1 Oh met ngehi, Moronai, pahn uhsehla ntingihdi poadoapoad en Sared oh rie ohlo.

2 Pwe kedekedeo mwurin Kauno e ketin kaunopadahr takai kan me rien Sared ohlo wahdahla pohn nahnao, rien Sared ohlo ahpw kohdihdosang pohn nahnao, oh e ahpw kihong takai ko nan wahroko me kaunopdahr, ehu nan ehu pwelengen wahroko; oh kilang, re kamarainihda nan wahroko.

3 Oh met Kauno ketin elehdahier takai kan en marain nan rot, pwe en kamarainih ohl akan, lih akan, oh seri kan, pwe irail en dehr kotehla pihl lap akan nan rot.

4 Kedekedeo ahnsou me irail kaunopadahr soangsoangen mwonge kan koaros, pwe irail en kak momouriki pohn pihlo, oh pil mwonge ong neirail pelin kou kan oh sihp kan, oh sohte lipilipil soangen mahn laud de mahn de men pihr me irail pahn wahda—kedekedeo ahnsou me irail wiahier mepwukat irail ahpw doulong nan werarail wahr akan, oh seiloakwei nan sehdo, liklikih Kauno arail Koht ong pein arail.

5 Kedekedeo Kauno Koht ahpw ketin elehda kisineng kehlail ehu en ipir pohn mesen pihlo, kohlahng nan sahpw en inouo; oh met irail ahpw lekilekidek kohwei pohn ilok en nan sehdo mwohn kisiniengo.

6 Kedekedeo pak tohto irail kin serdi wasa loal pahn sehdo, pwehki nahnahn ilok kan me kin sawasawa pohrail, oh pil pwehki angin kisinieng kehlail oh kamasepwehk me kin kohsang ni kehlail en kisiniengo.

7 Kedekedeo ahnsou me irail kin seridi wasa loal sohte pihl kak kaweirailla, pwehki wararail wahroko me teng duwehte dahl ieu, oh pil re teng duwehte weren Noha warihmwo; eri ahnsou me irail kin mihla pahn pihl irail kin eker Kauno, oh e ahpw kin ketin pwurehng kapwureirailda pohn pihlo.

8 Kedekedeo kisiningo sohte uhdihsang ipir irail kohlahng nan sahpw en inouo erein arail mihmi pohn pihlo; oh met kisiniengo wie ipihpir irail kohwei.

9 Oh irail ahpw kin kokouliki kaping ong Kauno; ei, rien Sared ohl ahpw kin koulki kaping ong Kauno, oh e ahpw kapingkihong oh kepinga Kauno rahno pwohn; oh ahnsou me e soutikpene, irail sohte uhdihsang kepkepinga Kauno.

10 Oh met irail wie kohkohwei; oh sohte mahn kamasepwehk en nan sed kak kawehla irail, de pil roahs me kak kawehla irail; oh mie marain rehrail ahnsou koaros, mehnda ma irail mih pohn pihlo de pil pahn pihlo.

11 Oh met irail wie kohkohwei; rahn silipwiki pahisek pahieu irail mihmihki pohn pihlo.

12 Oh irail ahpw serada pohn oaroahr en sahpw en inouo. Oh ahnsou me irail sokedi pohn oaroahr en sahpw en inouo irail poaridi pohn sahpwo, oh karakarahkiala pein irail mwohn Kauno, oh ahpw sengisengki arail peren mwohn Kauno, pwehki reken sapwellime kupwur kalahngan akan ong irail.

13 Kedekedeo irail ahpw kohwei pohn sahpwo, oh tepida kaunopada en mwetuwelih pwehlo.

14 Oh Sared nainiki pwutak pahmen; oh edarail iei Seikom, oh Kilkah, oh Meia, oh Oraia.

15 Oh rien Sared ohlo pil nainikihda pwutak kan oh serepein kan.

16 Oh kempoakepahn Sared oh rie ohlo uwen tohtohn irail meh riehk riemen; oh irail pil nanikihda pwutak kan oh serepein kan mwohn arail kohdo nan sahpw en inouo; oh eri irail tepida wie tohtohla.

17 Oh irail padahngkihda weweidiki karakarahk mwohn Kauno; oh irail pil alehdi padahk sang powe.

18 Kedekedeo irail ahpw tepida parpeseng pohn sahpwo, oh kaparaparala oh kaunopada mwetuwelih pwehlo; oh irail kehlailla nan sahpwo.

19 Oh rien Sared ohlo tepida mahmahla, oh e kilang me e pahn kereniongehr mehla oh seridi; eri e ahpw ndaiong Sared; Kitail kihpene neitail aramas akan pwe kitail en wadekidi irail meh depe, pwe kitail en kak esehsang irail dahme irail mwahuki sang kita mwohn ata pahn mehla oh seridi.

20 Oh aramas akan ahpw kapokonpene nin duwen dahme e nda. Met uwen tohtohn nein rien Sared ohlo pwutak kan oh serepein kan meh riehk riemen; oh uwen tohtohn nein Sared pwutak oh serepein kan meh ehk riemen, oh e nainiki pwutak pahmen.

21 Kedekedeo ira ahpw wadekidi uwen tohtohn neira aramas; oh mwurin ara wedekidier irail meh depe, ira ahpw kalelapak rehrail soahng kan me irail men re en wia mwohn ara pahn mehla oh seridi.

22 Kedekedeo aramasoko ahpw inangih me ira en kasarawiala emen neira pwutak ko en wia arail nanmwarki.

23 Oh met kilang, e kansensuwed ong ira. Oh rien Sared ohlo ahpw ndaiong irail: Ni mehlel soahng wet kin elehiong kalidu.

24 Ahpw Sared ndaiong rie ohlo: Mweidehng irail re en ahnekki nanmwarki. Oh eri e ahpw ndaiong irail: Kumwail pilada emen sang nan nait pwutak kan emen nanmwarki, iei me kumwail pwungki.

25 Kedekedeo irail pilada nein rien Sared ohlo nah meseniho; oh ede iei Peikak. Kedekedeo e ahpw kasohwe oh sohte men wia arail nanmwarki. Oh aramasoko men eh pahpa en idingkihong, ahpw eh pahpa sohte men wia; oh e kehkehlingkihong irail me irail sohte pahn idingki emen en wia arail nanmwarki.

26 Kedekedeo irail pilada rien Peikak pwutangko koaros, oh irail sohte men wia.

27 Kedekedeo pil sohte nein Sared pwutangko me men wia, irail koaros ihte emen me soh; oh Oraiah ahpw kasarawiala en wiahla nanmwarki en aramas kan.

28 Oh e tepida kakaun, oh aramas akan tepida pweida; oh irail kepwehpwehla mehlel.

29 Kedekedeo Sared ahpw mehla, oh pil rie ohlo.

30 Kedekedeo Oraia ahpw weweid ni karakarahk mwohn Kauno, oh ahpw tamataman soahng kesempwal akan men Kauno ketin wiahiongehr eh pahpao, oh pil padahkihong sapwellime aramas soahng kesempwal akan me Kauno ketin wiahiongehr arail pahpa ko.