1 Wachanim cʼut, lokʼalaj tak wachalal, ri in nu siqʼuim u wäch we jastak riʼ chiwe rech quiwetamaj chquij ri yabal tak tzij ri u yaʼom ri Kajawal chque conojel ri aj rachoch ri Israel.

2 Xukujeʼ rech quiwetamaj chi ri areʼ chʼawinak cucʼ ri aj Judeyib cumal qui chiʼ ri lokʼalaj tak kʼalajisanelab che ri cäpe na tzpa ri u chaplexic ri uwachulw, tzpa jun ijaʼlil cʼä che jun chic ijaʼlil, cʼä pa ri kʼij aretak quetzelex ulok che ri kastzij u winakil y mulaj re ri Dios. Pa ri kʼij riʼ, quemulix ulok pa ri ulew re ri quechbal y quetacʼabax na pa conojel qui wäch ri tasom tak ulew que.

3 Chiwilampeʼ cʼut, lokʼalaj wachalal, quinbij we jastak chiwe rech quixquicotic y quiwalajisaj i wäch che junalic rumal ri tewichibal ri cuyaʼ na ri Kajawal Dios paquiwiʼ ri iwalcʼual.

4 Wetaʼm chi qʼui chiwe sibalaj i tzucum rech quiwetamaj ri cäpe na. Rumal cʼu riʼ, wetaʼm chi iwetaʼm ri ix chi ri ka tiojil cäqʼuis na u wäch y cäcämic. Tzare, rucʼ ri ka tiojil cäkil na u wäch ri Dios.

5 Je cʼut, wetaʼm chi i wetaʼm ri ix chi pa tiojilal, ri areʼ ccucʼut na rib chquiwäch ri areʼ ri e cʼo pa Jerusalén, jawiʼ xujpe wi ri uj. Rajwaxic cʼut chi are waʼ cäcʼulmataj chquixol ri e areʼ. Jeriʼ u chomanic ri nimalaj Banel, chi cuyaʼ rib chuxeʼ ri qui takanic ri achijab pa tiojilal, y chi cäcämic rumal quech conojel winak, rech chi conojel winak cäquipatanij ri areʼ.

6 Rumal cʼut ri cämical petinak chquiwäch conojel ri winak rech cätzʼakatisaxic ri tokʼobisabal u rayibal ri nimalaj Banel rech ronojel ri cʼo cho ri uwächulew, rajwaxic xukujeʼ chi cʼo jun cuinem re cʼastajibal. Rajwaxic cʼut chi ri cʼastajibal cäpe paquiwiʼ conojel winak rumal ri tzakibal pa macaj. Cʼu ri tzakanic xpetic rumal ri u xalkʼatinic ri pixab. Cʼu rumal ri winak xetzakic, xetastaj chrij ri Ajawaxel.

7 Rumal cʼu riʼ, rajwaxic chi cʼo jun tojbal macaj ri man cäqʼuis taj. We tä ma tä jeriʼ, man cuyaʼ tä che ri ketzelal cätzelej u banic pa chʼajchʼojil, y ri nabe kʼatow tzij ri xkaj paquiwiʼ ri winak cäcʼojiʼ na che junalic. We tä cʼu jeriʼ, cʼo na chi we tiojil cäkʼoyic cho ri u nan, ri ulew, rech cäkʼayiʼc y cäcʼajinic, y man cäcʼastaj tä chic.

8 ¡Chiwilampeʼ ri retamabal ri Dios, ri relibal cʼuxaj, y ri rutzil! Rumal kastzij, we tä ri ka tiojil man cäcʼastaj tä chic, cʼo chi ri kuxlabal coc che u patanaxic ri jun ángel ri xtzak lok chuwäch jawiʼ cʼo wi ri Junalic Dios. Ri areʼ xux ri itzel, y man cäcʼastaj tä chic.

9 Cʼu ri kuxlabal cäquiban ne je ajs ri areʼ, y ri uj, we ne xujux itzelalaj angelib che jun itzel. Xujtastaj chrij ri Dios y xujcanaj canok rucʼ ri qui tat ronojel banal tak tzij, xujcanaj canok pa bis junam rucʼ. Ri areʼ xebusubuʼ ri nabe ka tat ka nan y xuqʼuex rib rech cäcaʼy je jas jun ángel re sakilal. Kas wi ri areʼ cusalabaj ri canimaʼ ri calcʼual ri achijab rech cäquimulij quib chi cʼuyal chubanic cämisanic y conojel u banic ri jastak chi kʼekumal.

10 Sibalaj nim ri rutzil ri ka Dios rumal cʼut chi cusucʼumaj ri ka be rech cujtoʼtajic pa u kʼab we itzelalaj xibinel. Kas wi ri xibinel riʼ, are ri cämical y ri xibalba. Ri in cʼut quinbij che ri u cämical ri tiojilal, y xukujeʼ ri u cämical ri uxlabal.

11 Y rumal ri u cholaj ri chomabal re ri Dios, ri Lokʼalaj Winak aj Israel, chresaxic ri ka mac, we cämical riʼ, ri nu bim chic, cäjach na lok chi jumul ri u cäminakib. Ri cämical riʼ, are ri mukbal rech ri tiojilal.

12 Cʼu we jun cämical re uxlabal, ri nu bim chic, cäjach na lok chi jumul ri u cäminakib. We cämical, re ri uxlabal, are ri xibalba. Rumal cʼu riʼ, rajwaxic chi ri cämical y ri xibalba quequitzelej ulok ri qui cäminakib. Ri xibalba rajwaxic quebutzelej ulok ri uxlabelab que ri e cʼo pa u kʼab ri qui cʼulel, ri itzel, y rajwaxic ri mukbal quebutzelej ulok ri qui tiojil ri e u chʼecom. Cʼäte cʼu riʼ, ri qui tiojil y ri uxlabelab que ri winak cäquirik na quib chi jumul. Are waʼ cäbantaj na rumal ri cuinem re ri u cʼastajibal ri Lokʼalaj Winak aj Israel.

13 ¡Sibalaj nim ri u cholaj ri cuban ri ka Dios! Rumal cʼut rajwaxic xukujeʼ chi ri cʼolbal re ri Dios yaʼom chque ri utzalaj uxlabelab quebutzelej ri uxlabelab que ri tzʼakatalaj winak, y ri mukbal quebutzelej ri qui tiojil ri tzʼakatalaj winak. Cʼäte cʼu riʼ, ri uxlabal y ri tiojilal cäquirik na quib chi jumul. Je cʼu riʼ, conojel ri winak riʼ majun mul cäsach na qui wäch, y e junalic wi, y e cʼaslic, y tzʼakat na ri quetamabal je jas ri uj pa tiojilal, xak xuwiʼ chi ri ketamabal cätzʼakatisax na.

14 Rumal cʼu riʼ, tzʼakat na ri ketamabal che ri ka mac, y ri ka tzʼilol, jeʼ, y xukujeʼ uj chʼanalic. Xukujeʼ ri sucʼalaj tak winak cʼo na tzʼakat ri quetamabal che ri qui quicotemal, y ri qui suqʼuilal. Querik na rucʼ chʼajchʼojilal, jeʼ, cʼä rucʼ ri atzʼiak re ri tzʼakatisabal.

15 Y cäcʼulmataj na chi aretak conojel winak e ocʼowinak chic tzpa we nabe cämical, cʼä pa ri cʼaslemal, cʼä aretak quecʼas che junalic, rajwaxic cʼut chi quetaqʼui chuwäch ri u cʼulibal ri kʼatbal tzij, ri Lokʼalaj Winak aj Israel. Cʼäte cʼu riʼ, cäpe ri kʼatbal tzij, y conojel cäkʼat na tzij paquiwiʼ je jas ri u beyal ri lokʼalaj ukʼatbal tzij ri Dios.

16 Kas wi ri Kajawal cʼaslic, y je jas ri areʼ cʼaslic, xukujeʼ ri sucʼalaj tak winak amakʼel e sucʼ wi, rumal ri Kajawal Dios u bim, y are riʼ ri u tzij ri areʼ, y man cäqʼuistaj taj u wäch. Ri e tzʼilalaj winak amakʼel e tzʼil wi. Ri e tzʼil, areʼ ri itzel y ri e rangelib. Ri e areʼ quebe na pa jun kʼakʼ banom umal quech, y man cäqʼuis taj u wäch. Ri cʼäx ri cäquirik na areʼ je jas jun cho re kʼakʼ y azufre, cʼu ri u reb ri kʼakʼ riʼ cäpakiʼc che junalic, y man cʼo tä u qʼuisic.

17 ¡Sibalaj ri rutzil y ri u tzʼakatisabal ri ka Dios! Ri areʼ cutzʼakatisaj ronojel u tzij. Cʼu ri u tzij elinak bic pa ri u chiʼ, y rajwaxic cätzʼakatisax ri u pixab.

18 Kastzij ri tzʼakatalaj winak, ri chʼajchʼojoxelab re ri Lokʼalaj Winak aj Israel, ri cojoninak che ri Lokʼalaj Winak aj Israel, ri qui chʼijom ri tak ripibal re ri uwächulew, y qui xutum ri qʼuixbal re, kastzij ri e areʼ cäquechbej na ri rajawibal ri Dios. Sucʼumam riʼ umal quech tzpa ri u chaplexic ri uwächulew. Ri e areʼ nojinak na che quicotemal chbe kʼij sak.

19 ¡Sibalaj nim ri relibal cʼuxaj ri ka Dios, ri Lokʼalaj Winak aj Israel! Ri areʼ quebutzokopij ri u chʼajchʼojoxelab pa u kʼab ri cʼäxalaj xibinel, ri itzel, y ri cämical, y ri xibalba, y ri jun cho re kʼakʼ y azufre, are ri cʼäx che junalic.

20 ¡Sibalaj nim ri u lokʼalabal ri ka Dios! Ri areʼ cʼut retaʼm ronojel, y man cʼo taj ri man retaʼm taj.

21 Ri areʼ cäpe na ulok cho ri uwächulew rech quebucolo conojel ri winak we tä cäquitatabej ri u chʼabal. Kas wi ri areʼ cʼut cuchʼij ri cʼäx quech conojel winak, jeʼ, ri cʼäx quech chquijujunal ri e cʼaslic, ri achijab, cʼu ri ixokib, y ri acʼalab ri e cʼo pa ri alaxic rech ri Adán.

22 Ronojel waʼ cuchʼijo rumal rech chi quecʼastaj na conojel ri winak, rumal rech chi coojel quetaqʼuiʼ chuwäch ri areʼ pa ri nimalaj kʼij re ri kʼatbal tzij.

23 Cʼu ri areʼ cutak chque conojel winak chi cäquiqʼuex qui cʼux che ri qui mac, y quekasax xeʼ jaʼ pa ri u biʼ. Cäquiban waʼ aretak tzʼakat chic ri qui cojonic che ri Lokʼalaj Winak aj Israel. We tä man cäquiban tä jeriʼ, man quecuin tä quecolotaj na chupam ri rajawibal ri Dios.

24 Cʼu we tä man cäquiqʼuex tä qui cʼux y man quecojon tä che ri u biʼ, y man quekasax tä xeʼ jaʼ pa ri u biʼ, y man cäquikʼiʼ taj cʼä pa ri qʼuisbal, kastzij quetzeletaj na. Jeriʼ rumal ri Ajawaxel Dios, ri Lokʼalaj Winak aj Israel, u bim canok.

25 Ri areʼ cʼut u yaʼom jun pixab, y jawiʼ man yaʼom tä wi jun pixab, xukujeʼ man cʼo tä ri cʼajisbal wächaj. Jawiʼ man cʼo tä wi ri cʼajisabal wächaj, xukujeʼ man cʼo tä ri etzelal. Jawiʼ man cʼo tä wi ri etzelal, ri relibal cʼuxaj ri Lokʼalaj Winak aj Israel cuchaʼo ri e areʼ, rumal ri tojbal macaj. Ri e areʼ quecolotajic rumal ri u cuinem ri areʼ.

26 Ri tojbal macaj ri xuban ri Cristo cutaʼ ri suqʼuilal cque conojel ri man yaʼom tä chque ri pixab. Rumal cʼu riʼ, quetzokopixic pa u kʼab ri cʼäxalaj xibinel, ri cämical y ri xibalba, y ri itzel, y ri cho re kʼakʼ y azufre, are ri cʼäx ri man caqʼuis taj. Quetzelex na ulok cho ri Dios, ri xuyaʼ chque ri cuxlab, cʼu areʼ ri Lokʼalaj Winak aj Israel.

27 Tzare tokʼob u wäch ri areʼ ri yaʼom ri pixab che, jeʼ, ri areʼ ri cʼo rucʼ conojel ri u takbal ri Dios, je jas ri uj, y cuxalkʼatij, y cutzak u kʼij ri u tijowem. ¡Kastzij, itzel ri u cʼolem!

28 ¡Sibalaj subunel ri u noʼj ri itzel! ¡Sibalaj cäquichomaj ri achijab chquij ri jastak ri man cʼo tä qui patan chque! ¡Sibalaj ri qui tukaril, y ri conalaj tak qui tzij ri achijab! Aretak qui tijom quib, cäquichomaj chi e etamanelab y man cäquitatabej tä ri u pixab ri Dios. Xane quetzelaj riʼ, y cäquichomaj chi quetaʼm chi ronojel. Rumal cʼu riʼ, ri quetamabal xak conalaj tak tzij, y man cʼo tä qui patan chque. Cʼu ri e areʼ quesachic.

29 Tzare utz coc jun che etamanel xaʼ we tä cunimaj ri u pixab ri Dios.

30 Tokʼob qui wäch ri kʼinomab, ri cʼo qʼui ri qui kʼinomal re ri uwächulew. Rumal chi e kʼinomab, quequetzelaj ri mebaʼib, y quecokataj ri cʼamelalaj tak winak. Ri canimaʼ cʼo pa ri qui kʼinomal. Rumal cʼu riʼ, ri qui kʼinomal, are ri qui dios. Kastzij, ri qui kʼinomal cäsach na cucʼ ri e areʼ xukujeʼ.

31 Tokʼob qui wäch ri e areʼ ri quecaʼy je jas ri tʼoyib rumal man cäcaj taj quetoic. Ri e areʼ quesachic.

32 Tokʼob qui wäch ri e areʼ ri quecaʼy je jas ri moyib rumal man cäcaj taj cäquilo. Ri e areʼ cʼut quesachic na xukujeʼ.

33 Tokʼob qui wäch ri e areʼ ri man cʼo tä retal ri canimaʼ, rumal ri quetamabal re ri itzel qui banom quebusoc na pa ri qʼuisbal kʼij.

34 Tokʼob u wäch ri cäbanow tzij. Ri areʼ cäqʼuiak na iquim pa xibalba.

35 Tokʼob u wäch ri cämisanel ri cäcämisan rucʼ rayibal. Ri areʼ cäcäm na.

36 Tokʼob qui wäch ri cäquiban qui mac cucʼ ixokib man e cʼulan taj. Ri e areʼ queqʼuiak na iquim pa xibalba.

37 Tokʼob qui wäch ri e areʼ ri cäquikʼijilaj ri alaʼs tak tiox. Ri itzel que conojel tak ri itzel cäquicot cumal ri e areʼ.

38 Cʼu xukujeʼ, tokʼob qui wäch ri e areʼ ri quecämic pa ri qui mac. Kastzij quetzelej na ulok cho ri Dios, y cäquil na u wäch, y quecanaj canok pa ri qui mac.

39 Lokʼalaj wachalal, chinatajisaj chi sibalaj itzel ri u xalkʼatinic ri u pixab ri Lokʼalaj Dios. Xukujeʼ itzel ri i yaʼic iwib che ri u takchibal che mac ri jun itzel subunel. Chnataj chiwe chi we quixnoʼjin rucʼ ri tiojilal, are ri cämical, tzare we quixnoʼjin rucʼ ri uxlabal, are kas wi ri junalic cʼaslemal.

40 Lokʼalaj wachalal, chitatabej ri nu tzij. Chinatajisaj ri nimalaj rutzil ri Lokʼalaj Winak aj Israel. Mibij chi nu bim cowilaj tak tzij chiwij. We tä quibij jeriʼ, quixyokʼowic ri kastzij, rumal in nu bim ri u tzij ri Banel iwech. Wetaʼm chi ri tzij re ri kastzij sibalaj co che ronojel jastak e tzʼil. Tzare ri e sucʼ man cäquixej tä quib chuwäch ri tzij riʼ, rumal ri e areʼ cäcaj ri kastzij y man quesalabax taj.

41 Rumal cʼu riʼ, lokʼalaj wachalal, chixkebok rucʼ ri Ajawaxel, ri Lokʼalaj Winak. Chinatajisaj chi sucʼ ri u be. Chiwilampeʼ, ri be chque ri achijab, are chʼutin, nitz u wäch. Pune tä jeriʼ, sucʼumam chquiwäch. Ri Lokʼalaj Winak aj Israel are ri chajinel re ri roquibal. Man cʼo tä u pataninel chiriʼ. Y man cʼo tä chi jun be, xak xuwiʼ rumal ri oquibal. Cʼu ri areʼ man cäsub taj, rumal cʼu ri Ajawaxel Dios ri u biʼ.

42 Xapachin cuchʼabej, ri areʼ cujako chuwäch. Ri areʼ queretzelaj ri etamanelab, ri e qui tijom quib, ri kʼinomab, ri e areʼ ri qui nimarisam quib cumal ri quetamabal, ri qui noʼjibal, y ri qui kʼinomal. We tä man caquiyaʼ tä can we jastak riʼ, y cäquibij chi e con chuwäch ri Dios, y sibalaj cäquimachʼachʼej quib, ri areʼ man cujak tä na chquiwäch.

43 Tzare ri jastak que ri etamanelab y ri winak utz qui chomabal quecʼuʼutaj na chquiwäch che junalic. Areʼ riʼ jun quicotemal ri sucʼumam can umal quech ri chʼajchʼojoxelab.

44 Lokʼalaj wachalal, chinatajisaj ri nu tzij. Chiwilampeʼ, quinwesaj ri watzʼiak y quintowij chiwäch. Quinboʼchiʼj che ri Dios re ri nu colotajic chi quinrilo rucʼ ri u bokʼwäch, ri cäril ronojel. Je cʼu riʼ, quiwetamaj na pa ri qʼuisbal kʼij, aretak cäkʼat tzij paquiwiʼ conojel winak rumal ri qui banom, chi ri Dios re Israel xrilo chi ri in xebintowij pa wanimaʼ ri itzel ri i banom. Rumal cʼu riʼ, quintas wib chuwäch ri i quiqʼuel, y quintaqʼuiʼ na chʼajchʼoj chuwäch ri Dios.

45 Lokʼalaj wachalal, chitasaʼ iwib chuwäch ri i mac. Chitowij can ri tikom chʼichʼ re ri areʼ ri cäraj quixuxim co. Chixkebok rucʼ ri Dios ri abäj re ri i colotajic.

46 Chisucʼumaj i cʼux che ri nimalaj kʼij aretak cäbantajic ri suqʼuilal chque ri e sucʼ. Ri kʼij riʼ, kas wi ri kʼij re ri kʼatbal tzij. Chisucʼumaj i cʼux rech chi man quiqʼuix tä rucʼ jun cʼäxalaj xibibal, rech man cänataj tä chiwe ronojel ri itzelalaj i mac rucʼ kʼalajil, y cʼo chi quibij: Lokʼalaj, lokʼalaj ri kʼatbal tzij la, Nimalaj Ajawaxel Dios. Wetaʼm nu mac. In nu xalkʼatim ri takbal la. Cʼu ri xalkʼatibal kas wech ri in. Rumal cʼu riʼ, ri itzel in u chʼecom y ri in tzakinak chic pa ri cʼäxalaj u bisonem.

47 Chiwilampeʼ wachalal, ¿la takal waʼ, chi quinnatajisaj chiwe ri cʼäxalaj kastzij paquiwiʼ we jastak riʼ? ¿La quinsoc ne iwanimaʼ we tä chʼajchʼoj i chomabal? ¿La kastzij in cʼo iwucʼ je jas u beyal ri u sakil ri kastzij we tä ma tä cʼo i mac?

48 Chiwilampeʼ, we tä ri ix chʼajchʼoj, man quintzijon tä iwucʼ chrij ri chʼajchʼojil. Tzare cʼut rumal man chʼajchʼoj tä ri ix, y quiniwilo jacha jun ajtij, rajwaxic quixintijoj che ri cucʼam na ulok ri macaj.

49 Kastzij, ri nu cʼux cäretzelaj ri macaj, cʼu ri wanimaʼ cäquicot che ri suqʼuilal. Y quinnimarisaj u kʼij ri lokʼalaj u biʼ ri nu Dios.

50 Tisaj wachalal, chijujunal ri ix ri cächakiʼj u chiʼ, tisaj ulok pa ri jaʼ. Ri areʼ ri man cʼo tä u puak, tasaj chulokʼic y cäwaʼic. Tisaj chulokʼic ri u waʼl uva y ri u tuʼ wacäx. Are waʼ man cʼo tä u rajil. Rumal riʼ man rajwaxic tä ri puak.

51 Rumal cʼu riʼ, mitzak i puak chquilokʼic ri jastak ri man cʼo tä qui patan. Xukujeʼ, mitzak i chac che ri man cäcuin tä cuyaʼ utzil. Chitampeʼ ri nu tzij, y chinatajisaj ri nu bim. Cʼu chixkebok rucʼ ri Lokʼalaj Winak aj Israel. Chixquicotok rucʼ ri man cäsach taj, y ri man cäpus taj, y chquicotok i cʼux pa utzil.

52 Chiwilampeʼ lokʼalaj wachalal, chinatajisaj ri u tzij ri i Dios. Chibanaʼ chʼawem rucʼ ri areʼ amakʼel pakʼij, y chiyaʼ maltiox che ri lokʼalaj u biʼ chakʼab. Quicotok ri iwanimaʼ.

53 Chichʼoboʼ ri nimalaj yabal tzij ri u yaʼom ri Kajawal y ri nimalaj utzilal chquwäch ri calcʼual ri achijab. Rumal ri u nimal, ri rutzil, y ri relibal cʼuxaj, ri areʼ u yaʼom u tzij chke chi man conojel tä ri kijaʼl quesachic, je jas u beyal ri tiojilal. Xane ri areʼ quebuchajij. Y cuban na chi pa ri tak ijaʼlil ri quepe na, quebux na ri e areʼ jun sucʼalaj u kʼab cheʼ rech ri rachoch ri Israel.

54 Wachanim cʼut wachalal, quinwaj quintzijon chi jubikʼ iwucʼ, tzare cʼä cʼo chuek quinbij na chiwe ri u nicʼajil ri nu tzij. Amen.