1 Ao e koro bukina bwa te uea are Ramonaai e tuangiia ana toro bwa a na tei i moa ma ni kakoauai bwaai ni kabane are a tia n noori ni kaineti ma te bwai are e riki.

2 Ao ngke a bane n tia ni kakoauai bwaai ni kabane ake a tia n noori, ao e a tia n ongo aron ana kakaonimaki Amon ni kawakinaia ana nanai ni man, ao korakoran naba mwaakana n un ni kaaitara ake a tangiria n tiringnga, e bon rang korakora miimiina, ao e taku: E koaua bwa iai rakana nakon te aomata. Nooria, tiaki aio te Tamnei ae Korakora are e kakanakoi tuaa aika a korakora iaoia te botanaomata aio, ibukin aia tiritiri?

3 Ao a kaeka te uea ni kangai: Ngkana tao te Tamnei ae Korakora ke te aomata, ti bon aki ataia ma ti bon ti atai aikai, bwa e bon ^aaki kona n tiringaki irouia ana kairiribai te uea; ao a bon aki naba kona ni kamaenakoa ana nanai ni man te uea ngkana raora, ibukin rabakauna ao matoatoan korakorana; ngaia ae, ti ataia bwa raon te uea. Ao ngkai, O te uea, ti bon aki kakoaua bwa te aomata e na reke te aeka ni mwaakaa ae korakora aei kioina ngkai e bon aki kona n tiringaki.

4 Ao ngkai, ngke te uea e ongo taeka aikai, e taku nakoia: Ngkai I a ataia bwa bon te Tamnei ae Korakora; ao e a tia n ruo n te tai aei bwa e na kaawakin maiumii, bwa N na aki ^atiringingkami n aroia tarimi ake I tiringia. Ao ngkanne bon aio te Tamnei ae Korakora are ara bakatibu a tataekinna.

5 Ao ngkanne bon aio reireian Ramonaai, are e karekea mai iroun tamana, bwa iai te ^aTamnei ae Korakora. Ma e ngae ngke a kakoaua te Tamnei ae Korakora, a bon taku bwa are a karaoia e bon eti; ngaia are, Ramonaai e a bon moanna ni korakora nakonakona, n te maaku bwa mwiina e a tia ni kairua ngke e tiringia ana toro;

6 Bwa e a bon tia n tiringia aika a mwaiti ibukina bwa tariia a bon kamaenakoia aia nanai ni man n te tabo n ran; ao ibukin ae a maenako aia nanai ni man a bon tiringaki.

7 Ao ngkanne bon aia waaki Reimwanaite aikai bwa te tei i rarikin ranin Teebuti ni kamaenakoia aia nanai ni man aomata, bwa aonga ni kairia nako aika a mwaiti ake a kamaenakoi nakon oin abaia, bwa aio aia anga n rawebwaia i marenaia.

8 Ao e koro bukina bwa te uea are Ramonaai e titirakinia ana toro, ni kangai: E ngaa te mwaane aio ae iai mwaakana ae korakora?

9 Ao a taku nakoina: Nooria, are e kamwarakeia am aoti. Ao ngkanne te uea e tua nakoia ana toro, i mwaain kamooaia ana nanai ni man, bwa a na katauraoia ana aoti ma ana kai ni buaka, are e na mwananga iai nakon te aba are Nibwaai; bwa iai te baka n amwarake ae korakora ae e booaki n te aba are Nibwaai, iroun taman Ramonaai, are e uea iaon te aba ni kabuta.

10 Ao ngkanne ngke te uea are Ramonaai e ongo bwa Amon e katauraoi ana aoti ma ana kai ni buaka e bon mimi riki n aron ana kakaonimaki Amon, ma ni kangai: E koaua bwa bon akea te toro ma i buakoia ana toro ae kakaonimaki n aron teuaei; bwa e uring au tua ni kabane ma ni karaoi.

11 Ao ngkanne ma te koaua ao I a ataia bwa bon Te Tamnei ae Korakora aio ao I tangiria bwa e na rin irou, ma I aki ninikoria n tuatua.

12 Ao e koro bukina bwa ngke Amon e a tia ni katauraoia aoti ma kai ni buaka ibukin te uea ao ana toro, e rin nakon te uea, ao e nooria bwa moan te uea e a bon rang bitaki; ngaia are e nang otinako ni kitana matana.

13 Ao temanna ana toro te uea e taku nakoina, Rabana, are, e kona n rairaki nanona bwa, te mwaaka ke te uea ae korakora, ibukina bwa a taraa aia uea bwa e korakora; ngaia are e taku nakoina: Rabana, te uea e tangiriko bwa ko na tiku.

14 Ngaia are Amon e rairaki nakon te uea, ao e taku nakoina: Teraa ae ko tangiria bwa N na karaoia ibukim, O te uea? Ao te uea e aki kaeka i nanon te maan ae teuana te aoa, n aron aia tai, bwa e aki ataia bwa teraa ae e na riai n taekinna nakoina.

15 Ao e koro bukina bwa Amon e taku riki nakoina: Teraa ae ko tangiria mai irou? Ma te uea e aki kaeka.

16 Ao e koro bukina bwa Amon kioina ngke e kaonaki n Tamnein te Atua, ngaia are e ataa ana ^aiango te uea. Ao e taku nakoina: Tiaki ibukina bwa ko a tia n ongo bwa I kamaiuia am toro, ao I tiringia itiman tariia n te bana ao ma te kabaang, ma ni kakibanakoi baia ake temwaangina, bwa I aonga ni kamaiuia am nanai ni man ao am toro; nooria, Tiaki ngaia te bwai aei ae ko mimi iai?

17 I taku nakoim, bukin teraa ngkai e korakora miimiim? Nooria, ngai bon te aomata, ao ngai am toro; ngaia are, te bwai are ko tangiria ae eti, ao N na karaoia.

18 Ao ngkanne ngke te uea e a tia n ongo taeka aikai, e mimi riki, bwa e nooria bwa Amon e kona n ^aataa ana iango; ma e ngae n anne, te uea are Ramonaai e kaurea wiina ma n taku nakoina: Antai ngkoe? Ngkoe te Tamnei ae Korakora, are e ^batai bwaai ni kabane?

19 Amon e kaeka ao e taku nakoina: Tiaki.

20 Ao e taku te uea nakoina: Ko kanga n ataa ana iango nanou? Ko kona n taetae n aki maaku, ma n tuangai bwaai aika a kaineti ma bwaai aikai; ma n tuangai naba bwa n te mwaaka ra are ko tiringia ma ni kakibanakoi iai baia tarira ake a kamaenakoia au nanai ni man—

21 Ao ngkanne, ngkana ko tuangai bwaai ni kaineti ma bwaai aikai, te bwai are ko tangiria ao N na bon anganiko; ao ngkana ko kainnanoia ao N na bon tararuaiko n au tanga ni buaka; ma I ataia bwa ko korakora riki nakoia ni kabane; ma e ngae n anne te bwai are ko tangiria mai irou N na bon anganiko.

22 Ao ngkanne Amon e bon wanawana, e aki tiritiri, e taku nakon Ramonaai: Ko na kona n ongo n au taeka, ngkana I tuangko bwa n te mwaaka ra ae I karaoi bwaai aikai iai? Bwa aio te bwai ae I tangiria mai iroum.

23 Ao te uea e kaeka, ao e taku: Eng, N na kakoauai am taeka ni kabane. Ao ikai are e a mwane iai.

24 Ao Amon e a waaki n taetae nakoina ma te ^aninikoria, ma n taku nakoina: Ko kakoaua bwa iai te Atua?

25 Ao e kaeka, ma n taku nakoina: I aki ataia bwa teraa ae ko nanonna.

26 Ao ngkanne Amon e taku: Ko kakoaua bwa iai te Tamnei ae Korakora?

27 Ao e taku, Eng.

28 Ao Amon e taku nakoina: Aio bon te Atua. Ao e taku riki Amon nakoina: Ko kakoaua bwa te Tamnei ae Korakora aio, are te Atua, e kariki bwaai ni kabane ake a mena i karawa ao n te aonaba?

29 Ao e taku nakoina: Eng, I kakoaua bwa e karaoi bwaai ni kabane ake a mena n te aonaba; ma I aki ataa karawa.

30 Ao Amon e taku nakoina: Karawa bon te tabo are e mena iai te Atua ma ana anera ni kabane aika a tabu.

31 Ao te uea are Ramonaai e taku: E mena i etan te aonaba?

32 Ao Amon e taku: Eng, ao e taratara nako naano i aoia natia aomata; ao e atai ni kabane ana ^aiango ma ana kantaninga te nano: bwa ni baina are a bane ni karikaki iai bwaai ni kabane man moan karikan bwaai.

33 Ao te uea are Ramonaai e taku: I kakoauai bwaai ni kabane ake ko a tia n taekin. Ko kanakomaiakaki mai iroun te Atua?

34 Ao Amon e taku nakoina: Ngai bon te ^aaomata; ao te aomata ni moan karikan bwaai e karikaki ni katotongan te Atua, ao I weteaki iroun Tamneina ae Tabu bwa N na ^breirei bwaai aikai nakoia aomata, bwa aonga n uotaki nakon ataakin ae eti ao ae koaua;

35 Ao mwangan te ^aTamnei aei e mena inanou, are e anganai te ^brabakau, ao te mwaaka naba n aron au onimaki ma nanou are iroun te Atua.

36 Ao ngkanne ngke Amon e a tia n taekin taeka aikai, e a waaki man karikan te aonaba, ao karikan naba Atam, ma n tuanga bwaai ni kabane are e kaineti ma bwakan te aomata, ma ni ^akabwarabwara ma ni kawenea i matana te rongorongo ma ^bkoroboki aika tabu ibukiia aomata, are a bon tia n taekinaki irouia ^cburabeti, nakon naba te tai are tamaia, Riaai, e kitana iai Ierutarem.

37 Ao e kabwarabwara naba nakoia (nakon te uea ma ana toro) mwamwanangaia ni kabane aia bakatibu i nanon te rereua, ma kainnanoia ni kabane ni baki ma n taka, ma marakiia, ao a mwaiti riki.

38 Ao e kabwarabwara naba nakoia ni kaineti ma aia kaitara Reimwan ma Remuera, ao natin Itimaera mwaane, eng, ni kabane aroia ni kaitara e bon karakin; ao e kamatataa nakoia te rongorongo ma koroboki aika tabu man te tai are Riaai e kitana iai Ierutarem nakon te tai ae ngkai.

39 Ma tiaki ti aio; bwa e kamataata nakoia te ^ababaire ni kaboaki, are e katauraoaki man moan katean aan te aonaba; ao e kaota naba nakoia rokon Kristo, ao ana mwakuri ni kabane te Uea e bon kaoti nakoina.

40 Ao e koro bukina bwa i mwin are e a tia n taekin bwaai aikai ni kabane, ma ni kamataatai nakon te uea, te uea e kakoauai ana taeka ni kabane.

41 Ao e tang nakon te Uea, ni kangai: O te Uea, nanoanga; n aron am ^ananoanga ae mwaiti are e mena i aoia kaain Nibwaai, nakoiu, ao au aomata.

42 Ao ngkanne, ngke e a tia n taekina aio, e bwaka nako aontano, n aron ae mate.

43 Ao e koro bukina bwa ana toro a anaia ao a uotia nakon buuna, ma ni kawenea iaon te kainiwene; ao e wene n aron ae mate i nanon te maan ae uoua te ngaina ao uoua te tairiki; ao buuna, ma natina mwaane ao aine a tang ni wenei iaona, n aroia Reimwanaite, ma ni bwaebwaeti ibukin buana.