1 Ujtawan hermanosníy, qankunata wajyaykichisman astawan kapusqayrayku willasunaykichispaj. Imaraykuchus willanay tiyan imachus kananmanta.

2 Imastachus willasqaykichis, chaykunata Diosmanta kachasqa angel ñoqaman willawarqa. Paytaj niwarqa: Rijch’ariy. Ñoqataj rijch’arerqani. Paytaj ñawpaqeypi sayarerqa.

3 Paytaj niwarqa: Rijch’ariy, uyariytaj imastachus nisqayki. Imaraykuchus may kusiyniyoj willaykunata willaj jamuni.

4 Imaraykuchus Señor qampa mañankusqasniykita uyarin. Allin sonqoyoj kasqaykita rikun ñoqata kachamuwarqataj qanman willajta kusikunaykipaj, llajtaykiman willanaykipajtaj paykunapis kusiywan junt’asqas kanankupaj.

5 Imaraykuchus tiempo jamun, manataj ashkachu faltan, mayqempichus tukuy atiyniyoj Señorqa, pichus kamachin, pichus tukuy wiñaymanta karqa, wiñaypaj wiñayninkama kashantaj, payqa janaj pachamanta uraykonqa, runaspa wawasninkunejta purenqataj. Milagrosta ruwaspa, onqosqasta thañichispa, wañusqasta jatarichispa, suchusta purichispa, ciegosta rikuchispa, llojt’usta uyarichispa, tukuy imaymana onqoyta thañichispataj.

6 Paytaj qharqonqa supaykunata, mayqenkunachus sajra espiritus kanku, pikunachus runaspa wawasninkoj sonqosninkupi tiyakunku.

7 Paytaj tentacionesta muchonqa. Jinataj cuerpo nanayta, yarqhayta, ch’akichiskuyta, sayk’uytawan muchullanqataj. Runasmanta nisqaqa, payqa astawanraj muchonqa mana wañuspa. Uyariy, llajtampa juchallikusqanmanta, millayta ruwasqanmantawan payqa ancha phutiyniyoj kaspa anchata muchonqa, chayrayku yawarnin sut’umonqa sapa jumpínanmanta.

8 Paytaj Jesucristo sutichasqa kanqa, Diospa Wawan, janaj pachaj, kay pachajpawan Tatan, tukuy imata qallariymantapacha Ruwaj. Mamantaj Maria sutichasqa kanqa.

9 Paytaj jamonqa kajninkunaman, salvacion runaspa wawasninkuman jamunampaj, paypa sutimpi feniyoj kasqankunejta. Tukuy kaywampis, paykunaqa runalla kasqanta yuyanqanku, supayniyoj kasqanta nenqankutaj. Payta jasut’enqanku, cruzpi chakatanqankutaj.

10 Kinsa kaj p’unchaypitaj wañusqasmanta jatarimonqa. Qhawariy, imaraykuchus payqa sayarin tukuy mundota jazganampaj. Tukuy kaykuna ruwasqas kanqanku cheqa juicio runaspa wawasninkuman jamunampaj.

11 Paypa yawarnintaj allinyachin runaspa juchasninkuta, mayqenkunachus urmanku Adampa juchallikusqanrayku. Pikunachus wañunku mana yachaspa imatachus Dios munarqa ruwanankupaj, pikunatajchus mana yachaspa juchallikunku.

12 Chaywampis, ¡ay, ay chay runamanta, mayqenchus yachaspa Diospa contranta ruwan! Imaraykuchus salvacion payman mana jamunchu, mana Diosman kutirikojtenqa, manataj feniyoj kajtenqa Señor Jesucristopi chayqa.

13 Señor Diostaj profetasninta kachamun tukuy runaspa wawasninkuman, kaykunata willanakupaj tukuy aylluman, tukuy llajtaman, tukuy parlaymantaj. Chaynejta, pikunachus Jesucristo jamunanta creenku, kikinkoj juchasninku pampachasqa kanankupaj, kusikunankupajtaj ancha allin kusikuywan Jesus paykunaman jamunmanña karqa jinata.

14 Chaywampis Señor Dios rikorqa llajtan sinchi umayoj llajta kasqanta. Paykunamantaj leyta qorqa, Moisespa leynintapis.

15 Paytaj ashkha jamunanmanta señalesta, t’ukunasta, rijch’aykunasta, llanthustawan paykunaman rikucherqa. Llimphuchasqa profetastaj paykunaman jamunanmanta willarqanku. Chaywampis paykuna sonqosninkuta rumiyacherqanku, manataj entienderqankuchu Moisespa leynin mana ni imapaj kasqanta, Jesuspa yawarnimpa allinyachiynillanwan.

16 Jinataj juch’uy wawas juchallikuyta atinkuman karqa chayqa, mana salvakunkumanchu karqa. Ñoqataj qankunaman niykichis paykuna bendecisqa kasqankuta. Imayraykuchus Adanrayku, jiná kay kawsayraykutaj, urmanku, chaywampis Cristoj yawarnin juchasninkuta allinyachin.

17 Astawanraj niyki mana waj sutipis qosqachu kananta, manataj waj ñampis qosqachu kananta, mayqenejtachus runaspa wawasninku salvakuyta atinku. Tukuy atiyniyoj SeñÓr Cristoj sutinnejpi, sutinnejllatataj salvakuyta atinku.

18 Imaraykuchus payqa juzgan, juiciontaj cheqa. Juch’uy wawataj, mayqenchus wañun, payqa mana tukuchisqachu kanqa. Runastaj maldicionta ujyanku mana k’umuykuspa juch’uy wawas jinaman tukunankupaj. Creenankutaj tiyan salvacion kasqanta, kashasqantapis, jamunantapis Cristoj, tukuy atiyniyoj Señor, yawarnimpa allinyachisqanrayku.

19 Imaraykuchus mana Espiritupi kajqa Diospa enemigon. Ajinataj Adampa urmasqanmantapacha, jinataj kanqa siñaypaj wiñayninkama mana Santo Espiritoj munayninta kasuspaqa, manataj Espiritupi kajman tukuspaqa, Señor Cristoj allinyachisqannejta, allin kawsajman tukuspaqa. Paytaj wawa jinaman tukunan tiyan llamp’u sonqoyoj kaspa, k’umuykuspa, muchoj sonqoyoj kaspa, munakuywan junt’asqa kaspa, tukuy imatachus Señor payman qonman, chayta kasuspa, imaynamantachus uj wawa tatanta kasun, ajinallatataj.

20 Astawanraj niyki, tiempo jamonqa mayqempichus tukuy llajta, tukuy ayllu, tukuy parlay, tukuy runapis yachanqa Salvadormanta.

21 Chay p’unchay jamojtintaj mana pipis mana juchachasqachu kanqa Diospa ñawpaqempi. Juch’uy wawaslla mana juchachasqachu kanqanku Diosman kutirikuynejta, tukuy atiyniyoj Señorpa sutimpi feniyoj kaynejtataj.

22 Kay tiempopitaj, maypachachus qan yachachinki llajtaykiman imatachus Señor Dios kamachisunki, chaypacha mana mana juchayojchu kanqanku Diospa rikuynimpi, ñoqaj qanman parlasqayman jinalla.

23 Kunantaj parlarqani imatachus Dios kamachiwarqa parlanayta.

24 Jinataj nin Señor: Juzgana p’unchaypi paykuna sayarenqanku kay llajtaj contranta k’anchayniyoj willay jina. Chaymanta juzgasqa kanqanku sapa ujnin kaj ruwasqasninman jina allin kajtinkupis, sajra kajtinkupis.

25 Sajra ruwasqasniyoj kajtinkowa, paykunaman kikin juchallikusqasninku, millay kasqankutaj rikuchisqas kanqanku. Chaytaj paykunata Diospa ñawpaqenmanta ithirichenqa phutiyniyoj, wiñay jasut’iy lugarman, maymantachus manaña kutimuyta atinkuchu. Chayrayku juchachasqa kayta kikinkupaj ujyarqanku.

26 Chayrayku paykuna Diospa phiñaynin vasomanta ujyarqanku, mayqentachus justicia mana negayta aterqachu. Imaynamamtachus justiciaqa Adampa urmasqanta mana negayta aterqachu jark’asqa frutota mikhusqanrayku, kikillanta. Chayrayku khuyaynenqa mana jayk’ajpis paykunapaj kanqachu.

27 Jasut’iyninkutaj ninawan azufrewan lawraj qhocha jina kanqa, mayqempa lawrayninchus mana thasnukoj, mayqempa q’osñinchus wiñaypaj wiñayninkama wicharin. Ajinata Dios kamachiswarqa. Amen.