ປຈສ, ປະຖົມມະການ 48:5–11. ປຽບທຽບໃສ່ກັບ ປະຖົມມະການ 48:5–6
ເອຟະຣາອີມ ແລະ ມານາເຊ ໄດ້ກາຍເປັນເຜົ່າຂອງອິດສະຣາເອນ. ເຊັ່ນດຽວກັບໂຢເຊັບໃນສະໄໝບູຮານໄດ້ຊ່ວຍເຫລືອຊີວິດຄອບຄົວຂອງເພິ່ນທາງຮ່າງກາຍສັນໃດ, ລູກຫລານຂອງເພິ່ນຈະຊ່ວຍເຫລືອຊາວອິດສະຣາເອນທາງວິນຍານສັນນັ້ນ ໃນຍຸກສຸດທ້າຍ.
5 ແລະ ບັດນີ້, ກ່ຽວກັບລູກຊາຍສອງຄົນຂອງເຈົ້າ, ເອຟະຣາອີມ ແລະ ມານາເຊ, ຊຶ່ງໄດ້ເກີດນຳເຈົ້າໃນປະເທດເອຢິບ, ກ່ອນພໍ່ໄດ້ມາຫາເຈົ້າໃນເອຢິບ; ຈົ່ງເບິ່ງ, ພວກເຂົາເປັນຂອງພໍ່, ແລະ ພຣະເຈົ້າຂອງບັນພະບຸລຸດຂອງພໍ່ຈະອວຍພອນພວກເຂົາ; ແມ່ນແຕ່ເໝືອນດັ່ງ ຣູເບັນ ແລະ ຊີເມໂອນ, ພວກເຂົາຈະໄດ້ຮັບພອນ, ເພາະພວກເຂົາເປັນຂອງພໍ່; ດັ່ງນັ້ນພວກເຂົາຈຶ່ງຖືກເອີ້ນຕາມຊື່ຂອງພໍ່. (ສະນັ້ນ ພວກເຂົາຈຶ່ງຖືກເອີ້ນວ່າ ອິດສະຣາເອນ.)
6 ແລະ ຜູ້ສືບທອດຂອງເຈົ້າ ຊຶ່ງເຈົ້າຈະມີຫລັງຈາກນີ້, ຈະເປັນຂອງເຈົ້າ, ແລະ ຈະຖືກເອີ້ນຕາມຊື່ຂອງອ້າຍນ້ອງຂອງພວກເຂົາ ໃນມູນມໍລະດົກຂອງພວກເຂົາ, ໃນເຜົ່າທັງປວງ; ສະນັ້ນ ພວກເຂົາຈຶ່ງຖືກເອີ້ນວ່າ ເຜົ່າຂອງ ມານາເຊ ແລະ ຂອງເອຟະຣາອີມ.
7 ແລະ ຢາໂຄບໄດ້ກ່າວກັບໂຢເຊັບວ່າ, ເມື່ອພຣະເຈົ້າຂອງບັນພະບຸລຸດຂອງພໍ່ ໄດ້ມາປະກົດຕໍ່ພໍ່ທີ່ ລູເຊ,ໃນແຜ່ນດິນການາອານ; ພຣະອົງໄດ້ສັນຍາກັບພໍ່, ວ່າພຣະອົງຈະມອບແຜ່ນດິນນັ້ນໃຫ້ພໍ່ ແລະ ລູກຫລານຂອງພໍ່ ເພື່ອຄອບຄອງຕະຫລອດໄປເປັນນິດ.
8 ສະນັ້ນ, ໂອ້ ລູກຂອງພໍ່, ພຣະອົງໄດ້ອວຍພອນພໍ່ ໃນການລ້ຽງດູເຈົ້າໃຫ້ເປັນຜູ້ຮັບໃຊ້ຂອງພໍ່, ໃນການຊ່ວຍເຫລືອຄອບຄົວຂອງພໍ່ໃຫ້ພົ້ນຈາກຄວາມຕາຍ;
9 ໃນການປົດປ່ອຍຜູ້ຄົນຂອງພໍ່, ອ້າຍນ້ອງຂອງເຈົ້າ, ຈາກຄວາມອຶດຢາກທີ່ຮ້າຍແຮງໃນແຜ່ນດິນ; ດັ່ງນັ້ນ ພຣະເຈົ້າຂອງບັນພະບຸລຸດຂອງເຈົ້າ ຈະອວຍພອນເຈົ້າ, ແລະ ຜົນແອວຂອງເຈົ້າ, ເພື່ອພວກເຂົາຈະໄດ້ຮັບພອນຫລາຍກວ່າອ້າຍນ້ອງຂອງເຈົ້າ, ແລະ ຫລາຍກວ່າຄອບຄົວຂອງບິດາຂອງເຈົ້າ;
10 ເພາະເຈົ້າໄດ້ຮັບໄຊຊະນະແລ້ວ, ແລະ ບ້ານຂອງບິດາຂອງເຈົ້າໄດ້ກົ້ມຂາບເຈົ້າ, ແມ່ນແຕ່ດັ່ງທີ່ໄດ້ສະແດງແກ່ເຈົ້າ, ກ່ອນເຈົ້າໄດ້ຖືກຂາຍໄປປະເທດເອຢິບ ດ້ວຍນ້ຳມືຂອງພວກອ້າຍຂອງເຈົ້າ; ດັ່ງນັ້ນ ພວກອ້າຍຂອງເຈົ້າຈຶ່ງຈະກົ້ມຂາບເຈົ້າ, ຈາກລຸ້ນສູ່ລຸ້ນ, ກັບຜົນແອວຂອງເຈົ້າຕະຫລອດການ;
11 ເພາະເຈົ້າຈະເປັນແສງສະຫວ່າງແກ່ຜູ້ຄົນຂອງພໍ່, ເພື່ອປົດປ່ອຍພວກເຂົາໃນວັນແຫ່ງການເປັນຊະເລີຍ, ຈາກຄວາມເປັນທາດ; ແລະ ເພື່ອນຳຄວາມລອດກັບມາໃຫ້ພວກເຂົາ, ເມື່ອພວກເຂົາກົ້ມຂາບຢູ່ໃຕ້ບາບ.