Iralaud 2
Mehn Sared kan kaunopada ong arail pahn seiloaklahng nan sahpwen inou—E wia sahpw pilipida ehu wasa me aramas anahne papah Krais ma soh re pahn kamwakel sang—Kauno ketin mahseniong rien Sared pwutako erein awa siluh—Mehn Sared kan wiahda wahr en nansed kei—Kauno mahsanihong rien Sared pwutako en medewehda ia mwomwen eh pahn mie mehn ser nan wahr en nansed ko.
1 Kedekedeo Sared oh rie pwutako, oh arail peneinei kan, oh pil kempoakepahn Sared oh rie pwutako oh arail peneinei kan, ahpw kohdihla nan wahu en paliepeng, (oh eden wahuo iei Nimrod, ahdo kohsang ni eden sounkesik kehlailo) iangahki neirail mahn kan me irail kihpene, mahn ohl oh lih en soangen mahn koaros.
2 Oh irail pil wiahda lidip kan oh koledi menpihr kan; oh irail ahpw pil kaunopada dewen mwahmw ehu me irail wahkihda mwahmw en nan pihl kan.
3 Oh irail ahpw pil wahda desured, me, wehwehki, sukehn longalap; eri met irail wahdahier simwisimw en longalap, oh soangsoang dipwisou koaros me mih pohn sahpwo, soangen weren tuhke koaros.
4 Kedekedeo ahnsou me irail kohdihdo nan wahu en Nimrod, Kauno ahpw ketidihdo oh mahseniong rien Sared ohlo; oh e ketiket nan dipwek ehu, oh rien Sared ohlo sohte kilang ih.
5 Kedekedeo Kauno ahpw mahsaniong irail me re pahn kohla nan sapwtehno, ei, wasa me saikinte pak ehu aramas kohla ie. Kedekedeo Kauno ahpw ketin kahluwa irail, oh ni eh ketiket nan depwek ieu e ahpw kin mahseniong irail, oh ketikihong irail kaweid en wasa me re pahn seiloakla ie.
6 Kedekedeo irail ahpw seiloak nan sapwtehno, oh wiahda wahr kei, me irail kotehkihla pihl tohto kei, oh limen Kauno kin wie kaukaweid irail ahnsou koaros.
7 Oh Kauno sohte mweidada me irail pahn uhdi palio sehdo nan sapwtehno, ahpw e ketin kupwuriki me irail pahn kohdohng nan sahpw en inouo, me pilipilda sang sahpw koaros, me Kauno Koht ketin nekinekid ong pwihn en aramas mour pwung.
8 Oh e ketin kahukihla nan sapwellime engieng ong rien Sared ohlo, me mehmen me pahn sapwasapw nan sahpw en inouo, sang ni ahnsouo kohkohlahte, pahn anahne papah ih, me wia Koht mehlel oh ihte, ma soh irail pahn kamwakel sang ahnsou me e pahn ketin engiengda unsek pahrail.
9 Oh met, kitail kak kilang kupwur en Koht ong sahpwet, me e wia sahpw en inou; oh sohte lipilipil wehi me pahn sapwaniki pahn anahne papah Koht, ma soh irail pahn kamwakel sang ahnsou me e pahn ketin engiengda unsek pahrail. Oh e pahn engiengda unsek pahrail ahnsou me irail pahn dipanla mehlel.
10 Pwe kilang, sahpw wet iei sahpw pilipilda sang sahpw koaros; eri mehmen me pahn sapwaniki pahn anahne papah Koht ma soh e pahn kamwakel sang; pwe iei kupwur poatoapoat en Koht. Oh aramas en sahpwo pahn kin lao dipanla unsek, re ahpw pahn kin kamwakel sang.
11 Oh met en kohieng kumwail, kumwail Mehn Liki kan, pwe kumwail en kak ese kupwur en Koht—pwe kumwail en koluhla, oh dehr usehla amwail wiewia suwed kan lao e doarala, pwe kumwail de pahn kihong pohmwail engieng unsek en Koht duwehte irail akan me kousoanehr pohn sahpwet arail wiahier.
12 Kilang, sahpwet iei sahpw pilipil ehu, oh sohte lipilipil wehi me pahn sapwaniki e pahn saledek sang kalidu, oh sang sensel, oh sang pahn wehi teikan koaros me mih pahn lahng, ma re pahn papahte Koht en sahpwet, me iei Sises Krais, me kasansaladahr sang ni soahng kan me se ntingihdier.
13 Oh met I pahn uhsehla ei ntingih poadoapoado; pwe kilang, kedekedeo Kauno ahpw ketin wahdo Sared oh riehko iei ni sehd lapo me irepeseng sahpw kan. Oh ahnsou me irail kohdo ni sehdo irail ahpw kauada imwarail impwal kan; oh irail kahdanihki wasahu Moriankumer; oh irail kin koukousoan nan impwal kan, oh koukousoan nan impwal kan pohn oaroahro erein sounpar pahieu.
14 Kedekedeo ni imwin pahr pahieuo Kauno ahpw pwurehng ketido rehn rien Sared ohlo, oh uh nan depwek ieu oh mahseniong ih. Oh Kauno ahpw mahseniong rien Sared ohlo erein awa siluh, oh ketin kapwkapwung ih pwehki eh sohte tamataman eker ni mwaren Kauno.
15 Oh rien Saren ohlo ahpw koluhkihla suwed me e wiadahro, oh ahpw eker ni mwaren Kauno ong rieh kan me ieiang ih. Oh Kauno ahpw mahsanihong ih: I pahn mahkehnguhk oh dipen riomw kan; ahpw kumwail sohte pahn pwurehng wiahda dihp, pwe kumwail pahn tamataman me Ngehnio sohte pahn ketin ieiang aramas ahnsou koaros; eri, ma kumwail pahn wia dihp lao kumwail direkihla dihp kumwail pahn kalipilipsang mwohn silangin Kauno. Oh ih ei kaweid kan met pohn sahpwo me I pahn kihong kumwail pwe en wia amwail sohso; pwe e pahn wia sahpw pilipilda sang sahpw koaros.
16 Oh Kauno mahsanih: Kohwei doadoahk oh wiahda, wahr kan ni wiepe me kumwail wiadahro. Kedekedeo rien Sared ohlo ahpw kohla doadoahk, oh pil rieh kan, oh wiahda wahr kan ni wiepe me irail wiadahro, nin duwen me Kauno kaweid kin irail. Oh wahrko tikitik, oh marahra pohn pihlo, duwehte marahrahn mehnpihr ni e peipei pohn pihl.
17 Oh wahrko wiawihda ni wiepe me teng mehlel, iei e kak kol pihl duwehte dahl; oh pah pil teng duwehte dahl; pengpengeh kan pil teng duwehte dahl; oh koadoke kan kengkengda; oh powe pil teng duwehte dahl; oh uwen reireiih, reireiihte tuhke pwoat; oh ahnsou me wenenihmwih kin ritidi, e pahn teng duwehte dahl.
18 Kedekedeo rien Sared ohlo ahpw kapakapiong Kauno, ndinda: Maing Kaun, I wiahier doadoahk me komwi ketin mahsanihong ie, oh I wiadahr wahr kan ni duwen kaweid me komwi mahsanihong ie.
19 Oh kilang, Maing Kaun, sohte marain nan wahroko; iawasa me se pahn kin katanga ie? Oh se pahn pil mehla, pwe se sohte kak esingek loale, ihte kisinieng me mih loale; eri se pahn mehla.
20 Oh Kauno mahsanihong rien Sared ohlo: Kilang, ke pahn wiahda pwoahr powe, oh pil pah; oh ahnsou me kumwail pahn anahne kisinieng a kumwail pahn kihsang pweinen pwoahro oh alehdi kisinieng. Oh ma pihlo pahn kohda pohmwail, kilang, kumwail pahn pwaindi pwoaro, pwe kumwail de mehla nan pihl me pahn lapakehlong.
21 Kedekedeo rien Sared ohlo ahpw kapwaiada, nin duwen mahsen en Kauno.
22 Oh e pwurehng eker Kauno ndinda: Maing Kaun, kilang I wiadahr ni duwen dahme komwi mahsenihnong ie; oh I kaunopadahr wahr kan ong neir aramas kan, oh kilang sohte e rotorot loale. Kilang, Maing Kaun, ia duwe komwi pahn mweidehng kiht sen kotehla pihl lap wet nan rotorot?
23 Oh Kauno ahpw mahsanihong rien Sared ohlo: Dahme ke men I pahn wia pwe en mie marain nan wahr akan? Pwe kilang, kumwail sohte pahn kak ahneki wenihmwtok kan, pwe e pahn mwerpene; de pil wahda kisiniei, pwe kumwail sohte pahn kohwei sang ni marain en kisiniei.
24 Pwe kilang, kumwail pahn duwehte roahs nan werengen sehdo; pwe lapalahn ilok kan pahn sawasawa pohmwail. Ahpw, I pahn kapwureikumwaildahsang nan wasa loal en sehdo; pwe kisinieng kan kin ipisang nan eweiet, oh pil kotou kan oh lapake kan ngehi me kin kadarewei.
25 Oh kilang, I pahn kaunopuhkada ong mepwukat; pwe kumwail sohte pahn kak kotehla wasa loal wet, ihte ma I pahn kaunopada kumwail ong ilok en nansedo, oh kisinieng kan me pahn kohdo, oh lapakeh kan me pahn kohdo. Eri dahme ke men I pahn kaunopkinkumwail pwe en kak mie marain rehmwail ahnsou me kumwail pahn duhla wasa loal en nan sehdo?