ປຈສ, ມັດທາຍ 3:4–6. ປຽບທຽບໃສ່ກັບ ມັດທາຍ 2:4–6
ສາດສະດາໄດ້ບອກລ່ວງໜ້າວ່າ ເບັດເລເຮັມຈະເປັນສະຖານທີ່ເກີດຂອງພຣະເມຊີອາ.
4 ແລະ ເມື່ອເພິ່ນໄດ້ເອີ້ນພວກຫົວໜ້າປະໂລຫິດ, ແລະ ພວກທຳມະຈານທັງໝົດມາເຕົ້າໂຮມກັນ, ແລ້ວເພິ່ນກໍໄດ້ຖາມພວກເຂົາວ່າ, ສະຖານທີ່ ຊຶ່ງໄດ້ຖືກຂຽນໄວ້ໂດຍສາດສະດາ, ບ່ອນທີ່ພຣະຄຣິດຈະມາເກີດນັ້ນ ຢູ່ທີ່ໃດ? ເພາະເພິ່ນມີຄວາມຢ້ານກົວຫລາຍ, ແຕ່ເພິ່ນບໍ່ເຊື່ອຖ້ອຍຄຳຂອງສາດສະດາ.
5 ແລະ ພວກເຂົາໄດ້ຕອບເພິ່ນວ່າ, ມີຂຽນໄວ້ໂດຍສາດສະດາ, ວ່າພຣະອົງຈະເກີດຢູ່ໃນເມືອງເບັດເລເຮັມ ແຂວງຢູດາຍ, ເພາະພວກເພິ່ນໄດ້ກ່າວດັ່ງນັ້ນ,
6 ພຣະຄຳຂອງພຣະຜູ້ເປັນເຈົ້າໄດ້ມາເຖິງເຮົາ, ກ່າວວ່າ, ແລະ ເບັດເລເຮັມ ຊຶ່ງຕັ້ງຢູ່ໃນດິນແດນຢູດາຍເອີຍ, ໂດຍທາງເຈົ້າ ກຸມມານນ້ອຍຈະເກີດມາ, ຊຶ່ງ ເຈົ້າກໍບໍ່ແມ່ນຜູ້ເລັກນ້ອຍທີ່ສຸດ ໃນບັນດາເມືອງໃຫຍ່ໆຂອງຢູດາຍ; ເພາະພຣະເມຊີອາຈະມາຈາກເຈົ້າ, ຜູ້ຈະໂຜດຊາວອິດສະຣາເອນ ຜູ້ຄົນຂອງເຮົາ.
ປຈສ, ມັດທາຍ 3:24–26. ປຽບທຽບໃສ່ກັບ ມັດທາຍ 2:23
ພຣະເຢຊູເຕີບໂຕຂຶ້ນ ແລະ ເຝົ້າລໍພຣະຜູ້ເປັນເຈົ້າ ກ່ອນເລີ່ມຕົ້ນການປະຕິບັດສາດສະໜາກິດຂອງພຣະອົງ.
24 ແລະ ເຫດການໄດ້ບັງເກີດຂຶ້ນຄື ພຣະເຢຊູໄດ້ເຕີບໂຕຂຶ້ນ ພ້ອມກັບພີ່ນ້ອງຂອງພຣະອົງ, ແລະ ເຂັ້ມແຂງ, ແລະ ເຝົ້າລໍພຣະຜູ້ເປັນເຈົ້າ ສຳລັບເວລາຂອງການປະຕິບັດສາດສະໜາກິດຂອງພຣະອົງ ຈະມາເຖິງ.
25 ແລະ ພຣະອົງໄດ້ຮັບໃຊ້ພາຍໃຕ້ພຣະບິດາຂອງພຣະອົງ, ແລະ ພຣະອົງບໍ່ໄດ້ກ່າວດັ່ງມະນຸດຄົນອື່ນໆ, ທັງພຣະອົງບໍ່ສາມາດຮັບການສິດສອນໄດ້; ເພາະພຣະອົງບໍ່ຈຳເປັນໃຫ້ມະນຸດຄົນໃດມາສອນພຣະອົງ.
26 ແລະ ຫລັງຈາກຫລາຍປີຜ່ານໄປ, ເວລາແຫ່ງການປະຕິບັດສາດສະໜາກິດຂອງພຣະອົງກໍໃກ້ຈະມາເຖິງແລ້ວ.
ປຈສ, ມັດທາຍ 3:34–36. ປຽບທຽບໃສ່ກັບ ມັດທາຍ 3:8–9
ຜູ້ທີ່ໄດ້ປະຕິເສດຂ່າວສານຂອງໂຢຮັນ ບັບຕິສະໂຕ ໄດ້ປະຕິເສດພຣະຄຣິດ. ພຣະເຈົ້າສາມາດເຮັດໃຫ້ຜູ້ທີ່ບໍ່ໄດ້ເປັນຊາວອິດສະຣາເອນ ເປັນຜູ້ຄົນແຫ່ງພັນທະສັນຍາໄດ້.
34 ດ້ວຍເຫດໃດ ເຈົ້າຈຶ່ງບໍ່ຮັບເອົາຄຳສັ່ງສອນຂອງຜູ້ທີ່ພຣະເຈົ້າໄດ້ສົ່ງມາ? ຖ້າຫາກເຈົ້າບໍ່ຮັບເອົາສິ່ງນີ້ໄວ້ໃນໃຈ, ເຈົ້າກໍບໍ່ໄດ້ຮັບເອົາເຮົາ; ແລະ ຖ້າຫາກເຈົ້າບໍ່ໄດ້ຮັບເອົາເຮົາ, ເຈົ້າກໍບໍ່ໄດ້ຮັບເອົາຄົນທີ່ເຮົາໄດ້ສົ່ງໄປໃຫ້ຖ້ອຍຄຳ; ແລະ ເປັນເພາະຄວາມຜິດບາບຂອງເຈົ້າ, ເຈົ້າຈຶ່ງບໍ່ມີເສື້ອຊັ້ນນອກ.
35 ສະນັ້ນ, ຈົ່ງກັບໃຈ, ແລະ ເຮັດໃຫ້ໄດ້ຜົນສົມກັບວ່າ ພວກເຈົ້າໄດ້ກັບໃຈ;
36 ແລະ ຢ່າຄິດໃນໃຈວ່າ, ພວກເຮົາເປັນລູກຫລານຂອງອັບຣາຮາມ, ແລະ ພວກເຮົາເທົ່ານັ້ນທີ່ມີອຳນາດທີ່ຈະນຳລູກຫລານມາໃຫ້ອັບຣາຮາມ ບັນພະບຸລຸດຂອງພວກເຮົາ; ເພາະຂ້າພະເຈົ້າກ່າວກັບພວກເຈົ້າວ່າ ພຣະເຈົ້າສາມາດບັນດານໃຫ້ກ້ອນຫີນເຫລົ່ານີ້ເປັນລູກຫລານຂອງອັບຣາຮາມໄດ້.
ປຈສ, ມັດທາຍ 3:38–40. ປຽບທຽບໃສ່ກັບ ມັດທາຍ 3:11–12
ໂຢຮັນບັບຕິສະໂຕ ເປັນພະຍານວ່າ ພຣະເຢຊູມີອຳນາດທີ່ຈະໃຫ້ບັບຕິສະມາດ້ວຍພຣະວິນຍານບໍລິສຸດ ແລະ ດ້ວຍໄຟ.
38 ຂ້າພະເຈົ້າໃຫ້ບັບຕິສະມາພວກເຈົ້າດ້ວຍນ້ຳ, ຕາມ ການກັບໃຈຂອງພວກເຈົ້າ; ແລະ ເມື່ອຜູ້ທີ່ຂ້າພະເຈົ້າໄດ້ກ່າວເປັນພະຍານສະເດັດມາ, ຜູ້ທີ່ ມີລິດເດດກວ່າຂ້າພະເຈົ້າ, ຊຶ່ງຂ້າພະເຈົ້າບໍ່ສົມຄວນຈະຈັບແມ່ນແຕ່ເກີບຂອງພຣະອົງ, (ຫລື ຜູ້ມີຕຳແໜ່ງທີ່ຂ້າພະເຈົ້າບໍ່ສາມາດເຮັດແທນໄດ້,) ດັ່ງທີ່ຂ້າພະເຈົ້າໄດ້ກ່າວມານັ້ນ, ຂ້າພະເຈົ້າໃຫ້ບັບຕິສະມາພວກເຈົ້າກ່ອນພຣະອົງຈະສະເດັດມາແທ້ໆ, ວ່າເມື່ອພຣະອົງສະເດັດມາ ພຣະອົງຈະ ໃຫ້ພວກເຈົ້າຮັບບັບຕິສະມາດ້ວຍພຣະວິນຍານບໍລິສຸດ ແລະ ດ້ວຍໄຟ.
39 ແລະ ພຣະອົງເປັນຜູ້ທີ່ຂ້າພະເຈົ້າຈະກ່າວເປັນພະຍານ, ຊຶ່ງພຣະຫັດຂອງພຣະອົງຈະຖືກະດົ້ງຝັດເຂົ້າ, ແລະ ພຣະອົງຈະເຮັດລານເຂົ້າໃຫ້ກ້ຽງດີ, ແລະ ຮວບຮວມເອົາເຂົ້າເມັດດີໄວ້ໃນເລົ້າ; ແຕ່ ໃນຄວາມສົມບູນແຫ່ງເວລາຂອງພຣະອົງເອງ, ພຣະອົງຈະເຜົາເຂົ້າເມັດລີບດ້ວຍໄຟທີ່ໄໝ້ຢູ່ຕະຫລອດໄປ.
40 ດັ່ງນັ້ນ ໂຢຮັນຈຶ່ງໄດ້ມາ, ໄດ້ສັ່ງສອນ ແລະ ໃຫ້ບັບຕິສະມາ ຢູ່ໃນແມ່ນ້ຳຈໍແດນ; ໄດ້ກ່າວເປັນພະຍານ, ວ່າຜູ້ທີ່ຈະສະເດັດມາພາຍຫລັງເພິ່ນ ມີອຳນາດທີ່ຈະໃຫ້ບັບຕິສະມາດ້ວຍພຣະວິນຍານບໍລິສຸດ ແລະ ດ້ວຍໄຟ.
ປຈສ, ມັດທາຍ 3:43–46. ປຽບທຽບໃສ່ກັບ ມັດທາຍ 3:15–17
ໂຢຮັນໃຫ້ບັບຕິສະມາແກ່ພຣະເຢຊູໂດຍການລົງໄປໃນນ້ຳໝົດທັງຕົວ, ເຫັນພຣະວິນຍານບໍລິສຸດເໝືອນດັ່ງນົກເຂົາລົງມາ, ແລະ ໄດ້ຍິນສຸລະສຽງຂອງພຣະບິດາ.
43 ແລະ ພຣະເຢຊູ, ໄດ້ຕອບລາວວ່າ, ຈົ່ງຍອມໃຫ້ເຮົາຮັບບັບຕິສະມາຈາກເຈົ້າ, ເພາະດ້ວຍເຫດນີ້ ພວກເຮົາຈຶ່ງເຮັດໃຫ້ຄວາມຊອບທຳທັງໝົດສຳເລັດ. ແລ້ວລາວຈຶ່ງຍອມຕໍ່ພຣະອົງ.
44 ແລະ ໂຢຮັນໄດ້ລົງໄປຢືນຢູ່ໃນນ້ຳ ແລະ ໃຫ້ບັບຕິສະມາແກ່ພຣະອົງ.
45 ແລະ ເມື່ອພຣະເຢຊູໄດ້ຮັບບັບຕິສະມາແລ້ວ, ກໍໄດ້ຂຶ້ນຈາກນ້ຳທັນທີ; ແລະ ໂຢຮັນໄດ້ເຫັນ, ແລະ ແລ້ວ, ສະຫວັນໄດ້ເປີດອອກແກ່ລາວ, ແລະ ລາວໄດ້ເຫັນພຣະວິນຍານຂອງພຣະເຈົ້າເໝືອນດັ່ງນົກເຂົາ ລົງມາຢູ່ເທິງພຣະເຢຊູ.
46 ແລະ ແລ້ວ, ລາວໄດ້ຍິນສຽງຈາກສະຫວັນ, ກ່າວວ່າ, ທ່ານຜູ້ນີ້ເປັນບຸດທີ່ຮັກຂອງເຮົາ, ຜູ້ເຮົາພໍໃຈຫລາຍ. ຈົ່ງຟັງທ່ານ.