʼ junam iwir, camic, y amakʼel. Xsucʼumatajic ri be tzpa ri u kajic ri achi pa ri mac, y sipatal ri colotajic.

5 Utz quetijox ri achijab chretamaxic ri utz chuwäch ri man utz taj. Yaʼom chic ri pixab chque ri achijab. Ri takbal tak tzij man cukʼalajisaj tä chi sucʼ majun winak. Xukujeʼ man quetastaj taj xaʼ rumal riʼ. Kastzij wi rumal ri pixab re ri uxächulew xetastajic. Xukujeʼ rumal ri pixab re ri Uxlabixel cäkʼatitaj na ri utz chque, y quebux tokʼob na qui wäch che junalic.

6 Rumal cʼu riʼ, ri esabal ka mac cäpe chkawäch rumal ri lokʼalaj Mesías, ri nojinak che utzil y kastzij.

7 Chawilampeʼ, ri areʼ cuchiʼj rib je jas jun tabal tokʼob rumal rech ri ka mac, rech cätzʼakatisax ronojel ri pixab chque conojel ri quebison pa canimaʼ che ri Dios, y ri queniman qui cʼux che. Xak xuwi ri areʼ takal chutzʼakatisaxic ronojel ri pixab.

8 Je cʼu riʼ, sibalaj rajwaxic quebix waʼ jastak chque ri winak ri e cʼo cho ri uwächulew, rech cäquietamaj chi majun winak cäcuinic cäcʼojiʼ jawiʼ cʼo wi ri Dios, xane rumal utzil u banom, ri relibal cʼuxaj, y ri u tokʼobisan wächaj ri Lokʼalaj Mesías. Ri areʼ cuyaʼ can u cʼaslemal je jas u beyal ri tiojil, y cucʼamo chi jumul rumal ri u cuinem ri Uxlabixel, rech cäbantaj na ri cʼastajibal qui wäch conojel ri cäminakib. Ri areʼ ri nabe chque ri quecʼastaj na.

9 Je cʼu riʼ, areʼ ri nabial chquiwäch conojel rech ri Dios. Are cäboʼchiʼn che ri Dios paquiwiʼ conojel ri calcʼual ri achijab. Y ri e areʼ ri quecojon che, quecolotaj na.

10 Y rumal u boʼchiʼm paquiwiʼ conojel, conojel ri winak quekeb na rucʼ ri Dios, y quetaqʼuiʼc na chuwäch ri areʼ chucʼamic ri u kʼatbal tzij paquiwiʼ je jas u beyal ri kastzij y ri u chʼajchʼobal ri cʼo rucʼ. Je cʼu riʼ, ri cäraj ri takbal tak tzij re ri Dios ri u yaʼom ri jun Lokʼalaj Winak, are ri u banic ri cʼajisabal wächaj ri cärachilaj bic. Waʼ jun wikom cʼajisabal wächaj sibalaj cukʼatij ri cärachilaj quicotemal che u tzʼakatisaxic ri cäraj ri tojbal macaj.

11 Rajwaxic ri utz y ri man utz taj pa ronojel. We tä ma tä jeriʼ, ri nabe nu cʼojol aretak in cʼo pa ri ulew cätzʼinowic, man cʼo tä u banic cäbanic ri suqʼulal, mine ri etzelal. Man cʼo tä cäbanic ri lokʼalaj mine ri awas, cʼu ri utz mine ri itzel. Rajwaxic conojel waʼ jastak quebux xaʼ jun. We tä jeriʼ xaʼ jun tiojil, cäcanaj chic cäminak, man cʼo tä ri u cʼaslemal mine ri u cämical. Xukujeʼ man cʼo tä u macum mine sak ranimaʼ. Man cäquicot taj, man cäbison taj. Xukujeʼ man cʼo tä chi cunaʼ mine chi man cunaʼ tä jun.

12 Je cʼu riʼ, man cärik tä u patan ri u bantajic ri uwächulew, y man cʼo tä u cholaj. Kas we tä jeriʼ, cäsach ri retamabal ri Dios y ri junalic u chomabal. Quesach xukujeʼ qui wäch ri cuinem, y ri elibal cʼuxaj, y ri kʼatbal tzij rech Dios.

13 Y we tä quibij ix chi man cʼo tä takbal pixab, xukujeʼ quibij chi man cʼo tä macaj. Cʼu we tä quibij chi man cʼo tä macaj, quibij xukujeʼ chi man cʼo tä suqʼuilal. We man cʼo tä ri suqʼuilal, xukujeʼ man cʼo tä quicotemal. Cʼu we tä man cʼo tä suqʼuilal mine ri quicotemal, man cʼo tä xukujeʼ ri cʼajisabal wächaj mine bisonem. Y we tä ma tä cʼo wä, man cʼo tä ri Dios. Y we tä man cʼo tä ri Dios, ma tä cʼo ri uj, y xukujeʼ man cʼo tä ri uwächulew rumal man cʼo tä u cholaj xebantajic conojel jastak. Man cʼo tä cäquibano, y xukujeʼ man cʼo tä cäbantaj chque. We tä jeriʼ, conojel sachinak.

14 Y wachanim, nu cʼojol, quinbij waʼ jastak chiwe ri ix rech utz cʼo qui patan chiwe rech quiwetamaj. Rumal kas cʼo wi jun Dios. Ri areʼ u banom conojel jastak. U banom ri caj, ri uwächulew, y conojel ri cʼo chquiwäch. U banom ri jastak ri cʼo jas cäquichacuj, cʼu ri jastak ri quechacutaj na.

15 Y rech cäbantaj ronojel ri junalic u chomanic ri Kajawal paquiwiʼ ri achijab cʼäte u winakirisam ri nabe ka nan ka tat, y ri tak awaj ri quebin chuwächulew, y ri tak chicop ri querapin cho ri caj, kas conojel ri jastak, rajwaxic chi cʼo ri utz y cʼo ri man utz taj chi conojel. Je cʼu riʼ, cʼo ri u wäch cheʼ awas cätijowic y ri cheʼ re ri cʼaslemal. Ri jun cʼa y ri jun chic quiʼ.

16 Te cʼu riʼ, ri Ajawaxel Dios xuyaʼ che ri achi rech cuban ri rajwaxic che u toʼic rib. Xane man cäcuin tä ri achi cuchaʼ ri cäraj we tä ma tä cätakchix rumal ri utz o rumal ri man utz taj.

17 Cʼu ri in, Lehi, quinbij je jas u beyal nu siqʼuim cho ri tzʼibatal canok, chi jun ángel rech ri Dios xtzak ulok chicaj, te cʼu riʼ ri areʼ xux ri itzel rumal retzelal xraj xubano chuwäch ri Dios.

18 Y rumal xqʼuiak ulok chicaj, y rumal xetzelaj rib che junalic, xraj chi conojel ri winak e cʼo quetzelal xukujeʼ. Rumal cʼu riʼ, areʼ je jas jun cumätz. Kas, areʼ ri jun itzel, ri u tat ronojel banal tzij. Rumal cʼu riʼ, xubij che ri Eva: Chatijaʼ ri u wäch ri jun cheʼ awas cätijowic. Man catcäm taj, xane catux na je jas ri Dios, ri retaʼm ri utzil y ri itzel.

19 Y aretak ri Adán y ri Eva qui tijom chi jubikʼ ri u wäch ri jun cheʼ awas cätijoxic, xebesax bic pa ri jeʼlalaj xoral re Edén chutajixic ri ulew.

20 Y xecʼojiʼ calcʼualab, jeʼ, conojel ri calaxic quib cho ri uwächulew.

21 Y ri qui cʼaslemal ri calcʼual ri achijab xenajtajiric je jas u beyal ri u rayibal ri Dios rech chi cäquiqʼuex qui cʼux aretak cʼä quecʼojiʼ rucʼ qui tiojilal. Ri qui cʼolem xux na jun cʼolem rech cäquil na we utz o man utz taj. Xban naj qui kʼij je jas u beyal ri takbal ri xuyaʼ ri Ajawaxel Dios chque conojel ri calcʼualab ri achijab. Kastzij xuyaʼ takbal chi rajwaxic conojel winak cäquiqʼuex qui cʼux che ri qui mac/ Xucʼut chquiwäch conojel winakib chi e sachinak rumal ri nabe qui nan qui tat ri xquixalkʼatij ri u takbal ri Dios.

22 Y wachanim, chiwilampeʼ, we tä ri Adán u nimam ri u pixab ri Dios, ma tä tzakinak, xane canajinak ne pa ri jeʼlalaj xoral re Edén. Conojel ri xetiquitajic xecanajic e junam aretak xebantaj ulok. Y jeriʼ kas quixcanaj tä chi junalic, y man queqʼuistaj taj.

23 Y man tä xecʼojiʼ ri calcʼual. Rumal cʼu riʼ, xecanaj tä pa jun cʼolem jasiʼ man cʼo tä qui mac. Man cʼo tä qui quicotem rumal man quetaʼm tä ri cʼäx. Man cuyaʼ taj cäquiban tä ri utz rumal man quetaʼm tä ri macaj.

24 Tzare chiwilampeʼ, conojel e bantajinak rucʼ ri retamabal ri jun ri retaʼm ronojel.

25 Xtzak ri Adán rumal rech chi cʼo na winak. Ri winak e cʼolic rumal rech chi cäquirik na ri quicotemal.

26 Y cäpe na ri Mesías pa ri tzʼakatisabal kʼijal chresaxic ri qui mac conojel ri calcʼual ri achijab cho ri tzakibal. Rumal cʼu cäresaxic ri qui mac che ri tzakibal, e tzokopitalic che junalic. Quetaʼm jas ri utz y ri itzel. Quecuinic cäquiban ri que. Majun cätakan paquiwiʼ, xak xuwi rumal ri cʼajisabal wächaj re ri kʼatbal tzij pa ri nimalaj qʼuisbal kʼij je jas u beyal ri takbal ri u yaʼom ri Dios.

27 Je cʼu riʼ, ri achijab e tzopitalic pa ri qui tiojil. Yatal chque ri jastak ri rajwaxic chque. Y cuyaʼ chi cäquichaʼ ri tzokopitalem y ri junalic cʼaslemal rumal ri nimalaj kʼatal wächaj ri xban paquiwiʼ conojel ri achijab. Quecuinic xukujeʼ cäquichaʼ ri kajbal pa qui kʼab ri qui cʼulel y ri cämical, je jas u beyal ri itzel. Kas areʼ cäraj chi quiaktak ri canimaʼ conojel ri achijab junam rucʼ.

28 Y wachanim, nu cʼojol, quinrayij chi quijiqʼuibaʼ i cʼux che ri nimalaj qʼuexel wächaj. Chitatabej ri nimalaj u takbal y chixcojon che ri u tzij. Chitzucuj ri junalic cʼaslemal je jas u beyal ri u rayibal ri Lokʼalaj Ruxlabixel.

29 Michaʼ ri junalic cämical je jas u beyal ri tiojilal y ri itzel ri cʼo chupam, ri cuyaʼ ri ruxlabal ri itzel ri cuinem rech quixuchapo, y quixucʼam bic pa xibalba rech cäcuinic cajawinic piwiʼ pa ri rajawibal ri areʼ.

30 In nu bim we jujun tak tzij riʼ chiwe iwonojel ri ix, nu cʼojol, pa ri qʼuisbal tak kʼij re nu tijowem. Nu chaʼom ri utzalaj chʼacap je cubij ri kʼalajisanel chrij ri cäpe na. Man cʼo tä jun nu rayibal, xak xuwi chi utz ri iwanimaʼ che junalic. Amen.