1 Na afei ɔbaa dɛ nna nyimpadodow kɛse a wɔyɛ Nephi no nkorɔfo no aboa hɔn ano, etwa temple no a ɔwɔ Dzifuu no ho ehyia; na nwanwa kɛse akã hɔn ma obiara nye no nua rodwendwen nwanwadze kɛse na wɔrekyerɛkyerɛ nsesa kɛse a esi bea no do.

2 Na wɔrotwetwe nkɔmbɔ so fa dɛm Jesus Christ yi a woeyi asɛnkyerɛdze a ɔfa no wu ho akyerɛ yi ho.

3 Na ɔbaa dɛ ber a wogu do rotwetwe nkɔmbɔ no, wɔtsee ndze bi fi sor; na wɔdze hɔn enyiwa kɔr aprɔw, na ndze a wɔtsee no wɔanntse ase; na ɔnnyɛ ndze dzendzen, anaa ndze kɛse; ɔyɛ ndze tseabaa, naaso ɔwɔɔ hɔn ma wɔtsee no wɔ hɔn mu ma hɔnho beebiara nnyi hɔ a annwosow; nyew, ɔwɔɔ hɔn akra mu, na ɔmaa hɔn akoma dzɛwee.

4 Na ɔbaa dɛ wɔtsee ndze no bio, na wɔanntse ase.

5 Na wɔtsee ndze no bio ne mpɛn a otsĩa ebiasa, na wobuee hɔn asowa ama wɔaatse; na wɔmaa hɔn enyiwa do wɔ sor kyerɛɛ bea a ndze no fi; na wɔhwɛɛ sor hann wɔ bea a ndze no fi bae no.

6 Na hwɛ, ne mpɛn a otsĩa ebiasa no wɔtsee ndze no ase; na ɔsee hɔn dɛ:

7 Hom nhwɛ mo Dɔba a ɔsɔ m’enyi yie, no mu na mahyɛ me dzin enyimnyam—hom ntsie no.

8 Na ɔbaa dɛ, ber a wɔtsee ase no wɔmaa hɔn enyiwa do kyerɛɛ sor bio; na hwɛ, wohun dɛ Ɔbarimba bi fi sor risian; na ɔhyɛ atar fitaa; na ɔbaa famu na obegyinaa hɔn finimfin, na nyimpadodow no nyinara daan hɔn enyiwa hwɛɛ no, na woenntum emmbue hɔn ano annkasa annkyerɛ hɔnho mpo, na woenntum anntse iyi ase, na wɔdween dɛ ɔbɔfo na oeyi noho akyerɛ hɔn.

9 Na ɔbaa dɛ ɔtseen ne nsa na ɔkasaa kyerɛɛ nkorɔfo no see dɛ:

10 Hom nhwɛ, Emi nye Jesus Christ no a nkɔnhyɛfo gyee dase dɛ ɔbɛba wiadze no.

11 Na hwɛ, Emi nye wiadze kan nye nkwa no; na manom kuraba wenwen no a Egya no dze maa me no ano, na mahyɛ Egya no enyimnyam dɛ mefaa wiadze bɔn too mo do, na no mu na fitsi ahyɛse no maayɛ Egya ne pɛ wɔ adze nyinara mu.

12 Na ɔbaa dɛ ber a Jesus kãa dɛm nsɛm yi no nyimpadodow no nyinara hwee famu; osiandɛ wɔkaa dɛ wɔahyɛ ho nkɔm wɔ hɔn mu dɛ Christ beyi noho akyerɛ hɔn ber a ɔafow akɔ sor n’ekyir no.

13 Na ɔbaa dɛ Ewuradze kasaa kyerɛɛ hɔn see dɛ:

14 Hom nsoɛr mbra me hɔ, ama hom eetum dze hom nsa akã me mfemu, na hom ehu mprɛgow n’ananmu wɔ me nsa nye m’anan ho, ama hom eehu dɛ Emi nye Israel Nyankopɔn no, nye asaase nyinara do Nyankopɔn a woeku no apata wiadze bɔn no.

15 Na ɔbaa dɛ nyimpadodow no kɔree, na wɔdze hɔn nsa kãa ne mfemu, na wohun mprɛgow n’ananmu wɔ ne nsa nye n’anan ho, na dɛm na hɔn nyinara yɛɛ, wɔkɔr no nkorkor kesii dɛ hɔn nyinara kɔree, na wɔdze hɔn enyiwa hunii, na wɔdze hɔn nsa so kãa hwɛe hun nokwar no na wɔgyee ho dase, dɛ ɔyɛ ɔno, nyia nkɔnhyɛfo no kyerɛɛw noho nsɛm dɛ ɔbɛba no.

16 Na ber a hɔn nyinara kɔree na hɔnankasa gyee ho dase no, wɔdze ndze kor tsẽaa mu see dɛ:

17 Hosanna! Nhyira nkã Ɔsorsor Nyankopɔn ne dzin! Na wotwae hwee Jesus n’ananadze, na wɔsɔɔr no.

18 Na ɔbaa dɛ ɔkasaa kyerɛɛ Nephi (na Nephi kã nyimpadodow no ho) na ɔsee no dɛ ɔmbra kan.

19 Na Nephi soɛree na ɔkɔr kan, na ɔbɔɔ no mu adze wɔ Ewuradze enyim na ofeew n’anan ho.

20 Na Ewuradze see no dɛ ɔnsoɛr. Na ɔsoɛree gyinaa n’enyim.

21 Na Ewuradze see no dɛ: Merema wo tum ma sɛ mofow kɔ sor bio a edze enuma nkorɔfo yi.

22 Na Ewuradze frɛɛ binom so bio, na ɔkãa dɛmara so kyerɛɛ hɔn; na ɔmaa hɔn tum dɛ wonnuma. Na ɔsee hɔn dɛ: Dɛm kwan yi na hom mfa do nnuma; na mma hom mma ekyingye biara mmba hom mu.

23 Nokwar mese hom dɛ, obiara a ɔnam hom nsɛm do bonu noho wɔ no bɔn ho na ɔbɛpɛ dɛ wonuma no wɔ me dzin mu no, hom mfa dɛm kwan yi do nnuma no—Hwɛ, hom bɔkɔ ekegyina nsu no mu, na hom enuma no wɔ me dzin mu.

24 Na afei hwɛ, dɛm nsɛm yi na hom nkã, hom mbɔ ne dzin, nse dɛ:

25 Ɔnam tumdzi a Jesus Christ dze ama me no do, munuma wo wɔ Egya, nye Ɔba, nye Sunsum Krɔnkrɔn ne dzin mu. Amen.

26 Na afei hom mfa no nhyɛ nsu no mu, na hom nyi no bio mfi nsu no mu.

27 Na dɛm kwan yi do na hom mfa nnuma wɔ me dzin mu; na hwɛ, nokwar mese hom dɛ, Egya nye Ɔba, nye Sunsum Krɔnkrɔn no yɛ kor; na mowɔ Egya no mu, na Egya no so wɔ mo mu, na Egya nye Ɔba no yɛ kor.

28 Na dɛ mbrɛ mahyɛ hom no, dɛmara na hom mfa nnuma. Na mma hom mma ekyingye biara mmba hom mu, dɛ mbrɛ esi pɛn no; eso mma hom mma ekyingye biara mmba hom mu a ɔfa me nkyerɛkyerɛ ho botae ho, dɛ mbrɛ esi hom mu pɛn no.

29 Na nokwar, nokwar mese hom dɛ, obiara a wentwiwentwi sunsum wɔ no mu no nnyɛ medze, mbom ɔyɛ abɔnsam dze, ɔno nye wentwiwentwi n’egya, na onunu nyimpa hɔn akoma ma wɔdze ebufuw dzi aper.

30 Hwɛ, iyi nnyɛ me nkyerɛkyerɛ, dɛ medze ebufuw bonunu adasa hɔn akoma ma woetsia hɔnho; mbom iyi nye me nkyerɛkyerɛ, dɛ hom nyi dɛm ndzɛmba yi akwa.

31 Hwɛ, nokwar, nokwar, mese hom dɛ, mebɛda me nkyerɛkyerɛ edzi akyerɛ hom.

32 Na iyi nye me nkyerɛkyerɛ, na ɔyɛ nkyerɛkyerɛ a Egya no dze ama me; na megye Egya no ho dase, na Egya no so gye moho dase, na Sunsum Krɔnkrɔn no so gye Egya no nye emi so ho dase; na megye dase dɛ Egya no ahyɛ adasa nyinara a wɔwɔ mbea nyinara do dɛ wonnu hɔnho na wɔngye me ndzi.

33 Na obiara a ɔgye me dzi, na wonuma no no, wɔbɛgye no nkwa; na hɔn na wobenya Nyankopɔn n’ahenman no ayɛ hɔndze.

34 Na obiara a ɔnnkɛgye me edzi na woennuma no no wobobu no fɔ.

35 Nokwar, nokwar, mese hom dɛ, iyi nye me nkyerɛkyerɛ, na megye ho dase dɛ ofi Egya no hɔ; na obiara a ɔgye me dzi no gye Egya no so dzi; na Egya no bɛgye moho dase akyerɛ no, na ɔdze ogya nye Sunsum Krɔnkrɔn no bɛba abɛsera no.

36 Na dɛm na Egya no dze bɛgye moho dase, na Sunsum Krɔnkrɔn no bɛgye Emi nye Egya no ho dase akyerɛ no; na Emi, na Egya no, nye Sunsum Krɔnkrɔn no yɛ kor.

37 Na mese hom bio dɛ, hom nnu homho, na hom nyɛ dɛ abofra kakraba, na wonnuma hom wɔ me dzin mu, annyɛ dɛm a hom nsa rennkã dɛm ndzɛmba yi.

38 Na mese hom bio dɛ ɔsɛ dɛ hom nu homho, na wonuma hom wɔ me dzin mu, na hom bɛyɛ dɛ mbofra, annyɛ dɛm a hom rinnya Nyankopɔn n’ahenman no nnyɛ homdze.

39 Nokwar, nokwar, mese hom dɛ, iyi nye me nkyerɛkyerɛ, na nyia osi ne dan wɔ iyi do no si ne dan wɔ ɔbotan do, na hɛl mbobow rinndzi no do konyim.

40 Na nyia ɔdze bi bɛkã iyi ho anaa obeyi bi efi mu, na ɔdze ato hɔ dɛ iyi yɛ me nkyerɛkyerɛ no, dɛm nyimpa no fi abɔnsam na onnsii dan no wɔ mo botan do; mbom osi dan no wɔ anhwea fapem do na sɛ nsuyirii ba na ehum tu no a hɛl mbobow no bobue agye no.

41 Dɛm ntsi, hom nkɔ nkorɔfo yi hɔ, na hom nkɛda nsɛm a makã yi edzi nkyerɛ nyimpa a wɔwɔ asaase n’ano n’ano.