1 Wacamic, lokʼalaj wachalal, ri in, Nefi, quinqʼuis nu kʼalajisanem che ri cäpe na, xak xuwiʼ jujun tzij jubikʼ quincuinic quintzʼibaj ri wetaʼm chi quecʼulmataj na. Xukujeʼ xak xuwiʼ quincuinic chutzʼibaxic jujun chque ri u tzij ri wachalal Jacob.

2 Rumal cʼu riʼ, quinqʼuis ri nu tzʼibanem. Xak xuwi cʼo jujun tak tzij quinwaj quinbij chrij ri u tzijobelil ri Cristo. Rumal cʼu riʼ, quintzijon na chiwe je jas u kʼalajil ri nu kʼalajisam canok.

3 Cäquicot ri wanimaʼ rucʼ sak kʼalaj, rumal cʼu jeriʼ cächacun ri Dios chquixol ri calcʼual ri achijab. Ri Kajawal Dios cusakirasaj ri chomabal. Ri are cʼut cätzijon cucʼ ri achijab pa qui chʼabal rech cäquito.

4 Rumal cʼu riʼ, quinrayij chi cänataj chiwe ri nu bim chrij ri kʼalajisanel che ri cäpe na ri xucʼut ri Ajawaxel chnuwäch. Ri areʼ cukasaj na xeʼ jaʼ ri Alaj Chij rech ri Dios, ri cäresaj na qui mac ri e aj uwächulew.

5 Wacamic cʼut, ri Alaj Chij rech ri Dios areʼ lokʼalaj. We tä rajwaxic che ri areʼ cäkasax xeʼ jaʼ rech cätzʼakatisax ronojel ri suqʼuilal, rumal riʼ, ¿la ma tä sibalaj rajwaxic chke ri uj, uj ajmaquib, rech cujkasax xeʼ jaʼ?

6 Wachanim cʼut, quinwaj quintaʼ chiwe ri ix, ri lokʼalaj wachalal ¿jas u sucʼ xutzʼakatisaj ri Alaj Chij rech ri Dios ronojel suqʼuilal are xkasax xeʼ jaʼ?

7 ¿La ma tä iwetaʼm ri ix chi ri areʼ chʼajchʼoj? Tzare pune tä ri areʼ lokʼalaj, cucʼut chquiwäch ri calcʼual ri achijab chi, je jas u beyal ri tiojilal, ri areʼ cumachʼachʼej rib chuwäch ri Tataxel. Y cukʼalajisaj chuwäch ri Tataxel chi cäniman che rumal ri u nimaxic ri takbal re.

8 Rumal cʼu riʼ, aretak kasam chic xeʼ ri jaʼ, ri Lokʼalaj Uxlabixel xkaj ulok puwiʼ ri areʼ xaʼ junam rucʼ jun palomax.

9 Y chi jumul, are waʼ cucʼut chquiwäch ri calcʼual ri achijab chi sucʼum ri be y latzʼ u wäch ri u chiʼ ri oquibal jawiʼ rajwaxic queboc wi. Ri areʼ u banom ri cʼutbal wächaj chquiwäch.

10 Y xubij chque ri calcʼual ri achijab: Chixinterenej. Rumal cʼu riʼ, lokʼalaj wachalal, ¿la cuyaʼ cäkaterenej ri Jesús we man cäkaj taj cäkanimaj ri u takbal ri Tataxel?

11 Y ri Tataxel xubij: Chiqʼuexaʼ i cʼux, chiqʼuexaʼ i cʼux, y chixkasax xeʼ jaʼ pa ri u biʼ ri lokʼalaj nu Cʼojol.

12 Y xukujeʼ xintatabej ri u chʼabal ri Cʼojolaxel, xubij chwe: Jachin ri cäkasax xeʼ jaʼ pa ri nu biʼ, ri Tataxel cuyaʼ che ri Lokʼalaj Uxlabixel, je jas u yaʼom chwe. Rumal cʼu riʼ, chixinterenej, y chibanaʼ jas iwilom chi nu banom ri in.

13 Rumal cʼu riʼ, lokʼalaj tak wachalal, we quiterenej ri Cʼojolaxel rucʼ ronojel iwanima, y man quiban tä quieb i wäch, mawi quixsubun chuwäch ri Dios, xane rucʼ jun sucʼalaj i rayibal, y quiqʼuex i cʼux che ri i mac, y quicʼut chuwäch ri Tataxel chi kas quiwaj quicʼam piwiʼ ri u biʼ ri Cristo rumal ri kasbal xeʼ jaʼ, y kas quiterenej ri Iwajawal, i Colonel cʼä chuxeʼ ri jaʼ, je jas ri tzij u bim ri areʼ, chiwilampeʼ, we quiban ronojel waʼ, kastzij quicʼam na ri Lokʼalaj Uxlabixel. Y cʼäte riʼ, kas cäpetic ri kasbal re kʼakʼ y re ri Lokʼalaj Uxlabixel. Cʼäte cʼu riʼ, quixcuinic quixchʼawic pa qui chʼabal ri angelib y quirak i chiʼ chunimarisaxic u kʼij ri Lokʼalaj Winak aj Israel.

14 Kastzij, lokʼalaj wachalal, jeriʼ xpe ulok chnuwäch ri u chʼabal ri Cʼojolaxel, xubij: Aretak i qʼuexom chic i cʼux cho ri i mac, y i kʼalajisam chuwäch ri Tataxel chi quiwaj quinimaj ri nu pixab. Jeʼ, aretak i cʼamom chic ri kasbal xeʼ jaʼ, y xukujeʼ ri kasbal re kʼakʼ, y ri Lokʼalaj Uxlabixel. Cʼu aretak quixcuinic quixchʼawic chic pa jun cʼacʼ chʼabal, cʼä pa ri qui chʼabal ri angelib, je cʼut, we tä quitas wib chnuwäch aretak i banom chic ronojel waʼ, utz na chiwe we tä ma tä iwetamam nu wäch.

15 Y xinta ri u chʼabal ri Tataxel, xubij: Kastzij wi, ri u tzij ri nu Lokʼ kastzij y sucʼalaj. Ri areʼ ri cukʼiʼ na cʼä pa ri qʼuisbal kʼij, ri areʼ cäcolotaj na.

16 Wacamic, lokʼalaj wachalal, rumal cʼu waʼ, wetaʼm chi xak xuwiʼ we jun winak cukʼiʼ cʼä pa ri qʼuisbal kʼij chuterenexic ri u cʼutbal ri u Cʼojol ri Dios cʼaslic, cäcuinic cäcolotajic.

17 Rumal cʼu riʼ, chibanaʼ ri jastak ri xinbij chiwe chi wilom pa tak ilonem chi cuban na ri Iwajawal, ri Esanel i mac. Rumal riʼ e cʼutum chnuwäch, rech chi quiwetamaj ri u chiʼ ri oquibal jawiʼ rajwaxic quixoc wi. Kastzij rajwaxic quixoc pa ri u chiʼ ri oquibal, are ri qʼuexbal cʼuxaj, y ri kasbal xeʼ jaʼ. Cʼäte cʼu riʼ, cäpe na ri esabal i mac rumal ri kʼakʼ y ri Lokʼalaj Uxlabixel.

18 Cʼäte cʼu riʼ, quirik iwib pa we sucʼumalaj chʼutin be ri copan pa ri junalic cʼaslemal. Kastzij ri ix oquinak chic pa ri u chiʼ ri oquibal rumal i banom je jas cubij ri takbal re ri Tataxel y ri Cʼojolaxel. Cʼu i cʼamom ri Lokʼalaj Uxlabixel. Ri areʼ cuyaʼ kʼalajisabal chquij ri Tataxel y ri Cʼojolaxel rech cätzʼakatisax ri yabal tzij banom rumal ri areʼ ri cubij chi we tä xixoc pa ri be, quicʼam na riʼ.

19 Wachanim cʼut, lokʼalaj wachalal, aretak ri ix oquinak chic pa ri sucʼumalaj latzʼ be, quintaʼ chiwe: ¿La banom chic ronojel? Kastzij, quinbij chiwe: man jeʼ tä riʼ. Ri ix ulinak cʼä jawiʼ ix cʼo wi xak xuwiʼ rumal ri u tzij ri Cristo, y rumal ri co i cojonic che ri areʼ, y i cuʼbam i cʼux che ronojel ri utz ri u banom ri areʼ, ri nim u cuinem che colotajibal.

20 Rumal cʼu riʼ, co chitakej rucʼ ri Cristo, rucʼ jun utzalaj kastzijalaj cojobal cʼuxaj, y rucʼ lokʼokʼebal che ri Dios y chque conojel ri achijab. We tä quiban jeriʼ, y quitatabej ri u tzij ri Cristo, y we quikʼiʼo cʼä pa ri qʼuisbal, kastzij na, ri Tataxel cubij chiwe: Quixcʼojiʼ na pa ri junalic cʼaslemal.

21 Wacamic, chiwilampeʼ, lokʼalaj wachalal, are waʼ ri be. Man cʼo tä chic jun be, mawi jun biʼaj chuxeʼ ri caj rumal rech cäcolotajic jun winak chupam ri rajawibal ri Dios. Kastzij cʼut, are waʼ ri lokʼalaj tijonem re ri Tataxel, y ri Cʼojolaxel, y ri Lokʼalaj Uxlabixel. Ri e areʼ e jun Dios y man queqʼuistaj taj. Amen.