1 Oh Kauno ahpw mahsanihong rien Sared ohlo en kohdihla sang pohn nahnao sang mwohn silangin Kauno, oh ntingihdi soang kan me e kilangehr; oh e sohte pahn mweimweiong en kohieng aramas akan lao lel mwurin eh pahn langada pohn lohpwuo; oh iei kahrepe wet me nanmwarki Mosaia nekinekidki, pwe e sohte pahn kohdo ong sampah lao lel mwurin Krais e pahn kasalehiong pein ih sapwellime aramas kan.

2 Oh mwurin Krais e ketin kasalehiongehr pein ih, ni mehlel, rehn sapwellime aramas akan, e mahsanih me ntingko en sansalada.

3 Oh met, mwurin mwo, irail koaros pwupwidi nan peikasal; oh sohte emen ihte Mehn Leimen kan, oh irail soikalahr rongamwahu en Krais; eri I pahngokieng me I pahn pwurehng ekihla nan pwehl.

4 Kilang, I ntingihdier pohn pileit pwukat udahn dahme rien Sared ohlo kilangada; oh saik pak ehu mehkot laud kasansalada duwehte soahng kan me kasansalehng rien Sared ohlo.

5 Eri Kauno ketin mahsanihong ie I en ntihngihdi; oh I ntingihdier. Oh e ketin mahsanihong ie I en katengepene; oh e pil ketin mahsanihong ie me pahn tangepene mehn kawehwehko; eri I katengepenehier mehn kawehwehko, nin duwen kosonned en Kauno.

6 Pwe Kauno ketin mahsaniong ie: E sohte pahn kohwei rehn Mehn Liki kan lao lel rahno me irail pahn koluhkihla diparail kan, oh mwakelekella mwohn Kauno.

7 Oh Kauno mahsanih, ni rahno me irail pahn pwoson ie duwehte rien Sared ohlo, pwe irail en kak mwakelekela rehi, eri I ahpw pahn kasalehiong irail soahng kan me rien Sared ohlo kilangada, iei kapwkapwarahda ong irail ei kaudiahl akan koaros, Sises Krais, Sapwellimen Kohto, Sahm en nanleng oh sampah, oh audaparah kan koaros me ketin mahsanih.

8 Oh mehmen me pahn uhwong mahsen en Kauno, e konehng en riahla; oh mehmen me pahn kahmahmki mepwukat, e konehng en riahla; pwe I sohte pahn kasalehiong ih mehkot laudsang, Sises Krais ketin mahsanih; pwe iei ngehi me ketin mahsanih.

9 Oh sang ni ei pahngok nanleng kan kin ritida oh ritidi; oh sang ni ei mahsen sampah kin rerrer; oh sang ni ei pahngok towe kan pahn mehla, iei sang ni kisiniei.

10 Oh mehmen me sohte pahn kamehlele ei mahsen kan e pil sohte pahn kamehlele nei tohnpadahk kan; oh kumwail medewe ma mehlel ngehi me koasoi; pwe kumwail pahn ese me ngehi me koasoakoasoi, ni imwin rahno.

11 Ahpw mehmen me pahn kamehlele mepwukat me I koasoia, iei ih me I pahn pwarengki kaudiahl akan en Ngehnio, oh e pahn ese oh kadehdehki. Pwehki sang ni Ngehnio e pahn esehki mepwukat mehlel; pwe e pahn kangongehki aramas akan en wia me mwahu.

12 Oh mehkoaros me kin kangoange aramas akan en wia me mwahu kin sang rehi; pwe sohte me mwahu kin kohsang ekei ihte sang rehi. Ih ngehi me kin kahluwa aramas akan ong mwahu koaros; mehmen me sohte pahn kamehlele ei mahsen akan e sohte pahn kamehlele ie—me ngehi iei ih; oh mehmen me sohte pahn kamehlele ie, e sohte pahn kamehlele Sahmo me ketin kadariehdo. Pwe kilang, ngehi iei Sahmo, ngehi iei maraino, oh mouro, oh mehlelo en sampah.

13 Kohdo rehi, kumwail Mehn Liki kan, oh I pahn kasalehiong kumwail soahng kesempwal akan, eripito me ekiekla pwehki sohpwoson.

14 Kohdo rehi, kumwail peneinei en Israel, oh e pahn kasansal ong kumwail uwen kesempwal en soahng kan me Sahmo ketin kaunopadahng kumwail, sangete ni kepikipikdahn sampah; oh e saikinte kohdohng kumwail, pwehki sohpwoson.

15 Kilang, ahnsou me kumwail pahn tehrpeseng kahdeng en sohpwoson me kin kahrehiong amwail mour suwed kan en duduwehte, oh keptakai en mohngiong, oh maskun en madamadau, eri soahng kesempwal oh kapwuriamwei kan me ekieksang kumwail sangete ni poahsondahn sampah—ei, ahnsou me kumwail pahn eker Sahmo ni mwarei, nan mohngiong karakarahk oh ngehn peik, eri kumwail pahn ese me Sahmo ketin tamatamante inouo me ketin wiahiongehr amwail pahpa ko, kumwail peneinei en Israel.

16 Oh eri ei kaudiahl kan me I elehda Sohn nei laduo en ntingihdi pahn pwarpwarada mwohn mesen aramas koaros. Tamataman, ahnsou me kumwail pahn kilang mepwukat, kumwail pahn ese me ahnsouo kerendohr me re pahn sansalada ni mwekid.

17 Eri, ahnsou me kumwail pahn alehdi poadoapoad wet kumwail en ese me doadoahk en Sahmo tepier wasa koaros pohn sahpwo.

18 Eri, koluhla kumwail koaros me mih ni keimw en sampah, oh kohdo rehi, oh kamehlele ei rongamwahu, oh papidaisla ni mwarei; pwe mehmen me pahn kamehlele oh papidaisla pahn komourla; ahpw mehmen me sohte pahn kamehlele pahn lekidekla; oh kilel akan pahn kin ieiang irail me kamehlele mwareiet.

19 Oh meid pai mehmen me pahn kin loaloapwoat ong mwareie ni imwin rahno, pwe e pahn kohdahla oh kousoan nan wehio me kaunopadahng ih sangete ni poahsondahn sampah. Oh kilang iei ngehi me koasoiahier. Ahmen.