Te Atua, Atu n Atua
Iai teniman aomata aika kakaokoro n te Atu n Atua: Te Atua, te Tama ae Akea Tokina; Natina, Iesu Kristo ao te Tamnei ae Raoiroi. Ti kakoauaia n tatabemania nako (TOni. 1:1). Man te kaotioti ni boong aika kaitira ti ataia bwa te Tama ao te Nati iai rabwataia ae kona n ringaki ae te iriko ao te ri ao bwa te Tamnei ae Raoiroi bon te aomata ae te tamnei, ae akea irikona ao rina (R&B 130:22–23). Aomata aika teniman aikai a kororaoi katiteuanakiia ao a nakoraoi n te kantaninga ao aia koaua (Ioane 17:21–23; 2Nib. 31:21; 3Nib. 11:27, 36).
Te Atua te Tama
Bon te Tama, ke Erohim, are e atongaki n te ara ae te Atua. E aranaki bwa te Tama ibukina bwa bon tamaia tameneira (WI 16:22; 27:16; Maraki 2:10; Mat. 6:9; Ebeto 4:6; Ebera 12:9). Te Atua te Tama bon te tia tautaeka are moan te mwaake n te aonaba. Bon ngaia are te kabanea ni mwaaka (KB 18:14; Aram. 26:35; R&B 19:1–3), E atai bwai ni kabane (Mat. 6:8; 2Nib. 2:24), ao E mena n taabo nako rinanon Tamneina (TAre. 139:7–12; R&B 88:7–13, 41). Aomata iai reitakiia ae onoti ma te Atua are e kaokoroa te aomata man bwai aika karikaki ni kabane: mwaane ao aine bon natin te Atua aika tamnei (TAre. 82:6; 1Ioan. 3:1–3; R&B 20:17–18).
E karako tai aika tauaki mwia ibukin kaotin te Atua te Tama nakon ke n taetae nakon te aomata. A taekinaki ni koroboki aika tabu bwa E taetae nakon Atam ao Ewa (Mote 4:14–31) ao e kabwarabwara taekan Iesu Kristo n tai aika bati (Mat. 3:17; 17:5; Ioane 12:28–29; 3Nib. 11:3–7). E kaoti nakon Tetebano (Mwak. 7:55–56) ao Iotebwa Timiti (IT—R 1:17). I mwina E kaoti nakoia Iotebwa Timiti ao Sidney Rigdon (R&B 76:20, 23). Nakoia naake a tangira te Atua ao a kaitiakiia i matana, n tabetai te Atua e angania te tibwanga bwa a na nooria ao n ataia i bon irouia bwa bon Ngaia te Atua (Mat. 5:8; 3Nib. 12:8; R&B 76:116–118; 93:1).
Te Atua te Nati
Te Atua ae ataki bwa Iehova bon te Nati, Iesu Kristo (Itaia 12:2; 43:11; 49:26; 1Korin. 10:1–4; 1Tim. 1:1; Kaoti. 1:8; 2Nib. 22:2). Iesu e mwakuri i an ana kairiri te Tama ao e bon tabwanin nakoraoina ma Ngaia. Ni kabane aomata bon tarina ao mwaanena, bwa Ngaia bon te karimoa mai buakoia natin Erohim aika tamnei. Tabeua bwaai aika a na taraki ni koroboki aika tabu a aranna n te taeka ae te Atua. Te katooto, e taekinaki ni koroboki aika tabu bwa “Te Atua e karika karawa ma aonaba” (KB 1:1), ma ni koauana bon Iesu are te Tia Karikibwai i an ana kairiri te Atua te Tama (Ioane 1:1–3, 10, 14; Ebera 1:1–2).
Te Atua ae te Tamnei ae Raoiroi
Te Tamnei ae Raoiroi bon te Atua naba ao e aranaki bwa te Tamnei ae Tabu, te Tamnei, ao Tamnein te Atua, i buakon riki tabeua aekan ara aikai ao nakoa. Ma ana ibuobuoki te Tamnei ae Raoiroi, te aomata e kona n ata nanon te Atua te Tama ao n ataia bwa Iesu bon te Kristo (1Korin. 12:3).