1 Kunantaj, munasqa hermanosníy, mana Diosman kutirinkichischu chayqa, qankunaj wasisniykichis ch’in pacha jinalla saqesqas kanqanku, chayta willaykichis.

2 Arí, sichus mana Diosman kutirinkichis chayqa, warmisniykichis uyway p’unchaypi razonniyoj kanqanku waqanankupaj; ayqeyta munankichis manataj ni maypipis pakakunaykichispaj lugar kanqachu; arí, ay wijsallikusqa kajkunamanta, imaraykuchus paykuna llasa kanqanku mana ayqeyta atinankupaj; chayrayku sarusqas kanqanku, saqesqallataj kanqanku wañunankupaj.

3 Arí, ay kay Nefij llajtun nisqa runasmanta mana Diosman kutirikojtinkoqa, kay paykunaman rikuchisqa señalkunata, t’ukuchisnakunatawan rikojtinku; paykunaqa Señorpaj ajllasqa runas kanku; arí, Nefij llajtanta munakun Dios, paykunata k’amillantaj; arí, sajra ruwananku ’únchaykunapi paykuna k’amisqa kanku paykunata Dios munakusqanrayku.

4 Chaywampis hermanosníy, lamanitakunata chejnimpuni paykunaj ruwasqasninku sajra kasqankurayku, kaytaj tatasninkoj yachayninkuna may sajra kasqanrayku. Chaywampis, qhaway, salvacion paykunaman jamusqaña nefitakunaj willasqasninkunejta; kaypajtaj Señorqa p’unchayninkunata karunchan.

5 Paykunaj kuraj parten ruwanankoj ñannimpi purinku, Diospa ñawpaqempi allinta qhawanku imaynatachus purinku, paypa kamachisqasninta, nisqasninta, juiciosnintawan junt’ayta munallankutaj Moisespa leyninman jina, chayta qhawanaykichista munayman.

6 Arí, niykichis, paykunamanta asqan ashkha runas kayta ruwanku, puchoj hermanosninkuta cheqa kajmanta yachayman apanankupaj mana sayk’ukuspa ruwashanku; chayrayku sapa p’unchaypi ashkha runas paykunaman yapakushanku.

7 Paykunamantataj, pikunachus cheqa kajmanta yachaymana apachisqas, tatasninkoj sajra, millay yachayninkunamanta yachanankupaj, santa escriturasta creeyman apachisqastaj, arí, llimphuchasqa profetaspa sut’inchayninkunata, mayqenkunachus escribisqas, mayqenkunachus Señorpi feniyoj kayman pusanku, Diosman kutiriyman pusallankutaj, mayqen Diosman kutiriychus, feniyoj kaytajchus sonqo tijrayta paykunaman apan, chaykunata creenankupaj, chaykunata kikillaykichismanta yachankichis, qhawasqaykichisrayku.

8 Chayrayku pikunachus kaykama chayamunku, kikillaykichismanta sinchi mana kuyoj feniyoj kasqankuta yachankichis, libre kanankupaj imapichus feniyoj kasqankutapis yachankichis.

9 Yachankichis maqanakunasninkuta p’ampasqankuta, chay maqanakunasta jap’iyta manchachikusqankutapis, ichapis juchallikusunman nispa, chaytapis yachallankichistaj; arí, juchallikuyta manchachikojta rikunkichis — paykuna enemigosninkuwan saruchejta, wañuchejtapis saqekonqanku, manataj espadasninkuta contrankupaj oqharenqankuchu, kaytaj Cristopi feniyoj kasqankurayku.

10 Kunantaj, imapichus creenku, chaypi mana kuyoj kasqankurayku, k’anchaypi sumajta sayasqankurayku, Señorqa paykunata bendicenqa, p’unchayninkunata karunchanqataj, sajra ruwasqankuraykupis.

11 Arí, mana creeyman urmakojtinkupis Señor p’unchayninkuta karunchanqa, tatasninchismanta, profeta Zenosmanta, ashkha waj profetasmantapis willasqa p’unchay jamunankama, chay p’unchaypitaj hermanosninchis, lamanitakunapis, watejmanta cheqa kajmanta yachayman mosojyachisqas kanqanku.

12 Arí, niykichis, qhepa p’unchaykunapi Señorpa qosaj nispa nisqasnin hermanosninchisman, lamanitakunaman, qosqos kanankuta; ancha phutiyniyoj kanankuwampis, jallp’a patapi kaymanta jaqayman pusasqas kanankuwampis, qhatiykachasqas kanankuwampis, maqasqas, ayqechisqastaj kanankuwampis, mana ni maymampis rinankupaj, tukuy chaykunawampis Señor paykunawan khuyayniyoj kanqa.

13 Kaytaj sut’inchayman jina, cheqa kajmanta yachayman, imachus Kacharichejninkumanta, jatun cheqa Michejninkumantapis yachay, chayman pusasqas kanqanku, paypa ovejasninwan yupasqastaj kanqanku.

14 Chayrayku niykichis, mana Diosman kutirinkichischu chayqa, paykunata aswan allin renqa.

15 Jatun ruwanas, mayqenkunachus qankunaman qhawachisqas, chaykuna qhawachisqas paykunaman, pikunachus mana creeyman urmanku tatasninkoj ruwasqasninkurayku chayqa, kikillaykichismanta rikunkichis mana ni jayk’ajpis watejmanta mana creeyman urmanankuta.

16 Chayrayku, nin Señor: Mana q’alamantachu paykunata tukuchisaj, astawanqa yuyayniypa p’unchaynimpi paykunata ñoqaman kutichismusaj, nin Señor.

17 Kunantaj, nin Señor, nefitakunamanta parlaspa: Mana Diosman kutirinkuchus paykuna, munayniyta manataj ruwankuchus chayqa, q’alitumantapuni paykunata thunisaj, nin Señor, mana creesqankurayku, ashkha jatun ruwanas, mayqenkunatachus paykuna chawpinkupi ruwarqani, chaykunawampis: Señorpa kawsasqanman jinataj kaykuna junt’akonqanku, nin Señor.