1 Oh met keriah lap ehu tepida pohn sahpwo pwon pwehki wiewia suwed en aramas akan, me iei, ma aramas men pahn pwilikihda nah dipwisou de nah kedlahs pohn eh pasapas, de nan wasa me e kin nekidala, kilang, madahsang rahno, e sohte pahn kak diar, pwehki keriah lap wet pohn sahpwo.

2 Eri emen emen arams ahpw kolkihdi pehkan dahme pein ah, oh sohte men peki de pil kihla; oh emen emen aramas kin kolokolki pali maun en peh kan wasahn kolkol en nah kedlahs, pwe en doarehki pein ah dipwisou oh pein ah mour oh ah pwoud kan oh nah seri kan.

3 Oh met, mwurin erein sounpar riau, oh mwurin Sahred eh mehla, kilang, rien Sahred ohl pil pwarada oh mahwiniong Koriandumer, oh Koriandumer ahpw keme ih oh pwakialahng nan sapwtehn en Eikis.

4 Kedekedeo riehn Sahred ohlo ahpw mahwiniong ih nan sapwtehn en Eikis; oh mahwino doarala mehlel, oh kid kei mehkihla kedlahs.

5 Kedekedeo Koriandumer ahpw kapildi sapwtehno; oh rien Sahred ohlo ahpw karihsdo sang nan sapwtehno nihpwong, oh kemehla ekei pali nein Koriandumer sounpei kan, ni arail sakaulahr.

6 Oh e ahpw kohdo nan sahpw en Moron, oh koasonehdi pein ih nan mwoalen Koriandumer.

7 Kedekedeo Koriandumer ahpw koukousoan rehn nah sounpei kan nan sapwtehno erein sounpar riau, me kahrehda nan ahnsouo e ahpw alehdi kakehlail laud ong nah sounpei kan.

8 Met rien Sahred ohlo, me adaniki Kiliad, pil alehdier kakehlail ong nah sounpei kan, pwehki pwihn suwed rir kan.

9 Kedekedeo nah samworo lapalap kemehla ih ni eh ketiket nan mwolehu.

10 Kedekedeo emen pwihn suwed rir ko me kemehla ih sang ni ahl rir pwot, oh kalowehdi ong pein ih wehio; oh ede iei Lip; oh Lip wia ohl paliwar laud men, lapalahsang ohl koaros en nanpwungen aramas ko pwon.

11 Kedekedeo nan tepin pahr en Lip, Koriandumer ahpw kohdo nan sahpw en Moron, oh mahwingiong Lip.

12 Kedekedeo e ahpw mahwiniong Lip, me kahrehda Lip eh pelehdi pehu oh kawehla; ahpw, nein Koriandumer sounpei kan kohwei kehlail ong Lip, kahrehda eh tangala ni irepen sahpwo pohn oaroahro.

13 Kedekedeo Koriandumer ahpw pwakih ih; oh Lip ahpw mahwiniong ih pohn oaroahro.

14 Kedekedeo Lip ahpw mahwiniongada nein Koraindumer sounpei kan, kahrehda irail pwurehng tangala nan sapwtehn en Eikis.

15 Kedekedeo Lip ahpw pwakih ih lao e kohdo nan patapat en Eikohs. Oh Kiraindumer kahrehsang aramas kan koaros ni eh tangatangasang Lip nan pali en sahpwo me e kin tangala.

16 Oh ahnsou me e kohdo nan patapat en Eikohs e ahpw mahwiniong Lip, oh e palapaliong ih lao e mehla; ahpw, rien Lip ohl ahpw weliandi ih oh kohdohng Koriandumer, oh mahwino doarala mehlele, me kahrehda Koriandumer pwurehng tangasang mwohn nein rien Lip ohlo sounpei kan.

17 Met eden rien Lip ohlo iei Sihs. Kedekedeo Sihs ahpw pwakiala mwurin Koriandumer, oh e kawehla kahnihmw tohto, oh e kemehla koaros lih akan oh seri kan, oh e ahpw kin isikala kahnihmw kan.

18 Oh rohng kamasepwehk en Sihs kohwei wasa koaros nan sahpwo; ei, pakair ehu kohwei nan sahpwo—Ihs me kak uh mwohn nein Sihs sounpei kan? Kilang, e kin koahkoa sampah mwowe!

19 Kedekedeo aramas akan ahpw tepida kohpene nan sounpei kan, wasa koaros pohn sahpwo.

20 Oh irail pwalpeseng; oh ekei irail kohla iangala nein Sihs sounpei kan, oh ekei irail kohla iangala nein Koriandumer sounpei kan.

21 Oh mahwino me laud oh werei mehlel, oh ahnsou reirei kilel en nta oh kamaramas wiwiawi, me kahrehda pohn sahpwo pwon direkihla paliwar en me mehla kan.

22 Oh mahwino kin karuwaru oh wuk mehlel kahrehda sohte me luhwehdi pwe en saripedi mehla kan, ahpw irail kin karihswei sang ni nta keredi kohlahng nta keredi, pwilipwilikihdi paliwar en ohl akan, lih akan, oh seri kan mihseli pohn sahpwo, pwe en wiahla kenen mwahs me kin kangala uduk.

23 Oh pwowehu kohpeseng pohn sahpwo, iei pohn sahpwo pwon; eri aramas akan soansuwedkihda ni rahn oh nihpwong, pwehki pwowehu.

24 Ahpw, Sihs sohte uhdihsang pwakih Koriandumer; pwe e kahukihla me e pahn dupukiong Koriandumer eh ntahn rie ohlo, me kamakamalahr, oh mahsen en Kauno me kohieng Ihder me Koriandumer sohte pahn mehkihla kedlahs.

25 Oh met kitail kilang me Kauno ketin pwarengkinirail sapwellime engieng unsek, oh arail wiewia suwed kan oh tiahk suwed kan me kaunopadahr arail kamwomwala poatoapoat.

26 Kedekedeo Sihs ahpw pwakih Koriandumer kohla palimese, lao lel ni irepen sahpwo ni oaroahro, oh wasahu e mahwiniong Sihs erein rahn siluh.

27 Oh wen kamasepwehk en kamwomwalahn nein Sihs sounpei kan kahrehda aramas akan tepida masepwehk, oh tepida tang mwohn nein Koriandumer sounpei kan; oh irail tang kohla nan sahpw en Korior, oh kemehla toweh kan mwohrail, oh koaros me sohte iangirailla.

28 Oh irail kauwada imwarail impwal akan nan wahu en Korior; oh Koriandumer kauwada imwe impwal akan nan wahu en Suhr. Met wahu en Suhr karanihte dohl en Komnor; eri, Koriandumer ahpw kihpene nah sounpei kan pohn dohl en Komnor, oh ahpw pouk souwi ong nein Sihs sounpei kan pwe en luke iraildohng en mahwin.

29 Kedekedeo irail ahpw kohdo, ahpw pwurehng pwepwekihla; oh irail pwuredo keriapak, oh irail pwurehng pwepwekihla keriapak. Kedekedeo irail pwurehng pwurodo kesilipak en ahnsou, oh mahwino doarala mehlel.

30 Kedekedeo Sihs ahpw palapaliong Koriandumer oh kihong diren ohla kan; oh Koriandumer, lupungmaskihla pwehki nta laud kohsang, oh wisiksang duwehte me e mehla.

31 Met uwen ohl akan, lih akan oh seri kan me mehla pali koaros udahn laud kahrehda Sihs ruwesehki nah aramas akan me irail sohte pahn pwakih nein Koriandumer sounpei kan; eri, irail pwuralahng arail wasahn pweidi.