ປຈສ, ມາຣະໂກ 14:20–26. ປຽບທຽບໃສ່ກັບ ມາຣະໂກ 14:22–25
ພຣະເຢຊູຈັດຕັ້ງສິນລະລຶກ ໃນການລະນຶກເຖິງພຣະກາຍ ແລະ ໂລຫິດຂອງພຣະອົງ.
20 ແລະ ໃນຂະນະທີ່ເຂົາເຈົ້າຮັບປະທານອາຫານ, ພຣະເຢຊູໄດ້ຢິບເອົາເຂົ້າຈີ່ຂຶ້ນມາ ແລະ ອວຍພອນມັນ, ແລະ ຫັກມັນເປັນປ່ຽງໆ, ແລະ ມອບມັນໃຫ້ເຂົາເຈົ້າ, ແລະ ກ່າວວ່າ ຈົ່ງຮັບເອົາ, ແລະ ກິນມັນ.
21 ຈົ່ງເບິ່ງ, ໃຫ້ພວກເຈົ້າເຮັດສິ່ງນີ້ ໃນການລະນຶກເຖິງເນື້ອກາຍຂອງເຮົາ; ເພາະເມື່ອພວກເຈົ້າເຮັດສິ່ງນີ້ເລື້ອຍເທົ່າໃດ ພວກເຈົ້າຈະຈື່ຈຳຊົ່ວໂມງນີ້ ທີ່ເຮົາໄດ້ຢູ່ກັບພວກເຈົ້າ.
22 ແລະ ພຣະອົງໄດ້ຍົກຈອກຂຶ້ນ, ແລະ ເມື່ອພຣະອົງໄດ້ຂອບພຣະໄທແລ້ວ, ພຣະອົງໄດ້ຍື່ນມັນໃຫ້ເຂົາເຈົ້າ; ແລະ ເຂົາເຈົ້າໄດ້ດື່ມຈາກຈອກນັ້ນ.
23 ແລະ ພຣະອົງໄດ້ກ່າວກັບເຂົາເຈົ້າວ່າ ນີ້ເປັນການລະນຶກເຖິງເລືອດຂອງເຮົາ ຊຶ່ງເຮົາໄດ້ຫລັ່ງເພື່ອຫລາຍຄົນ, ແລະ ພັນທະສັນຍາໃໝ່ຊຶ່ງເຮົາມອບໃຫ້ພວກເຈົ້າ; ເພາະພວກເຈົ້າຈະເປັນພະຍານເຖິງເຮົາຕໍ່ທົ່ວໂລກ.
24 ແລະ ເມື່ອພວກເຈົ້າເຮັດພິທີການນີ້ເລື້ອຍເທົ່າໃດ, ພວກເຈົ້າຈະຈື່ຈຳຊົ່ວໂມງນີ້ ທີ່ເຮົາໄດ້ຢູ່ກັບພວກເຈົ້າ ແລະ ໄດ້ດື່ມກັບພວກເຈົ້າຈາກຈອກນີ້, ແມ່ນແຕ່ຄັ້ງສຸດທ້າຍໃນການປະຕິບັດສາດສະໜາກິດຂອງເຮົາ.
25 ແທ້ຈິງແລ້ວ ເຮົາກ່າວກັບພວກເຈົ້າວ່າ ພວກເຈົ້າຈະເປັນພະຍານເຖິງເລື່ອງນີ້; ເພາະເຮົາຈະບໍ່ດື່ມຜົນຂອງອະງຸ່ນກັບພວກເຈົ້າອີກ, ຈົນກວ່າເຖິງວັນນັ້ນ ວັນທີ່ເຮົາຈະດື່ມຜົນໃໝ່ໃນອານາຈັກຂອງພຣະເຈົ້າ.
26 ແລະ ບັດນີ້ ເຂົາເຈົ້າໄດ້ໂສກເສົ້າ, ແລະ ໄດ້ຮ້ອງໄຫ້ນຳພຣະອົງ.
ປຈສ, ມາຣະໂກ 14:36–38. ປຽບທຽບໃສ່ກັບ ມາຣະໂກ 14:32–34
ຢູ່ເຄັດເຊມາເນ, ແມ່ນແຕ່ອັກຄະສາວົກສິບສອງ ບໍ່ເຂົ້າໃຈຄັກແນ່ເຖິງບົດບາດຂອງຂອງພຣະຄຣິດ ໃນຖານະເປັນພຣະເມຊີອາ.
36 ແລະ ເຂົາເຈົ້າໄດ້ມາເຖິງສະຖານທີ່ແຫ່ງໜຶ່ງ ທີ່ເອີ້ນວ່າ ເຄັດເຊມາເນ, ຊຶ່ງເປັນສວນ; ແລະ ສານຸສິດໄດ້ເລີ່ມກັງວົນໃຈຢ່າງໜັກ, ແລະ ໜັກໃຈຫລາຍ, ແລະ ເລີ່ມຈົ່ມຢູ່ໃນໃຈ, ສົງໄສວ່າ ນີ້ຄືພຣະເມຊີອາຫລືບໍ່.
37 ແລະ ພຣະເຢຊູ ໂດຍທີ່ຮູ້ຈັກເຖິງຄວາມໃນໃຈຂອງເຂົາເຈົ້າ, ໄດ້ກ່າວກັບສານຸສິດວ່າ ຈົ່ງນັ່ງຢູ່ບ່ອນນີ້, ໃນຂະນະທີ່ເຮົາອະທິຖານ.
38 ແລະ ພຣະອົງໄດ້ພາເປໂຕ, ແລະ ຢາໂກໂບ, ແລະ ໂຢຮັນ ໄປກັບພຣະອົງ, ແລະ ພຣະອົງໄດ້ຕິຕຽນເຂົາເຈົ້າ, ແລະ ໄດ້ກ່າວກັບເຂົາເຈົ້າວ່າ ຈິດວິນຍານຂອງເຮົາໂສກເສົ້າຫລາຍ, ແມ່ນແຕ່ຈົນເຖິງຕາຍ; ໃຫ້ພວກເຈົ້າລໍຖ້າຢູ່ນີ້ ແລະ ຄອຍເຝົ້າລະວັງ.